Prezidentdən məmurlara növbəti xəbərdarlıq
"Onsuz da
bizim kifayət qədər informasiya mənbələrimiz var və əgər nə isə orada düzgün
istiqamətdə getməsə, kimsə əyri yolla getsə, biz ondan gec-tez xəbər tutacağıq”
Dövlət
idarəetmə sistemində aparılan islahatlar nəticəsində rüşvətxor, korrupsiyaya
qurşanmış, öz şəxsi mənafeyini dövlətin maraqlarından üstün tutan məmurlar cəzalandırılıb.
Prezident İlham Əliyev çıxışlarında mütəmadi olaraq bu məsələyə toxunur və rüşvətə,
korrupsiyaya qurşanan, səlahiyyətlərindən sui-istifadə edən vəzifəli şəxslərin
cəzalandırılacağını daim bəyan edir. Hüquq-mühafizə orqanlarının araşdırmaları
nəticəsində artıq ayrı-ayrı rayonların icra başçılarının, struktur rəhbərlərinin
məsuliyyətə cəlb edilməsinin şahidi oluruq.
"Sahibkarlara
şərait yaradın”
Bir neçə
gün öncə Prezidenti İlham Əliyev Rafiq Cəlilovu Cəlilabad Rayon İcra Hakimiyyətinin
başçısı və Rəşad Tağıyevi Şəmkir Rayon İcra Hakimiyyətinin başçısı təyin
olunmaları ilə əlaqədar videoformatda qəbul edərkən də bu məsələlərə bir daha
toxundu: "Siz gündəlik həyatda elə işləyin, elə çalışın ki, həm vətəndaşlar
sizdən razı olsunlar, həm də rayonların inkişafı sürətlə getsin və təşəbbüs
göstərin, investorları cəlb edin, sahibkarlara şərait yaradın. Ancaq əfsuslar
olsun ki, real həyatda biz bunun tam əksini görürük. Bunun nəticəsində və eyni
zamanda, buraxılmış ciddi nöqsanlar, pozuntular, rüşvətxorluq və korrupsiya
hallarına görə həm Cəlilabad, həm də Şəmkir rayonlarının keçmiş icra başçıları
cinayət məsuliyyətinə cəlb olunmuşlar”.
"Hər kəs
qanun qarşısında bərabərdir”
Prezident
vurğulayıb ki, heç kim qanundan yuxarı dayana bilməz və burada hər kəs qanun
qarşısında bərabərdir: "Heç kimdə immunitet yoxdur və ola bilməz. Bütün dövlət
məmurlarını vəzifəyə təyin edərkən mən bu tövsiyələri verirəm. Ancaq sizdən əvvəl
bu vəzifələrdə çalışmış insanlar yalnız şəxsi mənafelərini güdürdülər,
talançılığa, rüşvətxorluğa və korrupsiyaya qurşanmışdılar, insanlara laqeyd
yanaşırdılar, rayonların qarşısında duran gündəlik problemlərlə yox, öz şəxsi
problemləri ilə, şəxsi biznesləri ilə məşğul idilər və əlbəttə, insanların
haqlı narazılığına səbəb olmuşdular. Bütün bu faktlar üzə çıxandan sonra, əlbəttə
ki, hər iki icra başçısı öz vəzifələrindən azad edildi və indi onlar qanun
qarşısında cavab verəcəklər. İstintaq gedir, istintaq hər şeyi göstərəcək.
Ancaq ilkin məlumatlar, o cümlədən sübutlar və istintaq materialları deməyə əsas
verir ki, bu insanların cinayət məsuliyyətinə cəlb edilməsi tam əsaslı idi”.
"Əgər siz
bu məsuliyyətin altına girirsinizsə...”
Dövlət
başçısı çıxışı zamanı vurğuladı ki, heç kim məsuliyyətdən canını, yaxasını
qurtara bilməz: "Bunu mən dəfələrlə demişəm, bir daha demək istəyirəm, sizə də
deyirəm və bu gün bütün digər məmurlara deyirəm - əgər məmurlar öz işində yenə
də bu çirkin əməllərdən əl çəkməsələr, onların da aqibəti eyni olacaq. Hətta
çıxışlarımın birində demişdim ki, əgər təmiz işləmək istəmirsinizsə, getməyin
bu işlərə, razılıq verməyin, yoxsa bədbəxt olacaqsınız. Əgər siz bu məsuliyyətin
altına girirsinizsə, onda, bax, dediyim kimi, qanun çərçivəsində işləməlisiniz
və bu yüksək etimadı doğrultmalısınız. Elə işləməlisiniz ki, vətəndaşlar sizdən
razı olsunlar”.
Prezident
qeyd edib ki, dövlət orqanlarında təmsil olunan məmurların işi də elə şəffaf
olmalıdır ki, ictimai nəzarət də bunu təsdiqləsin: "Onsuz da bizim kifayət qədər
informasiya mənbələrimiz var və əgər nə isə orada düzgün istiqamətdə getməsə,
kimsə əyri yolla getsə, biz ondan gec-tez xəbər tutacağıq. Ona görə, bu da nəzərə
alınmalıdır”.
Dövləti
talayanlar cəzasını alacaq
Dövlət
başçısı məmurlarla bağlı məsələyə toxunaraq, onların öz səlahiyyətlərindən
istifadə edərək vətəndaşlardan rüşvət tələb etməsinin yolverilməz olduğunu deyib.
Bu, bir daha onu deməyə əsas verir ki, idarəetmə sistemində şəffaflıq,
qanunlara əməl edilməsi ölkə rəhbərinin daim diqqət mərkəzindədir. Heç şübhəsiz
ki, hansısa məmurun, səlahiyyətli şəxslərin törətdikləri qanunazidd əməllər
gec-tez bəlli olur və onlar məsuliyyətdən yaxa qurtara bilmirlər. Təəssüflər
olsun ki, bir sıra məmurlar cəzalandırılan icra başçılarını, müxtəlif səlahiyyətli
şəxsləri görməzlikdən gəlir və elə düşünürlər ki, xüsusi statusa malikdir. Belə
şəxslər xalqa xidmət etdiklərini unudurlar. Lakin cinayət cəzasız qalmır. Dövlət
başçısının da dəfələrlə vurğuladığı kimi, kimliyindən, vəzifəsindən asılı
olmayaraq rüşvət və korrupsiyaya qurşanaraq dövləti talamağa cəhd edən hər bir
şəxs cinayət məsuliyyətinə cəlb ediləcək və cəzasını alacaq.
Azad Məmmədov