Yaxın Şərqdə nə baş verir?
Bir neçə il
əvvəl Yaxın Şərqdə yaranmış böhran yenidən bu regionun digər dövlətlərində baş
qaldırmağa başlayıb. Belə ki, son günlər iki ərəb dövləti - Qətərlə Səudiyyə
Ərəbistanı arasında yaranmış problem dünyanın diqqətini yenidən bu bölgəyə cəlb
edib. Bunun ardınca isə ötən gün İranda parlament və digər mühüm obyektlər
terror hücumlarına məruz qaldı. İslam ölkələrində baş verən hadisələrin
regionun digər dövlətlərinə də təhlükə yaratması şübhəsizdir. Ümumiyyətlə,
Yaxın Şərqdə nə baş verir?
Mövzu ilə
bağlı "Kaspi” qəzetinə açıqlamasında Milli
Məclisin deputatı, politoloq Elman Nəsirov bildirdi ki, sözün həqiqi
mənasında Yaxın Şərq hər zaman bir barıt çəlləyinə bənzəyir: "Bu regionun
stabil, sakit dövrünü xatırlamaq özü çətin məsələdir. Xüsusilə, 2010-cu ildən
başlayaraq Yaxın Şərqdə "ərəb baharı” başlandı və bütün regionu silkələyən
proseslərin əsası qoyuldu. Son günlər Qətər ətrafında yaranmış vəziyyət heç
şübhəsiz, çoxsaylı suallar yaradıb. Çünki bu ölkə 1981-ci ildə yaradılmış Fars
Körfəzinin Ərəb Dövlətləri Liqasının üzvüdür. Bütövlükdə bu liqanın üzvləri
ABŞ-ın müttəfiqləri sayılır və onların hər birində Birləşmiş Ştatların hərbi
bazaları yerləşir. Birdən-birə Qətər ilə Fars Körfəzi regionu ölkələrinin, eyni
zamanda Misirin və digər dövlətlərin münasibətlərinin bu qədər korlanmasını
proqnozlaşdırmaq çətin məsələ idi. Lakin bu reallaşdı”.
E.Nəsirov
əlavə etdi ki, indi isə İranla bağlı çox ciddi proseslər getməkdədir:
"Xüsusilə, İran parlamentində baş verən son hadisələr, həm də daxili
stabilliyin pozulması onu göstərir ki, artıq regionda yeni bir "bahar”ın əsası
qoyulur. "Ərəb baharı”nın əhatə etmədiyi ölkələr onun növbəti hədəfinə
çevrilib. Yəni, "ərəb baharı” haradan istiqamətlənirdisə, hansı güc mərkəzləri
həyata keçirirdilərsə, indi də yeni dövlətlər onun orbitinə daxil edilməkdədir.
Hesab edirəm ki, Qətərdə və İranda baş verən hadisələrə məhz bu kontekstdə
qiymət vermək lazımdır. Baş verən hadisələr çox uzağa gedən siyasi nəticələrə
və kataklizmlərə gətirib çıxara bilər. Biz onun başlanğıcının şahidi oluruq. Bu
nöqteyi-nəzərdən onsuz da olduqca mürəkkəb olan bir regionda əslində elə bir
proseslər baş verməkdədir ki, onun ağır fəsadlarını və nəticələrini gələcəkdə
müşahidə edə bilərik. Hesab edirəm ki, region ölkələri və böyük dövlətlər son
dərəcə ehtiyatlı bir davranış nümayiş etdirməlidirlər. Çünki söylədiyim kimi,
Yaxın Şərq bir barıt çəlləyinə bənzəyir və regionun böyük dövlətlərinin böhrana
cəlb edilməsi, siyasi kataklizmlərin əhatə edəcəyi ölkələr kimi seçilməsi
nəticə etibarilə çox dəhşətli fəlakətlərə gətirib çıxara bilər”.
Millət vəkili Sahib Alıyev bildirdi ki,
bəzi ekspertlər Səudiyyə Ərəbistanı ilə Qətər arasında baş qaldıran
ziddiyyətlərin İranın marağına xidmət etdiyi və ABŞ-ın regionda mövqelərini
zəiflədə biləcəyi düşüncəsindədirlər: "Əslində bu, yanlış yanaşmadır. Unutmayaq
ki, Qətər deyəndə göz önünə ilk gələn Birləşmiş Ştatların Əl-Udeyddəki hərbi
bazası olur. Yaxın Şərqdə 11 min nəfərlik
heyəti olan və 17 ölkənin hava marşrutlarını nəzarətdə saxlayan ən böyük hərbi
bazanı Amerika boşuna Qətərdə yerləşdirməyib. Sözügedən baza 2003-cü ildə məhz
Səudiyyə Ərəbistanından köçürülüb ki, bununla da rəsmi Vaşinqton bölgədə kimi
özünə daha yaxın müttəfiq saydığını ortaya qoyub. Ona görə də başda Səudiyyə
olmaqla, bir neçə ərəb dövlətinin Qətəri boykot etmələri heç də onun
təklənməsinə aparıb çıxarmayacaq. Bu
qarşıdurma prosesi də Amerikanın nəzarəti altındadır və elə həm də maraqları
çərçivəsindədir”.
S.Alıyevin
sözlərinə görə, ərəblər arasında ziddiyyətlərin qızışmasının kökündə indi də
təriqət fərqliliyi durur: "Bəli, məzhəb də deyil, təriqət. Demək, müsəlmanların
məzhəb fərqliliyinə görə 2 yerə parçalanması azlıq edir. Yeri gəlmişkən, Mursi
devrilərkən baş verən hakimiyyət dəyişikliyinə Səudiyyə Ərəbistanı ilə Qətərin
fərqli yanaşması və Misirlə regionun adını çəkmək istəmədiyimiz başqa bir böyük
dövlətinin arasında ziddiyyətlərin yaranması da elə bundan qaynaqlanırdı. Bir
sözlə, Yaxın Şərq ölkələri məzəb ayrılığından sonra indi də təriqət fərqliliyi
çəkişmələrinə baş vurublar və bu da Qərbdəki bəlli çevrələrin heç də
maraqlarının əleyhinə yönəlməyib, əksinə, elə maraqlarına xidmət edir. İranın
Qətəri guya öz qanadları altına almağına gəldikdə isə, Qətər çoxdan qanad
altındadır. Rəsmi Tehran da bunun yaxşı
fərqindədir. Sadəcə, Qətərə dəstək bəyanatları verməklə, məzhəb davası apardığı Səudiyyəni qıcıqlandırmağa
çalışır”.
Politoloq Fikrət Sadıxov qeyd etdi
ki, Tehranda baş verən terror aktları müəyyən xarici qüvvələr tərəfindən təşkil
olunub: "Düzdür, artıq bu teraktı İŞİD öz üzərinə götürüb. Bütövlükdə bu, Yaxın
Şərqdə baş verən hadisələrin acı nəticələridir. İlk növbədə, Qətərə qarşı
sanksiyalar, bu ölkə ilə bir sıra ərəb dövlətlərinin diplomatik əlaqələri
kəsməsi baş verdi. Onu da bilirik ki, Qətər İranla yaxın münasibətlərə
malikdir. Qətər bir neçə dəfə bəyan edib ki, İranla münasibətləri inkişaf
etdirməkdə maraqlıdırlar və bu istiqamətdə addımlar atacaqlar. Təbii ki, bu
bəzi qüvvələri qıcıqlandırır və narahat edir. Təsadüfi deyil ki, Qətərlə bir
sıra ərəb dövlətləri arasında münasibətlər qırıldıqdan sonra Tehranda terror
hadisəsi baş verdi. Bu olaylardan bir neçə nəticə çıxarmaq olar. Çox təəssüflər
olsun ki, indiki hadisələr islam həmrəyliyinə zərbədir. Eyni zamanda, bu
amillər müsəlman dünyasını parçalayan məqamlardır. Hesab edirəm ki, biz
regionda gərginliyin artmasını hələ bir müddət müşahidə edəcəyik”.
Bəxtiyar MƏMMƏDLİ