Dirisinə də, ölüsünə də sahib çıxmayan Ermənistan
Ekspertlərin
fikrincə, Paşinyan narazılığın artacağından qorxaraq cəsədləri almaqdan imtina
edir
Ermənistan-Azərbaycan, Dağlıq Qarabağ münaqişəsi
başlayandan indiyə qədər ötən vaxt ərzində Ordumuz erməni işğalçılarına qarşı rəşadətlə
mübarizə aparır. İmperialist qüvvələrin hamiliyini, hərtərəfli dəstəyini öz
üzərində hiss edən Ermənistan əsgərlərimizin iradəsi qarşısında sarsılıb. Birinci
Qarabağ müharibəsində 30 minə yaxın vətəndaşımız şəhid olub, 50 minə yaxın
azərbaycanlı hərbçi müxtəlif dərəcəli yaralar alıb. Güc balansının Azərbaycanın
əleyhinə olması səbəbindən torpaqlarımızın 20 faizi Ermənistan silahlı
qüvvələri tərəfindən işğal olunub, Ordumuz ümumən müharibəni deyil, bir döyüşü
uduzub. Sonrakı dövrlərdə bu işğalın aradan qaldırılması, torpaqlarımızın azad
edilməsi üçün bir neçə uğurlu hərbi əməliyyat olub. Bunlardan birincisi ulu
öndər Heydər Əliyevin rəhbərliyi ilə 1993-cü ilin dekabrında başlayan və
1994-cü ilin 6 yanvar tarixinə qədər davam edən Horadiz əməliyyatıdır. Bu hərbi
əməliyyat nəticəsində Horadiz qəsəbəsi, Füzuli rayonunun 20 kəndi və Cəbrayıl
rayonunun Cocuq Mərcanlı kəndi Azərbaycanın nəzarətinə keçib. Əməliyyatda
misilsiz qəhrəmanlıq nümunələri göstərdiklərinə görə, 8 nəfərAzərbaycanın
Milli Qəhrəmanı adına layiq görülüb.
Strateji
avtomobil yoluna nəzarət
Növbəti belə uğurlu hərbi əməliyyatlar sırasında
2016-cı ilin Aprel döyüşləri, 2018-ci ilin Günnüt zəfəri də yer alıb. Aprel
hadisələri Dağlıq Qarabağda1994-cü ildə atəşkəs haqqında saziş
imzalandıqdan bu yana ən şiddətli döyüşlər sayılıb. Döyüşlər Azərbaycan Silahlı
Qüvvələrinin qələbəsi ilə nəticələnib, Tərtər rayonunun Talış kəndi ətrafındakı
yüksəkliklər və Seysulan kəndi, Cəbrayıl rayonunun Lələtəpə yüksəkliyi və Cocuq
Mərcanlı, Goranboy rayonunun Gülüstan kəndi, Tərtər rayonunun Qazaxlar və
Suqovuşan (keçmiş adı Madagiz) kəndi istiqamətində yollar düşməndən azad
olunub. Günnüt əməliyyatı isə 2018-cı il mayın 20-dən 27-nə qədərNaxçıvan
Muxtar Respublikasında Azərbaycan və Ermənistan arasında baş verən döyüşlərdir.
Əlahiddə Ümumqoşun Ordusunun əks-həmlə əməliyyatı nəticəsində Şərur rayonunun
Günnüt kəndi, "Ağbulaq” yüksəkliyi, Qızılqaya və Qaraqaya dağları azad olunub,
Dərələyəz mahalının Arpa kəndi Azərbaycan Ordusunun nəzarəti altına keçib.
Döyüşlər nəticəsində, ümumi olaraq, 11 min hektarlıq ərazi azad olunub.
Əməliyyat Azərbaycan Silahlı Qüvvələrinə
İrəvan-Yeğeqnadzor-Gorus-Laçın-Xankəndi strateji avtomobil yoluna nəzarət
etməyə imkan verib.
Ermənistanın
məhv olma təhlükəsi
Ermənistan-Azərbaycan, Dağlıq Qarabağ münaqişəsi
tarixində sonuncu hərbi əməliyyat 2020-ci il sentyabrın 27-dən başlanan və
hal-hazırda da davam edən döyüşlərdir. Cəmi bir ay beş gün ərzində Ordumuz
ümumilikdə 200-ə yaxın yaşayış məntəqəsini, o cümlədən Füzuli, Cəbrayıl,
Zəngilan, Qubadlı şəhərlərini, Hadrut qəsəbəsini işğaldan azad edib, həmçinin
Murovdağ zirvəsini və bir sıra strateji yüksəklikləri ələ keçirib. Dağlıq
Qarabağ münaqişəsi tarixində həyata keçirilən bütün bu uğurlu hərbi
əməliyyatların fonunda diqqət çəkən vacib məqam problemin sülh yolu ilə həllinə
məsul olan ATƏT-in Minsk qrupunun həmsədr dövlətlərinin öz neytrallığını
saxlamamağı, Ermənistan çətin vəziyyətə düşən kimi dərhal onun harayına
çatması, atəşkəslərlə hərbi əməliyyatların – torpaqların müharibə yolu ilə azad
edilməsinin qarşısını almalarıdır. 1994, 2016, 2018-ci illərdə olduğu kimi,
indiki hərbi əməliyyatların gedişində də Rusiya, Fransa və ABŞ atəşkəs
çağırışları ilə çıxış ediblər. Ermənistanı məhv olma təhlükəsindən qurtarmaq üçün
ilk belə təşəbbüs Rusiya tərəfindən irəli sürülüb və cari il oktyabrın 10-da
Moskvada münaqişə tərəfləri müvəqqəti humanitar atəşkəs haqqında razılıq əldə
ediblər. ATƏT-in Minsk Qrupu həmsədr ölkələrini təmsil edən ABŞ, Fransa və
Rusiya prezidentlərinin 1 oktyabr, həmsədrlərin 5 oktyabr və 10 oktyabr tarixli
bəyanatlarına uyğun olaraq, oktyabrın 18-də növbəti humanitar atəşkəs qəbul
edilib.
Humanitar
atəşkəsə "sadiqliyini” təzahürü
Ən nəhayət, oktyabrın 24-də Vaşinqtonda ABŞ Dövlət
katibi Mayk Pompeonun Ermənistan və Azərbaycan xarici işlər nazirləri ilə
ayrı-ayrılıqda görüşündən sonra oktyabrın 25-dən başlamaq şərti ilə daha bir
humanitar atəşkəs razılığı əldə olunub. Lakin hər üç atəşkəs razılığı
Ermənistan silahlı qüvvələri tərəfindən pozulub. Döyüşlərdə Ordumuzun
qarşısında duruş gətirə bilməyən düşmən, atəşkəs haqqında razılığın əldə
olunmasını özünə fürsət bilib, darmadağın olunmuş silahlı birləşmələrini
toparlayıb, xarici ölkələrdən qaçaq yollarla yeni silahlar əldə edib və
Azərbaycanın Gəncə, Tərtər, Bərdə şəhərlərini, həmçinin digər yaşayış
məntəqələrimizi raket atəşinə tutub, içərisində azyaşlılar da olmaqla,
ümumilikdə 90-dan çox mülki şəxsi qətlə yetirib, 300-ə yaxın vətəndaşımızı
yaralayıb, kütləvi dağıntılara səbəb olub. Bununla Ermənistan işğalçı
siyasətini, terrorçu mahiyyətini, humanitar atəşkəsə "sadiqliyini” növbəti dəfə
nümayiş etdirib.
Meyitlərin
qarşılıqlı mübadiləsi
Onu da xatırlatmaq yerinə düşər ki, humanitar
atəşkəs razılıqlarından dərhal sonra Azərbaycanın əsir və itkin düşmüş, girov
götürülmüş vətəndaşlarla əlaqədar Dövlət Komissiyası hər iki tərəfə aid həlak
olmuş hərbçi meyitlərinin qarşılıqlı mübadiləsinə, hətta erməni hərbçilərinin
meyitlərinin bir hissəsinin birtərəfli qaydada geri qaytarmasına, eləcə də,
ölkəmizdə saxlanılan erməni hərbçilərin, mülki şəxslərin qarşı tərəfdəki 2
azərbaycanlı girovla azad edilməsinə hazır olduğunu bəyan edib. Eyni zamanda,
Azərbaycan tərəfinin, Ermənistan silahlı qüvvələrinin geri çəkilərkən döyüş
bölgəsində qoyub getdiyi yaşlı erməni qadınların da birtərəfli qaydada azad
edilməsinə hazır olduğu diqqətə çatdırılıb. Bu barədə Beynəlxalq Qızıl Xaç
Komitəsi də (BQXK) məlumatlandırılıb. Azərbaycan Prezidentinin köməkçisi -
Prezident Administrasiyasının Xarici siyasət məsələləri şöbəsinin
müdiriHikmət Hacıyevin, əsir və itkin düşmüş, girov götürülmüş
vətəndaşlarla əlaqədar Dövlət Komissiyasının katibi İsmayıl Axundovun mətbuata
açıqlamalarından belə məlum olur ki, indiyədək Ermənistan, əsirlərin,
saxlanılan şəxslərin azad edilməsi və meyitlərin qaytarılması ilə bağlı
Azərbaycanın təkliflərinə cavab verməyib. Beləliklə də, işğalçılığını davam
etdirən Ermənistan, bu ölkənin avantürist baş naziri Nikol Paşinyan öz
vətəndaşlarının nə dirisinə, nə də ölüsünə sahib çıxmayıb. Yalnız oktyabrın
29-da Azərbaycan Müdafiə Nazirliyinin iştirakı, ATƏT və Beynəlxalq Qızıl Xaç
Komitəsinin vasitəçiliyi ilə 30 erməni hərbçisinin meyiti birtərəfli qaydada
Azərbaycanın Tovuz rayonunun Əlibəyli kəndi istiqamətində Ermənistan tərəfinə
təhvil verilib. Ermənistan tərəfi bundan artığını qəbul etməyib. Eyni zamanda
döyüş bölgəsində köməksiz buraxılıb gedilən mülki şəxs, 85 yaşlı Yevgeniya
Babayan da Gürcüstan-Ermənistan sərhədində qarşı tərəfə təhvil verilib. Lakin
Ermənistan tərəfi erməni mülki şəxs, 84 yaşlı Mişa Melkumyanı təhvil almaqdan
son anda imtina edərək növbəti dəfə qeyri-insani davranış nümayiş etdirib.
Erməni
baş nazir yenə öz ampluasındadır
Mövzu ilə bağlı fikirlərini "Kaspi” qəzetinə
açıqlayan millət vəkili, politoloq Elman
Nəsirov bildirib ki, tərəflər arasında 3 dəfə əldə
edilən humanitar atəşkəs razılaşmasının bir məqsədi də əsir və girovların,
meyitlərin qarşılıqlı qaytarılması olub. Deputatın fikrincə, Ermənistan
humanitar atəşkəs razılaşması əldə ediləndən bir neçə dəqiqə sonra Azərbaycanın
yaşayış məntəqələrini atəşə tutmaqla bu razılaşmaların üzərindən xətt çəkib:
"Bununla Paşinyan hökuməti həm razılaşmanın üstündən xətt çəkdi, həm də döyüş
meydanında qalan erməni hərbçilərinin meyitlərini götürməkdən imtina etdi.
Bütün baş verənlərə rəğmən, erməni baş nazir yenə öz ampluasındadır. Ermənistan
nəinki ölmüş erməni hərbçilərinin meyitlərini qəbul etmək istəmir, eyni zamanda
köməksiz vəziyyətdə atıb qaçdıqları yaşlı vətəndaşına da sahib çıxmır. Sual
yaranır ki, Ermənistan nə üçün belə edir? Axı erməni vətəndaşların, əsir və
girovların, meyitlərin qaytarılması Ermənistanın da mənafeyinə uyğun ola
bilərdi. Onlar, yəni Paşinyan hökuməti bunu özlərinin apardığı səmərəli işin
nəticəsi kimi cəmiyyətə təqdim edə bilərdi. Amma etmədilər. Fikrimcə, bunun
yeganə səbəbi onunla əlaqədardır ki, döyüşlərdə məhv edilən erməni döyüşçülərin
sayı həddindən artıq çoxdur. Ermənistan rəsmi şəkildə itkilərinin sayının minə
yaxın olduğunu açıqlayıb. Ancaq reallıqda bundan qat-qat çoxdur. Əgər həmin
cəsədlər Ermənistana qaytarılarsa, erməni cəmiyyəti əsl reallığı görəcək.
Erməni hərbçilərinə məxsus məzarların çoxluğu, bununla bağlı erməni
cəmiyyətində yaranan söz-söhbət hakimiyyət əleyhinə böyük narazılıqlara yol
açacaq. Əgər erməni hərbi qulluqçularının meyitlərinin hamısı Ermənistana
aparılsa, ölkədə siyasi partlayış baş verə bilər. Bu isə Nikol Paşinyan
hakimiyyətinin sonu deməkdir”.
Paşinyan
hakimiyyətinin ən şərəfsiz dövrləri
Demokratiya və İnsan
Hüquqları komitəsinin sədri, hüquq üzrə fəlsəfə doktoru Çingiz Qənizadə qəzetimizə açıqlamasında deyib ki, humanitar
atəşkəsin pozulma səbəblərindən biri Ermənistanın öz əsgərlərinin meyitlərini
qəbul etmək istəməməyidir. Hüquq müdafiəçisinin sözlərinə görə, faktiki olaraq
müharibəni uduzan işğalçı dövlət Dağlıq Qarabağda gedən döyüşlər zamanı
itkilərini minimum rəqəmlərlə göstərir, xalqını aldadır: "Çünki çoxsaylı
meyitlər Ermənistana gedən kimi, orada ictimai-siyasi vəziyyət dəyişəcək. Onsuz
da Ermənistanda artıq istefa tələbləri var, müxalifət partiyaları kəskin
bəyanatlar verirlər. Ordunun hakimiyyəti götürməsi ilə bağlı təkliflər var.
Paşinyan öz xalqını sanki ət maşınına göndərir və bilir ki, gec-tez bu
proseslərin sonu gələcək. Paşinyan ölənlərin sayını gizlətməklə, yalan
danışmaqla daha çox hakimiyyətdə qalmağa çalışır. Buna görə də o, öz
hərbçilərinin meyitlərini, hətta işğal altında saxladıqları yaşayış
məntəqələrindən geri çəkilərkən köməksiz vəziyyətdə qoyub qaçdıqları iki qoca
ermənini – Hadrut qəsəbə sakinləri, 85 yaşlı Babayan Yevgeniya Pavlovnanı və 84
yaşlı Melkumyan Mişa Merlandoviçi də geri qaytarmaq istəmir. Bu, Ermənistanın
beynəlxalq humanitar hüquq normalarına hörmətsizlik əlaməti olmaqla yanaşı, bu
ölkənin öz vətəndaşlarına qeyri-humanist mövqe sərgiləməsinin də
göstəricisidir. Hazırda Paşinyan hakimiyyətinin ən şərəfsiz dövrlərindən birinə
təsadüf edilir. Onsuz da o, hakimiyyətə gələndən qonşularına qarşı siyasətdə,
beynəlxalq hüquqda yaramaz mövqe nümayiş etdirirdi, indi isə ən iyrənc
vəziyyətə çatıb. Paşinyan öz vətəndaşlarının nə ölüsünə, nə də dirisinə sahib
çıxır. Bu, Paşinyan hakimiyyətinin sonunun yaxınlaşdığını işarə edən amillərdən
biridir”.
Vətəndaşın
taleyi onları maraqlandırmır
AMEA-nın
Qafqazşünaslıq İnstitutunun elmi işlər üzrə direktor müavini, siyasi elmlər
doktoru Ramilə Dadaşova da
hesab edir ki, Azərbaycan həlak olanların meyitlərinin, girovların, əsirlərin
dəyişdirilməsi üçün humanitar atəşkəsin olmasına razılıq versə də, Ermənistan
hər dəfə onları kobudcasına pozur. Alimin qənaətincə, Ermənistan əsirlərinin,
meyitlərinin qaytarılmasının marağında deyil və əsirlikdə olan vətəndaşlarının
taleyi, həlak olan vətəndaşlarının meyitləri onları maraqlandırmır: "İndiyədək
Ermənistan, əsirlərin və saxlanılan şəxslərin azad edilməsi və meyitlərin
qaytarılması ilə bağlı Azərbaycanın təkliflərinə cavab verməyib. Yalnız
məcburiyyət qarşısında qaldıqdan sonra cəmi 30 meyit və bir yaşlı sakinini
təhvil alıb. Digər meyitləri hələlik qəbul etməyib. Ermənistanın atəşkəs
etməkdə məqsədi odur ki, vaxt əldə etsin, silah, güc toplasın. Azərbaycana
təzyiq edən dövlətlərin məqsədi təcavüzkar, terrorçu Ermənistanı məğlubiyyətdən
xilas etməkdir. Ermənistan atəşkəsi pozduğu üçün məsuliyyət daşıdığı kimi,
Azərbaycana təzyiq edərək atəşkəs rejiminə razı salan dövlətlər də işğalçı
dövləti dəstəklədikləri üçün məsuliyyət daşıyırlar”.
"Bizim
itkilərimiz minimaldır”
Xatırladaq ki, Prezident
İlham Əliyev oktyabrın 28-də Rusiyanın "İnterfaks” agentliyinə müsahibəsində
Ermənistanın döyüş meydanında minlərlə itki verdiyini açıqlayıb. O, bunun
qarşılığında Azərbaycanın minimal itkilər verdiyini dilə gətirib: "Fərziyyələrə
görə Ermənistanın hansı itkiləri ola biləcəyini deyə bilərəm, hətta tam riyazi
cəhətdən. 256 tank məhv edilib, bu, dünənki gün üçün olan məlumatdır. Hər gün
bu rəqəm artır. Hesablayın, orada hərəsində (ekipaj) 3-4 nəfər var. Bu, artıq
təxminən min nəfər. Sonra 50-dən çox piyadaların döyüş maşını (ekipaj 3+7) məhv
edilib. Orada təxminən neçə nəfərin olduğu aydındır. Yüzlərlə artilleriya
topları. Hər birində bir neçə nəfər. 6 ədəd S-300 qurğusu, 40-a yaxın "Osa”,
"TOR”, "KRUQ”, "KUB” zenit-raket kompleksləri. 400, bəlkə də 400-dən çox yük
maşını, onların böyük hissəsi məhv edilib, həm hərbi qulluqçularla, həm də
döyüş sursatı ilə birgə. Əgər bunları hesablasaq, hələ nə qədər səngərlərdə
məhv edilib. Axı, biz bu səngərləri, təmas xəttini keçmişik. Bu kadrlar internetdə
var. Yəni bizim məlumata görə, təkcə erməni tərəfinin itkisi 5 min və daha çox
ola bilər, yaralananlar isə müharibədə bir qayda olaraq, 2-3 dəfə çox olur.
Bizim itkilərə gəlincə, onları sonra açıqlayacağıq. Lakin deməliyəm ki, onlar
xeyli azdır. Silahlı toqquşmanın xarakteri, mürəkkəb relyef və ermənilərin 30
il ərzində qurduqları istehkamlar nəzərə alınarsa, hesab edirəm ki, hər bir
insan həyatı dəyərlidir, lakin bütün bunlarla bərabər, bizim itkilərimiz
minimaldır”.
Rufik
İSMAYILOV