“Vətən Müharibəsində qazanılan zəfər başımızı uca etdi”
Qasım Nəsirov: "İndi
özümüzü daha rahat və güvənli hiss edirik”
Müzəffər Azərbaycan Ordusunun düşmən işğalında olan torpaqlarımızı azad
etməsini dünya azərbaycanlıları da böyük coşqu ilə qeyd edir. Onların da bu
mübarizəyə öz töhfələri olub. Uzun illərdir ki, Ermənistan-Azərbaycan
münaqişəsi ilə bağlı həqiqətləri dünyaya çatdırmaq üçün mücadilə aparıblar. Bu
gün də mübarizələri bitməyib, əksinə daha geniş vüsət alıb.
İsveçrə Azərbaycanlıların
Koordinasiya Şurasının əlaqələndiricisi və Azərbaycanlıların İsveçrədəki
Mədəniyyət Mərkəzinin rəhbəri Qasım Nəsirovla söhbətimiz də bu
barədədir:
- Qasım müəllim, Azərbaycan
böyük zəfər tarixini yaşayır. Qarabağımız işğaldan azad olub. İsveçrədə qələbə
xəbərlərimiz hansı əks-sədanı yaratdı?
- Dünyanın hər yerində olduğu kimi, İsveçrədə yaşayan azərbaycanlılar
tərəfindən də işğal olunan torpaqlarımızda zəfər qazanılması, Qarabağın geri
alınması böyük əks-səda yaşatdı. 30 il
azərbaycanlılar Qarabağın həsrətini çəkdi, o torpaqların azad olunması
arzusu ilə yaşadı. Bu qədər həsrətdən, itkilərdən sonra torpaqlarımıza
qovuşduq. Bu, tarixi qələbədir. Təbii
ki, burada yaşayan azərbaycanlılar da eyni hissləri yaşayır və mübarizələrini
davam etdirirdilər.
- Vətən müharibəsi
günlərində dünyanın hər yerində yaşayan azərbaycanlılar böyük həmrəylik nümayiş
etdirdilər. Ölkəmizə maddi və mənəvi dəstək aksiyaları keçirdilər, informasiya
müharibəsinə qatıldılar. Yaşadığınız ölkədə olan diaspor bu savaşa hansı
dəstəyi verdi?
- Biz təkcə savaş günlərində deyil, ondan əvvəlki illərdə də erməni
vandalizminə qarşı mübarizə aparmışıq, təbliğat işlər görmüşük. Uşaqlarımızın
yaddaşından silinməməyi üçün bu tarixi anlatmağa çalışmışıq. Vətən Müharibəsində
qazanılan zəfər başımızı uca etdi. Biz bir-birimizi təbrik edə-edə azərbaycanlı
olduğumuzdan böyük qürur hissi duyuruq. İndi özümüzü daha rahat və güvənli hiss
edirik. Bundan sonra da eyni qayda ilə işlərimizi davam etdirəcəyik. Çünki
mübarizə təkcə döyüş meydanında deyil, bizim gündəlik işlərimizdə də özünü
göstərməlidir. Biz bu zəfərimizi daha da möhkəmləndirməliyik. Ona görə, bizim
sivil savaşımız davam edir. İsveçrədəki azərbaycanlılar müharibə vaxtı hər gün
medianı izləyir, bir-biri ilə müzakirələr aparır, sosial mediada fəallıq
göstərir, paylaşımlar edirdilər. Azərbaycana qarşı yanlış məlumatlarla
rastlaşanda, münasibətimizi bildirirdik. Həmin insanlarla əlaqə yaradır,
həqiqəti başa salmağa çalışır, məktublar göndərirdik. Savaş günlərində bir neçə
tədbir keçirdik. Cenevrədə meriya binası və BMT qarşısında, Sürix meydanında,
Bern meydanında tədbirlər keçirərək Qarabağ savaşının bizim tərəfimizdən haqlı
olaraq aparıldığını bildirdik.
- İsveçrənin qonşuluğunda
olan Fransa ermənilərə dəstək mövqeyi tutdu. Dünya ölkələrində yaşayan azərbaycanlılar,
həmçinin Fransanın mövqeyinə etiraz bildirdilər. Siz bu istiqamətdə hər hansı
işlər gördünüzmü?
- Fransanın parlamenti tərəfindən qəbul edilən qərar, təbii ki, bizi
narahat edir. Bu qərar layihəsini pisləmək və ona qarşı çıxmaq üçün orda yaşayan
azərbaycanlılar tərəfindən yazılan məktublar, etirazlar daha önəmlidir. Bizim məqsədimiz İsveçrədə bu
məsələlərin parlamentə gedib çıxmasının və əleyhimizə hər hansı bəyanatların
verilməsinin qarşısının alınmasıdır. Yəni biz çalışmalıyıq ki, bu məsələlər
yuxarılara gedib çıxmasın. Hər ölkədə yaşayan azərbaycanlılar Azərbaycanla
bağlı problemlərlə həmin ölkədə daha çox məşğul olmalıdırlar. Bunun effekti
daha çox olar.
2021 iş elanları
- Noyabr ayında ermənilərin
Bazeldə keçirmək istədikləri konsert niyə baş tutmadı?
- Noyabrın 22-də Bazel şəhərinin kilsəsində Bazel Simfonik
Orkestrinin konserti nəzərdə tutulmuşdu. Konsertdə iştirak edən musiqiçilərin
əksəriyyəti ermənilər idi. Konserti,
guya Xocavənd xəstəxanasında bombardmandan xəsarət almış yaralılara kömək etmək
üçün keçirmək istəyirdilər. Bunu afişalarında da qeyd etmişdilər. Konsertin
əvvəlində ermənilərin İsveçrədəki tanınmış diaspor rəhbəri çıxış edəcək və
müharibədə ermənilərin zərər çəkməsindən və s. danışacaqdı. Afişada da Artsax
(Qarabağ-Ermənistan) yazılmışdı. Bazeldə yaşayan diaspor üzvlərimiz bu barədə
bizə məlumat verdilər. Biz də dərhal
kilsə ilə əlaqə yaratdıq. Bir çox informasiyalar toplayıb onlara göndərdik.
Kilsənin baş rahibi ilə görüş əsnasında erməni tərəfin kilsəni siyasi məqsədləri
üçün istifadə etdiyini və bu kimi fikirlərini musiqi vasitəsi ilə insanların
başına yeritmək istədiklərini bildirdik. Bizim sözlərimiz onlara təsir etdi və
konsertin başlamasına iki gün qalmış onu ləğv etdilər və bizdən də üzr
istədilər. Bu, bizim ən böyük qələbəmizdən biridir ki, böyük bir zalda musiqi
dinləməyə gələn insanlara Qarabağı qondarma "Artsax” adı ilə təqdim etmələrinin
qarşısını aldıq. Onların konsert adı
altında siyasi məqsədlərinin həyata keçməsinə mane olduq. Bundan sonra da
mübarizəmizi bu istiqamətdə davam etdirəcəyik. İlk növbədə ölkəmiz haqqında
yazılan yalan məlumatların qarşısını almaq lazımdır. Çox vacibdir ki, insanlar
bizim haqqımızda yalan məlumatları oxumasınlar. Təəssüf ki, xarici mediada
tez-tez bu cür məlumatlar yer alır. Yerli siyasətçilər və media nümayəndələri
ilə görüşüb Qarabağ müharibəsinin mahiyyəti, işğaldan azad edilən torpaqlarımız
haqqında onlara məlumatlar vermək, həqiqətləri anlatmağı düşünürük.
Bildirməliyik ki, ermənilər, torpaqlarımızdan çəkilərkən evləri, tarixi
abidələri, məscid və kilsələri yandırıb, dağıdıb yarasız hala salıblar. Qoy
onlar əsil həqiqəti bilsinlər.
- İşğaldan azad olunan
yerlərimizlə bağlı hansı mədəniyyət tədbirlərinin təşkilini düşünürsünüz?
- Ermənilər işğal etdikləri torpaqlarımızı viran edib, evləri
dağıdıb, yandırıblar. Əlbəttə, dəyən ziyanı aradan qaldırmaq asan deyil, amma
Azərbaycan qüdrətli ölkədir. İnanıram ki, həmin bölgələr yenidən əksi
ab-havasını qaytaracaq, öz gözəlliyini alacaq. İndiki halda işğalçıların
dağıtdığı yerləri biz fərqli şəkildə təqdim etmək istəyirik. Məsələn, son
vaxtlar hətta Ağdamın adını "Xirosima” qoyublar. Yəni Ağdam partlayışdan
sonrakı Xirosimanı xatırladır. Mən Xirosima ilə bağlı bir tarixçəni
xatırlatdım: "Xirosimadan olan Sadako Sasaki adlı yapon qız atom bombasından
sonra xəstələnmişdi. O şəhərin bərpası və öz sağlığının geri qayıtması üçün 100
ədəd oriqami düzəltməyə qərar vermişdi. O, həyatdan tez köçdüyü üçün məqsədinə
çata bilməsə də, adı hamının dilində qaldı. "Xirosima” dediyimiz zaman hamı oriqamiləri
xatırlayır. Mən də təklif etdim ki, əgər Ağdamı Xirosima ilə müqayisə ediriksə,
Ağdama görə bir aksiya keçirək və bütün uşaqlardan, isveçrəlilərdən xahiş edək
ki, oriqami düzəltsinlər. Bu, Ağdamın bərpası və orda həyatını itirən insanları
xatırlamaq üçün gözəl təşəbbüsdür. Təklif etdim ki, həmin oriqamini gələcəkdə
Ağdamın simvolu olaraq edək. Ağdamda oriqaminin heykəlini də qoymaq olar. Mən
Ağdamın əvvəlki vaxtlarının və dağılmış
görkəminin şəkillərini ortaya qoyacağam. İnsanlardan xahiş edəcəyəm ki, bu
fotolara baxıb Ağdamın bərpası və orda həlak olan insanların xatirəsini anmaq
üçün oriqami düzəltsinlər. Biz bu təşəbbüsü İsveçrədə reallaşdırmağı düşünürük.
Təranə Məhərrəmova