Xaricdə nə olursa yaxşıdır məntiqi
Ukrayna Ali Radası sentyabrın 3-də keçirilən
iclasında deputat toxunulmazlığının ləğv olunması barədə qanun layihəsini qəbul
edib. 2020-ci il yanvarın 1-dən qüvvəyə minəcək bu qanun deputatların Ali
Radanın razılığı olmadan cinayət məsuliyyətinə cəlb olunmasını, saxlanmasını,
yaxud həbs edilməsini qadağan edən müddəaların konstitusiyadan çıxarılmasını nəzərdə
tutur. Bununla yanaşı, deputatlar əvvəlki kimi səsvermənin nəticələrinə, təhqir
və böhtan istisna olmaqla parlamentdə səsləndirdilkəri fikirlərə görə hüquqi məsuliyyət
daşımayacaqlar. Ukraynada qəbul edilən bu qanun layihəsi Azərbaycan cəmiyyətində
də müzakirələrə səbəb olub. Xüsusilə radikal müxalifət cameəsində sözügedən
qanun layihəsinin ölkəmizin parlamenti tərəfindən də qəbul edilməsinin
vacibliyi önə çəkilib.
Ümumiyyətlə, harada qeyri-ordinar bir addım atılırsa,
radikal müxalifət dərhal ona demokratiya donu geyindirir və Azərbaycanda tətbiq
edilməsini istəyir. Belə olan halda haqlı sual yaranır ki, əgər deputat
toxunulmazlığının ləğv edilməsi mütərəqqi addım, demokratiyanın göstəricisidirsə,
AXC-Müsavat cütlüyünün hakimiyyəti dövründə bunu niyə etmirdilər? Yaxud, özlərini
siyasətçi, jurnalist, bloqqer, qeyri-hökumət təşkilatı sədri, dindar kimi qələmə
verən hər kəsə radikal müxalifət funksionerləri toxunulmazlıq
tələb etdikləri halda, deputatların toxunulmazlığının ləğvini istəmək hansı məntiqə
söykənir?
Mövzu ilə bağlı fikirlərini "Kaspi” qəzetinə
açıqlayan siyasi şərhçi Aydın Quliyevbildirib ki, müxalifətin radikal düşərgəsində təmsil olunanların
davranışlarında, fikirlərində zaman keçdikcə artan məntiqsizlik, rabitəsizlik
özünü açıq şəkildə büruzə verir. Onun sözlərinə görə, indiyə qədər ölkədə
keçirilən seçkilərdə məğlub olan, xalqın etimadını itirən radikallar nəyin
bahasına olursa-olsun mövcud iqtidarın siyasətini gözdən salmaq, qaralamaq
yolunu tutublar: "Bu, ilk növbədə siyasi perspektivlərinə olan inamın zəifləməsi,
onlar tərəfindən atılan addımlara hər hansı ictimai dəstəyin verilməməsi, beynəlxalq
əlaqələrin, beynəlxalq dəstəyin olmaması ilə əlaqədardır. Radikal düşərgənin
növbəti məntiqsizliyi deputatların toxunulmazlığı barədə ortaya atdıqları
mülahizələrdə də görünür. Millət vəkillərinin toxunulmazlığının ləğvi, onlar
barəsində ictimai tənbeh tədbirlərinin görülməsi və sair bu kimi məsələlər küçələrdə,
meydanlarda həll olunmur. Bu kimi hallara Azərbaycan qanunvericiliyində,
Konstitusiyada əksini tapmış normativlər çərçivəsində münasibət sərgilənir. Əgər
ölkədə deputat toxunulmazlığının ləğvinə ciddi ehtiyac yaranacaqsa, bu, Milli Məclisin
müzakirələri, Azərbaycan Prezidentinin rəyi vasitəsilə tam qanuni əsasda həllini
tapacaq. Bunun üçün hansısa xarici ölkədə baş verənlərin nümunə göstərilməsinə,
küçə və meydanlarda bu barədə çıxışlar edilməsinə, kənardan müdaxilələrə
ehtiyac yoxdur. Azərbaycan hüquqi dövlətdir və bu ölkədə bütün məsələlər qanun
çərçivəsində həllini tapır”.
"Hilal” İctimai
Birliyinin sədri Arzuman Abdulkərimov qəzetimizə açıqlamasında bildirib ki, radikal
müxalifətin 26 illik uğursuzluqlarının əsas səbəblərindən biri məhz hər şeyi
inkar etmək, uğurlara kölgə salmaq, xaricdə baş verən hansısa hadisəni təqlid
etmək vərdişləridir. QHT sədrinin sözlərinə görə, əgər Ukraynadan öncə Azərbaycanda
deputat toxunulmazlığı barədə qanun qəbul olunsaydı, radikallar dərhal bu
addımı tənqid atəşinə tutacaq, bunu qeyri-demokratik hadisə kimi qələmə verəcək,
əksini tələb edəcəkdilər: "Azərbaycanda Milli Məclis seçkili orqandır və
parlamentə deputatlar gizli səsvermə ilə xalq tərəfindən seçilir. Hər bir millət
vəkili ən azı 25-30 min seçicinin yaşadığı dairəni əhatə edir. Fikrimcə, bu qədər
vətəndaşın, seçicinin etimad göstərdiyi şəxsin toxunulmazlığının kənardan
kiminsə istəyi ilə, heç bir əsaslandırma aparılmadan ləğv edilməsi, düzgün
yanaşma olmaz. Bu, həmin deputatın seçicilərinə hörmətsiz yanaşmadır. Digər tərəfdən,
Azərbaycan Konstitusiyasının "Qanunvericilik hakimiyyəti” adlı V fəslində millət
vəkili olmağa dair tələblər, vəzifə öhdəlikləri, deputatlıqdan məhrumetmə,
toxunulmazlıq və onun hansı hallarda ləğvi məsələləri aydın şəkildə əksini
tapıb. Konstitusiyaya görə, millət vəkili cinayət başında yaxalanarsa tutula
bilər və belə olduqda deputatı tutan orqan bu barədə dərhal Baş prokurora xəbər
verir. Baş prokurorun təqdimatı əsasında Milli Məclisinin qərarı ilə
deputatının toxunulmazlığına xitam verilir və sair. Yəni, demək istədiyim budur
ki, deputatların hüquq və səlahiyyətləri, toxunulmazlığının ləğvi və sair məsələlər
qanunvericiliklə tənzimlənir. Ona görə də radikal müxalifətin deputat
toxunulmazlığının ləğvi barədə müzakirələr açmasına ciddi yanaşmıram. Onların həyat
tərzi, "siyasi mübarizə” adı altında ortaya qoyduqları "fəaliyyət” dünyanın
harasında baş verməsindən asılı olmayaraq, bütün neqativ hallara görə Azərbaycan
iqtidarını günahkar görməkdir”.
Rufik İSMAYILOV