Azərbaycan ali, Ermənistan isə üçüncü liqada təmsil olunan ölkədir
Faktlar Azərbaycanın bütün göstəricilər üzrə Ermənistanı
qabaqladığını sübut edir
Ötən gün Prezident İlham Əliyevin yanında 2019-cu
ilin yekunlarına həsr edilmiş müşavirə keçirilib. Dövlət başçısı giriş nitqində
yola saldığımız ildə əldə edilən nailiyyətlərdən, qarşıda duran vəzifələrdən
geniş söhbət açılıb. Prezident İlham Əliyev müşavirənin sonunda erməni baş
nazir Nikol Paşinyanın öz ölkəsinin "uğurları” haqqında danışarkən Ermənistanı
Azərbaycanla müqayisə etməsinə də toxunub. Bildirib ki, guya Ermənistanın Azərbaycanı
bir çox parametrlər üzrə qabaqlamasına dair Paşinyanın fərziyyələrinin heç bir əsası
yoxdur.
"Bu, bizim hərbi qələbəmiz
idi”
Prezident vurğulayıb ki, Azərbaycan Ermənistanı
bütün əsas parametrlər üzrə böyük fərqlə qabaqlayır. O, bunu təsdiqləmək üçün
bir neçə hadisəni və rəqəmi diqqətə çatdırıb: "Azərbaycan 2011-ci ildə 155 ölkənin
dəstəyi ilə BMT Təhlükəsizlik Şurasına qeyri-daimi üzv seçilmişdir. ...2011-ci
ildə bizdən əvvəl Ermənistan da öz namizədliyini vermişdi. Ancaq biz namizədliyi
verəndən sonra onlar götür-qoy etdilər və gördülər ki, bizimlə rəqabətdə onlar
100 faiz uduzacaqlar, çox sakitcə, qorxaqcasına öz namizədliyini geri götürdülər.
Çünki bilirdilər ki, BMT-də biz onlara böyük fərqlə qalib gələcəyik və beləliklə,
onlar rüsvay olacaqlar. Yəni, bu, 9 il bundan əvvəl baş vermiş hadisədir və onu
göstərir ki, beynəlxalq müstəvidə Ermənistanın və Azərbaycanın hörməti və çəkisi
nə dərəcədə fərqlənir. BMT Təhlükəsizlik Şurasına seçilməyimiz bizim böyük
siyasi və diplomatik qələbəmizdir və eyni zamanda, Ermənistan üzərində böyük qələbə
idi. 2016-cı ildə Ermənistan dinc Azərbaycan əhalisinə qarşı hərbi təxribat törədib
və bu təxribat nəticəsində bir neçə dinc vətəndaş həlak olub. Onların arasında
uşaqlar da olub. Azərbaycan buna cavab olaraq uğurlu əks-hücum əməliyyatı keçirərək
Ağdərə, Füzuli, Cəbrayıl rayonlarının bir hissəsini, minlərlə hektar torpağı
işğalçılardan azad etdi və o torpaqlarda Azərbaycan bayrağı ucaldıldı. Bu,
bizim hərbi qələbəmiz idi. Növbəti hərbi qələbə 2018-ci ildə təmin edilmişdir.
Uğurlu Naxçıvan əməliyyatı nəticəsində 10 mindən çox hektar ərazi
işğalçılardan, erməni silahlı qüvvələrindən təmizləndi və bir neçə önəmli
strateji yüksəklik azad edildi. Bu yüksəkliklər imkan verir ki, biz Ermənistanın
strateji kommunikasiyalarına tam nəzarət edə bilək. Bu, bizim ikinci hərbi qələbəmiz
idi”.
Dünyanın ən güclü
orduları reytinqində ölkəmizin yeri
Dövlət başçısı deyib ki, dünyanın ən güclü orduları
reytinqində Azərbaycan 52-ci, Ermənistan isə 96-cı yerdədir. O, "Global
Firepower 2019”
hesabatına istinad edərək, hava gücü üzrə dünyada Azərbaycanın 63-cü, Ermənistanın
86-cı, tank gücü üzrə ölkəmizin 32-ci, işğalçı dövlətin 78-ci yerdə olduğunu
söyləyib.Müqayisəni əsas makroiqtisadi göstəricilərə görə
davam etdirən dövlət başçısı deyib ki, 2019-cu ildə Azərbaycanın ümumi daxili məhsulu
dollar ekvivalentində 47,6 milyard dollar, Ermənistanda isə cəmi 13 milyard
dollar olub: "Alıcılıq qabiliyyətinə görə Azərbaycan 187 milyard dollar daxili
məhsula sahibdir, Ermənistan 33 milyard, fərq 5,6 dəfədir. Adambaşına düşən
ümumi daxili məhsul Azərbaycanda 4800 dollar, Ermənistanda 4500 dollardır.
Alıcılıq qabiliyyətinə görə adambaşına düşən ümumi daxili məhsul Azərbaycanda
18 min 600 dollar, Ermənistanda 11 min dollardır. Valyuta ehtiyatları Azərbaycanda
51 milyard dollar, Ermənistanda 2 milyard dollardır, fərq 25 dəfədir. Xarici
ticarət dövriyyəsi Azərbaycanda 33,6 milyard, Ermənistanda 7,4 milyard
dollardır, fərq 4,5 dəfədir. İxrac - Azərbaycan 19,6 milyard, Ermənistan 2,4
milyard, fərq 8,1 dəfədir. Müsbət saldo Azərbaycanda 6 milyard dollar, Ermənistanda
mənfi saldo 2,6 milyard dollardır. Sərmayə qoyuluşu - keçən il Azərbaycana 13,5
milyard dollar qoyulubdur, Ermənistana 900 milyon, fərq 15 dəfədir. Xarici dövlət
borcu - Azərbaycanın xarici dövlət borcu 7,9 milyard dollar, Ermənistanın 6
milyard dollardır. Azərbaycanda xarici dövlət borcu ümumi daxili məhsulun 17
faizini təşkil edir, Ermənistanda 40 faizdən çoxdur. Valyuta ehtiyatları Azərbaycanda
xarici dövlət borcundan 6,4 dəfə çoxdur, Ermənistanda xarici dövlət borcu
valyuta ehtiyatlarından 2,3 dəfə çoxdur. Adambaşına düşən xarici borc Azərbaycanda
799 dollar, Ermənistanda 1900 dollardır”.
Əməkhaqları və
pensiyalara dair müqayisə
Əməkhaqları və pensiyalara dair məlumatı təqdim edən
Prezident İlham Əliyev qeyd edib ki, 2019-cu ilin dekabr ayında Azərbaycanda
orta əməkhaqqı 723 manat - 425 dollar təşkil etdiyi halda bu, Ermənistanda 369
dollardır: "Alıcılıq qabiliyyətinə görə orta əməkhaqqı üzrə Azərbaycan MDB-də
ikinci, Ermənistan doqquzuncu yerdədir. Minimum pensiya Azərbaycanda 200 manat,
yəni 118 dollar, Ermənistanda 55 dollardır. Minimum pensiyaya görə Azərbaycan
MDB-də ikinci, Ermənistan doqquzuncu yerdədir. Minimum pensiyanın alıcılıq
qabiliyyətinə görə Azərbaycan MDB-də birinci, Ermənistan onuncu, yəni axırıncı
yerdədir. Orta pensiya Azərbaycanda 262 manat, yəni 154 dollar, Ermənistanda 84
dollardır. MDB-də orta pensiyaya görə Azərbaycan dördüncü, Ermənistan səkkizinci
yerdədir. Orta pensiyanın alıcılıq qabiliyyətinə görə Azərbaycan MDB-də ikinci,
Ermənistan axırıncı – onuncu yerdədir. Yoxsulluq səviyyəsi Azərbaycanda 4,8
faiz, Ermənistanda 24 faizdir, fərq beş dəfədir. Şəhid ailələrinə və müharibə əlillərinə
2019-cu ildə Azərbaycanda 934 mənzil verilibdir, Ermənistanda sıfır. Bütövlükdə
Azərbaycanda bu kateqoriyadan olan insanlara 7590 mənzil verilib, Ermənistanda,
bildiyimə görə, belə proqram mövcud deyil. Təkcə keçən il bu kateqoriyadan olan
insanlara 600 avtomobil verilib, Ermənistanda sıfır. Bütövlükdə bu
kateqoriyadan olan insanlara 6750 avtomobil verilib, Ermənistanda sıfır”.
Orta əsr təfəkkürü,
qonşu dövlətlərlə münaqişə şəraiti
Yeni Azərbaycan
Partiyasının (YAP) Siyasi təhlil və proqnozlaşdırma şöbəsinin müdiri, millət vəkili
Aydın Mirzəzadə"Kaspi” qəzetinə açıqlamasında bildirib ki, Prezident İlham Əliyev növbəti dəfə
Azərbaycanla Ermənistanın uğurlu müqayisəsini aparıb, real mənzərəni ortaya
qoyub. Onun sözlərinə görə, Azərbaycan öz dövlətçiliyini bu gün beynəlxalq
hüquq normaları, sivil prinsiplər üzərində, işğalçı Ermənistan isə orta əsr təfəkkürü
ilə, qonşu dövlətlərlə münaqişə şəraitində qurur: "Bunun nəticəsidir ki, hər
bir ölkə öz inkişafında tamamilə fərqli nəticələr əldə edib. Azərbaycan bu gün
beynəlxalq birliyin nüfuzlu üzvüdür, ölkə iqtisadiyyatı güclü inkişaf edir. Azərbaycan
əhalisinin sayı artır, vətəndaşlar bütün sahələr üzrə özlərini daha güvənli
hiss edirlər. Ermənistan isə perspektivi olmayan dövlətdir. Azərbaycandan fərqli
olaraq işğalçı Ermənistanın əhalisi hər il azalır. Ermənistanda investisiya
yoxdur, inkişafdan söhbət gedə bilməz”.
Ermənistan əhalisi
daim xof içində
Millət vəkili deyib ki, Ermənistan əhalisi daim xof
içində, Azərbaycanın nə vaxtsa hərbi əməliyyatlara başlayaraq öz ərazilərini
işğaldan azad edəcəyi qorxusu ilə yaşayır: "Prezident İlham Əliyev çox düzgün
olaraq bildirdi ki, Azərbaycan ali, Ermənistan isə üçüncü liqadadır. Göründüyü
kimi, Ermənistanda hakimiyyət dəyişsə də bu ölkənin dövlətçilik fəlsəfəsi dəyişmir.
Ermənistan bugünkü sivil dünyada özünün yerini tapa bilmir. Nə qədər ki, köhnə
təfəkkürlə, digər xalqları aşağılamaq baxışı ilə yaşayacaqlar, həmişə uduzacaqlar.
Ermənistanın min illərdən sonra təsadüfən qazandığı müstəqilliyinin heç bir
perspektivi yoxdur. Bir ölkənin ki, əhalisi durmadan köçüb gedir, bir ölkənin
ki bütün strateji obyektləri artıq xarici şirkətlərə satılıb və digər dövlətlərin
vassalı rolunu oynayır, onun gələcəyindən danışmaq olmaz. Prezident İlham Əliyevin
müqayisəsi və məsələlərə münasibəti çox düzgün idi, reallığı əks etdirirdi. Bu,
eyni zamanda Azərbaycan vətəndaşının tamamilə dəstəklədiyi bir məsələdir”.
Azərbaycan Avropa
dövlətlərindən öndə
Millət vəkili, siyasi
şərhçi Sahib AlıyevPrezident İlham Əliyevin müşavirədəki yekun nitqindən sitat gətirərək, Azərbaycanın
ali liqada, Ermənistanın isə üçüncü liqada təmsil olunan ölkə kimi qiymətləndirib.
Deputatın qənaətincə, hətta ölkə sözünü belə, burada adam tərəddüdlə işlədir.
Çünki Ermənistan forpostdur, bir çox hallarda beynəlxalq subyekt yox, obyekt -
bəlli güclərin əlində alət kimi çıxış edir: "Cənab Prezidentin Ermənistanın Azərbaycandan
nə qədər geri qaldığının üzərində faktlarla və bu qədər geniş dayanmasına gəldikdə,
bu, heç də zəifin fonunda güclü görünmək istəyindən qaynaqlanmır və ölkəmizin
buna heç ehtiyacı da yoxdur. Çünki Azərbaycan bu gün öz güc və nüfuz potensialı
ilə Avropanın bir çox orta çəkili dövlətlərini belə, geridə qoyur, o da qala
dalana dirənmiş və dirədilmiş Ermənistan ola. Bilirsiniz ki, ABŞ-ın "U.S.News
& World Report” nəşri dünyadakı 200-ə yaxın ölkənin içərsindən 80 ən
nüfuzlusunun reytinq cədvəli dərc etmişdi. Azərbaycan orada 45-ci yerdədir.
Bizim iki qonşumuz - Gürcüstanla Ermənistan heç bu cədvələ salınmadıqları halda
Azərbaycan öz güc və nüfuzuna görə Avropanın orta çəkili dövlətləri -
Portuqaliya, Çexiya, Rumıniya, Xorvatiya və digərlərindən də öndə idi”.
Geosiyasi
reallıqların çox sürətlə dəyişdiyi dövr
S.Alıyev Ermənistanın populist baş
nazirinin guya ölkəsinin adambaşına düşən ÜMD-nin həcminə görə Azərbaycanı ötüb keçməsi barədə səsləndirdiyi absurd fikirlərə də münasibət bildirib. Deyib ki, Ermənistandakı
bir çox iqtisadçılar bunun ağ yalan olduğunu göstərəndən sonra Paşinyan yanıldığını etiraf edərək üzr istəyib: "Təəssüf ki, bizdə bəziləri Paşinyana hələ
də züy tutaraq Ermənistanın Azərbaycanı ötüb keçdiyini deyirlər, bu da səbəbsiz
deyil. Onlara verilən tapşırıq bu yöndədir.
Cənab Prezident konkret faktlar gətirməklə əsl reallığı ortaya qoydu.
Qoydu ki, elə də yüksək hazırlığı olmayanlar həqiqəti bilsinlər. Bir də Ermənistandakılar
da görsün ki, özlərindən hər baxımdan və bütün parametrlər üzrə güclü olan bir
dövlətin torpaqlarını işğal altında saxlamaq onlara gələcəkdə nə vəd edir. Və
unutmasınlar ki, biz geosiyasi reallıqların çox sürətlə dəyişdiyi bir dövrdə
yaşayırıq. Özündən hər baxımdan güclü bir ölkəylə düşmənçilik bu gün regional
layihələrdən təcrid, depopulyasiya və sair problemlərlə üzləşmələrinə səbəb
olubsa, sabah tam məhvləriylə nəticələnə bilər”.
"5-ci kolon”un təmsilçilərinə
tərs şillə effekti
Siyasi şərhçi qeyd edib ki, Prezident İlham Əliyevin
bu açıqlaması bir tərəfdən ölkəsinin uğurlarından dəm vurub, sonra bəzi rəqəmlərdə
şişirtməyə yol verdiyni özü də etiraf edib üzr istəyən Ermənistanın populist
baş naziri Paşinyana, eyni zamanda da bəzən haylarla sinxron hərəkət edən
buradakı "5-ci kolon”un təmsilçilərinə tərs şillə effektli növbəti dərsdir:
"Bu, eyni zamanda Ermənistandakılara reallığı başa salmaq və ona da uyğun
davranmaq çağırışı idi. Orada bu çağırış adekvat qiymətləndiriləcəkmi? Açığı,
buna elə də ümidli deyiləm. Niyə? Bu sualın cavabı isə fikrimcə, Ermənistanın
keçmiş başçısı Robert Köçəryanın iki həftə bundan öncə məhkəmədə səsləndirdiyi
sözlərdə axtarmaq lazımdır. O, orada Ermənistanı manqurtlar ölkəsi adlandırdı.
Düz 10 il Ermənistana rəhbərlik etmiş bir adam bu fikirdədirsə, yəqin səbəbi
var. Və bu heç də onun özünün də manqurt olmaması anlamını daşımır”.
Rufik İSMAYILOV