Dünyaya çıxmaq istəyiriksə, hər zaman hazırlıqlı olmalıyıq - Fotolar
Sentyabrın 25-dəTürk Dünyasının
Mədəniyyət Paytaxtı Oş şəhərində keçirilən VII "Art-Ordo” Türkdilli Ölkələrin
Teatr Festivalında ölkəmizi Azərbaycan Dövlət Gənc Tamaşaçılar Teatrı təmsil
edib. Festivalda teatrın istedadlı aktrisasının ifasında "Mən öləndə ağlama”
adlı monotamaşa nümayiş olunub. Pyesin müəllifi Pərvin Nurəliyeva,quruluşçu
rejissoru Ayla
Osmanova, işıq
və səs rejissoru Zaur Rəşidov olan
tamaşa Oş şəhər Bələdiyyəsinin
xüsusi diplomlarına, festivalın əsas mükafatlarından birinə -"Ən uğurlu yaradıcılıq axtarışları”nominasiyasında
birinci yerə və pul mükafatına layiq görülüb.
Səfər sonrası istedadlı
aktrisa Səbinə Məmmədova təəssüratlarını bizimlə bölüşdü:
- Festivalın qaydalarına görə, son bir
ildə hazırlanan, yeni tamaşalar VII "Art-Ordo” Teatr Festivalında nümayiş oluna
bilərdi. Gənc Tamaşaçılar Teatrının rəhbərliyi bizə etimad göstərdi və
gənclərdən ibarət olan yaradıcı heyətimizlə festivalda iştirak etdik. Teatr festivalında
Azərbaycandan Akademik Musiqili Teatrın direktoru Əliqismət Lalayev və
ADMİU-nin professoru İsrafil İsrafilov da iştirak edirdilər. Bir məqamı da qeyd
edim ki, festival günlərində TÜRKSOY-un Teatr rəhbərləri şurasının iclası da Oş
şəhərində keçirilirdi. Festivalda iştirak etdiyimiz günlər ərzində iştirakçı
dövlətlərin tamaşalarını seyr etmək imkanımız oldu. Tamaşaları seyr etmək bizim
üçün maraqlı idi. Müxtəlif türkdilli xalqların teatrlarına, nümayiş
etdirdikləri əsərlərə tamaşa etdikcə, öz teatrımız haqqında müəyyən fikirlər
formalaşdırırdıq. Məsələn, Qırğızıstanın 5 teatrı dəvət olunmuşdu. Nümayiş
olunan tamaşaları izlədikcə bir daha əmin oldum ki, Azərbaycan teatrı böyük bir
intibah dövrü yaşayıb. Bu gün biz sözün əsil mənasında, dünya ilə inteqrasiya
edə bilən, teatr prosesində müəyyən yol qət etmiş vəziyyətdəyik.Festivalda nümayiş etdirdiyimiz
tamaşanı izləyənlər öz təəccüblərini gizlədə bilmirdilər. Orda izlədiyimiz
tamaşalar heç də bizim tamaşamızdan yüksək səviyyədə deyildi. Orada qeyd
etdilər ki, 3 xanımın ortaya çıxardığı bir iş kişilərin ağlına gəlməzdi.
Tamaşada psixoloji məqamlar, alt qatlar, eyni zamanda Qarabağ mövzusuna
toxunduq. Tamaşanın qəhrəmanı qeyd edir ki, "anamın qardaşı Qarabağ döyüşlərində
həlak olmuşdu”.
- "Mən
öləndə ağlama” tamaşası kiçik səhnə üçün nəzərdə tutulduğu halda, onu böyük
səhnədə oynamaq sizə çətinlik yaratmadı?
- Həqiqətən də ilk dəfə idi ki, mən o
tamaşanı böyük səhnədə oynayırdım. Orada hər kəs maksimum 5 nəfərlə tamaşa
oynadığı halda, mən monotamaşa ilə səhnəyə çıxdım. Biz bu tamaşanı Gənc
Tamaşaçılar Teatrının kiçik səhnəsində oynamışdıq. İlk dəfə idi ki, 400
nəfərlik zalda nümayiş etdirirdik. Həmin səhnəyə uyğun olaraq mizanları dəyişdik,
hər şeyi 20 dəqiqənin içərisində həll etdik. Tamaşanın nəticəsi də gözəl oldu.
Türkdilli dövlətlərin teatr cameəsinin nümayəndələri, teatrşünaslar gözəl
fikirlər səsləndirdilər. Nəinki teatrşünaslar, tamaşadan sonra bizə yaxınlaşıb
münasibətini bildirən, ünvanımıza xoş sözlər söyləyən tamaşaçılar da oldu.
- Bu
festival sizə nə qazandırdı?
- Bu festival mənə özümə inanmağı,
potensialıma daha çox bələd olmağı öyrətdi. Və bir şeyi anladım ki, öz üzərimdə
daha çox çalışmalıyam. Öz üzərimdə elə işləməliyəm ki, heç kim məndə səhv
tapmasın. Mən elə bir plastikaya malik olmalıyam ki, heç bir problemlə
üzləşməyim. Aktyor rezin kimi olmalıdır. Əgər biz dünyaya çıxmaq istəyiriksə,
hər zaman hazırlıqlı olmalıyıq.
- Mənəvi
olaraq Azərbaycanda kimlərdən dəstək gözləyirdiniz və o dəstəyi gördünüzmü?
- Açığını desəm, çox az adam sidq-ürəklə
bizi dəstəkləyirdi. Bunu hiss etməyə nə var ki? Ancaq onu da qeyd edim ki, heç
zaman heç kimdən dəstək gözləməmişəm. Ötən il Rusiyada XII Beynəlxalq Yay Teatr Məktəbinə gedəndə, hər kəs elə bilirdi
ki, mən orada epizodik rol oynayacam. Mən ora gedib dram qrupuna düşəndə və
orda əsas qəhrəmanı oynayanda, bildim ki, heç kimin dəstəyinə ehtiyacım yoxdur.
Əgər istəyirəmsə, edə bilərəm. Hər şey insanın özündən asılıdır. Dəstəyə gəlincə
isə, festivalda iştirak edəndə, teatrımızın direktoru Nahidə İsmayılzadə öz
"Facebook” səhifəsində paylaşım etdi, bizə uğurlar arzuladı. Bu mənim üçün
böyük dəstək idi.
-
Sizdə müşahidə vərdişlərinin yaxşı inkişaf etdiyinin şahidi olmuşuq. Aktrisa üçün
müşahidəçi olmaq nə qədər önəmlidir?
- Canlandırdığım hər obrazı müşahidələrimdən
keçirirəm. Əgər ruhi xəstə obrazını canlandırıramsa, ruhi əsəb dispanserinə gedirəm.
Misal üçün, "Mən öləndə ağlama” tamaşasını hazırlamamışdan öncə pyesin müəllifi
Pərvin Nurəliyeva,quruluşçu
rejissoruAyla Osmanova və mən Maştağada yerləşən ruhi əsəb
dispanserinə getdik. Orda yaşadıqlarımızın depressiyasından hələ də çıxa bilmirik. Tamaşada canlandırdığım qəhrəmanla
eyni problemi yaşayan bir qızla söhbət etdik və mən o qızdan istifadə etdim. Belə
ki, o danışdıqca, bütün hərəkətlərini, jestlərini götürməyə başladım. Pərvinlə Ayla
donmuş vəziyyətdə idi və mən prosesi izləyirdim. Bu xanım magistr təhsili alıb,
çox istedadlıdır, Mendeleyevin cədvəlini əzbər bilən fizikdir. 1986-cı ildə bir
sevgi yaşayıb, sevgisi qınağa səbəb olub, münasibətləri alınmadıqda, qız psixoloji
gərginlik keçirib. Qız bizimlə söhbətində dedi ki, mən günah işlətmişəm, əlini
yuxarı qaldırıb göyü göstərək söylədi ki, "o mənimlə danışır, deyir ki, sən səhv
etmisən, düz etməmisən”. O danışdıqca, mən də onun bütün jestlərini özümə köçürürdüm.
Daha sonra onu digər otağa apardılar. Biz bir psixoloqla görüşdük. O, bizi şizofreniya
və digər psixoloji xəstəliklərlə bağlı məlumatlandırdı. Mənim oynadığım obraz isə
bir aydan sonra şizofreniya xəstəliyi tutub, ömürlük xəstəxanada qalıb öləcək bir
insan idi. Bu tamaşa mənə dəhşətli psixoloji təsir göstərdi. Sırf bu rola görə bütün
çevrəmdəki insanlarla əlaqəmi kəsmişdim.Bəli, mənim müşahidə qabiliyyətim çox güclüdür.
"Ağ ölüm” tamaşasında narkoman qız obrazını canlandırmaq üçün Bakıda geridə
qalmış bir bara getdim. Kimsə məni orada görsəydi, adıma söz çıxarardı (gülürük).
Ancaq mən ora müşahidə üçün getmişdim. Bu tamaşa məni böyüdüb. Ən məşhur
əsərlərdə tanınmış simaları oynamışam. Ancaq bu tamaşa mənə daha çox təsir
edib. Bu tamaşadan sonra mən bir az fərqli oldum. Heç nə vecimə deyil.
- Keçən
görüşümüzdəki qız sanki siz deyilsiniz...
- «O gecə» serialındakı obrazım mənə
bir daha sübut etdi ki, Səbinə komplekssizdir və onu olduğu kimi qəbul etmək
lazımdır. Kim məni olduğum kimi qəbul etmirsə, o insandan uzaqlaşıram.
- Sizi
qəbul etməyənlər var?
- O qədər... Bilirəm ki, insanlara
əziyyət verirəm və ona görə də insanlarla çox az münasibət saxlamağa çalışıram.
Ona görə də çevrəmdə çox az insan var. Mən nə üçün dəyişməliyəm? Hərdən
düşünürəm ki, texnikasız aktrisayam, bir gün ürəyim partlayacaq, öləcəm, ya da
canlandırdığım obraz alınmayacaq. Misal üçün, sonuncu dəfə oynadığım «Leyli və
Məcnun» tamaşasından əvvəl tamaşaya başlamışıq və tamaşa alınmır. Tamaşanın da
əsası baş roldur. Mən bilirəm ki, bu tamaşanı aparıram. Mən tamaşaçıları niyə
aldadım? Birdən məni səhnəyə itələdilər və barmağım qırıldı. Baxdım ki,
barmağım əyilib, əlimə baxıram, ağlamağım gəlir... Və başladım hönkür-hönkür
ağlayaraq oynamağa. Bu tamaşa o qədər gözəl alındı ki... Fikirləşdim, Allah
başıma elə bir iş gətirir ki, həqiqətən nəsə olsun, tamaşa təbii alınsın.
-
Sanki bu dəfə sizi bir az üsyankar gördük.
- Nə vaxtsa hamımız öləcəyik. Heç kim əbədi
deyil. Kimsə Hökumə Qurbanova kimi ad qoyacaq, kimsə qoymayacaq. Mən nəyə görə kiminsə
qabağında əyilməliyəm? İstədiyim kimi yaşamaq istəyirəm. Mənim üçün milli-mənəvi
dəyərlərimiz hər zaman önəmlidir. "Azərbaycanda qısa geyinməyim, xaricdə geyinim”
kimi bir düşüncə sahibi deyiləm. Əksinə, vətəndən kənara çıxanda daha uzun geyinməyə
çalışıram. Bu mənim həyatımdır. Mən heç kimin həyatına qarışmıram. Mənim planetimə
girməyin. Planetimə girib ulduzlarımı darmadağın edəcəksənsə, gəlmə, sadəcə uzaqdan
seyr et. Bilirəm ki, mənə nifrət sevgidən daha çoxdur.
- Niyə?
- Çünki kiminsə inkişafına göz yuma bilmirlər.
Heç bir "kruq”a girmirəm, heç kimi yalandan tərifləmirəm, heç kimlə oturub-durmuram,
arxamda da heç kim yoxdu. Bir Allahım, bir də anam var. Anamın halal zəhməti ilə
böyümüşəm, bununla fəxr edirəm. Bu günə qədər heç kimin qapısında boynubükük olmamışıq.
Anam mənim üçün hər şeydir.
- Nə üçün
rejissorlar hər zaman sizə təhqir olunmuş, zorlanmış, döyülmüş, həyatı məhv olmuş
faciə qəhrəmanlarını həvalə edirlər?
- Bilmirəm. Yəqin ki, bu məndə daha yaxşı alınır. Mənim hər zaman müşahidəm
güclü olub. Hazırda "Atılmışlar” serialında obraz canlandırıram. Gündəlik
serial çəkirik. Serialın rejissoru Elvindir. Komandası çox istedadlıdır. O, çox
səbirli və təmkinli, kifayət qədər də savadlıdır. Mənim üçün gənclərlə işləmək
daha rahatdır. İşimə daha da böyük uğuru gənclər gətirə bilərsə, onlarla
birlikdə inkişafa doğru getmək istəyirəm
Xəyalə Rəis