Pandemiya ilə mübarizə tədbirləri effektiv nəticələr verir
Vətəndaşlarımızın məsuliyyətli davranışı, məhdudiyyətlərə
anlaşıqlı şəkildə yanaşması əldə edilmiş uğurun başlıca şərtlərindən biridir
Azərbaycan dövləti koronavirus pandemiyası ilə
mübarizə istiqamətində tədbirləri davam etdirir. Səmərəli maarifləndirmə,
müvafiq tibbi infrastrukturun yaradılması, profilaktika və müalicə məsələlərinin
keyfiyyətli şəkildə həll olunması, xüsusi karantin rejiminin tətbiqi və mərhələli
qaydada məhdudlaşdırıcı və yumşaldıcı tədbirlərin həyata keçirilməsi, vətəndaşların
məsuliyyəti, dövlət-vətəndaş həmrəyliyi uğurlu nəticələrin əldə olunmasının
başlıca səbəbləridir. Hazırda ölkənin əksər şəhər və rayonlarında sərtləşdirilmiş
xüsusi karantin rejimi ləğv edilib, bir çox məhdudiyyətlər aradan qaldırılıb.
Yalnız Bakı, Sumqayıt şəhərləri və Abşeron rayonunda yeni yoluxma halları ilə
bağlı təhlükə qaldığına görə, bir sıra məhdudiyyətlər saxlanılıb. Məlumat üçün
qeyd edək ki, Nazirlər Kabineti yanında Operativ Qərargah bu kimi məhdudlaşdırma və ya
yumşaldılma ilə bağlı qərarlardan öncə ölkədə və ayrı-ayrı regionlarda vəziyyət
ətraflı öyrənilir, təhlil olunur, bütün risklər müəyyənləşdirilir və onların
qarşısının alınması üçün profilaktik tədbirlər həyata keçirilir. Gediş-gəlişlə
bağlı məhdudiyyətin qüvvədə qalması da yoluxma təhlükəsinin daha yüksək olduğu
Bakı, Sumqayıt şəhərləri və Abşeron rayonundan ölkənin digər şəhər və
rayonlarına infeksiyanın ötürülməsini maksimal şəkildə məhdudlaşdırmaq məqsədi
daşıyıb.
Ümumdünya Səhiyyə Təşkilatının
tövsiyələri
Onu da xatırlatmaq yerinə düşər ki, Ümumdünya Səhiyyə
Təşkilatının (ÜST) tövsiyələrində və təlimatlarında yoluxma riski daha yüksək
olan regionlarla digər bölgələr arasında gediş-gəliş məhdudiyyətlərinin tətbiqi
məqsədəuyğun hesab edilir. Məhz bu amilləri nəzərə alsaq, vətəndaşlarımızın məsuliyyətli
davranışı, səbr və təmkinlə, anlaşıqlı şəkildə məhdudiyyətlərə yanaşması əldə
edilmiş uğurun başlıca şərtlərindən biridir.
Vətəndaşlarımız başa düşür ki, hazırda gediş-gəlişlə
bağlı məhdudiyyətin aradan qaldırılması ölkədə yoluxma hallarının artmasına,
sanitar-epidemioloji vəziyyətin pisləşməsinə gətirib çıxara bilər. Bu da öz
növbəsində sərtləşdirmə ilə bağlı yeni tədbirlərin həyata keçirilməsini zərurətə
çevirəcəkdir. Digər tərəfdən nəzərə alınmalıdır ki, payız-qış mövsümü həmçinin
digər xəstəliklərin fəallaşdığı dövrdür. COVİD-19-la birlikdə bu xəstəliklər
insan orqanizmi üçün ciddi təhlükədir. Buna görə də hazırkı dövrdə ən başlıca vəzifə
koronavirusun yayılmasına, yeni yoluxma ocaqlarının yaranmasına imkan verməməkdir.
Tədris müəssisələrinin fəaliyyətə başladığı hazırkı dövrdə qarşımızda duran əsas
vəzifələrdən biri isə həm də övladlarımızı bu problemdən qorumaq, onların təhsil
prosesinə normal şəraitdə qovuşmasını təmin etməkdir.
Cəmiyyətin təhlükəsizliyinə
laqeyd münasibət
Lakin əfsuslar olsun ki, bəzi vətəndaşlar tərəfindən
gediş-gəlişlə bağlı məhdudiyyətlərin qüvvədə saxlanmasına, bir sıra məhdudiyyətlərə,
qayda-qanunlara qarşı dözümsüzlük nümayiş etdirilir. Onlar mövcud təhlükəni
aydın təsəvvür edə bilmir, insanlarımızın, cəmiyyətimizin, özünün, ailəsinin
sağlamlığı və təhlükəsizliyinə laqeyd münasibət göstərirlər. Təbii ki, bu,
yolverilməz haldır. Bir qisim insanlar isə iddia edirlər ki,
sanitar-epidemioloji vəziyyət qənaətbəxş olduğuna görə muzeylərin və sərgi
zallarının fəaliyyətinə icazə verilməsi aktual deyil, bundan da vacib məsələlər
var. Ancaq məsələyə məntiqlə yanaşdıqda, aydın görmək olar ki, pandemiya ilə əlaqədar
hələlik bəzi məhdudiyyətlərin saxlanması heç də digər sahələr üzrə yumşaldıcı qərarların
qəbulunu istisna etməməlidir.
Dövlətin qətiyyəti,
niyyəti və gücü
Milli Məclisin Səhiyyə
komitəsinin üzvü Sədaqət Vəliyeva mövzu ilə bağlı açıqlamasında bildirib ki, Azərbaycan
dövləti pandemiya ilə mübarizə üçün bütün imkanlarını səfərbər edib, indiki dönəmdə
ölkə vətəndaşlarının sağlamlığının qorunması üçün mühüm tədbirlər görüb. Onun
sözlərinə görə, Azərbaycanda koronaviruslu xəstələrin müalicəsi üçün nəzərdə
tutulan modul tipli xəstəxanaların açılması COVID-19-la aparılan mübarizədə
dövlətin qətiyyətini, niyyətini və gücünü bir daha göstərir: "Qısa müddət ərzində
ölkəmizdə modul tipli 11 xəstəxana inşa edilib, bu tibb müəssisələrində çarpayıların
sayı 4100-dür. Xüsusilə belə xəstəxanalarda çox sayda intensiv
terapiya-reanimasiya yerlərinin mövcudluğu koronavirusla mübarizədə əlavə
imkanlar yaradır. Avqustun 31-də açılışı olan daha bir modul tipli xəstəxanada
isə 820-dən çox çarpayı mövcuddur, lakin qısa müddət ərzində onların sayını
1500-ə qədər artırmaq mümkündür”.
Lazımi infrastruktur
formalaşdırılıb
Həyata keçirilən tədbirlər nəticəsində hazırda Azərbaycanda
koronavirus xəstələrinin sayının azalmaqda olduğunu söyləyən millət vəkili S.Vəliyeva
son vaxtlar müsbət dinamika müşahidə edildiyini diqqətə çatdırıb. Bildirib ki,
bu rəqəmlərə istinad edib rahatlaşmaq olmaz: "Xüsusilə də payız-qış mövsümündə
xəstəliklərin baş qaldırması koronavirusun yenidən alovlanmasına səbəb ola bilər.
Əlbəttə, dövlət bütün ehtimalları nəzərə alaraq modul tipli xəstəxanaları inşa
edir ki, hər bir vəziyyətə hazır olaq. Hətta bu gün mövcud xəstəxanalardakı
yerlərlə yanaşı, iki Olimpiya İdman Kompleksi də koronavirus xəstələri üçün
ayrılıb və orada 300-dən 500-ə qədər çarpayı var. Əgər ehtiyac yaranarsa, qısa
müddətdə əlavə olaraq 1400 çarpayılıq 7 modul tipli xəstəxananın da tikintisini
həyata keçirilə bilər. Bununla yanaşı, ölkəmizdə laboratoriyaların sayı 45-ə
çatdırılıb və 900 mindən çox test keçirilib. Yəni, görülən bütün bu tədbirlər və
işlər onu sübut edir ki, Azərbaycan dövləti vətəndaşların sağlamlığını, onları
koronavirus bəlasından qorumaq üçün lazımi infrastruktur formalaşdırıb. Azərbaycan
dövləti insanların sosial-psixoloji vəziyyətini nəzərə alaraq COVID-19-la
mübarizədə daha səmərəli addımlar atmaqla karantin rejimini tamamilə aradan
qaldırmaq niyyətindədir. Elə bu səbəbdən görülən işlərlə yanaşı, hazırda bir
neçə şirkətlə koronavirusa qarşı peyvəndin ölkəmizə gətirilməsi istiqamətində fəal
iş aparılır. Heç şübhəsiz, Azərbaycan peyvəndi əldə edən birinci ölkələr
sırasında olacaq”.
Əsassız çağırışlar edənlər
səhvlərini başa düşəcəklər
Deputat vurğulayıb ki, ölkəmizdə tətbiq olunan
qaydalar, vəziyyətə uyğun şəkildə atılan addımlar və karantin rejimi öz səmərəsini
verir: "Məhz bunun nəticəsində artıq bir çox şəhərlərdə bütün karantin məhdudiyyətləri
aradan qaldırılıb. Lakin çox təəssüflər olsun ki, bu uğurların fonunda məsuliyyətini
dərk etməyən, şəxsi maraqlarını xalqın mənafeyindən üstün tutanlar dövlətin
atdığı addımlara əsassız olaraq ləkə yaxır, ictimai rəyi çaşdırmağa çalışırlar.
Onlar gediş-gəlişin, restoranların açılmasını tələb edirlər. Amma bunun nəticəsini
və məsuliyyətini dərk etmirlər. Əgər onların istədikləri olarsa və yoluxmaların
sayı yenidən artmağa başlarsa, o zaman məsuliyyət kimin üzərində olacaq? Muzeylərin
açılmasına rişxəndlə yanaşanlar onlarla, yüzlərlə insanın COVID-19-a
yoluxmasına görə məsuliyyət daşıyacaqlarmı? Əlbəttə ki, yox. Bu səbəbdən də
dövlətin atdığı addımları dəstəkləmək, səbirli olmaq lazımdır. Əgər tendensiya
bu cür davam edərsə, qısa zaman ərzində normal həyatımıza qayıdacağıq. O zaman
bu gün əsassız çağırışlar edənlər səhvlərini başa düşəcəklər”.
İntellektual səviyyə
yüksək olmasaydı...
Milli Məclisin
deputatı Hikmət Babaoğluhesab
edir ki, koronavirus cəmiyyətimizdə ekstremal, fövqəladə vəziyyət yaradıb. Onun
fikrincə, bu vəziyyətdən çıxış yolu bütün fərdlərin bərabər, sinxron hərəkəti və
Operativ Qərargahın müəyyənləşdirdiyi qaydalara dəqiq riayət etmələri ilə
mümkündür: "Təqribən yeddi aylıq prosesdə biz bir daha əmin olduq ki, Azərbaycanda
qanun hamı üçün bərabər tətbiq edilir, sosial statusundan, ictimai mövqeyindən,
müxtəlif titullarından asılı olmayaraq hər bir vətəndaşın qanun qarşısında bərabərliyi
təmin edilir. Bu çox mühüm amildir. Məhz ədalət də buradan yaranan hadisədir.
Beləliklə də, cəmiyyət üzvləri qanunun hamıya bərabər şəkildə şamil edildiyini
görür və bunu ədalətli hesab edir. Ona görə də, hazırda koronavirusa qarşı
mübarizədə əldə etdiyimiz nailiyyətlər məhz bu prinsiplərlə bağlıdır - qanunun
aliliyinin, ədalətli şəkildə hamının bərabərliyinin təmin olunması və karantin
rejimin tələblərinə riayət olunması” Azərbaycan cəmiyyəti kifayət qədər savadlı
və intellektual cəmiyyətdir. Çünki bəzi istisnalar olmaqla əsas etibarilə cəmiyyətin
böyük hissəsi karantin rejiminin bəlli tələblərinə riayət edir və qanunun
aliliyini, ədaləti təmin edən dövlət orqanlarının fəaliyyətini yüksək qiymətləndirir
Bu amil isə mühüm məsələdir. Çünki hər bir fərd qanunu da, baş verən hadisələri
də öz idraki keyfiyyətlərinə uyğun olaraq mənimsəyir. Əgər dediyim intellektual
səviyyə yüksək olmasaydı, şübhəsiz ki, burada biz istisnaların daha çox nəzərə
çarpmasının şahidi olacaqdıq. Ona görə də düşünürəm ki, bu gün pandemiyaya
qarşı mübarizədə əldə etdiyimiz uğurlar bu məsələlərlə sıx bağlıdır”.
Xarici mütəxəssislərlə
təcrübə mübadiləsi
H.Babaoğlu hökumətin gördüyü operativ və effektli tədbirlərə
də diqqət çəkib. Deyib ki, tibbi sənayenin qurulması, qısa müddətdə
ixtisaslaşmış xəstəxanaların açılması, dövlətimiz tərəfindən yüksək səviyyədə
tibbi xidmətlərin təşkil olunması pandemiya ilə mübarizədə xüsusi əhəmiyyətə
malikdir: "Bu sıraya ayrı-ayrı ölkələrdən ixtisaslı, təcrübəli həkimlərin Azərbaycana
gətirilməsi və onların birbaşa virusla mübarizə prosesinə qoşulması, yerli mütəxəssislərimizlə
təcrübə mübadiləsi aparmalarını aid etmək olar. Bütün bunların hamısı nəticə
etibarı bizim bugünkü ümumi uğurumuzu təmin edib. Amma yenə də bu proseslərdə
önə çıxan heç şübhəsiz ki, qanunun tələblərinin hamıya qarşı bərabər şəkildə tətbiq
olunması və qanun qarşısında hamının eyni davranışının təşkil olunması hadisəsidir.
Bu da uğurlarımızın ən mühüm səbəblərindən biridir”.
Vətəndaşların məsuliyyətli
yanaşması
Milli Məclisin
deputatı Azər Badamov da
dövlətin pandemiya ilə mübarizə tədbirlərinin öz effektiv nəticələrini göstərdiyini
vurğulayıb. Qeyd edib ki, tətbiq olunmuş karantin tədbirləri və məhdudiyyətlər
COVİD-19 infeksiyasının yayılma dinamikasını azaldıb. Millət vəkili söyləyib
ki, ölkədəki sanitar-epidemioloji vəziyyəti nəzərə alaraq Operativ Qərargah tətbiq
olunmuş sərt karantin rejimində yumşalmalar həyata keçirilir:"Paytaxtla
regionlar arasında gediş-gəlişdə məhdudiyyətlər qüvvədə qalsa da təhsil müəsisələrinin,
muzeylərin, sərgi salonlarının və digər ictimai qapalı müəssisələrin fəaliyyətinə
icazə verilib. Lakin məhdudiyyətlərin aradan qaldırılması o demək deyil ki,
koronavirus infeksiyası bitib. Koronavirus infeksiyası bizimlə yaşayır və həyatımızda
müəyyən sərbəstlik yaranmasına baxmayaraq, biz bunu unutmamalıyıq. Dünya
praktikasında görürük ki, hansı ölkələr tam yumşalmaya getdisə, həmin ölkələrdə
koronavirusun yayılması yenidən sürətlənib. Hətta həmin ölkələrdə yenidən sərt
karantin rejiminin yenidən tətbiqi məsələsi müzakirə olunur. Bu gün ölkəmizdəki
sanitar-epidemioloji vəziyyət qənaətbəxşdir. Təbii ki, bu nəticənin əldə
olunmasının əsasında dövətin gördüyü təxirəsalınmaz tədbirlər və vətəndaşların
məsuliyyətli yanaşması dayanır”.
Tibbi maska, sosial məsafə
və şəxsi gigiyena
Millət vəkili müasir səhiyyə ocaqlarının
koronavirus xəstələrinin sağalmasına yönləndirildiyini, yeni modul xəstəxanaların
istifadəyə verildiyini xatırladıb. Bildirib ki, bütün bunlar ehtiyat tədbirləridir:
"Vətəndaş olaraq bugünkü tələblərə məsuliyyətlə yanaşaraq, koronavirusu aşağı həddə
saxlaya bilərik. Biz unutmamalıyıq ki, peyvənd tətbiq olunana qədər tibbi
maska, sosial məsafə və şəxsi gigiyenaya yüksək dərəcədə riayət etməklə
yaşamağa məhkumuq. Həm də dövlətimiz yeni peyvəndin alınması istiqamətində iş
görür. Biz istəyirik ki, tam sınaqdan çıxmış, etibarlı əsasları olan peyvəndi
ölkəmizə gətirək və insanları vaksinasiyadan keçirək. Koronavirusun ömrü əbədi
deyil. Bunun da bir sonu olacaqdır. Amma bu sonun nə vaxt olacağını heç kim deyə
bilmir. Ona görə də biz vətəndaşlar olaraq öz üzərimizə düşən məsuliyyətə yüksək
səviyyədə riayət etməliyik, özümüzü, yaxınlarımızı qorumaqla dövlətin gördüyü
bu misilsiz işlərə dəstək vermiş oluruq”.
Alpər TURAN