“Radikallar milli maraqlarımızı müdafiə edənləri bu mübarizədən çəkindirməyə çalışırlar”

Professor Əli Həsənovun Kərimlinin timsalında radikal müxalifət qanadına hücum etməsini müxtəlif yerlərə yozanlara səslənən B.Həsənov tövsiyə edib ki, onlar "Keşikçidağ” məsələsində AXCP sədrinin antimilli, provakativ və qərəzli mövqeyinə nəzər yetirsinlər: "Əli Kərimli var gücü ilə ictimai rəyi manipulyasiya edib hakimiyyəti təzyiq altına salmağa və ölkəmizi yeni toqquşmaya sürükləməyə çalışırdı. Ehtimal etmək çətin deyil ki, "Keşikçidağ” məsələsi Əli Kərimlinin rəhbər vəzifədə təmsil olunduğu AXC-Müsavat cütlüyünün fərsiz hakimiyyəti dövründə baş versəydi, Azərbaycan yeni bir böhrana yuvarlanacaqdı. Beləliklə, Əli Həsənovun radikal müxalifəti tənqid etməsinin səbəbi onların hakimiyyətə qarşı destruktiv və qərəzli mövqe tutmaları, ümumilli məsələlərdə dövlət maraqlarına zidd mövqe sərgiləmələri, ölkəni xaosa və qarşıdurmaya sürükləmək cəhdləridir. Təəssüf ki, Əli Kərimli və onun tərəfdaşları tənqiddən nəticə çıxarmaq, bir hissəsində yer aldıqları məqaləni dərindən öyrənib, tezisləşdirib, siyasi dünyagörüşlərində köklü islahatlar aparmaq yerinə, şər-böhtan maşınını işə salmağa üstünlük veriblər. Adətən aciz insanların məğlub olduqları zaman əl atdıqları yeganə vasitə budur”.
Administrasiya rəsmisi sonda vurğulayıb ki, Əli Həsənovun öz məqaləsinin bir neçə abzasını Əli Kərimliyə həsr etməsi onu həyəcanlandırıb və xoşbəxtlik bəxş edib: "Yazıda özü haqqında sərt ifadələrin yer almasına baxmayaraq, AXCP sədri Prezidentin köməkçisi tərəfindən adının çəkilməsinin eyforiyasına qapılır, özünü bəxtəvər hiss edir və bundan piar kimi istifadə etməyə təşəbbüs göstərir. Bu da təbiidir. Hansı ki, illərdir dəridən-qabıqdan çıxanlar bu uğura nail ola bilmirlər”.
Mövzu ilə bağlı fikirlərini "Kaspi” qəzetinə açıqlayan millət vəkili, politoloq Hikmət Babaoğlu bildirib ki, milli maraqları qorumaq hər bir vətəndaşın borcudur. Onun sözlərinə görə, professor Ə.Həsənovun radikal müxalifəti tənqid etməsi həm onun vətəndaşlıq borcundan, həm də tutduğu rəsmi vəzifənin şərtləndirdiyi amillərdən irəli gəlir: "Bu, belə də olmalıdır. İndiki mərhələdə radikal müxalifət adlandırılan qruplaşmalar o qədər marginallaşıblar ki, onlar Azərbaycanın siyasi dəyərlərini, mədəniyyətini, əxlaqını hədəfə almaqla ölkəmizdə bir dəyərsizləşdirmə yaratmağa çalışırlar. Dəyərsizləşdirmənin ikinci ayağı lidersizləşdirməkdir. Lidersizləşdirmənin sonuncu mərhələsi dövlətsizləşdirməkdir. Radikal müxalifət adlandırılan marginal qruplar anti-Azərbaycan mərkəzlərin direktivləri ilə ölkəmizə qarşı bu üç mərhələli dağıdıcı siyasəti həyata keçirirlər. İlk növbədə Azərbaycanın siyasi münasibətlər sisteminə qeyri-etik ifadələri, söyüş və təhqirləri normal hal kimi təqdim etməklə ölkəmizin siyasi dəyərlərini, etikasını gözdən salırlar. Bunun ardınca liderləri, ondan sonra da dövləti hədəfə alırlar. Son mərhələdə əsl hədəf Azərbaycan dövləti və dövlətçiliyidir”.