Postpandemiya dövrü daxili turizm üçün yeni imkanlar açacaq

Ekspertlər deyir ki, bölgələrə yeni turizm marşrutları təşkil edilməlidir

Proqram dövlət-özəl tərəfdaşlığına əsaslanaraq təhlükəsizlik, şəffaflıq, sosial məsuliyyət, ədalətlilik, inklüzivlik, əməkdaşlıq və təbliğat kimi vacib prinsiplər rəhbər tutulmaqla həyata keçiriləcəkdir. İlkin mərhələdə proqramın yerləşdirmə (mehmanxana və mehmanxana tipli müəssisələr), ictimai iaşə obyektlərində (restoran və kafelər) və eyni zamanda turistlərə xidmət edən nəqliyyat vasitələrində tətbiqi nəzərdə tutulub. Dövlət Turizm Agentliyi tərəfindən SAHMAN proqramına qoşulan sənaye nümayəndələrinə təlimlərin keçirilməsi, zəruri ləvazimatlarla təminat, marketinq və brendinq kimi istiqamətlərdə dəstək veriləcək, proqram çərçivəsində tələb olunan əlavə sanitariya və gigiyena tədbirlərinə yönəldilən xərclərinin bir hissəsi ehtiyaca uyğun olaraq qarşılanacaq.
Bundan başqa, ölkəmizdə fəaliyyət göstərən turizmyönlü Assosiasiya və İctimai Birliklər bu çətin pandemiya dövründə Prezidentİlham Əliyevin "Biz birlikdə güclüyük ” çağırışına dəstək olaraq və bu devizi rəhbər tutaraq, Azərbaycan Turizm Assosiasiyasının (AZTA) təşkilatçılığı ilə videokonfrans keçirilib. İclasda Assosiasiya nümayəndələri pandemiya dövründə Azərbaycan turizminin mövcud vəziyyəti, həmçinin, karantindən sonrakı və postpandemiya dövründə daxili turizmin inkişafını sürətləndirən amillərdən bəhs ediblər. Özəl sektorun nümayəndələri təmsil etdikləri turizm müəssisələrinin mövcud problemləri və cari vəziyyəti haqqında məlumat veriblər, vəziyyətdən çıxış yolları üçün təkliflər səsləndiriblər. Qərara alınıb ki, bütün turizm qurumlarının səyi ilə yaxın günlərdə daxili turizmin fəaliyyəti və inkişaf perspektivlərinin dəqiq mexanizmi işlənib hazırlanacaq və müvafiq qurumlara və ictimaiyyətə təqdim olunacaq. Bütün bunların nəzərə alaraq görüşdə iştirak edən qurumlar arasında Assosiativ Tərəfdaşlıq haqqında Memorandum qəbul edilib. Memorandumun əsas məqsədi vahid platformadan çıxış edərək bütün səyləri bir araya gətirib, turizm qurumları arasında qarşılıqlı, səmərəli və faydalı əməkdaşlığı inkişaf etdirmək, turizmin inkişafında vətəndaş cəmiyyəti nümayəndələrinin fəallığını yüksəltmək, hər bir qurumu təmsil edən mütəxəssislərdən ibarət "beyin mərkəzi”nin yaradılması, zəruri layihələrin birgə işlənməsi, ölkənin turizm potensialının üzə çıxarılması və təbliği kimi məsələlərdir.
Mütəxəssislərlə postpandemiya dönəmində daxili turizmin inkişafı üçün hansı addımların atılacağını və nə dərəcədə effektiv olacağını müzakirə etdik.
Azərbaycan Turizm Assosiasiyasının İdarə Heyətinin sədri Əhməd Qurbanovdaxili turizmin inkişafı ilə bağlı konsepsiya hazırladıqlarını deyir: "Hazırda mövcud vəziyyətdən həm dünyada, həm də ölkəmizdə bütün sektorlar zərər görüb. Xüsusilə də ən böyük ziyan məhz turizm sahəsinə dəydi. Ölkələrə giriş-çıxış olmadığı üçün həm xarici, karantin dönəmi olduğundan insanları evdən çıxa bilmədiyi üçün isə həm də daxili turizmdə ciddi geriləmə müşahidə edilir. Turizm şirkətləri, turizm dayanıqlı obyektlər dayanma nöqtəsinə gəlib çatıb. Karantindən sonrakı dövrdə hələ sərhədlərin açılmayacağı üçün planlaşdırırıq ki, ilk olaraq ölkəmizdə daxili turizmi yenidən fəaliyyətə gətirək və inkişaf etdirək. Azərbaycan Turizm Assosiasiyası olaraq daxili turizmin inkişafı ilə bağlı konsepsiya hazırlayırıq. Konsepsiyanın məqsədi sırf daxili turizmin inkişafına yönəlikdir və turizm şirkətləri üçün "yol xəritəsi” olacaq. Ölkəmizdə elə turizm agentlikləri var ki, onlar təkcə getmə və gəlmə turizm ilə işləyirdilər. Hazırda bu turizm növü aktiv olmadığından həmin şirkətlər də bu konsepsiyadan yararlana bilər”.
Sədr bölgələrə yeni turizm marşrutlarının hazırlandığını qeyd etdi: "Bölgələrimizin potensialı yüksəkdir. Sərhədlər bağlı olduğu üçün xaricə gedə bilməyən vətəndaşlarımız karantindən sonra daxili turizmin bu potensialından kifayət qədər istifadə edə biləcəklər. Bunun üçün də düşünürük ki, bölgələrdəki otel və digər turizm xidmətləri göstərən obyektlərin sayını artırmaq lazımdır. Hazırda turizm şirkətləri ilə danışıqlar gedir və növbəti mərhələ üçün yeni turizm marşrutlarının planlanması nəzərdə tutulur”.
Ə.Qurbanovdan mövcud vəziyyətlə əlaqəli olaraq daxili turizmdə süni qiymət artımlarının da olub-olmayacağını soruşduq. O bildirir ki, qiymətlərdə dəyişikliyin olması gözlənilmir: "Məncə, qiymətlərdə nə artma, nə də azalma müşahidə edilməyəcək, stabil qalacaq. Çünki karantindən çıxan turizm obyektləri bir müddətdir ki, işləmədikləri üçün birdən-birə işə başlayanda qiyməti qaldırmayacaqlar. Amma qiymətlərdə azalma da olmayacaq. İlkin mərhələdə qiymətlər stabilliyini qoruyacaq, lakin növbəti mərhələ üçün bazardakı tələb-təklif məsələsinə uyğun şəkildə qiymətlərdə dəyişmə ola bilər. Turizm sahəsindən olanlar fərdi sahibkarlıq fəaliyyətləri ilə məşğuldurlar deyə, bu istiqamətdə qiymətlərə nəzarət etmək mümkün deyil. Sadəcə, biz həmişə həmin sahibkarlarla görüşlərimiz zamanı ciddi qiymət artımına yol verməməyi, hər kəsə uyğun təkliflər hazırlamaqlarını məsləhət görürük”.

Günel Azadə