Saakaşvili Ukraynadakı əsas məqsədini açıqladı
Odessanın keçmiş qubernatoru Mixail Saakaşvili bundan əvvəl ölkəsində
prezidentliyi dövründə uğurlu siyasətçi, yeni dövlətin qurucusu, Putinin şəxsi
düşməni kimi ad çıxarmışdı. O, Gürcüstanda ağır çəkili siyasətçi olsa da,
Ukraynada bu adı qazanması üçün hələ çox var. 2015-ci ildə Ukraynada peyda olan
və Odessada oliqarx İqor Kolomoyskaya yaxın İqor Paliçi əvəz edərək qubernator
kürsüsünə əyləşən Saakaşvili qısa müddət ərzində heyəti tam dəyişərək öz
komandasını formalaşdırdı. Ampluasına uyğun olaraq populist bəyanatlar
səsləndirərək, dərhal da iri ranqlı məmurları tənqid etməyə başladı. Bu sırada
ilk yerdə baş nazir Arseni Yetsenyuk və erməni əsilli daxili işlər naziri Arsen
Avakov oldu.
Lakin elə ki, Saakaşvili prezident Petro Poroşenkonun ətrafını
budamağa başladı, dərhal münasibətlər pisləşdi. Sonluq da Saakaşvili üçün pis
qurtardı və o, qubernatorluqdan getdi. Postunu tərk edərək müxalifətə keçən
eks-qubernator bu müddətə kimi Ukrayna siyasi isteblişmentində söymədiyi,
tənnqid etmədiyi birini saxlamadı. Belə görünür ki, o, təslim olmaq niyyətində
deyil, əksinə, yeni yaratdığı və qeydiyyatdan keçirdiyi siyasi hərəkatı – "Yeni
qüvvələrin hərəkatı”nı Ukraynanın xilaskarı etmək niyyətindədir. "LİGA.net”
saytına müsahibəsində eks-qubernator yeni hərəkatının məram və məqsədlərini,
eləcə də, Poroşenko və Donald Trampın Ukrayna siyasəti barədə danışıb. Onun
sözlərinə görə, bugünkü siyasi sistemdə onun partiyasının yeri yoxdur: "Lakin
biz onun aparıcı qüvvə olacaq yeni struktur formalaşdırmalıyıq. Biz böyük adlar
arasında müttəfiqlər axtarmırıq, ölkə vilayətləri üzrə iri həcmdə yerli qruplar
arasında dəstək axtarırıq. Mən hər gün yerli fəallarla, həvəskarlarla
görüşürəm. Onların böyük əksəriyyəti hər hansı biri qurumda təmsil
olunmayanlardır. Onlar bizə regionlardakı nümayəndə kimi gərəkdirlər. Biz isə
onlara siyasi platforma kimi gərəkik. Onlara ümummilli brend gərəkdir və
brendlə özlərini tək regional deyil, ümummilli səviyyədə göstərməlidirlər”.
Eks-qubernator əsas diqqəti korrupsiyaya qarşı mübarizəyə yönəldəcəklərini
bildirib.
O ki qaldı, maliyyələşmə məsələlərinə - Saakaşvili onu dəstəkləyən
yerli biznesmenlərə arxayın olduğunu dilə gətirib: "Bundan əlavə, onlar bizə
münasibətdə öhdəlik götürüblər. Biz insanları diqqətlə seçir, əvvəlki
fəaliyyətlərində korrupsiya elementlərinin olub-olmadığını müəyyənləşdiririk”.
M.Saakaşvili daha sonra baş nazir A.Yatsenyukun tənqidinə keçib və onu
korrupsiya çirkabına bulaşmaqda ittiham edib. Onun sözlərinə görə, bu şəxs ölkə
üçün heç nə etməyib: "Bu şəxs islahatların həyata keşirilməməsində Poroşenkodan
də çox günah sahibidir. Onun iqtisadiyyata təsir etmək imkanları var idi. Buna
görə də vəziyyəti dəyişə və ölkəni yaxşı istiqamətə çəkə bilərdi. Amma A.Yatsenyuk
islahatçı deyil, oliqarxların xidmətçisi rolunu oynamağa üstünlük verdi. Bax,
bütün məsələ bundadır”.
"Maraqlıdır ki, Yatsenyukla Poroşenko baş verən qarşıdurmadan
mehriban çıxdılar, sizə isə hər ikisi ilə sərt müxalifət vəziyyətinə düşdünüz.
Sizdən istifadə etdilər fikri ilə razısınız” sualının cavabında Saakaşvili bildirib
ki, "düzdür, Yatsenyuk və Poroşenko ukraynalı milyarder Axmedovla mütəmadi
görüşür. Mənə pis gələn odur ki, Qroysman baş nazir oldu və islahatlara
başlamaq istəmədi”. Prezidentlə sonuncu dəfə nə vaxt ünsiyyət qurması barədə
suala isə M.Saakaşvili belə cavab verib ki, bu görüş istefası ərəfəsində olub.
Poroşenko ona Cənubi-Şərqi Asiya ölkələrindən birində, konkret olaraq Tailandda
səfir işləməyi təklif edib: "Lakin mən ona bildirdim ki, sona kimi mübarizə
aparacağam”. Onun qənaətincə, Ukrayna üçün ən önəmlisi növbədənkənar parlament
seçkilərinin keçirilməsidir: "Ukraynada əhali sürətlə azalır. Avropa ittifaqı
ilə viza rejimin ləğvi də fəlakət olacaq. Nəticədə ukraynalı gənclər vizasız
Avropa ölkələrinə gedəcəklər. Biz 2-3 mln. insan itirəcəyik. Bu gün Ukraynanı
hakimiyyət deyil, böhran idarə edir. Hakimiyyət media və korrupsiya axınını
idarə edir, ölkəni yox”. M.Saakaşvili deyib ki, özü qədər oliqarxlarla toqquşan
ikinci bir ukraynalı siyasətçi tapmaq mümkün deyil: "Mən ilk gündən onları
özümə düşmən elan etmişəm”.
"Sizin Ukraynadakı əsas məqsədiniz nədir” sualının cavabında isə
eks-qubernator "sistemi dəyişmək istəyirəm” deyib. Gürcüstanın sabiq prezidenti
ABŞ prezidenti Donald Trampla bağlı sualı da cavablandırıb. Onun qənaətincə,
Tramp heç vaxt Ukrayna ilə alver etməyəcək və heç bir zaman rusiyayönümlü
olmayacaq: "O, güclü şəxsiyyətdir və ilk ABŞ prezidentdir ki, "Amerika
müharibəni udmağı öyrənməlidir” fikrini səsləndirib”.
Eks-qubernator onu da deyib ki, Ukrayna hökumətində xaricilərin
eksperimenti uğurlu nəticə vermədi: "Bütün bunlar fasad dəyişiklikləridir.
Məsələn, polyak heç vaxt Ukraynada dəmiryollarının necə dəyişdirilməsini anlaya
bilməz. Mənə gəlincə isə bu, başqa şeydir. Mən Ukraynaya cavan olanda gəlmişəm.
Burada formalaşıb, təhsil almışam. Mənim adaptasiya olmağıma ehtiyac yoxdur”.
Azər NURİYEV