Kəmalə Nəbibəyova: “Heç vaxt “məndə alınmayacaq” sözünü işlətməmişəm” - Fotolar
Teatrı yaradan, onu yaşadan və müqəddəsliyini
qoruyub saxlayan insan fədaidir. Biz ona sənət fədaisi deyirik. Müsahibim Azərbaycan
Türkiyə Vizyon Teatrının rəhbəri Kəmalə Nəbibəylidir. Kəmalə Nəbibəyli ali
təhsil aldıqdan sonra 2 il Türkiyənin "Barış” televiziyasının əməkdaşı olaraq Azərbaycanın
tarixi, mədəniyyətini təbliğ edərək silsilə verilişlər hazırlayıb. Ancaq teatra
olan sevgisi onu vətəndən kənarda da rahat buraxmayıb. Çox keçmədən Firuz
Mustafanın "Müqəvva” tamaşası ilə böyük sevgi qazanıb. Daha sonra "Adsız
qadın”,"Maneken” tamaşaları ilə öz
tamaşaçı auditoriyasını yaratmağı bacarıb.Hazırda Azərbaycan Türkiyə Vizyon Teatrını yaradan
Kəmalə xanım bildirir ki, artıq İstanbulda
müstəqil teatr şəklində fəaliyyət göstərir. İki dövlət arasında mədəni
körpü rolunu oynayan bu teatrın qapısı nəinki orada yaşayan azərbaycanlıların
üzünə, eyni zamanda Türkiyədə yaşayan digər
xalqların nümayəndələrinə də açıqdır. Kəmalə xanım mədəniyyətin ən böyük
siyasət olduğunu deyərək Azərbaycan mədəniyyəti, ədəbiyyatı, tarixinin
təbliğatçısına çevrildiyini bildirir.
- Azərbaycan Türkiyə
Vizyon Teatrı hansı zərurətdən yarandı?
- Tanınmış sənətkarımız Elçin İmanovla birlikdə "Turan”
teleteatrında Aygün Həsənoğlunun "Adsız qadın” əsərinə səhnə quruluşu vermək istədik.
Elçin müəllimlə tamaşanın məşqlərinə hazırlaşmağa başladıq. Müəyyən qurumlara dəstək
olmaları üçün müraciət etdik. "Adsız qadın” özündə Xocalı hadisələrini əks etdirən,
bizim tariximizdən bəhs edən maraqlı bir əsər idi və biz bunu geniş auditoriyaya
təqdim etmək istəyirdik. Təəssüflər olsun ki, çıxdığımız bu yolda heç kimdən dəstək
görmədik. Bu tamaşanın səhnələşdirilməsində israrlı idim. Əgər öz vətənimdə
hazırlaya bilmirəmsə, bunu Türkiyədə nümayiş etdirəcəyəm, dedim.
- Niyə məhz
Türkiyədə?
- Çünki Türkiyənin əhalisi çoxdur, auditoriyası
daha genişdir. Orada hər bir millətdən nümayəndələr var və mən istəyirdim ki, bu
tamaşanı onlara nümayiş etdirim. Düşündüm ki, "Adsız qadın” tamaşasını çoxmillətli
bir ölkədə nümayiş etdirsək, daha maraqlı olar.
- Bildiyimiz
qədəri ilə, tamaşaları Azərbaycan dilində hazırlayırsınız. Türk tamaşaçıları
üçün Azərbaycan dilində tamaşa nə qədər maraqlıdır?
- Söhbət "Adsız qadın”dan gedirsə, tamaşamızın dili
təkcə Azərbaycan dilindən ibarət deyil. Bilirsiniz ki, köhnə türk dili bizim
danışdığımız dildir. Doğrudur, biz o tamaşanı Azərbaycan dilində hazırladıq, ancaq
bizim dilimizdə elə sözlər var ki, onları türklər anlamır və ya fərqli məna
ifadə edir. Məcbur oldum ki, əsərin bəzi yerlərinin sözlərini dəyişim. Biz də
onu çox rahat hamının anladığı bir dilə çevirdik. Yəni orda nə tam Azərbaycan,
nə də tam Türkiyə türkcəsi istifadə edilmədi. Ancaq onu da qeyd edim ki,
teatrımızın repertuarında olan uşaq tamaşalarımız türk dilindədir.
- Kəmalə
xanım, insan öz məmləkətində belə nəyisə yenidən quranda bir çox çətinliklərlə
üzləşir. Tək qadın, yad bir məmləkət və sıfırdan bir teatr. Çətin olmadımı?
- İstanbula gəldiyim ilk dönəmlərdə o qədər çətin
idi ki... Elə günlərim olub ki, hər şeyi unudub, geri dönmək istəyirdim. Yeni
məkan, tanımadığım bir ölkə mənə ağır gəlirdi. Təbii ki, Türkiyə ilə canımız,
qanımız, kökümüz birdir, bunlar öz yerində. Nə qədər də olsa, yeni bir cəmiyyət,
yeni psixologiya ilə qarşı-qarşıya idim, oturub uşaq kimi ağlayırdım.
Valideynlərim üçün çox darıxırdım. Ondan sonra bir gün durdum özümə dedim ki,
yox, Kəmalə, sən güclüsən, sınmayacaqsan, dəfələrlə səni sındırmaq istəyiblər,
sınmamısan, indi də geri çəkilməyəcəksən. Bakıda tamaşa hazırlayanda
çətinliklərlə üzləşəndə, Elçin İmanov deyirdi ki, "boş ver, olmayanda olmur”.
Ancaq mən heç vaxt "məndə alınmayacaq” sözünü işlətməmişəm. Demək ki, insan özünü
necə proqramlaşdırırsa, elə də yaşayır.Türkiyəyə gəldikdən sonra bəzi dərnəklər bizə
dəstək oldu. Burda hər şeyə yenidən başlamaq, tamaşaları hazırlamaq - hamısı maliyyə
tələb edirdi. Sağ olsun valideynlərim, mənə çox dəstək oldular. Onların qarşısında
baş əyirəm. Həqiqətən valideynlərim böyük ürəyə sahib insanlardır. Əlbəttə ki, bizə kömək edənlər də oldu. İstanbul
mədəniyyət evi bizə öz dəstəyini əsirgəmədi. Onlara təşəkkürümü bildirirəm. Türkiyə
Təhsil mədəniyyət mərkəzinin, Qarapapaq türkləri dərnəyinin bizim bu işlərimizdə
çox böyük dəstəkləri oldu. Türkiyənin Azərbaycandakı konsulluğunun da bizə
diqqəti olub. Tamaşalarımızda iştirak ediblər.Heç bir şey düşünmədən əlimdə bir şüar tutmuşam:
Azərbaycan. Bir gün dedilər ki, madam vətəni bu qədər sevirsən, niyə vətəni
tərk etmisən? Dedim, mən orada bacara bilmədiyimi burada etməyə çalışıram ki,
Türkiyədə bizim keyfiyyətsiz və bəsit musiqimizi dinləməsinlər. Axı bizim çox
zəngin və musiqi tariximiz var.
- Qurucusu olduğunuz "Turan” teleteatrı fəaliyyətini nə üçün yarımçıq qoydu?
- "Turan”
teleteatrı 2014-cü ildə Bakıda yaranıb. Hətta sizə deyim ki, Xocalı soyqırımı
ilə bağlı Rəşid Behbudov adına Mahnı Teatrında tədbir də keçirdik. Tədbirə
millət vəkillərimiz təşrif buyurmuşdu. Biz istədik ki, bu teatr vasitəsi ilə bütün
türk dünyasının ədəbiyyatını, mədəniyyətini bir araya gətirək. Siyasətdən uzaq,
türkdilli xalqların kiçik bir modelini yaradaq. Heç bir siyasi məqsəd, məram
daşımırdı. Aygün Həsənoğlunun "Adsız qadın” tamaşasını səhnələşdirməyi qərara
adlıq.
- "Adsız
qadın” tamaşasında aktrisa olaraq sizi səhnədə gördük. Bu sizin ilk
monotamaşanız idimi?
- Xeyr. Tamaşanın rejissoru Elçin İmanova dedim ki,
bu tamaşanı canlandırmaq üçün bir aktrisa düşünürsənmi? Dedi, birini düşünmüşəm
artıq. Kimliyini soruşanda, o aktrisanın mən olduğumu söylədi. Düzdür, o zamana
qədər mən monotamaşa oynamışam, ancaq bu tamaşanın ağır yükünün altına girməkdən
qorxurdum. Bir gün başa düşdüm ki, onu istədiyimiz kimi hazırlamaq üçün maliyyə
dəstəyi lazımdır. Müəyyən rəsmi qurumlara müraciətlər etməyə başladım. Çox
gülməli olsa da, böyük şirkətlər cüzi miqdarda maliyyə ödəmək cavabları
verdilər.
- Bu sizi
çoxmu məyus etdi?
- Təbii ki, məyus etdi, axı biz bunu özümüz üçün
etmirdik. Məyus olsaq da, qırılmadıq. Hətta heç zaman unutmaram, Xocalı faciəsini
özündə əks etdirən bir tamaşa hazırlayanda, Qarabağdan olan iş adamı ilə
görüşdüm. Layihə şəklində təqdim etdim. Mənə dedi ki, sənin işin-gücün yoxdur?
Açığı, bu mənim üçün böyük bir zərbə oldu. Elçin İmanov dedi ki, bu ssenarini
qoyuram kənara, əgər yüngül bir şey hazırlasaydıq, sponsoru çox olardı. Görünür
biz səhv etmişik, yolumuzu düz tutmamışıq. Ancaq mən sonuna qədər mübarizə
apardım. O an ağlıma İstanbul gəldi. Meqapolis, müxtəlif millətlərin yaşadığı
bir ölkə. Düşündüm ki, burada bəlkə nəyəsə nail ola bilərəm. Səsimi qismən də
olsa çatdıra bilərəm.
-
Peşmansınızmı?
- Türkiyəyə gəlməyimə peşman deyiləm. Əksinə, bu
qədər elədiklərimi Bakıda edə bilməzdim.
- Türkiyədə
sizdən başqa Azərbaycan Teatrı, yəni rəqibiniz varmı?
- Rəqibimiz olmasa da, bizi qısqanan insanlar var.
Baxmayaraq ki, onlar teatrdan uzaq insanlardır. Çox istəyərdim ki, onlar da
teatr kimi formalaşsınlar, rəqibimiz olsunlar, inkişaf edək. Onlarla aramızda
rəqabət olsun. İnkişafın olması üçün rəqabət lazımdır. Təəssüflər olsun ki,
bunu hamı qəbul etmir. Amma eybi yoxdur, hansısa gücə sahibəm ki, kimlərsə də
çəkinir. Biz davam edəcəyik.
- Vizyon
teatrı deyildikdə, nə nəzərdə tutulur?
- Əvvəlcə teleteatr adlandırdıq. Sonra gördük ki,
burda onu anlamırlar, onun üçün adını
dəyişib, vizyon elədik. Bizim hazırladığımız "Adsız qadın” elə teletamaşadır.
Tamaşanın eyni zamanda prosesi həm monitorda, həm də səhnədə gedir. Bir az
çətin olsa da, Azərbaycana bu janrı Elçin İmanov gətirdi. Biz onu ilk dəfə
Türkiyədə həyata keçirə bildik. Monitorda nümayiş olunan çəkimləri də biz özümüz
eləmişdik.
- İstərdik,
bizə yeni layihələrinizdən danışasınız.
- İndi də televiziya və film layihələrimiz var. Hazırda
tarixi filmlə bağlı müzakirələr edirik, tarixçilər həmin layihənin üzərində işləyir.
Dövlət dəstəyi ilə onu həyata keçirəcəyik. Burda Azərbaycan məktəbi var, çox
yaxın bir zamanda oranın uşaqları üçün tamaşa hazırlayacağıq.
- Teatrlara
gedənlərin sayı günü-gündən azaldığı bir zamanda tamaşaçıları teatra necə cəlb
edirsiniz?
- Əksinə, bizim tamaşaçı problemimiz olmur. Daha
çox diqqət görürük. Getdiyimiz yerdə birbaşa bələdiyyə rəhbəri ilə danışa bilirik,
tamaşamızı alırlar. Hazırda boş günümüz yoxdur. Şükürlər olsun, heç kimə də yalvarmırıq
ki, bizim biletimizi satın. Bu da onun göstəricidir ki, biz işləyirik.
- Uğur olan
yerdə qısqanclıq da olur. Siz həmkarlarınız tərəfindən qısqanclığa tuş
gəlmisinizmi?
- Qısqananlara deyirəm, yaxşı ki, varsınız, məndə
güc yaradırsınız. Gedib Azərbaycanda demişdilər ki, guya mənim diplomum yoxdur,
həvəskar fəaliyyət göstərirəm. Ancaq mən Azərbaycan Dövlət Mədəniyyət və
İncəsənət Universitetində təhsil almışam. Həm bakalavr, həm də magistr
təhsilimi qırmızı diplomla başa vurmuşam. Bu gün də burada ölkəmizi təbliğ
edirəm. Buna sevinmək əvəzinə, yalan məlumatlar verənlər olur.
Xəyalə Rəis