Sosial-iqtisadi siyasətin mərkəzində Azərbaycan vətəndaşı dayanır
Azərbaycanda
ümummilli lider Heydər Əliyevin əsasını qoyduğu sosial siyasət dayanıqlı olması,
ölkənin iqtisadi bazisinə əsaslanması, mükəmməl və dünya təcrübəsində uğurla
sınaqdan çıxmış normativ-hüquqi bazaya söykənməsi ilə diqqət çəkir. Belə ki,
1993-cü ildə xalqın təkidli tələbi ilə siyasi hakimiyyətə gətirilən ulu öndər
Heydər Əliyevin bilavasitə rəhbərliyi altında ölkə iqtisadiyyatı tənəzzüldən
çıxdı, daxili sabitlik təmin olundu və yalnız bu tədbirlərin ardınca sosial
siyasət sahəsində əhəmiyyətli addımlar atıldı.
Hər bir vətəndaşın
sosial rifahına xidmət edən bu sosial-iqtisadi siyasət 2003-cü ildən etibarən
Prezident İlham Əliyev tərəfindən uğurla davam etdirilib, sözügedən sahədə
geniş islahatlar həyata keçirilib. Bu istiqamətdə atılan addımlar çərçivəsində şəhid
ailələrinin, müharibə əlilləri və veteranlarının həyat şəraitinin yaxşılaşdırılması
xüsusilə diqqət çəkir. Buna daha bir misal olaraq, Prezident İlham Əliyevin
cari ilin 19 aprel tarixində "Azərbaycan Respublikasının ərazi bütövlüyü
uğrunda həlak olmuş, ölmüş və hərbi əməliyyatlarla əlaqədar xəbərsiz itkin
düşdüyünə görə ölmüş elan edilmiş hərbi qulluqçuların ailə üzvlərinin sosial
müdafiəsinin yaxşılaşdırılması ilə bağlı əlavə tədbirlər haqqında” Fərman
imzalamasını göstərmək olar. Həmin sənədə əsasən, 1997-ci il avqustun 2-dək
Azərbaycanın ərazi bütövlüyü uğrunda həlak olmuş, ölmüş və hərbi əməliyyatlarla
əlaqədar xəbərsiz itkin düşdüyünə görə ölmüş elan edilmiş hərbi qulluqçuların
vərəsələrinə bu Fərmanla müəyyənləşdirilmiş qaydada 11.000 manat məbləğində
birdəfəlik ödəmə verilməsi nəzərdə tutulub.
Sosial ədalət və şəffaflıq tam təmin edilir
Noyabrın 14-dən
başlayaraq birdəfəlik ödəmənin verilməsi prosesi qanunvericiliyin tələblərinə
ciddi riayət olunmaqla və şəffaflıq tam təmin edilməklə həyata keçirilir. Şəhid
hərbi qulluqçuların vərəsələri Əmək və Əhalinin Sosial Müdafiəsi Nazirliyinin
rəsmi saytında sorğu verərək ödəmə almaq hüquqlarını öyrənir, ardınca da
notariat kontorlarına müvafiq sənədləri təqdim edir, vərəsəlik şəhadətnaməsi
əldə edirlər. Növbəti mərhələdə sənədlər notariat kontorları tərəfindən
elektron qaydada nazirliyə təqdim olunur. Nazirlikdəki müvafiq işçi qrupu həmin
sənədlərin təhlilini aparır. Sənədləşmə proseduru tam başa çatdıqdan sonra
vərəsələrə Fərmanda göstərilən məbləğdə birdəfəlik ödəmənin verilməsinə
başlanılır.
Birdəfəlik ödəmə almaq hüququ olan vərəsələr
Əmək və əhalinin sosial müdafiəsi naziri Sahil Babayev
bununla bağlı bildirib ki, şəhid hərbi qulluqçulardan 9531 nəfərinin vərəsəsi
birdəfəlik ödəmə almaq hüququna malikdir. Nazir qeyd edib ki, Prezident İlham
Əliyevin 2018-ci il 19 aprel tarixli 1 nömrəli Fərmanının icrasının yüksək
səviyyədə təmin edilməsi, şəhid hərbi qulluqçuların vərəsələrinə birdəfəlik
ödəmələrin verilməsi prosesinin tam şəffaf, qanunauyğun və vətəndaş
məmnunluğuna səbəb ola bilən səviyyədə həyata keçirilməsi üçün bütün səylər
səfərbər olunub. Onun sözlərinə görə, şəhid hərbi qulluqçuların 99 faizinin
vərəsəsi birdəfəlik ödəmə almaq hüququna malik olduğunu öyrənib. Davamlı
olaraq, vərəsələrin sənədlərinə baxılır və şəhid hərbi qulluqçular üzrə
vərəsələrə Fərmanda nəzərdə tutulan ödəmənin verilməsi barədə qərarlar qəbul
olunur, müvafiq vəsaitlərin ödənişi prosesi davam etdirilir.
S.Babayev
vurğulayıb ki, ümumilikdə, 9531 şəhid hərbi qulluqçunun vərəsələrinin
birdəfəlik ödəmə almaq hüququ müəyyən edilib: "İllər öncə şəhid hərbi
qulluqçulara görə sığorta ödənişi ilə təmin edildikləri üçün yenidən birdəfəlik
ödəmə almaq hüququna malik olmayanların kiçik bir qrupu da var. Həmin insanlar
indiyədək heç vaxt sığorta ödənişi almadıqları iddiası ilə narazılıq
bildiriblər. Bu insanlar nazirliyin rəhbər vəzifəli şəxsləri tərəfindən qəbul
olunublar. Onlara vaxtilə ödəniş aldıqlarına dair təsdiqedici sənədlər bir daha
təqdim olunmaqla, ətraflı izahat işi aparılıb”.
Sosial siyasətin məqsədləri
Milli Məclisin Əmək və sosial siyasət komitəsinin sədri Hadi Rəcəblimövzu ilə bağlı mətbuata açıqlamasında deyib ki, Azərbaycanda əhalinin sosial
rifahının daha da yüksəldilməsi, xüsusən də ölkəmizin ərazi bütövlüyü uğrunda
həlak olmuş hərbi qulluqçuların ailələrinə, vərəsələrinə yüksək qayğı
göstərilməsi daim dövlətin diqqət mərkəzindədir. O bildirib ki, hər bir
cəmiyyət öz inkişafına uyğun olaraq sosial siyasəti formalaşdırır və bu
siyasətin həyata keçirilməsi üçün zəruri şəraitin yaradılmasını təmin edir:
"Baş verən ictimai, iqtisadi və digər inkişaf reallıqları sosial siyasətin
məzmununun, mahiyyətinin zənginləşməsində böyük əhəmiyyət kəsb edir. Sosial
siyasətin qarşısına qoyulmuş məqsədlərə nail olmaq üçün onun həyata keçirilməsi
mexanizminin böyük əhəmiyyəti var. Bu
mexanizmin əsas elementi iqtisadiyyatı inkişaf etdirməkdir. Çünki
iqtisadiyyatda uğur qazanmadan, yüksək maliyyə imkanlarına nail olmadan sosial
siyasəti lazımi səviyyədə inkişaf etdirmək mümkün deyil. Azərbaycanda ulu öndər Heydər Əliyevin müəllifi olduğu
sosial siyasət cəmiyyətin hər bir fərdini əhatə edir. Bu gün aztəminatlı
ailələrə, müharibə veteranlarına və əlillərinə mənzillərin və avtomobillərin
verilməsi, əlillərin reabilitasiyası, ailə, qadın və uşaq problemlərinə yüksək
diqqət, əhalinin məşğulluğunun təmin edilməsi, uğurlu gənclər siyasəti
dövlətimizin prioritetləri sırasındadır. Prezident İlham
Əliyevin 19 aprel tarixli Fərmanı və bundan irəli gələn addımların atılması da
qeyd etdiklərimizə daha bir nümunədir”.
Şəhid ailələrinə diqqət
Millət vəkili, "Yeni Azərbaycan” qəzetinin baş redaktoru Hikmət
Babaoğlu da qəzetimizə açıqlamasında dövlət başçısının
məlum fərmanını, ümumilikdə Azərbaycanda həyata keçirilən sosial siyasəti
vətəndaşlara, o cümlədən şəhid ailələrinə diqqət və qayğısının növbəti təzahürü
kimi qiymətləndirdi. Dedi ki, bu proses qanunvericiliyin tələblərinə ciddi
riayət olunmaqla şəffaf şəkildə həyata keçirilir: "Azərbaycan sosial dövlətdir.
Prezident İlham Əliyev dəfələrlə bəyan edib ki, ölkədə həyata keçirilən
siyasətin mərkəzində məhz Azərbaycan vətəndaşı dayanır. Dövlət başçısının
müəyyənləşdirdiyi bu strateji kursa uyğun olaraq reallaşdırılan məqsədyönlü
dövlət siyasəti ona istiqamətləndirilib ki, ölkənin dinamik iqtisadi
inkişafından əhalinin bütün təbəqələri, ələlxüsus da xüsusi qayğıya ehtiyacı
olan insanlar bəhrələnə bilsinlər. Azərbaycanda cəmiyyətin ayrı-ayrı təbəqələri
arasında ədalətli resurs bölgüsünü təmin etmək məqsədilə müxtəlif tədbirlər
həyata keçirilir və beləliklə, dövlət qayğısına ehtiyacı olan bütün vətəndaşlar
dövlət tərəfindən dəstəklənirlər”.
Etibarlı sosial müdafiə
Deputat H.Babaoğlu
Azərbaycanda hərbi qulluqçuların, şəhid ailələrinin, müharibə əlillərinin
etibarlı sosial müdafiəsinin təmin edilməsinə xüsusi diqqət göstərildiyini
vurğuladı. Onun sözlərinə görə, son illərdə Prezident İlham Əliyevin
məqsədyönlü siyasətinə uyğun olaraq hərbi sahəyə ayrılan xərclərin əhəmiyyətli
dərəcədə artırılması ölkənin müdafiə potensialının gücləndirilməsi ilə yanaşı,
Silahlı Qüvvələrdə xidmət edən hərbi qulluqçuların etibarlı sosial müdafiəsinin
təmin edilməsinə, mənzil-məişət problemlərinin həll olunmasına, onlara verilən
imtiyaz və güzəştlərin miqyasının genişləndirilməsinə daha geniş şərait yaradıb:
"Bu sahədə dövlət siyasətinin mühüm istiqamətlərindən biri də hərbi
qulluqçulara dövlət icbari sığortasının tətbiqidir. Bütövlükdə respublikamızda
dövlətin Qarabağ müharibəsi əlillərinə və şəhid ailələrinə qayğısı davamlı və
çoxşaxəli səciyyə daşıyır. Son 15 ildə Prezident İlham Əliyev Qarabağ
müharibəsi əlillərinin və şəhid ailələrinin sosial müdafiəsinin gücləndirilməsinə,
o cümlədən onların mənzil-məişət şəraitlərinin yaxşılaşdırılmasına yönələn bir
neçə fərman və sərəncam imzalayıb. Dövlət başçısının 2014-cü il 20 iyun tarixli
sərəncamı Qarabağ müharibəsi əlilləri və şəhid ailələrinin mənzillə təminatı
işlərinin gücləndirilməsinə yönəlib. Sərəncama uyğun olaraq, Qarabağ müharibəsi
əlillərinə və şəhid ailələrinə dövlət vəsaiti hesabına hər cür rahatlığa malik
mənzillər verilir. Ölkəmizdə
müharibə əlillərinə və onlara bərabər tutulan şəxslərə dövlət vəsaiti hesabına
minik avtomobillərinin verilməsi də ənənə halını alıb. Respublikamızda müharibə
əlillərinə, şəhid ailələrinə minik avtomobilləri, mənzillər verilməsi ilə bağlı
statistika kifayət qədər zəngindir. Son 20 il ərzində ölkəmizdə şəhid
ailələrinə, müharibə əlillərinə 5500-dən çox fərdi ev və mənzil, altı mindən
çox minik maşını verilib ki, bu da dövlətin müvafiq kateqoriyadan olan
insanlara qayğısının təzahürüdür. Bu siyasət eyni ardıcıllıqla bu gün də davam
etdirilir”.
Humanist siyasətin bariz nümunəsi
Quba rayonunun Birinci Nügədi kəndinə yaşayan şəhid anası Qalina
Şirinbəyova da şəhid ailələrinin dövlətimizin diqqət və
qayğısına sığındığını dilə gətirib. O, "Azərtac” vasitəsilə Prezident İlham
Əliyevə şəhid ailələrinə və bu kateqoriyadan olan digər şəxslərə göstərdiyi
diqqətə görə minnətdarlığını bildirib. Qeyd edib ki, 11 min manat məbləğində
birdəfəlik ödəmələrin verilməsi Azərbaycanın ərazi bütövlüyü uğrunda həlak
olmuş hərbi qulluqçuların ailələrinə, vərəsələrinə yüksək diqqət və qayğının
bariz nümunəsidir: "Oğlum Pərviz Şirinbəyov 1993-cü ildə Xocavənd istiqamətində
gedən döyüşlərdə qəhrəmancasına vuruşaraq şəhid olub. Onunla bərabər digər üç
qardaşı da Vətənimizin müdafiəsi uğrunda silaha sarılmışdı. Əlbəttə, hər bir
ana üçün oğul itkisinə dözmək çətindir. Şəhidlər qanlı döyüşlərə atılanda hər
hansı maddiyyat haqqında düşünməyiblər. Onlar Vətənlərini azğın düşməndən
müdafiə etmək üçün canlarından keçiblər. Şəhidlər, o cümlədən oğlum Pərviz
xalqımızın yaddaşında daim yaşayacaq. Prezident İlham Əliyevin Fərmanına əsasən
birdəfəlik ödəmələrin verilməsi dövlətimizin bizə qayğısıdır. Fərmanda qeyd
olunan 11 min manat vəsait tam şəffaf şəkildə mənim də hesabıma köçürüldü. Bununla
yanaşı, Qarabağ müharibəsi əlilləri və şəhid ailələri üçün evlər tikilir,
onların problemlərinin həllinə həssaslıqla yanaşılır. Mən düşmən tapdağı
altında olan torpaqlarımızın Prezidentimiz, Ali Baş Komandan İlham Əliyevin
rəhbərliyi ilə tezliklə işğaldan azad olunacağına inanıram”.
Dövlətin qayğısı
1993-cü il iyulun 28-də Gədəbəy döyüşlərində şəhid olan hərbi
qulluqçu Sərdar İbrahim oğlu Məmmədovun qardaşı Sədi Məmmədov da
Azərbaycan Prezidentinə şəhid hərbi qulluqçuların vərəsələrinə 11 min manat
məbləğində birdəfəlik ödəmələrin verilməsinə görə minnətdarlığımı bildirib,
bunu dövlətin qayğısı kimi qiymətləndirib. S.Məmmədov həmin vəsaitin hesabına
köçdüyünü və aldığını söyləyib.
Sonda bir daha
vurğulamaq yerinə düşər ki, ümummilli lider Heydər Əliyev tərəfindən əsası
qoyulan, bu gün Prezident İlham Əliyev tərəfindən uğurla həyata keçirilən
sosial-iqtisadi siyasətin mərkəzində Azərbaycan vətəndaşı dayanır. Dövlət
başçısının 2018-ci il 19 aprel tarixli Fərmanı və ondan irəli gələn məsələlərin
həlli də bu siyasətin davamı olmaqla, Azərbaycan Prezidentinin humanistliyinin,
ölkəmizin ərazi bütövlüyü uğrunda həlak olmuş hərbi qulluqçuların ailələrinə,
vərəsələrinə yüksək diqqət və qayğının bariz nümunəsidir.
Bəxtiyar MƏMMƏDLİ
Yazı Azərbaycan
Respublikasının Əmək və Əhalinin Sosial Müdafiəsi Nazirliyi və Azərbaycan
Respublikasının Prezidenti yanında Kütləvi İnformasiya Vasitələrinin İnkişafına
Dövlət Dəstəyi Fondunun keçirdiyi müsabiqəyə təqdim edilir