Qarabağ bütün dünyada azərbaycanlıları birləşdirdi
20.07.20 19:43
2846
Müxtəlif
ölkələrdə soydaşlarımız bir araya gələrək, erməni təxribatına cavab verdilər
Bu günlərdə Ermənistan-Azərbaycan
sərhədinin Tovuz istiqamətində baş verən hadisələr nəinki ölkədə, bütün dünyada
ürəyi vətən üçün döyünən hər bir azərbaycanlını qəzəbləndirdi və həmrəy etdi.
Belə ki, dünyanın harasında yaşamasından asılı olmayaraq, hər bir azərbaycanlı
dövlətimizin, ordumuzun yanında olduğunu bir daha göstərdi. Bunu artıq bir neçə
gündür ki, planetin müxtəlif yerlərində soydaşlarımızın keçirdiyi dəstək
mitinqləri də sübut edir. Bu cür aksiyalar Avropanın müxtəlif şəhərlərində hələ
də davam edir.
Dünyanın müxtəlif ölkələrində yaşayan azərbaycanlılar
bu hadisələrdən sonra aksiyalar təşkil edib, yürüşlər keçirir, səslərini ucaldıb,
"Hər şey vətən üçün”, "Qarabağ bizimdir, bizim olacaq” şüarlarını səsləndirirlər.
Soydaşlarımız bu işdə yaşadıqları ölkələrdə ermənilərin təxribatları ilə
qarşılaşsalar da, onların lazımi cavabını verməyi də bacardılar. Xaricdə baş
verənləri xaricdə yaşayan azərbaycanlıların dilindən eşidək.
Gənc
rejissor Elvin Abdulla iyulun 19-da İstanbulun Beyazit
meydanında "Can Azərbaycana canımız fəda" şüarı ilədəstək
məqsədli mitinq keçirildiyini deyir: "Sosial şəbəkə vasitəsi ilə iyulun 19-u
üçün İstanbulda yaşayan azərbaycanlıların bir araya gələcəkləri xəbərini
eşitdim. Bir Azərbaycan vətəndaşı olaraq buraya üz tutduq. Meydanda böyük
izdiham vardı. Tədbir İstanbulda fəaliyyət göstərən Azərbaycan Ocaqları, Turan
Ocaqları və İstanbul Universiteti Azərbaycan Mədəniyyət və Həmrəylik Birliyinin
təşkilatçılığı ilə keçirilirdi. Türkiyədə yaşayan, təhsil alan həmvətənlərimiz
və qardaş ölkənin nümayəndələri də aksiyada iştirak edirdilər. Böyük bir
izdihamda fəxrlə, qürurla iştirak etdik. Mitinqdə Azərbaycan və Türkiyə, digər
türkdilli dövlətlərin bayraqları qaldırılmışdı. İştirakçılar "Qarabağ
Azərbaycanındır", "Ar olsun Ermənistana", "Qarabağa
ədalət" şüarları səsləndirirdilər. İnsan belə bir mühitdə qürur hissi
keçirir. Nəinki İstanbulda, eyni zamanda həmin gün Ankarada da təcavüzkar
Ermənistana etiraz tədbiri keçirilib. Türkiyənin qurucusu Mustafa Kamal
Atatürkün məzarlığı yerləşən Anıtqəbir kompleksində çələnglər qurulub. Tədbirdə
Azərbaycanın Türkiyədəki Səfirliyi, Türk dünyası Parlamentarilər
Birliyi,Ankarada yaşayan azərbaycanlılar, Türkiyədəki Azərbaycanlı İş
Adamları Birliyi (TAİB), Osmanlı Ülkü Ocaqları Federasiyası və bu kimi bir çox
dərnəklərin üzvləri iştirakı ediblər”.
Kanadada yaşayan azərbaycanlılar,
diaspor təşkilatları və diaspor fəalları bu ölkənin Toronto və Ontario
şəhərlərində Azərbaycan ordusuna dəstək aksiyası keçiriblər. Kanadada yaşayan jurnalist Lalə Musaqızı qeyd edir ki, aksiya
iştirakçıları Ermənistan silahlı qüvvələrinin Ermənistan-Azərbaycan sərhədinin
Tovuz rayonu istiqamətində törətdiyi təxribata etirazlarını bildiriblər: "İyulun
19-da Kanadada yaşayan azərbaycanlılar Toronto şəhərində Azərbaycana dəstək,
Ermənistana "dayan" demək üçün bir araya gəldilər.Ermənistan
silahlı qüvvələrinin törətdiyi təxribata etiraz əlaməti olaraq Kanadada
fəaliyyət göstərən müxtəlif Azərbaycan cəmiyyətlərinin təşkilatçılığı ilə
izdihamlı yürüş keçirildi. Azərbaycan və ingilis dillərində "Erməni
aqressiyasına son", "Erməni işğalına son", "Qarabağ bizimdir,
bizim olacaq", "Qarabağa ədalət", "Şəhidlər ölməz, vətən
bölünməz", "Qarabağ Azərbaycanındır" şüarları altında keçirilən
aksiyaya təxminən 500-ə yaxın azərbaycanlı və Azərbaycan sevdalısı
qatıldı.Qeyd edim ki, qaldırılan bayraqlar arasında Türkiyənin, İsrailin,
Gürcüstanın da bayraqları var idi. Torontonun College və Yonge küçələrinin
kəsişməsindən başlayan yürüş şəhərin mərkəzində yerləşən Dundas meydanına kimi
davam etdi. Dundas meydanına çathaçatda leysan yağış yağsa da, heç kim yerindən
tərpənmədi. Yağış dayanandan sonra aksiya davam etdi və çıxışçılar bir-bir mikrofona
yaxınlaşaraq ürəklərini boşaltdılar. Erməni təcavüzündən, erməni məkrindən,
Tovuzda baş verən hadisələrdən, ermənilərin yaşayış yerlərini atəşə tutmasından
danışdılar və Azərbaycan həqiqətlərini Toronto sakinlərinə çatdırdılar. Toronto
sakinlərinə ermənilərin işğalçılıq siyasəti, Qarabağ həqiqətləri ilə bağlı
məlumat xarakterli broşürlər də dağıdıldı. Tədbirin sonunda Kanadada fəaliyyət
göstərən bütün Azərbaycan təşkilatlarının bir araya gələrək Azərbaycan alyansı
yaradacağı barədə fikirlər də səsləndirildi”.
L.Musaqızı qeyd etdi ki, yürüşün baş
tutması üçün mərkəz küçələrdə avtomobillərin hərəkəti məhdudlaşdırılmışdı.
Aksiyanın təhlükəsizliyini təmin etmək məqsədilə Toronto polisi iş başında
idi.
Almaniyanın Köln şəhərində yaşayan
azərbaycanlılar da Ermənistanın təxribatına cavab olaraq etiraz aksiyası
keçiriblər. Almaniyadakı Time TV Media
group-un jurnalisti Emil Cəfərov bizimlə söhbətində aksiya iştirakçılarının
Azərbaycanın ərazi bütövlüyündən, qonşu Ermənistanın işğalçılıq siyasətindən
əziyyət çəkməsindən və Qarabağ həqiqətlərindən bəhs edən şüarlar səsləndirərək,
şəhərin mərkəzi küçələrində yürüş etdiklərini bildirdi: "Bu, bir həmrəylik
yürüşü idi. Bu yürüşdə Almaniyada fəaliyyət göstərən diaspor təşkilatlarımız,
iş adamları, digər qurumların nümayəndələrdi iştirak edirdi. Bu yürüş milli ruhda
keçirildi. Bizi sevindirən əsas məsələ isə burda iqtidar, müxalifət söhbətinin
olmaması idi. Söhbət Azərbaycandan gedirsə,
insanlarımız bir yerə toplaşmağı bacarır”.
E.Cəfərov daha əvvəl, iyulun 18-də Düsseldorf
şəhərində də mitinq keçirildiyini dedi: "Düsseldorfdakı yürüşdə 1000-dən çox azərbaycanlı
iştirak edirdi. Alman dilində mətnlər oxundu, mətnlərdə Qarabağın necə işğal
olunması, Xocalıda baş verən hadisələr öz əksini tapdı”.
Niderland Krallığında fəaliyyət göstərən "Ana
Vətən”Niderland Azərbaycanlı Qadınlar Birliyinin sədri Mayisə
Ağamirzəyevadeyir ki,
Tovuzda yaşanan hadisələr oradakı azərbaycanlılara ciddi təsir edib: " Biz
xəbəri eşidən kimi, aksiya üçün müraciət etdik. Burda hər hansı aksiya
keçiriləcəksə, 4 gün öncədən məlumat verilməlidir və hadisələrin üzərindən 5
gün keçdikdən sonra biz o aksiyanı gerçəkləşdirdik. Ermənilər də öz
xislətlərindən əl çəkmədilər. Ermənilərin səfirliyimizin
binasının önünə gələrək onu əhatəyə almaq kimi məkrli niyyətindən xəbər tutan kimi,
Niderland-Belçika Azərbaycanlıları Koordinasiya Şurası, Benilüks
Azərbaycanlıları Konqresi, "Ana Vətən" Niderland Azərbaycanlı Qadınlar
Birliyi, Azərbaycan Xanımlar Klubu, Hollandiya Azərbaycan Evi, Hollandiya
Azərbaycan-Türk Kültür Dərnəyi, Holland-Azərbaycan Dostları Cəmiyyəti,
Belçika-Azərbaycan Dostluq Cəmiyyəti, "Odlar Yurdu" təşkilatının
üzvləri, Almaniya, Niderland və Belçikada təhsil alan tələbələrimiz ölkəmizin
diplomatik nümayəndəliyinin qarşısına gələrək ermənilərin piket cəhdinə
möhtəşəm etiraz aksiyası ilə cavab verdik. Biz aksiyadan öncə səfirliyimizin
qarşısında ingilis dilində yazılmış "Erməni təcavüzünə son!",
"Xocalıya ədalət!" şüarlarını, Ermənistanın son təxribatları zamanı
qəhrəmancasına həlak olmuş şəhidlərimizin şəkillərini düzməklə, ermənilərə
tarixi vətənlərinin təcavüzkar mahiyyətə malik olduğunu bir daha göstərdik. Aksiya
ərzində "Qarabağ Azərbaycandır!", "Qarabağ bizimdir, bizim
olacaq!", "Vur, keç səngəri, Azərbaycan əsgəri!" şüarlarını
səsləndirdik. Yerli polis qüvvələri vəziyyətə nəzarət etsələr də, ermənilər
soydaşlarımıza tərəf 2 dəfə daş və şüşə əşyalar atmaqla təxribatçı hərəkətlərə
yol verdilər. Biz polislərə müraciət etdik. Bir anda böyük polis qrupu töküldü.
Burada atlı polislər fəaliyyət göstərir ki, onlar öyrədilmiş itlərlə erməniləri
geri çevirdilər. Bu hadisə Holland mətbuatı tərəfindən əks olundu. Hətta sizə
onu da bildirim ki, düşmən tərəf 7 saat müddətində aksiya keçirmək üçün
polisdən icazə almışdı. Azərbaycanlılar isə sonadək mübarizədən əl çəkmədilər”.
Bakı 14°C
