Bakı 23°C
O Truskavetsdən bizdə də var axı
Bakıdan
Lvova uçan təyyarələr, demək olar ki, sərnişinlə dolu olur. Bölgə xüsusən
sağlamlıq turizmi üçün mövsümi olmadığından həm Azərbaycanın, həm də Ukraynanın
hava yolu şirkətləri insanlarımızı həftədə bir neçə dəfə bu qədim və gözəl şəhərə
daşıyır. Ordan Truskavetsə 1 saat 20 dəqiqəlik yoldur. Xüsusən orta yaşlı və 50
yaş üstü kişilər məmnunluqla çamadanlarını yığıb Karpat bölgəsinə - Truskavetsə yollanırlar. Aralarında hər il
istirahət üçün bu şəhəri təkrar seçənlər daha çoxdur.
Truskavetsə dikilən gözlər
Tətildə
Lvova uçanda bu marağın canlı şahidi oldum. Səbəblər çoxdur. Elə bu aydın və
gizli həvəsləri nəzərə alıb marağımı boğa bilmirəm: "Doğrudanmı, Lvovda əhalinin
80 faizi qadınlardır?”. Truskavetsə yollandığım avtomobilin sürücüsü tanış sual
eşidirmiş kimi gülümsəyir: "Qadınlar bir az çoxdur, amma o qədər fərq yoxdur. Çoxu da iş, ya da oxumaq
üçün xaricə gediblər”.
Azərbaycanlılar birinci yerdə
Truskavetsə
naşı turistlər gəlmir. Sovet dövründən də qabaq sanatoriyaları, mineral suları
ilə məşhurdur. "Büvet”i dünyada tanınır. Küçələrdə turistlər qaynaşır.
Pandemiya insanların Truskavets sevgisinə mane ola bilməyib. Onların içərisində
azərbaycanlılar daha çox gözə dəyir. Bunu şəhərin meri də təsdiqləyir: "Hər ay Truskavetsə dünyanın hər yerindən minlərlə
turist gəlir. Onların içərisində azərbaycanlılar birinci yerdə dayanır”.
Bizimkilər
Karpatın incisinə maraqlarını daha çox istirahət və müalicə üçün çeşidli
imkanların olması ilə izah edirlər. Mineral suların möcüzəvi şəfasını isə
xüsusi qeyd edirlər: "Oralarda insanın təkcə vücudu deyil, qəlbi də dincəlir”.
Öz mineral mənbələrimiz
Şəhəri gəzdikcə, turizm potensialını ürəyimdə
götür-qoy etdikcə ölkəmizin analoji imkanları ilə paralellər aparıram. Axı
bizim də bölgələrimiz təbii müalicə ehtiyatları
ilə zəngindir. Müalicəvi neft və palçıqlarımız, mineral sularımız heç də sağlamlıq
turizmi ilə öyünən ölkələrdən geri qalmır. Ancaq Abşeron yarımadasında püskürən onlarca palçıq
vulkanından çıxan müalicə palçıqları nə balneoloqların, nə də kurortoloqların
diqqətini çəkir. Digər bölgələrimiz də termal və mineral bulaqlarla, balneoloji,
oksigen xassəli sularla zəngindir.
Təəssüf ki, özümüzdə olan bu
sərvəti turizm bazarına çıxara bilmirik. Bu məhsulların tanıdılması
istiqamətində işlər təkcə stendlərdə nümayiş olunmaqla bitir. Amma
özümüzünkülər daxil, qonşu ölkələrin də turistləri üçün sağlamlıq turizminin
ünvanına çevrilməyə əla imkanımız var. Bundan həm də iqtisadiyyatımız qazanar. Onda
insanlarımız da müalicə üçün məsələn, Bakı-Lvov təyyarəsinə deyil, elə öz
bölgələrimizə tələsər...
Təranə Məhərrəmova
