Özgə qapılara dikilən ümidlər
Azərbaycan müstəqilliyini
ikinci dəfə bərpa etdikdən sonra hərbi çevriliş yolu ilə iqtidara gələn, lakin
cəmisi bir il sonra səriştəsiz və səbatsız idarəetmə nəticəsində ölkəni xaosa,
vətəndaş müharibəsinə sürükləyən hazırkı müxalifət o zaman hakimiyyəti qoyub
qaçmaqla xalqın ümidlərini puça çıxardı. Həmin gündən etibarən Azərbaycan
xalqının AXC-Müsavat cütlüyünə, eləcə də onların tör-töküntülərinə inamı itdi.
Məhz bu səbəbdən 1993-cü ildən indiyə qədər keçirilən bütün seçkilərdə ölkə
əhalisi radikal müxalifət liderlərinin şirin vədlərinə deyil, Azərbaycanı bütün
bəlalardan xilas edənə, onun sabahını düşünən əsl liderə dəstək nümayiş
etdirməkdədirlər. Hər dəfə seçkilərdə radikal müxalifət liderləri biabırçı
şəkildə məğlub olur, olan-qalan elektoratlarını da itirə-itirə gedirlər. Həmin
"liderlər” artıq Azərbaycan vətəndaşlarının dəstəyini ala bilməyəcəklərini
yəqin etdiklərindən ümidlərini yad qapılara dikiblər.
Alpər TURAN
Misal üçün, sonuncu
prezident seçkiləri öncəsi xarici qüvvələrin təsiri altında Ziyalılar Forumu,
"EL” Hərəkatı, Milli Şura təsis edən müxalifətçilər aldıqları təlimat, ən əsası
isə böyük məbləğdə maliyyə vəsaiti müqabilində heç bir siyasi fəaliyyəti
olmayan, kinodramaturq kimi tanınan, cibində ikili vətəndaşlıq pasportu
gəzdirən Rüstəm İbrahimbəyovu özlərinin vahid namizədi seçdilər. Ümid edirdilər
ki, Rusiyada yaşayan və oradakı "Milyarderlər İttifaqı”nın üzvü olan R.İbrahimbəyov
Şimal qonşumuzun dəstəyi nəticəsində prezident seçiləcək, AXCP-Müsavat
liderləri və tərəfdarları da "ağ günə” çıxacaqlar. Ancaq ağı qaradan seçməyi
yaxşı bacaran müdrik Azərbaycan xalqı öz qətiyyətini və iradəsini ortaya
qoyaraq, xarici dairələrə satılmış radikal müxalifət liderlərinin və onların
havadarlarının planlarını pozdu. Azərbaycan xalqı ulu öndər Heydər Əliyevin
layiqli davamçısı, öz təşəbbüsləri və həyata keçirdiyi siyasi kursla
liderliyini dəfələrlə sübut etmiş İlham Əliyevi dəstəkləyərək, məhz onu yenidən
ölkə prezidenti seçdi. Beləliklə də müxalifətçilər daha bir sarsıdıcı zərbə
alaraq, növbəti dəfə məğlub duruma düşdülər.
Amma təəssüflər olsun ki,
milli və dövlətçilik maraqlarını düşünməyən, öz şəxsi maraqları naminə kiminlə
gəldi əməkdaşlığa hazır olan radikal müxalifət, xüsusən də AXCP sədri Əli
Kərimli, onun Milli Şura dəstəsi, həmçinin bu şəxslərin ətrafında cəmləşənlər
həyatın verdiyi dərslərdən nəticə çıxarmır, reallığı acı da olsa olduğu kimi qəbul
edə bilmirlər. Belə ki, seçkidən-seçkiyə "fəallaşaraq” gündəmdə qalmağa cəhd
edən, hətta xarici dairələrin əlində maşa olmaqdan belə çəkinməyən bu qüvvələr 26
sentyabr referendumu öncəsi də səs-küy salmağa başlayıblar. Diqqət çəkən məqam
burasıdır ki, bu dəfə onlar Şimaldan deyil, okeanın o biri tayından – Qərbdən özlərinə
havadarlar axtarmağa başlayıblar.
Dünən haqqin.az saytında yer
alan məlumatlardan da aydın olur ki, avqustun 15-də
saat 10.00-da "Ümid” partiyasının funksionerləri Ənvər Ağazadə və Elmar
Abbaszadə Fransa səfirliyinə baş çəkiblər. Avqustun 17-də ABŞ səfirliyi öz
qapılarını radikal REAL təşkilatının fəallarına - Rəsul Cəfərova və Erkin
Qədirliyə açıb. Onları səfirliyin hansısa sıravi əməkdaşı, hətta ştatlı
diplomatı deyil, səfir Robert Sekuta özü şəxsən qəbul edib. Avqustun 18-də saat
16.50-də Xədicə İsmayıl Fransa səfirliyinə yollanıb. O, saat 18.30-a qədər,
demək olar ki, iki saat səfirlikdə olub və oradan birbaşa ADİSAD hüquq firmasının
ofisinə yollanıb. Avqustun 19-u 14.40-da isə AXCP sədri Əli Kərimli özü Böyük
Britaniya səfirliyinə yollanıb. Üç gün sonra bu səfirliyə radikal REAL
təşkilatında təmsil olunan Erkin Qədirli və Azər Qasımlı baş çəkiblər. Onları
da səfir Kerol Krofts şəxsən özü qəbul edib. Bu hadisələrdən cəmi 3 gün sonra,
daha dəqiq desək, avqustun 23-də, saat 15.10-da AXCP sədri Ə.Kərimli və Milli
Şura sədri Cəmil Həsənli ABŞ diplomatik missiyasının apartamentlərinə yollanıblar.
Ertəsi gün C.Həsənli yenidən Amerika səfirliyinə gedib. Avqustun 25-də isə
Britaniya səfirliyində Müsavat Partiyasının sədri Arif Hacılı peyda olub. O,
britaniyalıların qəbuluna 10.25-də gəlib və 11.35-də oranı tərk edib. Təxminən
bir saat sonra, 12.45-də britaniyalıların hüzuruna İsa Qəmbərin oğlu - NİDA
fəallarından biri Turqut Qəmbər gəlib və o, təxminən bir saata yaxın səfirlikdə
məsləhətləşmələrdə iştirak edib. Avqustun 25-də yenidən A.Hacılı ABŞ səfiri
Robert Sekutanın qonağı olub. Ən nəhayət, avqustun 30-da AXCP sədri Ə.Kərimli Avropa
İttifaqının səfiri Malena Martın qəbulunda olub.
Bu faktlardan
da göründüyü kimi, müxalif cəbhədə toplaşan bir qrup insan siyasi hakimiyyətə
gəlmək üçün Azərbaycan xalqının etimadını, vətəndaşın səsini qazanmaq, sivil
qaydada siyasi mübarizə aparmaq əvəzinə, ümidlərini ABŞ, Fransa, İngiltərə və
Avropa İttifaqı qapılarına bağlamaqdadırlar. Məhz bu qapılarda aldığı
təlimatlara uyğun olaraq, AXCP sədri Ə.Kərimli sosial şəbəkə üzərindən müraciət
yayaraq tərəfdarlarını referendum öncəsi mitinqə, Azərbaycan iqtidarına, siyasi
hakimiyyətə etiraz etməyə səsləyib. Ancaq tam əminliklə demək olar ki, radikal
müxalifətin xarici ölkə səfirliklərinin məsləhət-məşvərəti ilə həyata keçirmək
istədiyi bu plan da iflasa uğrayacaq. Hər dəfə olduğu kimi, bu dəfə də meydanda
tək qalan, Azərbaycan xalqının dəstəyini ala bilməyən radikal müxalifət
liderləri əvvəlcə məğlubiyyətin şokunu yaşayacaq, daha sonra bir-birinin
ünvanına küçə söyüşləri yağdırmaqla, düşdükləri duruma görə bir-birini ittiham
edəcəklər.Alpər TURAN