Qətərin təcridi ciddi qlobal nəticələrə gətirib çıxara bilər
Münaqişə və gərginliklərin səngimədiyi Yaxın Şərq növbəti problemlə üzləşib.
Bu dəfə gərginlik Qətər ətrafında yaşanır. Başda Səudiyyə Ərəbistanı olmaqla
yeddi ərəb ölkəsi Qətərlə diplomatik əlaqələri kəsib. Bu ölkələrin Qətəri
dənizdən və havadan mühasirəyə alması regional gərginliyi artırıb və dünyanın
diqqətini özünə cəlb edib. İnsident qüdrətli ərəb ölkələri arasında son onilliklərin
ən böyük gərginliyi hesab edilir. Belə bir iddia da var ki, Fars körfəzində
gərginlik Qətər və Türkiyəyə mənfi münasibəti ilə seçilən Birləşmiş Ərəb Əmirliklərinin
Vaşinqtondakı səfirinin internetdə yayılan
məktubundan sonra qızışıb. Eləcə də Çinin İranın Şanxay Əməkdaşlıq
Təşkilatına tamhüquqlu üzv olacağı barədə bəyanatı bu gərginliyə səbəb kimi
göstərilir. Lakin əsas diqqət Qətər və İranın yaxınlaşmasına yönəlir. Məsələ
ondadır ki, hər iki ölkə 51 trln. kub metr həcmində qiymətləndirilən "Cənubi Fars”
qaz yatağını işlədir. Bu o deməkdir ki, iki ölkənin əldə edəcəyi gəlir onların regiondakı
mövqelərinin xeyli güclənməsinə gətirib çıxara bilər. Hesablamalara görə, bu
yataqda dünyada qaz ehtiyatlarına görə ikinci yerdə qərarlaşan İranın qaz
ehtiyatlarının 40 faizi cəm olub. İranın burada payı 14,2 trln. kub metr, Qətərin
isə 25,4 trln.kub metrdir. Dünyada qaz ehtiyatlarına görə üçüncü olan Qətər
üçün bu rəqəm ehtiyatlarının 99 faizi
deməkdir. Başqa sözlə, böyük bir enerji oyununun getdiyi göz önündədir. Əgər
İran bu ehtiyatlarını dünya bazarına çıxararsa, bu, onun regiondakı mövqeyinin
güclənməsi demək olacaq. Bunu isə nə Birləşmiş Ştatlar, nə də Səudiyyə
Ərəbistanı istəyir. Çinə gəldikdə, onu energetika tələbatının ödənilməsi
narahat edir. Bütün bu hadisələrin regional və qlobal miqyasda nəticələrinin
olacağı isə şəksizdir. Bütün bunlar neftin dünya bazarında qiymətlərinə, ərzaq
sektoruna, Qətərin insan resurslarına, 2022-ci ildə keçiriləcək futbol üzrə
dünya çempionatı ilə bağlı inşaat layihələrinə təsir edəcək. Bu gərginlik həm
də Çinin "Bir dəhliz, bir yol” layihəsinə də təsirsiz ötüşməyəcək.
Belə bir durumda Türkiyənin rolu artır. Türkiyə nəşrləri yazır ki,
yaranmış gərginliyin tez bir zamanda nizamlanması üçün İslam Əməkdaşlıq
Təşkilatının müvəqqəti sədri kimi Türkiyənin və prezident Rəcəb Tayyib Ərdoğanın
intensiv diplomatik səyləri hamının xeyrinə ola bilər. Artıq yayılan xəbərlərə
görə, Türkiyə Qətəri ərzaq məhsulları ilə təmin etməyi öz üzərinə götürəcək. Bu
məsələnin müzakirəsi üçün yaxın günlərdə Qətərdən Türkiyəyə xüsusi nümayəndə
heyəti səfər edəcək. Bundan əvvəl ərəb KİV-ləri yazmışdı ki, Qətərin ərzaq
ehtiyatları ölkəyə 4 həftəyə qədər kifayət edəcək və rəsmi Doha içməli su və
kənd təsərrüfatı məhsullarının təmin edilməsi məqsədilə Ankara və Tehranla
danışıqlara başlayıb.
Beləliklə, regionda öz mövqeyini iqtisadi və siyasi sabitlik vahəsi
kimi göstərən Türkiyənin mövqeyi bütün bu hadisələr fonunda güclənə bilər.
Bununla yanaşı, Türkiyənin Fars körfəzi ölkələri arasında "vasitəçi”lik kimi
əhəmiyyətli mövqeyi var. Bir faktı da qeyd edək ki, Türkiyənin Qətərdə hərbi bazası
var. Türkiyə parlamenti də Qətərdəki hərbi bazasına daha çox əsgər
göndərilməsinə dair yeni mandat təsdiq edib.Parlamentdəki əsas siyasi
partiyalar bu qanunvericilik aktının növbədənkənar qaydada təsdiqini həyata
keçiriblər.
Beləliklə, Səudiyyə Ərəbistanı və digər Körfəz ölkələri Dohanın
blokadasına qalxdıqları bir vaxtda Ankara bu qarşıdurmadakı seçimini Qətərin
xeyrinə edib.Türkiyə Qətər və bir neçə körfəz qonşuları ilə yaxşı
münasibətlərə malikdir. Türkiyə və Qətər Misirdə "Müsəlman qardaşları”
təşkilatına və Suriyada antiəsəd qüvvələrinə birlikdə dəstək veriblər. Hakim AKP-nin
parlamentə təqdim etdiyi qanun layihəsində Qətərə əlavə qoşun göndərilməsi və
bu ölkə ilə hərbi əməkdaşlığın gücləndirilməsi də nəzərdə tutulur. Türkiyə
2014-cü il razılaşmasına əsasən, Qətərdə özünün hərbi bazasını yaradıb. 2016-cı
ildə Türkiyənin o vaxtkı baş naziri Əhməd Davudoğlu Qətərdəki 150 türk hərbçiyə
baş çəkmişdi. Türkiyə tərəfi 2015-ci ildə bildirirdi ki, son məqsəd burdakı
hərbi bazada 3 minədək əsgər yerləşdirməkdir. Baş nazirin müavini Numan
Kurtulmuş Qətər böhranının diplomatiya və dialoq yolu ilə həll edilməsi üçün səy
göstərdiklərini bildirib. O, bəzi dairələrinbucür böhranlarla islam
dünyasını hədəfə aldığınıdeyib. O ki qaldı Qətərə, bu ölkə onu terroru
dəstək verməkdə ittiham edən ölkələrin mövqeyi ilə razılaşmır. Ölkənin xarici
işlər naziri Məhəmməd bin Əbdül Rəhman bin Casim Al Tani deyib ki, Qətər bir
sıra ərəb ölkələri ilə münasibətlərdə yaranmış böhranın həlli üçün dialoqa
hazırdır: "Region ölkələri superdövlət deyillər ki, problemləri hərbi yolla
həll etsinlər”. Nazir əlavə edib ki, Qətər terrorizmi dəstəkləmir.
Bütün bunlardan çıxış edərək bu nəticəyə gəlmək olar ki, məsələnin
hələ uzun müddət müzakirə və gərginlik mövzusu olaraq qalacağı şəksizdir.
Xatırladaq ki, iyunun 5-də Səudiyyə Ərəbistanı, Bəhreyn və BƏƏ,
həmçinin Misir Qətəri terror təşkilatlarına və onların bu ərəb ölkələrində
daxili vəziyyəti gərginləşdirmək üzrə fəaliyyətlərinə dəstək verməkdə ittiham
edərək rəsmi Doha ilə diplomatik əlaqələri kəsdiklərini bəyan ediblər. Daha
sonra bu ölkələrin sırasına Yəmən, Liviya, Maldiv, Mavrikiy, Qəmər adaları və
Seneqal da qoşulub.
Azər