Xüsusi tarixi missiya - FOTOLAR
Tezliklə
işğaldan azad edilmiş torpaqlarımız gözəl məkana çevriləcək, soydaşlarımız
ata-baba yurdlarına qayıdacaq, Qarabağ xoşbəxtlik və firavanlıq diyarı olacaq
Azərbaycan
işğaldan azad olunmuş ərazilərin mina və partlamamış sursatlardan təmizlənməsini
həyata keçirməklə paralel olaraq genişmiqyaslı bərpa, quruculuq işlərinə də
start verib. Yüzlərlə kilometr uzunluğunda yeni yolların, o cümlədən hərbi təyinatlı
layihələrin icrası sürətlə gedir. Bu günə qədər Zəngilanın Ağalı kəndində
"ağıllı kənd” layihəsinin də icrasına başlanılıb, Ağdam şəhərinin yeni
hazırlanmış baş planına uyğun olaraq müvafiq addımlar atılıb. Zəngilan və
Laçında beynəlxalq aeroportların təməli qoyulub. Füzulidə inşa edilən yeni hava
limanı isə tamamlanmaq üzrədir. Prezident İlham Əliyevin avqustun 29-da Şuşaya
səfəri zamanı Əhmədbəyli-Füzuli-Şuşa Zəfər yolunda görülən işlərlə tanış olması
onu deməyə əsas verir ki, iki-üç hərəkət zolaqlı, 101 kilometr uzunluğu olan bu
yol da yaxın vaxtlarda tam istifadəyə veriləcək.
Azərbaycanın
Mədəniyyət Paytaxtı
Xüsusilə
qeyd etmək yerinə düşər ki, dövlətimizin başçısının Sərəncamı ilə təsdiq
edilmiş işğaldan azad olunmuş ərazilərin yenidən qurulması və bərpası layihəsi
çərçivəsində Şuşada işlər daha sürətlə gedir. İndiyə qədər bu qədim şəhərimizdəki
bir sıra obyektlərdə, o cümlədən məscidlərdə təmir-bərpa işləri aparılıb,
"Xarı-bülbül Oteli”nin açılışı olub. Azərbaycanın Mədəniyyət Paytaxtı elan edilən
Şuşada Xarı Bülbül Musiqi festivalı keçirilib. Prezident İlham Əliyevin budəfəki
Şuşa səfərində "Qarabağ” otelinin açılışı olub, Şuşadakı Xüsusi Nümayəndəliyin
yerləşəcəyi inzibati binanın, bəstəkar Üzeyir Hacıbəylinin ev-muzeyinin bərpasına
başlanılıb. Eyni zamanda Molla Pənah Vaqifin muzey-məqbərəsinin və büstünün,
Xalq artisti Bülbülün ev-muzeyinin, bəstəkar Üzeyir Hacıbəylinin heykəlinin
açılışları olub. Şuşa şəhərinin baş planı təqdim edilməklə bərabər, yeni otel və
konfrans mərkəzinin, 3, 4 və 5 mərtəbəli yaşayış binalarından ibarət olacaq ilk
məhəllənin təməlqoyma mərasimləri olub. Elə həmin gün Şuşa şəhərində Vaqif
Poeziya Günü, Heydər Əliyev Fondu tərəfindən təşkil edilən "Qarabağ Azərbaycan
mədəniyyətinin incisidir” və "Yenidən doğma diyarda. Qarabağın sənət inciləri”
sərgiləri keçirilib.
Milli
maraqların qətiyyətli müdafiəçisi
Bütün bu
sadalananlar bir daha onu deməyə əsas verir ki, Müzəffər Ali Baş Komandan,
Prezident İlham Əliyevin rəhbərliyi ilə Azərbaycan ərazi bütövlüyü məsələsində
prinsipiallıq nümayiş etdirir, tarixi torpaqlarımızın hər qarışı uğrunda
mübarizə aparır, doğma yurd yerlərimizin yenidən dirçəlməsinə, Böyük Qayıdışa
bütün resursları səfərbər edir. Dünyanın güc mərkəzlərinin, erməni havadarı
qismində çıxış edən böyük dövlətlərin təzyiq və təsir siyasətinə əhəmiyyət verməyən
Azərbaycan Prezidenti yalnız xalqın iradəsinə söykənərək milli-dövlətçilik
maraqlarını qətiyyətlə müdafiə edir. Ölkə rəhbərinin Şuşaya və işğaldan azad
olunan digər ərazilərə səfərləri çərçivəsində istifadəyə verilən, yaxud təməli
qoyulan obyektlər, böyük ruh yüksəkliyi ilə icra edilən layihələr Azərbaycanın
öz yolundan dönməyəcəyinə dair dünyaya verilən mesajdır.
Onların
başqa çıxış yolu yoxdur
Eyni
zamanda bu addımlar, həmçinin Prezident İlham Əliyevin səsləndirdiyi bəyanatlar
iqtisadi tənəzzül yaşayan, xaricdəki diaspor təşkilatların girovuna çevrilən
Ermənistana, Qarabağ ermənilərinə də açıq mesajlar verir. Haqq yolundan sapmış
ermənilər ya kasıb Ermənistanın, xaricdəki bəzi təşkilatların əlində alətə
çevrilməyə davam edərək, heç bir hüquqi status daşımadan, bir qarın ac, bir
qarın tox şəkildə, it damına bənzər şəraitdə yaşamağa davam etməlidirlər, ya da
Azərbaycan vətəndaşlığını, dövlətimizin qayda-qanunlarını qəbul etməklə bu ərazilərdə
normal həyat tərzi keçirməli, hamı ilə normal münasibət qurmalıdırlar. Onların
başqa çıxış yolu yoxdur.
Mədəni
inkişafda da yeni dövr
Milli Məclisin
deputatı Müşfiq Cəfərovmövzu ilə bağlı "Kaspi” qəzetinə bildirib ki, dövlət başçısı işğal edilmiş ərazilərin
bərpası, yenidən qurulması ilə bağlı bütün ideya və planların sürətlə
reallaşdırılmasını tam nəzarətində saxlayır. Millət vəkilinin sözlərinə görə,
Ali Baş Komandan qətiyyəti və yenilməz sərkərdə əzmi ilə Müzəffər Ordumuzun
gücünə, xalq-iqtidar birliyinə söykənərək düşməni necə məğlub edibsə, o cür də yenilməz
ruhla işğaldan azad edilmiş ərazilərdə sistemli quruculuq işlərinə, yüksək
texnologiyaların tətbiqinə başlayıb: "İndi hər kəs həmin ərazilərdə bərpa-quruculuq
işlərinin birinci mərhələsinin necə geniş və əhatəli şəkildə vüsət almasına
şahidlik edir. Azərbaycan üçün azad edilmiş ərazilərin dirçəldilməsi xüsusi
tarixi bir missiyadır. Torpaqlarımız işğaldan azad olunduqdan sonra Azərbaycanın
mədəni inkişafında da yeni dövr başlayıb. Xalqımıza məxsus tarixi abidələrin bərpası,
ənənəvi tədbirlərin yenidən və daha möhtəşəm qeyd olunması qayıdışımızın əyani
sübutudur. Müharibədən sonra Qarabağda aparılan tikinti-abadlıq işləri göz
önündədir. Şuşanın yenidən qurulması, Kəlbəcərə çəkilən elektrik xətti, Füzulidə
Hava Limanı və bu kimi digər işlər cəmi 9 aya görülüb”.
Xoşbəxtlik
və firavanlıq diyarı
Deputat
qeyd edib ki, ölkə başçısının Qarabağa hər səfəri yeni layihələrin reallaşması
ilə yadda qalır: "Prezident İlham Əliyevin rəhbərliyi və bilavasitə nəzarəti
altında işğaldan azad olunmuş ərazilərdə "Böyük Qayıdış” istiqamətində bütün zəruri
tədbirlər həyata keçirilir. Yaşayış evləri, sosial, yol-nəqliyyat, iqtisadi
infrastruktur sürətlə bərpa edilir. Düşünürəm ki, tezliklə işğaldan azad edilmiş torpaqlarımız
gözəl məkana çevriləcək, soydaşlarımız ata-baba yurdlarına qayıdacaq, Qarabağ
xoşbəxtlik və firavanlıq diyarı olacaq”.
Rufik
İSMAYILOV