Rəşid Behbudovun tanınmış vurğunu
Musiqi ruhun qidası, canın
dərmanıdır, deyirlər. Ancaq hər musiqi yaramıza məlhəm ola bilmir. Qəliz və
yüngül janrlara bölünən "ruhun qidası”nın da öz alıcıları, dinləyiciləri var.
Ən qəliz janrlardan biri də opera və klassik musiqilərdir. Bu janr hər nə qədər
gəlirli sahə hesab olunmasa belə, opera sənətinin inkişafı göz önündədir. Daha
çox elitar təbəqənin üstünlük verdiyi bu janr bəlkə də ifaçılıq sənətinin ən
çətin qollarındandır. Hər ifaçı da bu üslubda oxumağa ürək etmir.Əlqərəz, bu dəfəki müsahibimiz
SSRİ xalq artisti Rəşid Behbudovun mahnılarından
ibarət disk buraxaraq, Avropada, eləcə də ölkəmizdə klassik musiqilərimizi
tanıdan türkiyəli opera və klassik mahnılar
ifaçısı Oya Ergündür. Artıq bir neçə ildir ki, Rəşid Behbudovun mahnılarını
oxuyaraq, beynəlxalq konsertlərində sənətkarımızın adını çəkərək, ona olan
heyranlığını bildirən ifaçı dekabrın 15-də Alman-Azərbaycan Mədəniyyət
Birliyi - "Kapellhaus”da konsert proqramı ilə çıxış edəcək. Konsertinin dahi
sənətkarımız R.Behbudovun doğum gününə düşməsi heç də təsadüfi deyil. Deyir ki,
bu konsertə uzun müddətdir hazırlaşır.
-
Oya xanım, eşitdik ki, yenidən Rəşid Behbudovun repertuarı ilə tamaşaçıların görüşünə
gələcəksiniz. İstərdik, konsertdən öncə təəssüratlarınızı bizimlə bölüşəsiniz.
- Media qurumu olaraq sizə böyük
hörmətim var. Hər zaman mənim yaradıcılığımı işıqlandırmısınız. Bunun üçün sizə
minnətdarlığımı bildirirəm. Bu yaxınlarda qeyd etdiyiniz 135 illik yubileyiniz
münasibətilə də sizi təbrik edir, bütün "Kaspi”çilərə bu çətin peşədə uğurla
irəliləməyi arzulayıram.
Konsertimə gəlincə, dekabrın
15-də "Yeni il konserti” adlı proqramım olacaq. Saat 19:00-da "Kapellhaus”da
dinləyicilərimlə görüşəcəyəm. Mənim dünyaca məşhur ifaçınız olan Rəşid
Behbudova olan sevgimdən xəbərdarsınız. Bu konserti verməklə, yeni ilə Rəşid Behbudovun
mahnıları ilə girmək istəyirəm. O, mənim üçün özəldir. Bu mənim uşaqlığımdan gələn
özəl bir sevgidir. Hər kəsə bəllidir ki, onun mahnılarının vurğunuyam.
-
Konsertdə hansı repertuarla çıxış edəcəksiniz? Yəqin ki, Rəşid Behbudovun yaradıcılığına
müraciət edəcəksiniz?
- Əlbəttə ki, bu konsertimi
ona həsr edirəm. Konsert üçün təşkil olunan repertuarda Rəşid Behbudovun mahnıları
yer alacaq. Ancaq yalnız onun repertuarı ilə kifayətlənmək fikrində də deyilik.
Onlarla bərabər, bir sıra klassik mahnılar da ifa edəcəyəm. Dünya klassik musiqilərinə
də yer verməyi düşünürəm.
-
Ötən konsertinizdə monitor vasitəsilə Rəşid Behbudovla duetiniz gerçəkləşdi.
Bəs bu dəfəki konsertdə necə?
- Çox istəyərdim ki, bu
konsertdə də elə bir duet gerçəkləşsin. Əslində mahnı hazırdır. Ancaq bəzi
texniki problemlər var. Belə ki, çıxış edəcəyim zalın imkanları az olduğuna görə,
indi onu nümayiş etdirmək üçün aparaturaları axtarırıq. Çox istəyirəm ki, bu konsertimdə
də onunla duetim olsun.
-
Bu dəfəki konsertinizdə hansı yeniliklər olacaq?
- Keçən ilki ansamblımla bu
ildə birgə çalışacağıq. Sadəcə olaraq musiqi alətlərinə gitara əlavə olunub. Bu
dəfə tamam başqa bir repertuara müraciət etmişik.
-
Yeni mahnılar necə, olacaqmı?
- Bir yeni mahnım olacaq.
Ancaq adını çəkmək istəmirəm. İstəyirəm ki, sürpriz olsun.
-
Bizim hər hansı müğənnilərimizlə duet gözlənilirmi?
- Bəli, bir bariton səsli müğənni
ilə duet oxuyacağam. O da özünə aid iki ariya ifa edəcək.
-
Oya xanım, bəs konsertə gəlmək istəyən izləyicilər biletləri necə əldə
edəcəklər? Yoxsa yenə də biletlər pulsuz olacaq?
- Hər ilki kimi, bu dəfə də
biletlər pulsuz olacaq.
-
Bəs belə olan halda, sizin qazancınız nədir?
- Mən klassik musiqi
ifaçısıyam. Azərbaycanda klassik musiqi ifa edən dostlarım da kifayət qədərdir.
Onlar da bu sənətdən pul qazanmağın çətin olduğunu dilə gətirirlər. Gördüyüm
qədər, onlar da çox pul qazanmırlar. Ona görə də bu sənətə gəlir mənbəyi kimi
baxmıram. İstəyirəm ki, musiqisevərlər gəlsinlər və bu özəl günü mənimlə
bərabər musiqidən zövq alaraq keçirsinlər. Buradan da heç bir təmənna güdmürəm.
Onun üçün konserti ödənişli etmədim. Çünki bu konsertdə könüllü klassik musiqi
dinləmək istəyənləri görmək istəyirəm. Bunun üçün də konsertə hər təbəqənin
insanları gələ bilər.
-
İndi 2, 3, hətta 4 gün konsert verənləri görürük. Bəs siz necə?
- İldə bir neçə dəfə
konsert proqramları ilə çıxışlarım olub. Hətta mən verdiyim konsertlərin sayını
da itirmişəm. Dalbadal olaraq konsert proqramı ilə çıxış etməyi zəruri hesab
etmirəm. 2017-ci ildə də bir neçə
konsert proqramı ilə çıxış etməyi düşünürəm. Hazırda həmin layihələr
üzərində çalışıram. Konsertim saatyarım çəkəcək. Güman edirəm ki, saatyarım
içərisində tamaşaçılara çatdırmaq istədiyim mesajı ötürəcəyəm.
- Konsertlərdən söhbət düşmüşkən, eşitdiyimizə görə, sevgililər gününə də
konsert proqramı hazırlayırsınız.
- Elədir. Fevralın 14-də
yeni bir konsertim olacaq. O konserti sevgililərə həsr edəcəyəm. Həmin
konsertdə eyni ansamblla çıxış edəcəyəm.
- Həmin konsertdə də repertuar eyni olacaqmı?
- O konsertdə başqa
mahnılar ifa edəcəyəm. Sürpriz olaraq qalsın. Zamanı gələndə bu haqda məlumat
verəcəyəm.
- Həyat yoldaşınız həkim Hakan Tanrıverdi də öz sahəsində tanınan və peşəkar
insanlardandır. İki tanınan sima bir ailədə necə yola gedir?
- Heç çətin deyil. Biz ulduz
xəstəliyinə tutulmamışıq. Şükürlər olsun Tanrıya ki, bizim gözəl çevrəmiz var.
Sevgi olan yerdə insan hər bir çətinliyin, məsuliyyətin öhdəsindən gələ bilir.
Çalışırıq ki, öz işimizi peşəkar şəkildə həyata keçirək. Nə ediriksə, onun ən
yaxşısını etməyə səy göstəririk. Bu işdə də bir-birimizə dəstək oluruq.
- Hakan bəy peşəsi ilə əlaqədar olaraq qadınlarla çalışır. Bu sizdə hər hansı
bir qısqanclıq hissi yaradırmı?
- Əsla. Nə onda mənə qarşı,
nə də məndə ona qarşı qısqanclıq hissi var. Bunun səbəbi də sevgi və güvənə
söykənir. Bu iki hiss birlikdə olduqdan sonra heç bir qısqanclığa yer qalmır.
Bizim ailəmiz möhkəm təməllər üzərində qurulub. Ona görə belə xırda məsələlər
bu təməllərə zərər gətirə bilməz.
-
Son olaraq oxuculara sözünüz.
- Bütün musiqisevərləri
konsertimə dəvət edirəm. İstəyirəm ki, Yeni ili öz sevənlərimlə birlikdə
keçirim. Əgər siz də Rəşid Behbudovun repertuarını və dünyaca məşhur klassik mahnıları
mənim ifamda dinləmək istəyirsinizsə, o zaman sizləri də konsertimdə
gözləyirəm. Sizi əmin edirəm ki, asudə vaxt keçirmək üçün bu konsertə gəlməyə
dəyər. Mən dinləyicilər arasında ayrı-seçkilik etmirəm. Hamınız dəvətlisiniz.
Xəyalə Rəis