Meksika səfirinin Azərbaycandakı 4 ili
"Son 4 ildə Meksika və Azərbaycan münasibətləri daha da inkişaf edib.
Meksika ilə Azərbaycan artıq bir-birinə yaxın dövlətlərdir. Bu inkişaf iki ölkə
arasındakı mədəniyyət, turizm, ticari sahələri daha çox əhatə edir”.
Meksikanın Azərbaycandakı səfiri Rodriqo
Labardininin ölkəmizdəki fəaliyyətinin 4 illiyinə həsr olunan mətbuat
konfransında söylədiyi fikirlər dövlətlər arasında diplomatik münasibətlərin
qurulmasından bəri görülən işlərə aydınlıq gətirdi: "Bunlar turizm, ticarət,
mədəniyyət və ümumilikdə əməkdaşlıq sahələridir. Keçən illərə nəzər salsaq,
görərik ki, ölkələr bir-birini yaxşı tanıyır və qarşılıqlı əlaqələr inkişaf
etdirilir”.
İki ölkə arasında diplomatik əlaqələrin 1991-ci ildə qurulduğunu
xatırladan səfir qeyd etdi ki, Meksika Senatı Dağlıq Qarabağ münaqişəsi və
Xocalı soyqırımı ilə bağlı müxtəlif sənədlər qəbul edib: "Parlamentlərarası
əlaqələr inkişaf etməyə başlayıb, qarşılıqlı səfərlər baş tutub”. Diplomat
Azərbaycan səfirliyinin Meksika Birləşmiş Ştatlarında 2007-ci ildə,
Azərbaycanda isə Meksika səfirliyinin 2014-cü ildə fəaliyyətə başladığını
xatırlatdı: "Mən 2015-ci ildə Bakıya gəldim. İkitərəfli məsləhətləşmələrin
ikinci mərhələsi 2016-cı ildə baş tutdu. 2011-ci ildə artıq ikitərəfli səfərlər
baş tutmuşdu. İkitərəfli münasibətlər daha çox siyasətə yönəlmişdi. Bu müddətdə
rəsmi səviyyədə bir sıra qarşılıqlı səfərlər həyata keçirilib. 2012-ci ildə
hökumətlərarası sazişin imzalanması, əlaqələrin inkişafına daha da təsir
göstərib. Əlaqələrin inkişafı həmçinin bir sıra qurumlar arasında
münasibətlərin qurulmasına təkan verib”.
Diplomat məlumat verdi ki, Azərbaycan
ticarət missiyası Mexikoya səfər edib: "Ticarət ölkələrimiz arasında ikitərəfli
əlaqələrin bünövrəsini qoyub. İlk missiyanın heyəti sahibkarlardan ibarət idi.
Tekila və mezkal içkiləri Bakıya gətirildi. Tekila istehsalçıları Azərbaycana
bir neçə dəfə səfər ediblər və özəl şirkətlərlə müvafiq müqavilələr bağlanılıb.
Meksikanın Azərbaycan bazarında iştirakı artır. Ötən ili Meksika-Azərbaycan
ticarət mübadiləsində rekord il kimi səciyyələndirə bilərik. 2018-ci ildə ticarət
dövriyyəsi 26,2 milyon dollara çatıb”.
Diplomat qeyd etdi ki, Meksika Səfirliyinin təşkil etdiyi mədəniyyət,
rəssamlıq sərgiləri vasitəsilə ölkələrini daha çox tanıdıblar. Ölkələrimiz
arasında turizm əlaqələrinin inkişafına toxunan səfir qeyd etdi ki, Meksikadan
Azərbaycana gələn turistlərin sayında 9, Azərbaycandan gedən turistlərin
sayında 20 faiz artım var: "Azərbaycanlılar əsasən Mexiko və Konkun şəhərlərinə səfər edirlər”.
R.Labardini
qeyd etdi ki, Meksikadan Azərbaycana neft sektoru üçün borular, pivə,
avtomobillər və s. ixrac edilir. Səfir ölkələrimiz arasında təhsil əlaqələrinin
çox da inkişaf etmədiyini də qeyd etdi. Belə ki, hazırda Azərbaycandan Meksika
universitetlərində 6 tələbə təhsil alır: "Bu yaxınlarda riyaziyyat
olimpiadasında qalib gələn azərbaycanlı qız haqqında saytlar yazılar paylaşdılar.
Sevinirəm ki, həmin azərbaycanlı qız Meksikada doğulub. Ümid edirəm ki,
gələcəkdə ölkələrimiz arasında təhsil əlaqələri də inkişaf edəcək”.
Mətbuat konfransında iştirak etdi
Təranə Məhərrəmova