ABŞ-ın xarici siyasətində yeniliklər olacaq
Donald Trampın ABŞ prezidenti seçilməsi dünya gündəminin başlıca
mövzularından biri olaraq qalır. Bütün proqnozları alt-üst edərək qalib gələn
və yanvarın 20-də ABŞ prezidenti kürsüsünə əyləşəcək bu şəxsin gələcəkdə
yürüdəcəyi siyasət diqqət mərkəzindədir. Hamını düşündürən budur ki, Tramp
verdiyi vədləri yerinə yetirməyə çalışacaq, yoxsa dedikləri elə vəd olaraq da
qalacaq. Ən çox da onun xarici siyasətdə nələri prioritet görəcəyi müzakirə
olunmaqdadır. Bəlli olduğu kimi, postsovet məkanı, həllini tapmayan münaqişələr
Birləşmiş Ştatların daim diqqət mərkəzində olan məsələlərdən olub. Faktiki
olaraq ABŞ-ın iştirakı olmadan beynəlxalq münaqişələrlə bağlı hər hansı bir
müzakirə, tədbir keçirilməyib. Rəsmi Vaşinqton Dağlıq Qarabağ, Dnestryanı
bölgə, Ukrayna, Gürcüstan və s. münaqişələrin həllində nəticəsiz də olsa, aktiv
iştirakı ilə seçilib. Bəs görəsən yeni prezidentin dövründə bu xətt davam
edəcəkmi? Vaşinqton bu münaqişələrdə aktiv rol oynayan Rusiya ilə baş-başa
gələcək, yoxsa güzəştə gedəcək?
Əsas diqqət mərkəzində olan məsələlərdən biri də Türkiyə ilə münasibətlərdir. Məsələn,
Türkiyənin "Cümhuriyyət” nəşri yazır ki, "bəziləri hesab edir ki, Trampın
qələbəsi Türkiyə üçün yaxşı nəticə deməkdir. Lakin əslində bu, başdan-ayağa
fəlakətdir”. Müəllif yazır ki, bu gün Trampın qələbəsini yalnız Moskva, Tehran,
Pekin, Tel-Əviv və Ankara bayram edir. G-20-nin üzvləri və onlarla Qərb ölkəsi
narahatçılıq içindədir: "Türkiyə ilə bağlı Trampın əvvəlki bəyanatları maraqlı
idi. 15 İyun çevrilişi zamanı prezident Ərdoğanın atdığı addımları tərifləyən
Tramp qiyamdan sonra atılan addımları pisləyib”.
"Sabah” qəzetində dərc edilən başqa bir məqalədə müəllif bu qənaətə
gəlir ki, yeni prezident təmsil etdiyi partiyanın Türkiyə ilə bağlı yürütdüyü
siyasəti davam etdirəcək. Bu siyasət də sıx əməkdaşlığı nəzərdə tutur. Qəzet
Trampın təhlükəsizlik və kəşfiyyat üzrə sözçüsü general-leytenant Maykl Flayn
Türkiyə ilə əməkdaşlıq münasibətlərini bərpa etmək üçün xarici siyasətdə bəzi
tənzimləmələrə ehtiyac olduğu barədə fikirlərini verib. Trampın quracağı yeni
kabinetdə vəzifə alacağı iddia edilən Flayn Barak Obamanın Ankaranı kifayət
qədər anlamadığını qeyd edib. O, Türkiyənin Amerikanın maraqları baxımından
önəmli bir ölkə, eləcə də İraq və Suriyada İŞİD-lə mübarizədə ən güclü müttəfiq
olduğunu bildirib. FETÖ terror təşkilatının rəhbəri Fətullah Gülənlə bağlı
məsələlərə də toxunan sözçü onu Bin Ladenə bənzədib: "Biz Fətullah Gülənə
sığınacaq verməklə ən böyük müttəfiqimizi itiririk. 11 sentyabr hadisələrindən
sonra Türkiyənin Üsamə Bin Ladenə sığınacaq verdiyini öyrənsəydik, nə edərdik?
ABŞ terrorçuları Türkiyəyə verməlidir”.
Türkiyə ilə yanaşı, ABŞ-ın Rusiya ilə bağlı siyasətinin hansı
prinsiplər üzərində qurulacağı da maraq doğurur. "Rusiyaya müttəfiq kimi
yanaşacaq Donald Tramp Vladimir Putindən xoşlandığını gizlətməyəcək”. Bunu
"Henry Jackson Society” analitik mərkəzinin nəzdindəki Rusiya Araşdırma
Mərkəzinin rəhbəri Andrey Fokhall bildirib: "Hər iki siyasətçi ümumdünya
konspirasiya nəzəriyyəsini dəstəkləyir. Həmin nəzəriyyəyə görə, Rusiya
korrupsiyalaşmış və avtoritar dövlət olsa da, Qərb bundan heç də üstün
vəziyyətdə deyil. Tramp Rusiyanın Ukraynaya müdaxilə etmədiyini, Demokrat Partiyanın
Milli Komitəsinin elektron poçtunu sındıran hakerlərin Rusiya ilə əlaqəli
olmadığını və NATO-nun gələcəyinin sual altında olduğunu deyib. Ətrafına
rusiyapərəst məsləhətçilər toplamış Trampı Rusiya ilə yeni alyansın yaradılması
ideyası daha da həvəsləndirir. Onun iddialarına görə, müxtəlif məsələlərdə -
Suriyadan tutmuş silahlandırmaya nəzarət məsələsinə qədər irəliləyiş əldə etmək
üçün hər iki ölkəyə münasibətlərində yeniliklər etmək lazımdır”.
Oksford Universitetinin Sent-Entoni kollecinin elmi əməkdaşı, siyasi
elmlər doktoru Vladimir Pastuxov isə "Tramp Amerika xalqının Rusiya üçün seçdiyi
ən yaxşı namizəddir” fikirləri ilə razılaşmır. V.Pastuxov "Mən düşünmürəm ki
Trampa Putinlə asan olacaq. İlkin olaraq Tramp Putinə "Krım günahlarını”
bağışlaya bilər və onu Yaxın Şərqdə birgə əməliyyatlar keçirmək ideyasına cəlb
edə bilər. Putinin ayağı büdrəməyincə, hər şey yaxşı olacaq. Lakin Putin
büdrədiyi anda Tramp fürsəti əldən verməyəcək və düşünmədən "müttəfiqini”
uçuruma yuvarlayacaq”, - deyə Pastuxov fikirlərini yekunlaşdırıb. Dünya
Təhlükəsizlik İnstitutunun Rusiya və Asiya proqramlarının direktoru Nikolay
Zlobin isə hesab edir ki, Tramp nümayişkaranə addımlar ata bilər. Məsələn, o
hansısa bəyanat verə və Putinlə görüşə bilər və ya hansısa nümayəndə heyətini
Moskvaya səfərə göndərə bilər. Lakin Trampın gəmini bizim hiss edəcəyimiz və
görəcəyimiz şəkildə real olaraq geri çevirəcəyinə şübhə ilə yanaşıram”.
Trampın İranla bağlı da yeridəcəyi siyasət də maraqlıdır. Artıq belə
bir fikir səslənib ki, onun administrasiyası İranla imzalanmış nüvə
razılaşmasını ləğv edə və ya ona yenidən baxa bilər. ABŞ Dövlət Departamentinin
nümayəndəsi Mark Toner bu qənaətdədir.
Qeyd edək ki, Tramp seçkiqabağı kampaniyası dövründə bu sazişə görə
dəfələrlə Barak Obamanı tənqid edib və prezident seçiləcəyi təqdirdə sazişi
ləğv edəcəyini vəd edib.
Beləliklə, söylənilənlər hələ ki, ehtimal və proqnozlardır. Hər halda,
Trampın ənənəvi siyasəti davam etdirəcəyi, yoxsa inqilabi dəyişikliklər edəcəyini
zaman göstərəcək.
Azər NURİYEV