Bakı 16°C
“Aygünə “üçüncü qardaşımız” deyirik” - Fotolar
Müsahibimiz "Araz” radiosunun "Üçü birində”
şousunun "Məzahir dayısı” - ifaçı, aktyor, aparıcı Elgün Hüseynovdur. İfaçı
bizimlə söhbətində çəkildiyi "Ata ocağı” serialından, radiodakı
nailiyyətlərindən danışdı. Elə söhbətə "Araz FM” dalğasından başladıq.
- Uzun müddətdir
ki, "Araz FM”-də çalışırsınız. Sizi buraya bağlayan nədir?
- 2011-ci ildən "Araz” radiosunda çalışıram. Artıq
7 ildir ki, bu radio mənim ailə üzvümə çevrilib. Özümü radiosuz təsəvvür edə
bilmirəm. Hesab edirəm ki, mən uzun müddət elə radioda nəfəs alacam.
- Başqa bir radioya
getmək, fəaliyyətinizi orada davam etdirməyi necə, düşünmüsünüzmü?
- "Araz FM”-dəki ab-hava məni qane edir. Burada işçilərə
verilən sərbəstlik, rahat iş rejimini heç nə ilə əvəz etmək mümkün deyil. Ona görə
bu zamana qədər başqa bir radioya getmək haqqında düşünməmişəm. Digər radiolarla
müqayisədə bizim radionun iş rejimi mükəmməldir. Reytinqlərimiz, uğurlarımız daha
çoxdur və kollektivimiz mehribandır.
- Efirdə insanları
güldürən, müsbət enerji verən Elgün həyatda necə, efirdə olduğu kimidirmi?
- Əslində həyatda da deyib-gülən bir insanam. Təbii
ki, mənim də nəyəsə sərt reaksiya verdiyim, qanımın qara zamanları olur, bu da
insanlıq halıdır. Gərək o an mənə dəyməsinlər və tək buraxsınlar ki, özümə gəlim.
Elə anlar olub ki, zarafat etmək halında olmamışam. Həyatdır, hər şey olur, bir
də görürsən sükan arxasında kiməsə əsəbiləşirsən, yaxud da hansısa neqativ hallarla
rastlaşırsan. Gərək o dönəmlərdə mənə dəyib-dolaşmasınlar.
- İş prosesində belə
hallarla rastlaşırsınızmı?
- Əlbəttə ki. Canlı efirdir, hər şey ola bilər.
Belə anlarda çalışmışıq ki, bunu tamaşaçıya hiss etdirməyək. Olub ki, efirdən əvvəl
həmkarlarımla mübahisə etmişik, ancaq efirdə bunu dinləyiciyə hiss etdirməmişik.
Heç nə olmamış kimi, efiri davam etdirmişik.
- "Üçü birində”
şousunda efir zamanı aparıcılarla bir-birinizə atmacalar atırsınız. Bu, sizin aranızda
hər hansı bir soyuqluq yaradırmı?
- Hər insanın içərisində bir uşaqlıq var. Biz də məhz
bu veriliş əsasında daxilimizdəki uşaqların diliylə danışırıq. Bizim aramızda
yaranan mübahisələrə, aparılan dialoqlara nəzər yetirəndə, bunları 2-3-cü sinifdə oxuyan uşaqların mübahisəsinə
bənzədirəm. Bizim atmacalarımızda uşaqların aralarında olan o xırda nüanslar
var.Elə zamanlar olub ki, efirdən sonra mübahisələrimiz
düşüb. Atalarımız deyib ki, çəkişməsən, bərkişməzsən. Bizi möhkəmləndirən xüsusiyyətlərdən
biri də odur ki, bir-birimizə qarşı səmimiyik. Səmimi olmasaq, küsərik, dalaşarıq,
hətta ayrılarıq. Nə Aygündə, nə də Turalda kin deyilən bir şey yoxdur. Bir-birimizə
hirslənsək də, çalışırıq ki, efirin sonuna qədər bunu hiss etdirməyək."Üçü birində” şousunda sanki yaşıdlarımın arasındayam,
sinif yoldaşlarımızla işlətdiyimiz, məktəb vaxtı etdiyimiz zarafatları edirik.
Bir-birimizi çox yaxşı anlayırıq. Aramızda yeganə xanım olan Aygün Akifin xətrini
çox istəyirik, onu qoruyuruq. Aygün bizim dəyərlimizdir.
- Bu üçlüyü birləşdirən,
sadəcə "Üçü birində” şousudurmu?
- Əvvəllər belə idi. İndi isə bəzən verilişdən sonra
yemək yeyirik, harasa gəzməyə gedirik, maraqlı zaman keçiririk. İllər keçdikcə biz
daha da möhkəmlənirik. Bir-birimizin fikirlərinə hörmət edirik, fikir
mübadiləsi aparırıq. Gənclərin getdiyi məkanlara gedib, istirahət edir, birlikdə
əylənirik. Bir-birimiz arasında ayrı-seçkilik etmirik ki, sən xanımsan, bizimlə
harasa gedə bilməzsən və sair. Hərdən Aygünə "sən bizim üçüncü qardaşımızsan”
deyirik. Onu kənarda Aydın deyə səsləyirik.
- Radioda aparıcı
olan Elgünü, "Məzahir dayı”nı dinləyici yaxşı tanısa da, efirdə, səhnədə sizin
həmin Elgün olduğunuzu təsəvvür etmirlər.
- Bir çoxları məni məhz müğənni kimi tanıyır, bir çoxları
da heç bilmir ki, mən radioda veriliş aparıram. İndi elə bir zəmanədir ki, tək müğənniliklə
də dolanmaq olmur. Elə insanlar var ki, mənim haqqımda hər şeyi bilir. Sosial şəbəkədə
məni izləyir, ifa etdiyim sonuncu mahnını, bir neçə il əvvəl iştirak etdiyim müsabiqəni
belə yada salırlar. Sosial şəbəkələrdən istifadə etməyənlərin mümkündür ki,
xəbəri olmasın. Çünki mən gündəlik paylaşımlarımı məhz "İnstagram”da,
"Facebook”da edirəm.
- "Üçü birində”
səhər şousunun "Məzahir dayısı” çox məşhurdur. Yaratdığınız bu obraz daha məşhurdur,
yoxsa Elgün özü?
- Sadəcə "Üçü birində” şousunu dinləyənlər bilir ki,
"Məzahir dayı” adlı belə bir obraz var. Elgün adı isə həm səhər şousunda, həm efirdə,
həm saytlarda, həm də serialda səslənir. Məncə, Elgün daha məşhurdur.
- Tələbəlik illərində
sizi "Səda” Teatrının səhnəsində müxtəlif tamaşalarda aktyor kimi görürdük. Universiteti
bitirdikdən sonra isə sizi ancaq ifaçı kimi gördük.
- Düzdür, tələbəlik illərində səhnədə bir çox
obrazların müəllifi olmuşam. Elə üçüncü kursda oxuyanda da teatrda çalışırdım.
Ancaq aktyor kimi məni bir növ həvəsdən saldılar, sındırdılar. Üçüncü kursda oxuyanda
Azərbaycan Dövlət Musiqili Teatrında aktyor kimi çalışmaq üçün müraciət etdim. Orada
Ramil Qasımov mənə çox kömək oldu. Belə ki, Ramil başqa bir işə gedəcəkdi və
məni özünün teatrda canlandırdığı obrazlara dublyor kimi hazırlayırdı. Məşqlər
edir, gecə-gündüz çalışırdıq. Sonra gördüm ki, bu məşqlər çox zamanımı alır.
Çəkdiyim əziyyətin qarşılığında isə əməkhaqqı çox az idi. Tək teatrın qonorarı
ilə də dolana bilməzdim. İçimdə oxumaq həvəsi vardı və bu həvəsi yalnız teatrda
xərcləmək istəmirdim. Bəzən el şənliklərə gedir, toy idarə edirdim. İfaçı var ki,
toya yalnız pul qazanmağa gedir. Mənsə çalışırdım ki, toyda oxuduğum mahnılardan
zövq alım. Teatrda obrazım olan tamaşalar da həftə sonuna düşürdü. Düşündüm ki,
teatrın verdiyi məvacib mənə kifayət etməyəcək. Ən əsası isə, teatrda perspektiv
yox idi.
- Perspektiv
deyəndə nəyi nəzərdə tutursunuz?
- Misal üçün, yaşlı aktyorlar gənc aktyorlara sanki
paxıllıq edir, onlara rol verilməsinin tərəfdarı olmurlar. Hər işdə "mən-mən” deyirlər.
Təbii ki, bu da psixoloji olaraq gəncləri işindən soyudur, həvəsdən salır. Bir
də ki, biz teatrda tələbə vaxtı aldığım təqaüd qədər maaş alırdıq. Tələbə vaxtı
bilirdin ki, bu pulla özünü ancaq 4 il idarə edəcəksən və bu 4 il də
müvəqqətidir. Həmin pulla özümü ömürlük idarə edə bilməzdim.
- Bu gün teatrda baş
qəhrəman obrazlarını canlandıran tələbə yoldaşlarınızı görəndə, təəssüf hissi keçirirsinizmi?
- Əsla. Gənc aktyorlar illərlə teatrda çalışırlar.
Onların çəkdikləri əziyyəti görürəm və düşünürəm ki, nə yaxşı ki, zamanında
teatrı seçmədim. Bəlkə nə vaxtsa teatrda
işləyəcəm, bəlkə bu cameədə vəziyyət düzələcək. Ancaq bu sahədə heç bir perspektiv
görmürəm. Doğrudanmı, mən neçə il çalışacam və 90 manat maaş alacam? İstəyirdim,
elə bir işdə çalışım ki, rahat olum. Mənə bu rahatlığı isə "Araz FM” verdi.
- Sizi "Ata ocağı”
serialında Rəvan obrazında da görürük. Serialda vəziyyət necədir?
- Serialda vəziyyət mənim üçün yaxşıdır. Aktyor kimi
bir filmdə çəkilmək çoxdankı arzum idi. 2017-ci ildə serialdan dəvət aldım. Artıq
2 mövsümdür ki, Rəvan obrazını yaradıram və bu işdən zövq alıram.
- Həm radio aparıcısı,
həm aktyor, həm müğənni, həm də toy aparıcısısınız. Sizin haqqınızda "bir əlində
beş qarpız tutur” deyirlərmi?
- Əgər bir əlimdə o qarpızları saxlaya bilirəmsə,
uğur əldə edirəmsə, onlardan mənə söyüş gəlmirsə, niyə də etməyim? Bizim üçün
ən böyük tərəzi tamaşaçı və onun verdiyi dəyərdir. İndi elə bir zəmanədir ki,
buna məcbursan. Gəncəm, enerjiliyəm, yüngül bir işlə məşğul olub passiv otura
bilmərəm. Əgər səhər verilişi aparıb, bütün günü istirahət etsəm, özümü
cəmiyyətə yararsız hiss edərəm. Ailə saxlayan bir gənc üçün sadəcə bir yerdə
çalışmaq sərf etmir. Ən əsası odur ki, həm sevdiyim işlə məşğulam, həm də
pulumu qazanıram. Hər kəsə də bunu arzulayıram. İnsan sevdiyi işlə məşğul
olanda pul özü gəlib onu tapır. Amma çatdırmasam, təbii ki, birini axsadaram.İncəsənət Universitetinin "Estrada aktyorluğu”
ixtisasında Xalq artisti Ramiz Əzizbəylinin kursunu bitirmişəm. Ramiz müəllimin
üzərimizdə böyük əziyyəti var. O həmişə deyirdi ki, estrada sözünün tərcüməsi səhnədə
tək deməkdir. Bir insan səhnəni tək ələ almağı bacarmalıdır. Estrada fakültəsində
tələbələr elə yetişdirilirdi ki, oranı bitirən şəxs həm aparıcılığı, həm teatr aktyorluğunu,
həm səhnə danışığını, həm də estrada da özünü yaxşı göstərə bilirdi. Mən bu sahələrin
hamısını çox sevirəm. Bunların hamısı incəsənətin qollarıdır.
- Bu sənətlərdən hansında
özünüzü daha rahat hiss edirsiniz?
- Radioda. Təbii ki, ifaçılığı da çox sevirəm. Hər
birinin ayrı yeri var. Radio isə daha rahatdır. Çünki burada çox sərbəstəm. 7
il bir aparıcının yetişməsi üçün kifayət qədər vaxt deməkdir. Təbii ki, mənim
də qüsurlarım var, demirəm ki, peşəkar radio aparıcısıyam. Ancaq radioda efirin
taktikasını bilirik. Hələ də öyrənə-öyrənə gedirik. İnsan gərək dayanmasın.
- Sizi toylarda da
çox görürük.
- Son dönəmdə toylarımız zəifləyib.
- Səbəb?
- Sanki gənclər ailə qurmaq istəmirlər. Əvvəlki
illərə nəzər salsaq, ayda 7-10 toya gedirdiksə, indi 3 toya gedirik.
- Elgün bəy,
ata olduqdan sonra həyatınızda nələr dəyişdi?
- Övladım elə bir yaşdadır, elə cümlələr deyir ki,
mən özümü artıq güvəndə, daha güclü hiss edirəm. Atalıq hissimi sözlə ifadə
etmək mənə çətindir. Hiss edirsən ki, sən artıq həyatda formalaşmış insansan.
- İndiyə qədər
özünüz üçün yaşayırdınızsa, yəqin ki, artıq övladınız üçün yaşayırsınız?
- Əslində özüm üçün də yaşayıram, övladım üçün də.
Bu ifadəni çox da qəbul etmirəm. Can şirin şeydir. Valideynlərimiz "sənin üçün
yaşayıram” deyəndə, çox da dərinə getmirik. Amma ata olduqdan sonra hiss edirəm
ki, üzərimdə daha bir məsuliyyət var. Cəmiyyət üçün elə bir övlad
yetişdirməliyəm ki, həm özüm ona baxıb fəxr edim, həm də vətənə xeyirli-yararlı
olsun.
Xəyalə Rəis
