İqtisadi, həm də sosial baxımdan sərfəli layihə
İtaliyanın
"Daniele” şirkəti ilə "Baku Steel Company” arasında ölkəmizdə dəyəri 1,225
mlrd. avro olan kompleksinin inşasına dair saziş imzalanıb. "Kompleks dəmir
konsentratı, hazır dəmir istehsalını nəzərdə tutan 5 zavodu əhatə edəcək.
Kompleks növbəti 3 il ərzində inşa olunaraq istifadəyə veriləcək. Tikinti
dövründə 4 min nəfər işlə təmin olunacaq və tikintidən sonra 1200 yeni iş
yerinin yaradılmasına imkanı yaranacaq. Kompleks tamamilə rəqəmsal bir istehsal
olacaq. Məhsullar öz keyfiyyəti ilə seçiləcək və beynəlxalq standartlara cavab
verəcək.
Kompleksin
inşası yekunlaşdırıldıqdan sonra ölkə illik 500 mln. dollara qənaət edəcək.
Kompleks xammaldan tutmuş hazır məhsula qədər olan prosesi əhatə edəcək.
Kompleksin inşasından sonra həmin Azərbaycandakı müvafiq zavodlar da xammala
olan tələbatını yerli valyuta ilə elə Azərbaycandan alacaq.
Valyuta axınının qarşısı alınacaq
Kompleksin
Azərbaycan iqtisadiyyatına verəcəyi töhfələrdən danışan millət vəkili Vahid Əhmədov deyir ki, bu layihə xaricdən
asılılığımızı aradan qaldıracaq və ixracı genişləndirməyimizə səbəb olacaq:
"Xaricə metallurgiya məhsulu ixrac etməklə həm ixrac potensialımız artacaq, ölkəyə
valyuta daxil olacaq, həm də daxili tələbatımızın qarşılanmasına yardım edəcək
və bununla da ölkədən gedən valyuta axınının qarşısı alınacaq. Hazırda xaricdən
idxal etdiyimiz məhsulları 3 il sonra artıq öz valyutamızla daxildən ala biləcəyik.
Bu baxımdan, sözügedən kompleksin tikilməsi iqtisadiyyatımız üçün çox böyük əhəmiyyət
kəsb edir”.
Kompleks
fəaliyyətə düşəndən sonra ölkədəki ehtiyatların xammal üçün kifayət edib etməməsinə
gəlincə, V.Əhmədov deyir ki, onsuz da heç bir ölkədə elə bir hal yoxdur ki,
xammalın hamısını ölkə özü təmin etsin: "Müəyyən komponentləri ola bilsin,
xaricdən gətirsinlər. Amma əsas filiz yataqlarıdır, o da Azərbaycanda var.
Bilirsiniz ki, Sumqayıtda heç bir problem olmadan Boru Prokatı Zavodu fəaliyyət
göstərirdi. İndi isə modernləşdirilmiş texnologiyaya uyğun zavod tikiləcək.
Tikinti zamanı burada minlərlə insanın işləməsi, tikintidən sonra 1200 nəfərin
çalışması işsizliyin aradan qaldırılması baxımından da böyük uğurdur”.
Bazarda qiymətlər düşəcək
İqtisadçı ekspert Arzu Qafarlı hesab edir ki, İtaliyanın "Daniele” şirkəti ilə "Baku Steel
Company” arasında ölkədə dəyəri 1,225 mlrd. avro olan kompleksinin inşasına
dair saziş imzalanması Azərbaycan üçün həm iqtisadi, həm də sosial baxımdan sərfəlidir:
"İqtisadi baxımdan onu qeyd etmək olar ki, ölkəyə xarici valyuta axını olacaq,
valyuta ixracının isə qarşısını alacaq. Bu layihə baş tutduqdan sonra, bazarda
bu növ məhsulların qiymətləri qaneedici olacaq. Çünki zavodlar xammala olan tələbatını
yerli valyuta ilə aparacaq. Danılmazdır ki, bu gün ölkəmizdə fəaliyyət göstərən
müəssisələrin xammalı xarici bazarlardan alması, bazarda qiymətlərin yüksək
olmasına gətirib çıxardır”.
Layihənin
sosial baxımdan ölkəmizə hansı müsbət təsirlərinə gəlincə, A.Qafarlının fikrincə,
minlərlə insanın işlə təmin olunması minlərlə ailənin dolanışığı deməkdir: "Onu
da qeyd edim ki, bu sahədə bizdə təcrübə olduğundan peşəkar kadrlarımız da çoxdur”.
İqtisadçı Rəşad Həsənov da düşünür ki, yeni iş yerlərinin açılması
baxımından çox uğurlu layihədir: "Amma bilmirəm, xammal baxımından ölkədəki
resurslar zavodun fəaliyyəti üçün kifayət edəcək, ya yox. Çünki layihəyə kifayət
qədər böyük yatırım qoyulur. Ümumiyyətlə, neft ölkələri ağır sənayeyə həmişə
üstünlük verir. Biz də neft ölkəsi kimi bu ənənəni davam etdiririk. Ümid edirəm
ki, layihədən iqtisadiyyatımız qazanacaq”.
"Güclü iqtisadiyyatlar ağır sənayelər üzərində
formalaşır”
İqtisadçı Qadir İbrahimli deyir ki, sənayenin inkişafı iqtisadiyyatın
inkişafına həmişə stimuldur: "Güclü iqtisadiyyatlar yüngül sənaye əsasında
deyil, həmişə ağır sənayelər üzərində formalaşır. Düşünürəm ki, bütün hallarda
sözügedən kompleksin iqtisadiyyatımıza təsiri pozitiv olacaq. Bu kimi istehsal
müəssisələrinin formalaşması Azərbaycanın gələcəkdə ixracat potensialına da öz
töhfəsini verəcək. Ümumiyyətlə, Azərbaycanda hər hansı istehsal müəssisələrinin
yaradılmasını dəstəkləyirəm. Burada təkcə həmin müəssisələrdə işləyən insanlar
deyil, törəmə müəssisələr də faydalanacaq. Törəmə müəssisələr artıq Azərbaycanda
fəaliyyət göstərən zavoda ehtiyat hissələri və s. məhsullar sifariş edəcəklər.
Beləliklə, bu əmək tutumlu sahələr məşğulluq probleminin həllinə də öz töhfəsini
verəcək”.
Lalə