“Ol” deyəndə “Ol”an teatr - Fotolar
Teatr kütləni cəhalətdən qurtarmaq üçün ən ideal vasitədir.
Bir neçə il bundan qabağa qədər dövlət teatrlarımızın mövcudluğundan danışır,
onların yalnız özəl teatrlar yaranacağı təqdirdə inkişaf edəcəyini və əgər
rəqabət olsa, onların da inkişafa doğru yol alacağını deyirdik. İndi isə
yeni-yeni müstəqil teatrlar yaranır. Onlar öz büdcələri hesabına ayaqda durmaq üçün
mübarizə aparırlar. Bu gün özəl teatrların fəaliyyəti bizi bu baxımdan
sevindirir. Çünki yeni teatr yeni nəfəs deməkdir, yeni teatr yeni tamaşalar
deməkdir, yeni teatr fərqli repertuar deməkdir, yeni teatr yenilik deməkdir.
Eyforiyaya qapılan
teatr
Sentyabrın 23-də daha bir özəl teatr öz qapılarını
tamaşaçıların üzünə açdı. Bir neçə ay bundan əvvəl kinoteatrlara ayaq açan "Ol”
filminin yaradıcı heyəti bu dəfə «Ol” Teatrı ilə qarşımızda idi. İlk dəfə kiçik
səhnədə "Cəsur Şahzadə Məlikməmmədin nağılı”nda onlar sevimli qəhrəmanlarının
macəralı və sehrli dünyasına səyahətə apardılar. Tamaşanın quruluşçu rejissoru
kukla sənətini uzun illər Azərbaycanda və ölkə hüdudlarından kənarda təmsil
etmiş, bir çox festivalların laureatı olmuş Namiq Ağayev idi. Teatrın ilk
tamaşası olan "Cəsur Şahzadə Məlikməmmədin nağılı”da rollarda Fikrət Məmmədov,
Mehriban Rəcəbova, İlqar Kamal və Əli
Baloğlanov iştirak edirdi. Tamaşanın müəllifi və quruluşçu rejissoru Namiq
Ağayev, rəssam və kukla ustası Xuraman Azəridir, dizayn və qrafikası Orxan
Bektaşa məxsusdur.
Məlumat üçün qeyd edək ki, «Ol” Teatrını 1997-ci
ildə Namiq Ağayev Türkiyənin tanınmış aktyoru Tuncer Salmanla birlikdə
Türkiyədə açıb. Teatrın ilk tamaşası isə
Nazim Hikmətin 45 illiyi münasibəti ilə "Xoşgəldin, Nazım” adlı tamaşa olmuşdu.
Daha sonra Richard Bachın eyniadlı kitabından bəhrələnən "Qağayı” adlı tamaşa həmin
teatrda nümayiş olunmuşdu.
Namiq Ağayev bizimlə söhbətində «Ol” Teatrının o
illərindən danışdı. Dedi ki, bu "Ol” həm o "Ol”dandır, həm də o "Ol”dan deyil:
"Biz Tuncer Salmanla həmin «Ol” Teatrının tamaşaları ilə Amsterdama, Kiyevə,
Moskvaya qastrollara getmişdik. Bu teatr həmin teatrın davamı deyil. Tamam
başqa ampluada, başqa quruluşda hazırlanan bir teatrdır. "Ol” sözü mənim könlümdən
xəbər verir. Allah "Ol” deyib. "Ol” həm mübtədadır, həm feldir. "Ol” deyilib və
olub.Bu "Ol” məsələsi çox qəliz məsələdir. İndi də teatr şəklində
fəaliyyət göstəririk. Bizim məqsədimiz, hədəflərimiz var. Biz bu teatrla bir
çox ölkəyə festivala gedəcəyik. Bilirsiniz ki, biz bir neçə ay bundan öncə "Ol”
filmini də çəkdik. Filmin prodüseri Ramin Asimoğlu idi. Həmin Ramin bəy hazırda
teatrın direktoru və bədii rəhbəridir. O, mənim sənətdə kiçik qardaşımdır. Ramin
gəncdir və o, bu teatrı çox gözəl idarə edir. Biz bu səhnədə mini pantomima,
mini opera, uşaq və böyüklər üçün tamaşalar hazırlayacağıq. Teatrın nəzdində
aktyor kursları da fəaliyyət göstərəcək. Aktyora lazım olan bütün stereotipləri
yetişdirəcəyik. Sakit durmaq fikrində deyiləm. İstedadlı uşaqlardan buraya cəlb
edəcəyik”.
Biletlərin satışına gəlincə, Namiq Ağayev deyir ki,
əgər teatrı hansısa şirkət öhdəsinə götürsə, tamaşalar xeyriyyə məqsədi ilə,
ödənişsiz şəkildə təqdim olunacaq, ya da çox ucuz şəkildə biletlər satılacaq.
Əgər teatr "öz əli, öz başı” olsa, biletlərin qiyməti bir qədər baha ola bilər,
çünki teatrı saxlamaq lazımdır.
Rejissordan gələcək planlarını da xəbər aldıq. Deyir
ki, təkcə «Ol” Teatrı ilə kifayətlənmək niyyətində deyillər: "Musiqili teatr
açmaq istəyirik. Bundan başqa, «Ol” Teatrında rejissura, eyni zamanda prodakşın
var. Teatr bizimdir, hamınındır”.
Rejissordan nə üçün teatrın açılışını məhz uşaq
tamaşası ilə etdiklərini də soruşuruq: "Uşaqlar dünyanın ən saf, təmiz
varlıqlarıdır. "Cəsur Şahzadə Məlikməmmədin nağılı” tamaşası bizim milli nağıllarımız
əsasında hazırlanıb. Uşaq psixologiyasına, mistikasına özümüzü daha yaxın hiss
edirik. Bu bizdə nəsillikcədir. Mən çox gənc yaşlarımda ilk fəaliyyətimi
Abdulla Şaiq adına Kukla Teatrından başlamışdım. SSRİ-də həmin vaxt tamaşa
hazırlamaq bir rekord idi. Yaşlandıqca beynimiz sadələşir, dünyaya daha açıq
gözlə baxırıq. Bu beyin uşaq psixologiyasına çox uyğundur. Yaşlananda
sentimentallaşıb uşaqlaşırsan. Eyni zamanda, böyük bir tamaşa hazırlayırıq.
Uşaqları əyləndirmək yox, həm də estetik tərbiyə vermək istəyirik. Onlara
qəhrəmanlarımızı sevdirmək istəyirik”.
Kiçik səhnədəki canlılıq
«Ol” Teatrının
direktoru və bədii rəhbəri Ramin Asimoğlu
deyir ki, onların qarşısında böyük məqsədlər dayanır: "Teatr bir bayramdır. Biz
çalışacağıq ki, insanlara o bayram ab-havasını yaşadaq. Açığı, qabaqcadan böyük
danışmaq istəmirəm. Repertuarımızda müxtəlif səpkili tamaşalar yer alacaq ki,
artıq yeni tamaşanın məşqlərinə başlamışıq. Bundan sonra böyüklər üçün tamaşa
təhvil verəcəyik. Hədəfimiz birdir. O hədəfə təmiz, pak, müqəddəs getmək ən
böyük amalımızdır”.
Tamaşada şah
rolunun ifaçısı, aktyor Fikrət Məmmədov deyir ki, uşaqlara
milli nağıllarımızın təbliği vacib amillərdəndir: "Bu günün uşaqları xarici
nağıllara baxaraq böyüyür. Biz onlara yerli qəhrəmanlarımızı sevdirməli və
onları tanıtmalıyıq. Bu baxımdan Məlikməmməd ən baxımlı, oxunaqlı gözəl
qəhrəmandır. "Cəsur Şahzadə Məlikməmmədin nağılı” tamaşası bir fərqlilik idi.
Ümumiyyətlə «Ol” Teatrının tamaşaçısı burada təzə eksperimentlər görəcək. Necə ki
bu tamaşada gördülər. Sözügedən tamaşa aktyor və kukla sintezi nəticəsində
hazırlanmışdı. Bundan sonra «Ol” Teatrının səhnəsində yeni ideyalar, yeniliklər
olacaq”.
Tamaşaçıların görmək istədikləri
Teatrın açılışında
iştirak edən yazıçı-publisist Ülviyyə Heydərova deyir ki, hər
mədəniyyət ocağının açılması əslində bayramdır: "Çünki həmin məkanlar nəinki
mədəniyyəti, incəsənəti yaşadır, ən əsası, mənəviyyata xidmət edir. İnternet
dövründə, hər şey virtuallaşan zamanında rejissor Namiq Ağayevin yaratdığı «Ol”
Teatrı bir nəfəslik açdı. Teatr aləmində nə qədər bu cür teatrlar açılarsa,
bundan ancaq mədəniyyətimiz qazanar. «Ol” Teatrı mənə ailədə yeni dünyaya gələn
körpəni xatırladır. O körpənin gəlişi məni həm sevindirdi, həm də məsuliyyət
hissimi bir az artırdı. Düşünürəm ki, "Ol” Teatrını sağ-salamat böyütmək yalnız
başda Namiq Ağayev olmaqla kollektivin üzərinə düşən məsuliyyət deyil. Onu həm
də biz qorumalıyıq, yaşatmalıyıq! Bunun üçün ilk növbədə teatrı sevmək lazımdır.
"Ol” Teatrının açılması münasibətilə bütün teatrsevərləri təbrik edirəm!”.
Övladını teatra gətirən üç yaşlı Ucalın anası Sevinc
Fədai isə bildirir ki, müstəqil bir teatrın yaranması o deməkdir ki, orda azad,
fərqli düşüncə, yanaşma tərzi görəcəyik: "Bu mənada yeni bir müstəqil teatrın
yaranması mədəniyyət və mədəniyyətsevərlər üçün önəmli və ciddi hadisədir.
Paytaxtda övladımızla birgə istirahət etmək üçün gedəcəyimiz yerlərin
əksəriyyəti kafe, restoran və əyləncə mərkəzləridir. Ancaq həm uşaqlara, həm də
böyüklərə xidmət edən, insanları düşündürən, mənəvi rahatlıq, mənalı gülüş bəxş
edən bir teatrın var olması, təbii ki, çox gözəldir. «Ol” Teatrı elə ilk
tamaşasından böyüklü-kiçikli hər kəsin mənalı, dolu vaxt keçirməyinə səbəb ola
bildi. Uşaqların həmin müddət ərzində marağını cəlb etmək, sıxılmadan hər hansı
bir materialı izləməsini təmin etmək çətindir. Və "Ol” bunu bacardığına görə,
demək, ilk addımları uğurlu oldu. Kollektiv uşaqları həyəcanlandıra, güldürə
bildi. Həmçinin interaktivlik də uşaqlar üçün maraqlı oldu. Onlar xoşladığı,
maraqlarına səbəb olan personaja toxuna, kuklaları çağıra, sözlərini deyə
bildilər. Mən kiçik yaşımızdan dinlədiyimiz, oxuduğumuz nağılın belə fərqli
üslubda təqdim olunmasını çox bəyəndim. Bu gün az qala hər kəs xroniki
yorğunluq yaşayır və beynini, ruhunu dincəltməyə məşğuliyyətlər axtarır,
gülmək, məişətdən qopub düşünmək istəyir. Və nə xoş ki, bu teatrda səviyyəli,
xoş gülüş yaradan detallar var. Növbəti tamaşalarda isə məşhur və ya Azərbaycan
oxucusuna çox da məlum olmayan əsərlərin bu şəkildə fərqli formatda təqdim
olunması, tamaşaçını ciddi suallarla qarşı-qarşıya qoyması, düşündürməsi, eləcə
də ciddi yumor və replikalarla güldürməsi çox yaxşı olar. Teatrın yaradıcı
kollektivinə uğurlar arzu edirəm. Oğlum və mən artıq bu teatrın daimi
tamaşaçılarıyıq”.
Bizə isə yeni açılan "Ol” Teatrına bu çətin və
məşəqqətli yolda səbr, dözüm və uğurlar arzulamaq qalır. Yaradıcı kollektivin
yolu açıq və aydın olsun.
Xəyalə Rəis