Yanvarın 31-də Bakı Slavyan Universitetində
ERASMUS+ PETRA (Azərbaycan universitetlərində tədrisin və təlimin təkmilləşdirilməsi)
layihəsi çərçivəsində yaradılan təlim-tədris
mərkəzinin açılışı olub. Açılışda elm və təhsil adamları, təhsil ekspertləri və
media nümayəndələri iştirak edib.
Tədbirdə çıxış edən BSU-nun
rektoru, professor Nurlana Əliyeva bildirdi ki, Azərbaycanın qabaqcıl universitetlərində
dünya təhsil sisteminə, xüsusən də Avropa təhsil məkanına inteqrasiya, tədris
prosesinin qabaqcıl təcrübədən faydalanmaqla təkmilləşdirilməsi məqsədilə bir
sıra uğurlu layihələr həyata keçirilir: "Bakı Slavyan Universitetində hal
hazırda həyata keçirilən belə layihələrdən biri də ERASMUS+ PETRA layihəsidir.
Bu gün həmin layihə çərçivəsində yaradılmış və bu gündən etibarən fəaliyyətə
başlayacaq təlim-tədris mərkəzinin açılışına toplaşmışıq. Mərkəz Bakı Slavyan
Universitetinin müəllimlərinin peşəkarlıq səviyyəsinin yüksəldilməsinə, onların
müasir təlim metodları ilə işləmək bacarıqlarının, tədris prosesinin keyfiyyətinin
və səmərəliliyinin artırılmasına xidmət edəcək”.
Rektor dedi ki, mərkəzdə müəllim və
tələbə heyəti üçün zəruri təlim-seminarlar, işə yeni başlayan müəllimlərin
universitet həyatına adaptasiya olması, magistrant, o cümlədən doktorantlar
üçün uğurlu elmi-tədqiqat işinin yerinə yetirilməsinin metodlarına həsr olunan
kurslar təşkil ediləcək: "Avropa İttifaqının dəstəyi ilə təlim və tədris mərkəzini
təchiz etmək üçün nəzərdə tutulan zəruri avadanlıq alınaraq lazımı qaydada
quraşdırılıb. Bakı Slavyan Universiteti layihəyə qoşulduğu müddətdə universitetin əməkdaşları
Türkiyənin Qazi, Avstriyanın Vyana Tətbiqi Elmlər Universiteti, Finlandiyanın
Yuvaskyla və İspaniyanın Valensiya Politexnik universitetlərində müvafiq təlim,
seminar və konfranslarda da iştirak edərək Avropa universitetlərinin təcrübəsindən
yararlanıblar. Bundan əlavə, universitet əməkdaşları layihə ilə əlaqədar Xəzər
Universitetində təşkil olunmuş seminar və konfransda iştirak ediblər”.
Daha sonra BSU-nun elmi işlər üzrə prorektoru,
professor Rafiq Novruzov layihənin mahiyyəti və gələcək planlarından
danışdı: "Bakı Slavyan
Universiteti ERASMUS+ PETRA layihəsinə tərəfdaş universitet olaraq 2017-ci ilin iyul ayından qoşulub. Layihənin əsas hədəfi
Azərbaycanda tədris və təlimdə mükəmməlliyin təşviq olunmasıdır. Başlanğıc,
inkişaf, yayılma, istismar mərhələsindən ibarət olan layihə Azərbaycanın Bakı
Slavyan Universiteti də daxil olmaqla 5 dövlət və 2 özəl universitetini təlim və tədrisin keyfiyyətinin
təkmilləşdirilməsi üçün hədəf seçib. Universitetimiz başlanğıc mərhələsini
keçmiş, hal-hazırda inkişaf mərhələsindədir. Layihədə nəzərdə tutulduğu kimi
işçi qrupu yaradılıb. Bu gündən isə yayılma, yəni mübadilə mərhələsi başlanır”.
BSU-nun İngilis filologiyası kafedrasının baş müəllimi,
layihənin işçi qrupunun tədqiqatçısı Natəvan Babayeva isə yeni yaradılmış təlim-tədris
mərkəzinin qarşıya qoyduğu məqsəd və planlar, layihə çərçivəsində nəzərdə
tutulmuş kurslar, treninqlər, o cümlədən seminarlar barədə ətraflı məlumat verərək
qeyd etdi ki, təlim
və tədris mərkəzini təchiz etmək üçün lazım olan zəruri avadanlıq - 10 ədəd
personal kompüter, 10 ədəd planşet, 10 ədəd noutbook, proyektor və ağıllı lövhələr
Avropa İttifaqının dəstəyi ilə alınıb və quraşdırılıb.
Açılış mərasiminin ardından
iştirakçılar layihə çərçivəsində keçiriləcək seminar və treninqlər üçün müasir
standartlara uyğun yaradılmış auditoriya ilə tanış olublar. Günel Azadə
Bakı 17°C
