Rusiya ilə Belarus arasındakı “buzlar” əriyir?
Uzun müddətdir ki, müzakirə mövzusu olan Rusiya-Belarus münasibətləri
deyəsən, normallaşmağa doğru istiqamət götürüb. Sankt-Peterburqda terror baş
verən gün, yəni aprelin 3-də Belarus prezidenti adıçəkilən şəhərdə rusiyalı
həmkarı Vladimir Putinlə görüşüb. Danışıqların yekununda Rusiya prezidenti bəyan
edilib ki, iki ölkə arasında hər hansı bir mübahisəli məsələ qalmayıb. Adətən
Belarus lideri bu cür görüşlərdən sonra major, yəni qalmaqallı bəyanatlarla
çıxış edir, Rusiya tərəfi də ardınca onun dediklərini təkzib etməklə məşğul
olurdu. Gərginlik o həddə çatmışdı ki, Belarus lideri Avrasiya İqtisadi
İttifaqının iclasına da qatılmamışdı. Ən əsası, Belarus qurumun Gömrük
Məcəlləsinə imza atmamışdı. Bununla yanaşı, Moskva Belarusun ona qaza görə 726
milyon dollar borcunun olduğunu bəyan etsə də, Minsk bu iddiaların hamısını
rədd edirdi. Lakin bu dəfə Putin özü postfaktum elan edərək bildirib ki, Moskva
və Minsk on gün ərzində neft-qaz sahəsində problemləri həll edəcəklər. Bundan
əlavə, Rusiya və Belarus təbii qazın qiymətlərinə dair də razılığa gəlib. V. Putin
qeyd edib ki, onlar mübahisəli məsələlərin nizama salınmasına dair razılıq əldə
ediblər. Öz növbəsində A.Lukaşenko bildirib ki, Rusiya və Belarus İttifaq
dövlətinin uğurları çox kövrəkdir: "Belarus və Rusiya xarici siyasət,
təhlükəsizlik sferasında qarşılıqlı fəaliyyət göstərirlər. İttifaq dövləti
Belarus və Rusiya xalqlarının sosial zəmanətini və hüquq bərabərliyini təmin
edir. Lakin buna rəğmən, İttifaq dövlətin əldə etdiyi uğurlar kövrəkdir”.
A.Lukaşenko bəyan edib ki, Rusiya bu il Belarusun borc öhdəliklərini həll etmək
üçün güzəştlərə edəcək. Yəni ona güzəştli kredit verəcək.
Rusiya baş nazirinin müavini Arkadi Dvorkoviç isə jurnalistlərə
bildirib ki, bu ay ərzində Belarusa il ərzində 24 mln. ton neftin çatdırılması
bərpa oluna bilər. Məhz bu həcmdə də neft Belarusun bir sıra neft emalı
zavodlarının işləməsi üçün kifayət edir.
İlk baxışda Sankt-Peterburq görüşü Belarus rəhbərliyinin tam qələbəsi
kimi görünə bilər. Lakin məsələ heç də belə deyil. Detallara varanda bu
razılaşmanın arxasında hansı məramların durduğu bəlli olur. Məsələn, Rusiya
neftinin Belarusa nəqlinin bərpası Rusiyaya olan 726 mln. dollarlıq borc
ödəndikdən sonra reallaşacaq. Minsk neft və qazla bağlı düzəliş edilmiş
sənədlərin paraflanmasından sonra Rusiyanın "Qazprom” şirkətinə 726 milyon
dollar məbləğində borc ödəyəcək. Bu barədə RusiyanınEnergetika Nazirliyinin
nümayəndələri məlumat yayıb. Beləliklə, Moskva öz mövqeyində qalır. Sadəcə
olaraq Belarus bu borcu ödəmək üçün Rusiyadan kredit alacaq. Lakin bu da
hədiyyə deyil. Və nəzərə alaq ki, veriləcək kreditlərin faizlərini də ödəmək lazım
olacaq. Ümumilikdə belə nəticəyə gəlmək olar ki, Belarus Rusiyaya olan borcunu
qəpiyinə kimi ödəməli olacaq.
Bəs Putinin birdən-birə Lukaşenko ilə yaxınlaşması nə ilə bağlıdır?
Qərb nəşrləri yazır ki, bu həm də hər iki ölkədə baş verən etiraz aksiyalarından
qaynaqlanır. Kreml istəmir ki, narazılıqlar güclənsin. Yəni Moskva istəmir ki,
etirazlar olsun. Həm də belə bir fikir var ki, Minsk sürətlə Qərbə doğru
yaxınlaşır. Moskva da bunu istəmir. Rusiyanın Minskdəki səfiri Aleksandr
Surikov bildirib ki, Qərbin Belarusu Rusiyadan "qoparma”sı alınmayacaq. "Qərbin
Ukrayna, Belarus cinahlarında fəaliyyəti Rusiyanın əleyhinə yönəlib. Və biz
başa düşürük ki, növbəti cəhdlər Belarusa yönələcək və bu, artıq baş verib. Siz
bura müxtəlif nümayəndə heyətlərinin səfərlərinin intensivləşdiyinin şahidi
olursunuz. Biz buna alışırıq, lakin anlayırıq ki, bu gün Qərb Belarusu
Rusiyadan qopartmaq iqtidarında deyil”, - deyə o bildirib. Onun sözlərinə görə,
Belarus "Qərbin ağuşuna atılmağa” hazır deyil.
Yeri gəlmişkən, Moskva ilə Minsk arasında gərginlik erməni siyasi
dairələrində də narazılığa səbəb olub. Erməni mətbuatı dərhal Avrasiya İqtisadi
İttifaqına, eləcə də, Kollektiv Təhlükəsizlik üzrə Müqavilə Təşkilatına böyük
dəstək verən və ona sevgi ilə yanaşan siyasətçiləri topa tutub. Nəşrlər yazır
ki, hər iki qurumda böyük nüfuza malik olan Rusiya və Belarus daxilində baş
verənlərlə beynəlxalq ictimaiyyətin diqqətini özünə cəlb edib. Hər iki ölkənin
şəhərlərində irimiqyaslı etiraz aksiyalarında hökumətin istefası tələb edilib.
"170 milyonluq nəfərlik bazar təhlükə altına düşüb”, - deyə nəşrlər yazır.
Erməni siyasiləri sual edirlər ki, çoxəsrlik strateji müttəfiqlər olan iki
dövlət öz aralarında problemləri həll edə bilmirsə, onların təhlükəsizliyini
necə həll edəcək.
Azər