İncə yumor, mənalı gülüş, zəngin mimika
Və ya baharda
doğulub, baharda da həyatla vidalaşan sənətkar
O, təkcə
rollarına görə deyil, həm də xarici görünüşü, mimikası, özünü tamaşaçıya
təqdimetmə bacarığı ilə daim seçilən
aktyorlardan olub. Milli kino və teatrımızın səhnəsində yaratdığı obrazlar, elə
bil Bəşir Səfəroğlu üçün yazılmışdı. Bəlkə də başqa aktyorlar bu obrazları
oynasaydı, o qədər tamaşaçı sevgisi qazana bilməzdi. İncə yumor,
mənalı gülüş, zəngin mimika uzun müddət Azərbaycan Musiqili Komediya Teatrında
işləmiş bu aktyorun ifasına xas təkrarolunmaz cəhətlərdən idi...
14 yaşından səhnəyə
Bəşir Səfəroğlu
11 mart 1925-ci ildə Bakıda doğulub. Heç bir xüsusi peşə təhsili almayıb. Heç
teatr təhsili də olmayıb. Yeddi illik təhsilini Bakıda aldıqdan sonra ailə
vəziyyətinin ağırlığı ilə əlaqədar məktəbdən uzaqlaşıb. İlk dəfə səhnəyə 14
yaşında çıxıb və "Sevil” tamaşasında Gündüz rolunu oynayıb. Tamaşadakı bu
kiçik rol onun həvəsini daha da artırır. Ona görə də yaxşı rollar almaq
məqsədilə Dənizçilərin Mədəniyyət Evinə üz tutur və burada "Ölülər” tamaşasında
oynayır. Bu tamaşa onun gələcək taleyinə böyük təsir göstərir. Onun bu
tamaşadakı işini görən Musiqili Komediya Teatrının rejissoru Niyaz Şərifov
Bəşiri bu teatrda işləməyə dəvət edir. Artıq Musiqili Komediya Teatrı
aktyorlarının siyahısında 17 yaşlı Bəşir Səfəroğlunun da adı var idi.
1941-ci ilin
noyabrında yaşı çatmasa da könüllü cəbhəyə gedib. 1942-ci ildə kontuziya alaraq
eşitmə və danışma qabiliyyətini itirib. Bir müddət fəhlə, yük maşınının sürücüsü
işləyib. Ancaq teatra olan həvəsi onu tərk etmirdi. Niyaz Şərifov hər gün
teatrın qarşısına gəlib, həsrətlə bu binaya boylanan Bəşiri yenidən çəkib ora gətirir.
Beləliklə, o, əvvəl tamaşaçı qismində teatra gəlir, sonra isə kütləvi
səhnələrdə oynamağa başlayır. Günlərin birində yuxuda səhnəyə yararsızlığını
görür və bərk həyəcanlanır. Qışqırıb yerindən qalxır. Bununla da həm dili
açılır, həm də eşitməyə başlayır. O gün Bəşirin həyatında ən yaddaqalan bir
tarix olur. Bu, onu ömürlük səhnəyə bağlayan taleyin möcüzəsi idi.
Bir müddət
sonra isə onu truppaya aktyor qəbul edirlər.
Bəşir Səfəroğlu
Üzeyir Hacıbəylinin və Zülfüqar Hacıbəyovun klassik operettalarında, əsasən isə
çağdaş dramaturq və bəstəkarların musiqili komediyalarında müxtəlif xarakterli,
satirik, yumoristik, məzhəkəli rollarda çıxış edir. Aktyorun yaradıcılığında
xüsusi yer tutan Möhsün ("Beş manatlıq gəlin”, Məmməd Səid Ordubadi və Səid
Rüstəmov), Qaradavoy və Çiko ("Keto və Kote”, Vladimir Dolidze), Qoçu Əsgər və
Məşədi İbad ("Məşədi İbad”, Üzeyir Hacıbəyli), Uzun və Nəcəf ("Durna”, Süleyman
Rüstəm və Səid Rüstəmov), Qədir və Gülümsərov ("Ulduz”, Sabit Rəhman və
Süleyman Ələsgərov), Salyanski və Qəhrəman ("Gözün aydın”, Məhərrəm Əlizadə və
Fikrət Əmirov) və b. obrazlar tamaşaçı qəlbinə yol tapıb.
B.Səfəroğlunun iştirakı ilə
göstərilən tamaşalara bilet tapmaq o qədər də asan deyildi. O, Musiqili
Komediya Teatrının aparıcı aktyorlarından birinə çevrilmişdi. Onun xalq
artistləri Nəsibə Zeynalova və Lütfəli Abdullayev ilə tərəf müqabilliyi o qədər
canlı və maraqlı alınırdı ki, tamaşaçı alqışları bitmirdi. "Aya səyahət”
komediyasında oynadığı Hacı Kərimin sözləri bu gün də tamaşaçıların sevimli
ifadəsi kimi yaddaşlarda yaşayır.
Bəşir Səfəroğlu
milli kinematoqrafiyamıza da öz töhfələrini verən aktyorlardandır. O, cəmi 7
filmə çəkilib. "Aygün”, (Əmirxanın dostu), "Qəribə əhvalat” (Cəmil),
"Əhməd haradadır?” (Sərxoş), "Ulduz” (Gülümsərov), "Xoca Nəsrəddinin 12 qəbri”
(Nəsrəddin), "Yun şal” (Kişi) və "Yaşamaq gözəldir, qardaşım” (Səfər) filmləri
bu sıradadır. Aktyorun kinofilmlərdə yaratdığı unudulmaz obrazlardan Gülümsərov
rolu daim yaddaşlardadır. 1964-cü ildə istehsal olunan bu filmə aktyorun dəvət
olunması onun teatrda artıq məşhur bir sənət adamı kimi tanınması ilə bağlı
idi. Digər tərəfdən, teatrda böyük uğurla səhnəyə qoyulan bu musiqili
komediyada o, həm Qədirin, həm də Gülümsərovun maraqlı obrazlarını yaratmışdı.
Filmin quruluşçu rejissoru Ağarıza Quliyev də yəqin ki, onu tamaşada görüb,
seçmişdi. Gülümsərov bu istedadlı aktyorun özünün də sevdiyi və böyük
məhəbbətlə yaratdığı ekran qəhrəmanlarından idi.
1965-ci ildə "Tacikfilm”in
"Mosfilm”lə birgə çəkdiyi "Xoca Nəsrəddinin 12-ci qəbiri” filmində ona baş rolu
– Xoca Nəsrəddini həvalə etmişdilər. Rejissor Klementi Mints Bakıda onun
tamaşalarına baxandan sonra bu qərarı vermişdi. Film bütün SSRİ-də böyük
maraqla qarşılanmışdı.
60-cı illərin
ortalarında Azərbaycan Dövlət Filarmoniyasında təşkil olunan "Gəlməli, görməli,
gülməli” miniatür teatrında Bəşir Səfəroğlu onlarla satirik obraz yaradıb.
"Biz Bəşir Səfəroğlusuz teatrı istəmirik...”
Aktyorun sənət yolunu qızı,
Azərbaycanın Xalq artisti Afaq Bəşirqızı uğurla davam
etdirir. Atasının yarıda qalan arzularını həyata keçirmək, rollarını tamamlamaq
üçün çalışır.
Afaq xanım atasını xatırlayarkən
çox maraqlı məqamları yada salır: "Atam dünyadan elə tez getdi ki, onunla
doyunca bir yerdə yaşamaq mənə qismət olmadı. Həyatın keşməkeşlərini və
iztirablarını isə 14 yaşımda duydum. Atamla həyatımın cəmi 922 gününü bərabər
yaşamışam. Əslində, onunla yaxından tanışlığımın ömür tarixçəsi də elə bu
qədərdir. Bilmirəm, buna təsadüfümü deyim, ya taleyin gərdişimi – ancaq
doğulduğum günü valideynlərimdən məhrum olmuşam. Anam məni dünyaya bağışladığı
an öz həyatını itirib. Mən də onun məhəbbətini və nəvazişini hiss etmədən ondan
ayrılmışam. Bundan sonra məni anamın valideynləri saxlayıb böyüdüblər. Bu üzdən
də atamdan uzaq düşmüşəm. Nənəmlə babamın əllərinin taqəti tükənib
qocaldıqlarından mənim kimi azyaşlı uşağa baxmaq onlar üçün çətinləşmişdi. Buna
görə də 12 yaşım olanda məni atamın himayəsinə vermişdilər. 14 illik ömrümün
atamla keçən 922 günündə də ona doyunca "ata” deyə, nə də üzünü görə bilmişdim.
Səfəroğlunun adı gələndə indi də adamların dodaqları qaçır. Çox qəribədir,
hətta özünü və tamaşalarını heç vaxt görməyən gənc nəsil belə atamın
obrazlarına sakit baxa bilmir. Hazırda zövqlərin dəyişildiyi söylənilsə də, yüz
il bundan sonra belə Bəşir Səfəroğlunun insanların hafizəsində daim
yaşayacağına inanıram. Bəşir Səfəroğlu səhnədən milyonlarla insanı güldürsə də,
həyatda çox ciddi və amiranə insan olub və heç vaxt haqqı nahaqqa verməyib.
Bəlkə də elə buna görə 43 yaşında ikən həyatdan gedib. Atamın oğlu yox idi
deyə, onun yolunu mən davam etdirdim. Öz ömrümdə atamın yarımçıq qalan həyatını
da yaşamalı oldum. Arzumun əksinə çıxıb şərqşünas əvəzinə, aktrisa oldum,
dramatik obrazlar yaratdım və Moskvada "Bəşir Səfəroğlu” teatrını açdım.
Bilmirəm, bu hiss haradan yarandı? Atama olan sevgimdən, ya sənətkara qarşı
duyduğum məhəbbət hissindən? Deyə bilmirəm. Bircə onu bilirəm ki, həyatdan
atamın və özümün intiqamımızı almışam. Çünki o, bizim hər ikimizə qarşı amansız
olub. Həyat mənimlə çox pis zarafat edib. Doğulduğum gündən dəfələrlə qürurumu
sındırmaq istəsə də, buna gücü çatmayıb. Əlimdən aldıqlarının əvəzində məni
bərkidib və dözüm verib. 1969-cu il martın 22-də atam keçindi. Qəribədir ki,
onun doğulduğu və öldüyü təqvim arasındakı fərq 11 gündür. Əgər o, ikinci dəfə
dünyaya gəlsəydi, yəqin bu zaman kəsiyini də özünəməxsus qarşılayar, zarafata
salıb deyərdi: - Demə, olumumla ölümüm arasında cəmi-cümlətani 11 gün fərq
varmış. İşə bir bax, 43 illik həyatım 11 günə sığınırmış... Atam dünyasını
dəyişəndə bütün şəhər onu yola salmağa gəlmişdi. Mən isə ona qədər o cür
izdihamlı dəfn mərasimini heç vaxt görməmişdim. Cənazəsi bir vaxtlar səhnəsində
yaddaqalan obrazlar yaradıb salonundan gurultulu alqış sədaları kəsilməyən
Musiqili Komediya Teatrından götürüldü. Aktyor yoldaşları onun ölümünə dözə
bilməyib teatrın qapı və pəncərələrini sındırır və qışqıra-qışqıra "Biz Bəşir Səfəroğlusuz
teatrı istəmirik...” deyirdilər. İzdiham Musiqili Komediya Teatrından Fəxri
Xiyabana doğru üz tutanda yollar bağlanmış, hərəkət dayandırılmışdı. Atam dəfn
edilərkən onun üçün qazılmış son mənzilə baxaraq heyrətdən sarsılmışdım. İndi
düzbucaqlı qazılmış bu yer bir ay əvvəl atamı tapıb sinəsinə qısıldığım həmin
yer idi. Axı bu haqda yalnız ikimiz bilirdik. Onun dəfn edildiyi gün al qırmızı
gün çıxmışdı, bir isti var idi ki... Amma ertəsi gün Bakıda görünməmiş qar
yağdı və atamın məzarının üstünü tamam örtdü”.
Həm böyük məsuliyyət, həm də şərəf
Bəşir Səfəroğlu
43 yaşında dünyasını dəyişib. Kino və teatrda oynamaq istədiyi nə qədər rollar
ürəyində qalıb. Bəşir Səfəroğlu 1964-cü ildə əməkdar artist, 1968-ci ildə xalq
artisti fəxri adlarına layiq görülmüşdü. 1969-cu il martın 23-da dünyasını
dəyişən bu böyük aktyorun məzarı Fəxri Xiyabandadır. "Atam bahar fəslində dünyaya gəldiyinə görə, baharı çox
sevirdi. Qismət belə oldu ki, dünyasını da baharda dəyişdi. Əminəm ki, Azərbaycan
xalqı var olduqca Bəşir Səfəroğlu xatirələrdə əbədi yaşayacaq. Bəşir
Səfəroğlu adi bir şəxsiyyət deyildi. Adına gəmilər, küçələr, teatr olan
sənətkardır. Bu da hər sənətkara qismət olmur. Bəşir Səfəroğlu dünən olduğu
kimi, bu gün də, sabah da bənzərsiz obrazları ilə qəlblərdə yaşayacaq. O,
Azərbaycan teatr səhifəsinə qızıl hərflərə düşən aktyordur. Onun qızı olmaq
doğrudan da mənim üçün həm böyük məsuliyyət, həm də şərəfdir”.
Təranə Məhərrəmova