Elektromobillərin ƏDV-dən azad olunması müsbət qarşılanır
Ölkə prezidentinin təsdiqlədiyi və 2019-cu ildən
qüvvəyə minəcək Vergi Məcəlləsinə dəyişikliklərdə bir neçə maraqlı məqam var.
Oxu.Azxəbər verir ki, ƏDV-nin differensiallaşması ilə bağlı artıq ilk
addım atılıb və elektriklə işləyən avtomobillər ƏDV-dən azad olunub.Belə
ki, millət vəkiliTahir Mirkişlinin verdiyi məlumata görə, 2019-cu ildən
etibarən Azərbaycana elektrik avtomobillərinin idxalı ƏDV-dən azad edilib.
Bununla yanaşı, elektrik avtomobili idxal edərkən indi yalnız avtomobilin
dəyərinin 15 faizi həcmində rüsum ödəmək lazım olacaq.
Bəs görəsən qərar maşın bazarına necə təsir edəcək?
Ümumiyyətlə, elektromobillərin ƏDV-dən azad olunması qərarı ölkəmizdə onlara
olan marağı artıra bilərmi?
"Sirena Motors”un
marketinq departamentinin rəhbəri Eyyub Əliyev deyir ki, qərar qiymətlərin az da olsa ucuzlaşmasına səbəb
ola bilər: "Azərbaycan neft ölkəsi olduğuna görə, bu günə kimi elektromobillərə
maraq bir o qədər yüksək olmayıb. Amma şirkət olaraq biz də 2020-ci ildən sonra ölkəyə elektromobil
gətirmək haqqında düşünürük. Çünki elektriklə işləyən maşınlar ekologiyanın
qorunması baxımından çox vacibdir. Elektrik avtomobillərinin ƏDV-dən azad
olunması bu mənada çox müsbət haldır. Düşünürəm ki, bu qərar elektromobillərin
qiymətinə də müəyyən mənada təsir edəcək. Hal-hazırda bu nəqliyyat
vasitələrinin qiyməti çox bahadır. Onları ölkəyə gətirmək özü böyük xərc tələb
edir. Ən aşağı parametrlərə malik olan elektromobillərin qiyməti təxminən 60
min manata yaxındır. Əslində, bu qiymətin yarısına yanacaqla işləyən başqa
avtomobil almaq mümkündür. Qiymətlərin bu qədər baha olmasının əsas
səbəblərindən biri də gömrük rüsumlarının çox yüksək olmasıdır. İndi
elektromobillərin ƏDV-dən azad olunması haqqında qərar elektromobillərin
qiymətinin nisbətən ucuzlaşmasına səbəb ola bilər. Hesab edirəm ki, qiymətlər təqribən
20-25 faizə qədər aşağı düşə bilər. Amma ümumilikdə maşın bazarında elektromobillərə
birdən-birə marağın artacağını da gözləmək olmaz. Çünki qeyd etdiyim kimi, hazırda
bir elektromobilin qiymətinə iki yanacaqla işləyən avtomobil almaq mümkündür.
İnsanlar düşünür ki, bu qədər baha qiymətə maşın almağa dəyməz. Adətən elektriklə
çalışan nəqliyyat vasitələrinə dünyagörüşü yüksək olan insanlar üstünlük verir.
Düşünürəm ki, müəyyən bir müddətdən sonra elektromobillər bazarda öz yerini
tuta biləcək. Gələcəkdə maşın almaq istəyənlərin 30-35 faizi elektromobillərə
üstünlük verəcək. Bunun üçün isə bir qədər vaxt lazımdır”.
İqtisadçı-ekspert Vüqar
Bayramov deyir ki, belə
bir qərarın verilməsi müsbət hal kimi qiymətləndirilməlidir: "Qərarın
Azərbaycana elektromobillərin gətirilməsini təşviq edəcəyini düşünürəm. Çünki
bu qərar ölkəyə benzinlə deyil, elektriklə işləyən nəqliyyat vasitələrinin
gətirilməsini təşviq etmək məqsədilə verilib. Məqsəd bu sahədə stimullaşdırıcı
tədbirləri artırmaqdır. Amma yaxın zamanlarda Azərbaycana gətirilən
elektromobillərin sayının kəskin artacağını gözləmək olmaz. Çünki ölkəmizdə
elektrik avtomobillərinin xidməti hələlik tam formalaşmayıb. Elektromobilləri
ölkəyə idxal etmək mümkün olsa da, hələlik onların regionlarda servis
mərkəzləri yoxdur. Eyni zamanda, ölkəmizdə elektrik avtomobillərdən istifadə
ənənəsi də formalaşmayıb. Bütün bunları nəzərə alsaq demək olar ki, elektromobillərin
ƏDV-dən azad olunması haqda verilən qərar müsbət məqamdır. Gələcəkdə
elektromobillərə marağın artması proqnoz edilir. Bu mənada bu tip
avtomobillərin ölkəmizə gətirilməsi daha da sürətlənə bilər. Amma qısa müddət
ərzində Azərbaycan avtomobil parkında elektriklə işləyən avtomobillərin sayının
kəskin artacağını söyləmək düzgün olmaz. Hesab etmirəm ki, bu qərar ümumi
qiymətlərə bu və ya digər dərəcədə təsir etsin. Qeyd etdiyim kimi, Azərbaycanda
bu tip avtomobillərin sayı çox deyil”.
Millət vəkili Azər
Badamov söylədi ki, bu qərar dünyada gedən proseslərin bir
tərkib hissəsidir: "Hal-hazırda ekologiyanı qorumaq ən böyük məsələlərdən
biridir. Bu mənada elektrik avtomobillərin istehsalı və istifadəsinə böyük önəm
verilir. Artıq Avropada yanacaqla işləyən avtomobillərə qadağa qoyulacağı haqda
xəbərlər var. Gələcəkdə elektromobillərə keçidlə bağlı indidən ciddi addımlar
atılır. Belə bir şəraitdə Azərbaycanın Vergi Məcəlləsinə edilən bu dəyişiklik
vaxtında atılan addım kimi qiymətləndirilə bilər. Elektromobillərin ƏDV-dən azad
edilməsi və onların idxal rüsumlarına müəyyən güzəştlərin tətbiq edilməsi
Azərbaycanın ekologiyanın qorunmasında maraqlı olduğunu göstərir. Bildiyiniz
kimi, yanacaqla işləyən avtomobillər ekologiyanın ən böyük düşmənlərindən hesab
olunur. Atmosferdə zəhərli qazların çoxalması adekvat addımların atılmasını
tələb edir. Hesab edirəm ki, elektromobillərin ƏDV-dən azad edilməsi maşın
bazarında da yeni tendensiya formalaşdıracaq. Çünki elektrik avtomobillərinin
vergidən azad olunması və onların idxal rüsumlarına müəyyən güzəştlər tətbiq edilməsi
onların daha ucuz qiymətə idxal olunmasına şərait yaradacaq. Ümumilikdə
götürdükdə, elektromobillərdən istifadə vətəndaşlar üçün daha səmərəlidir.
Çünki yanacaq xərcləri azalacaq. Bu mənada verilən qərarı bir millət vəkili və
vətəndaş olaraq çox yüksək qiymətləndirirəm”.
Şəbnəm Mehdizadə