Bir qapısı keçmişə, bir qapısı gələcəyə açılan qatar
Və ya
Azərbaycan Dəmir Yolu Muzeyindən reportaj
Qədim
tranzit növlərindən biri də dəmiryoludur. Tarixi 1825-ci ilə qədər uzanan bu
nəqliyyat növü ilk dəfə İngiltərədə istifadəyə verilib. Elə bu tarixdən qısa
müddət sonra ölkəmizdə də dəmir yolu salınır. Sabunçu dəmir yolunun inşasına
1878-ci ildə başlanılır və 1879-cu ildə başa çatır. Dekabrın 17-dən etibarən
Balaxanı, Suraxanı, Sabunçu stansiyalarında daşınmaq üçün yüklər qəbul edilir. 1880-ci
ilin 20 yanvarında dəmir yolunun rəsmi açılışı olur. Dünyada ilk dəfə olaraq
neft məhz bu yolla sisternlərlə daşınmağa başlanılıb. Bakı-Suraxanı-Sabunçu
dəmir yolunun uzunluğu cəmi 20
km olub. 1925-ci ilin mart ayında Bakı-Sabunçu dəmir
yolu xəttinin yenidən qurulması və elektrikləşdirilməsi işlərinə başlanılıb.
14,5 ay ərzində işlər başa çatdırılıb. 1926-cı il iyulun 26-da Abşeronun məşhur
neft rayonları olan Sabunçu və Suraxanıya ilk elektrik qatarları hərəkət etməyə
başlayıb. Prezident İlham Əliyevin 2018-ci il 22
yanvar tarixli Sərəncamına əsasən, Bakı-Sabunçu sərnişin dəmir yolu yenidən
inşa olunub. 2018-2019-cu illərdə Bakı-Sabunçu dəmir yolu yenidən inşa
olunub. Layihənin tərkib hissəsi olan Sabunçu dəmir yolu vağzalı tamamilə
yenidən qurulub və həmin tarixi binada Azərbaycan Dəmir Yolu Muzeyi yaradılıb.
İki kino zal, bir suvenir mağazası və 3 sərgi
salonu
Muzeyin
rəsmi açılışı 2019-cu il noyabrın 19-da olub. Açılışda Prezident İlham Əliyev
iştirak edib. Qeyd edək ki, Prezident İlham
Əliyev Dəmir Yolu Muzeyinə simvolik maket hədiyyə edib və həmin maket də
sərgidə yer alıb. Muzeydə sərgilənən eksponatlar maraqlı gəldiyi üçün biz də
baş çəkdik. İlk olaraq qeyd edək ki, muzey iki mərtəbədə yerləşən iki
kinozal, bir suvenir mağazası və 3 sərgi salonundan ibarətdir. Birinci
mərtəbədə girişdə ilk olaraq dəmir yollarının üstdən görünüşünü əks etdirən
maketlə qarşılaşırıq. Daha sonra suvenir mağazası ilə tanış oluruq. Burada sırf
satış üçün nəzərdə tutulmuş eksponatlar, suvenirlər yer alır. Mağaza ilə üzbəüz
otaq kino zaldır. Burada sənətli filmlər, tarixi xronikalar, dəmir yollarının
inkişafına töhfə verən mühəndislər və insanlar haqqında bioqrafik filmlər
nümayiş olunur və vətəndaşlar üçün şərait yaradılıb ki, kim istəsə, oturub
filmi izləyə bilər.
Birinci
mərtəbə ilə tanışlığı bitirib ikinci mərtəbəyə qalxarkən, yolda dayanıb əlində projektor
tutan maşinist maketi ilə qarşılaşırıq. Məncə, bu maşinist maketini əbəs yerə
bura qoymayıblar. O, əlində tutduğu projektorlar növbəti mərhələdə muzeylə
tanış olmağımız üçün qaranlıq dəmir yollarını işıqlandıracaq. İkinci mərtəbədə
də kinozal var. Burada yerləşən zalda isə dəmir yollarının, qatarların və
dəmiryolu vağzallarının estetikası və möcüzəsi ilə dolu bədii filmləri
izləməkdən zövq ala bilərsiniz.
Cənubi Qafqazın dəmir yolunun tarixi xəritəsi...
Bu
mərtəbədə həmçinin birinci və ikinci sərgi salonları yerləşir. İlk olaraq
dəmiryolunun qədim tarixini fotolarla əks etdirən birinci sərgi zalına
yollandıq. Buradan, sözün əsl mənasında, tarixin qoxusu duyulurdu. Belə ki, orada
olan ekspozisiyalar, fotolarla tanışlıq insana, xidməti geniş yayılmış və
təhlükəsiz nəqliyyat vasitəsi hesab edilən dəmiryolunun təkcə tarixi barədə
deyil, onun, bəşəriyyətin inkişafına və elmi texniki tərəqqiyə təsiri, habelə
sənaye sahəsində oynadığı rol haqqında bir çox maraqlı faktlar öyrənmək şansı
yaradır. Həmçinin fotoları və qədimdə istifadə edilən dəmiryolu avadanlıqlarını
nəzərdən keçirərkən, həm Azərbaycanda, həm də dünyada milyonlarla dəmiryolu
işçisinin, mühəndisin, maşinistin, inşaatçının, bələdçinin bu işdə çəkdikləri
əmək, zəhmət insanın gözü qarşısında canlanır. Zalın bir hissəsi sırf dəmir
yollarının inkişaf xronologiyasına həsr edilib. Belə ki, müxtəlif tarixi
dövrlərdə hansı yeniliklərin olduğu fotolar və kiçik həcmli mətnlərlə izah
olunub. Xüsusilə də 19-cu əsrdə dəmir yolunun yaranması tarixini əks etdirən
arxiv foto və video materiallar, maraqlı eksponatlar, dəmir yolu və qatar
modelləri yer alır. Burada Birinci və İkinci Dünya Müharibəsində dəmir yolunun
rolu ilə bağlı maraqlı faktlar və məlumatlarla tanış olmaq mümkündür. Cənubi
Qafqaz dəmir yolunun tarixi xəritəsi muzeyin nadir eksponatlarındandır. Əsas
zalda 1885-ci ildən 1964-cü ilədək dəmiryolçuların geyindiyi uniformaları da
görmək olar.
Bu
mərtəbədə ən çox xoşuma gələn isə birinci zalla ikinci zal arasında yerləşən
vaqon idi. Təsəvvür edin, birinci zalda keçmişə aid xatirələrin arasında
gəzərkən birdən qatara daxil olursunuz və sanki o, sizi müasir dövrə, yəni
ikinci zala gətirir. Elə bil qatarın bir qapısı keçmişə, digər qapısı gələcəyə
açılır. Qeyd edim ki, vaqona daxil olarkən, insan qəribə nostalji hislər
yaşayır. Bir ara, həqiqətən də qatarla harasa səfər etdiyimi hiss etdim.
"Kosmik Gələcək”, "Vakuum qatar”
İkinci
zalda 20-ci əsrdə dəmir yolunda gedən inkişaf prosesini görmək mümkündür. Bir
tərəfdə ulu öndər Heydər Əliyevin ölkəmizdə dəmir yolunun inkişafına göstərdiyi
qayğı və diqqəti əks etdirən foto və mətnlər yer alırdı. Digər bir tərəfdə isə
"Kosmik Gələcək” başlığı altında qoyulan foto və mətndə, gələcəkdə dəmir
yollarının hansı sürətlə, hansı formada hərəkət edəcəyi ilə bağlı məlumat verilib.
Marağımızı cəlb edən fotolardan biri də "Vakuum qatar” idi. Orada qeyd edilirdi
ki, vakuum qatar ilk dəfə 1909-cu ildə təklif edilib, lakin hələ də yüksək
sürətli nəqliyyat vasitəsi kimi tətbiq olunmayıb. Bir digər məlumatda isə
hazırda dünyanın müxtəlif ölkələrində 10-a yaxın şirkətin ultramodern qatarlar
üçün layihələr hazırladığı və futuroloqların, ekoloqların və alimlərin
birmənalı şəkildə bu nəqliyyat növünün gələcəkdə ən məşhur nəqliyyat olacağına
inandıqları qeyd edilir.
Toxunmadan demək olmaz ki...
Daha
sonra isə üçüncü zala keçid edirik. Bu zalda isə dəmir yolu qatarlarının
modelləri, müxtəlif dövrlərə məxsus sərnişin obrazlarının maketləri nümayiş
olunur. Perronda hazırlanan zalda qatara çıxış şüşə ilə bağlanıb. Şüşə
arxasında tarixi dəmir yolu xəttinin bərpa olunmuş modeli görünür. Açığı,
burada ən çox xoşumuza gələn sərnişin maketləri idi. Toxunmadan, demək olmaz ki,
onlar canlı yox, eksponatdırlar. Bu zalda həmçinin şüşə altında yerləşdirilən
qatar və o dövrdə əhalinin necə zəhmətkeş olduğunu göstərən, dəmiryolçuların iş
prosesini anbaan əks etdirən maketlər var.
Dəmiryolu
Muzeyinə olan səfərimiz başa çatır. Həqiqətən, nostalji hisslərlə muzeydən
ayrılırıq. Muzey hələ ki, vətəndaşların istifadəsinə verilməyib. Amma əminik
ki, vətəndaşlarımız da buranı bəyənəcək və xüsusilə də, övladlarını
dəmiryolunun tarixi ilə tanış etmək üçün bu muzeyə gətirəcəklər.
Günel
Azadə