Çikaqoda Birinci İllinoys - Azərbaycan Kənd Təsərrüfatı Forumu keçiriləcək
ABŞ - Azərbaycan
Ticarət Palatası (USACC) və İllinoys Ticarət Palatasının birgə təşkilatçılığı
ilə bu ilin 4-5 aprel tarixlərində ABŞ-ın aparıcı maliyyə və ticarət mərkəzlərindən
olan Çikaqo şəhərində Birinci İllinoys - Azərbaycan Kənd Təsərrüfatı Forumu
keçiriləcək.
Forumun
məqsədi həm Azərbaycanda, həm də ABŞ-ın nəhəng kənd təsərrüfatı ştatlarından
olan İllinoys ştatında fəaliyyət göstərən kənd təsərrüfatı bizneslərini bir
araya gətirməklə tərəflər arasında aqrar sahədə əməkdaşlığın yaradılması, məhsuldarlığın
artırılması ilə bağlı ABŞ istehsalı olan texnologiyalarla, eləcə də kənd təsərrüfatının
müxtəlif sahələrində tətbiq olunan yeni metodlarla tanışlıqdır.
Forum çərçivəsində
Azərbaycanda kənd təsərrüfatı sahəsində çalışan şirkətlərdən ibarət İllinoys
ştatına ticarət missiyasınıntəşkili nəzərdə tutulur. Bütün maraqlı fiziki və
hüquqi şəxslər https://www.agroforum.us/ saytında forumun proqramı ilə tanış ola bilər və
qeydiyyatdan keçməklə ticarət missiyasına qoşula bilərlər.
İki
günlük proqram çərçivəsində Azərbaycan şirkətlərinin İllinoys ştatının aparıcı
istehsal müəssisələri, ferma və tədqiqat mərkəzlərinə, eləcə də gübrə və
protein istehsalı sahələrinə səfərlərinin təşkili nəzərdə tutulur.
Forum Azərbaycan
Respublikasının Kənd Təsərrüfatı Nazirliyi, Azərbaycan Respublikasının ABŞ-dakı
Səfirliyi, ABŞ-ın Azərbaycan Respublikasındakı Səfirliyi, ABŞ-ın Beynəlxalq
İnkişaf Agentliyi (USAID), İllinoys ştatının Kənd Təsərrüfatı Departamenti, Azərbaycanda
Amerika Ticarət Palatası (AmCham), Avropa Yenidənqurma və İnkişaf Bankı, CNFA,
GlobalChamber, JohnDeere və Dentons şirkətlərinin tərəfdaşlığı və BrandBuild
şirkətinin media tərəfdaşlığı ilə təşkil olunur.
Azərbaycan Dövlət İnformasiya Agentliyi- AZƏRTAC forumun əsas informasiya təminatçısıdır.
Birinci
İllinoys - Azərbaycan Kənd Təsərrüfatı Forumu ABŞ - Azərbaycan Ticarət Palatasının
Azərbaycanın ABŞ ştatları ilə biznes və ticarət əlaqələrinin genişləndirilməsi
proqramı çərçivəsində təşkil edilir.
Qeyd edək
ki, İllinoys ştatı ABŞ-ın aparıcı 10 kənd təsərrüfatı ştatları sırasındadır.
Ştatın torpaq ərazisinin 75 faizini əkin sahələri təşkil edir. Ştatın yalnız kənd
təsərrüfatı məhsullarının satışından illik gəliri 19 mlrd ABŞ dolları həcmindədir.