Növbəti manipulyasiya - Fotolar
İqtisadiyyatın bütün sahələrini əmək aləti ilə
təmin etdiyinə görə mütəxəssislər maşınqayırmanı sənayenin ürəyi adlandırırlar.
Maşınqayırma özü-özlüyündə yüzdən çox ayrı-ayrı istehsallar, sahələr, yarımsahələr,
elmi-texniki komplekslərdən ibarətdir. Yeni iş yerlərinin yaradılmasında, yeni
məhsulların bazara çıxarılmasında, ölkə iqtisadiyyatının güclənməsində, ölkənin
iqtisadi müstəqilliyinin artmasında, hərbi cəhətdən güclü olmasında
maşınqayırmaya alternativ sahə yoxdur. Bütün bunlarla yanaşı, maşınqayırma ölkənin
iqtisadi gücünün barometridir. Maşınqayırmanın səviyyəsinə görə ölkənin
sosial-iqtisadi inkişafı haqqında fikir söyləmək olar. Maşınqayırması yaxşı
olan ölkənin inkişaf səviyyəsi də yüksək olur. Hazırda sənaye cəhətdən inkişaf
etmiş ölkələrin iqtisadiyyatında aparıcı mövqe maşınqayırmaya və onunla əlaqədar
olan istehsal və sosial infrastrukturlara məxsusdur.
Belə bir fonda Azərbaycanda da minik
avtomobillərinin istehsal edilməsinə başlanılıb. Nəqliyyat vasitələrinə artan tələbin
daxili istehsal hesabına ödənilməsi üçün ilk öncə Naxçıvan Avtomobil Zavodu
istifadəyə verilib və bu müəssisə maşınqayırma sənayesinin inkişafında xüsusi çəkiyə
yiyələnib. 2010-cu ildən başlayaraq, Çin şirkəti ilə birlikdə bu zavodda müxtəlif
modellərdən ibarət "NAZ-Lifan” avtomobillərinin istehsalına başlanılıb.
Hazırda
isə Naxçıvanla yanaşı, "Gəncə
Avtomobil Zavodu” İstehsalat Birliyində, Neftçala Sənaye Məhəlləsində
yerləşən "Azərmaş” ASC və "İran Khodro” şirkətinin birgə müəssisəsində müxtəlif
minik və yük avtomobilləri, traktorlar istehsal olunur.
"Azərmaş”
ASC-nin Rusiyanın "QAZ Qrup” şirkəti ilə birgə həyata keçirdiyi layihə əsasında
yaxın gələcəkdə Hacıqabul Sənaye Müəssisəsində daha bir zavod istifadəyə veriləcək
ki, burada da kiçik həcmli yük avtomobilləri istehsalı olacaq. Bir neçə gün bundan öncə isə "Gəncə Avtomobil
Zavodu” İstehsalat Birliyində (İB) iki yeni yığım xəttinin açılışı olub.
"Gəncə
Avtomobil Zavodu” İB və Belarusun "Belkommunaş” ASC arasında bağlanmış ikitərəfli
əməkdaşlıq müqaviləsi çərçivəsində "E-321” markalı elektrobuslar və "PALESSE KZS-575” markalı taxılyığan
kombaynlar yığılaraq konveyerdən çıxıb.
Təbii ki, bütün bu addımlar, ölkəmizdə
maşınqayırma sənayesinin inkişafı istiqamətində görülən işlər, reallaşdırılan
layihələr hər birimizi sevindirir. Çünki, bunlar Azərbaycan iqtisadiyyatının
inkişafını nümayiş etdirən növbəti hadisələrdir. İqtisadiyyatın inkişafı isə
ölkə vətəndaşlarının sosial-rifah halının daha da yaxşılaşmasına xidmət edən əsas
amildir.
Lakin əfsuslar olsun ki, bütün bu uğurları həzm edə bilməyən daxili və
xarici qüvvələr Azərbaycanda maşınqayırma sənayesində atılan addımlara kölgə
salmağa çalışırlar. Elə bu günlərdə sosial şəbəkələrdə paylaşılan bir foto da
bu məqsədə ictimailəşdirilir. Əvvəlcədən hazırlanmış həmin fotoda dəmiryol nəqliyyatı
ilə daşınan iki avtobus əks olunub. Bu fotonu paylaşanlar iddia ediblər ki,
guya Gəncədə avtobus istehsalı ilə bağlı söylənilənlər həqiqətə uyğun deyil.
Harada, nə zaman çəkildiyi bəlli olmayan bu foto Azərbaycanla əlaqələndirilir.
Amma reallıq bundan ibarətdir ki, ilk dəfə
olaraq, Gəncə Avtomobil Zavodunda "E-321” markalı elektrobus və "PALESSE KZS-575” markalı taxılyığan
kombayn konveyerdən çıxıb. Hətta bu münasibətlə təşkil olunan mərasimdə
Belarusun baş nazirinin müavini İqor Lyaşenko, sənaye nazirinin müavini Dmitri
Korçik, "Qom Selmaş” ASC-nin baş direktoru Aleksandr Novikov, Belarusun ölkəmizdəki
səfiri Gennadi Axramoviç, Gəncə şəhər rəhbərliyi, "Gəncə Avtomobil Zavodu”
İstehsalat Birliyi Müşahidə Şurasının sədri, Mili Məclisin deputatı Xanlar Fətiyev,
millət vəkili Naqif Həmzəyev, zavodun direktoru Kamran Nəzərov və digər
qonaqlar da iştirak ediblər.
Qeyd olunub ki, indiyə qədər həmin müəssisədə,
ümumilikdə, 11 modeldə 10549 ədəd traktor, 143 xüsusi təyinatlı traktor
yığılaraq təhvil verilib. Bu texnikalardan 9825-i dövlət sifarişi əsasında
"Aqrolizinq" ASC-yə, 724-ü fermerlərə və iş adamlarına satılıb.
2019-cu ilin 4 ayı ərzində Gəncə Avtomobil Zavodunda 478 texnika istehsal
olunub. Bunlardan 469-sı müxtəlif model traktorlar, 1-i MAZ markalı qoşqulu
avtomobil, 1-i "KAMAZ” markalı avtomobil, 2-si MAZ markalı avtobus, 5-i
özüboşaldan traktor qoşqusudur.
2019-cu ilin aprel ayının sonuna qədər "Gəncə
Avtomobil Zavodu” İB-də 8 modeldə, müxtəlif modifikasiyalarda 2864 ədəd MAZ
avtomobili istehsal edilərək təyinatı üzrə təhvil verilib. Bu avtomobillərin
yığımının 30-40 faizini yerli istehsal təşkil edib. Aprelin 30-dək müəssisədə
330 MAZ qoşqusu və 3202 asma avadanlıq istehsal olunub. Bu müddətədək "Gəncə
Avtomobil Zavodu” İB-də, ümumilikdə, 208 ədəd "KAMAZ” markalı yük avtomobili və
411 ədəd "URAL” avtomobili istehsal edilib.
Milli Məclisin Gəncədən seçilən deputatı Naqif Həmzəyev də "Kaspi” qəzetinə açıqlamasında bildirib
ki, Azərbaycan sənayesi yeni inkişaf mərhələsinə
daxil olub. Onun sözlərinə görə, ölkədə qeyri-neft sənayesinin əsas həlqələrindən
birini formalaşdıran maşınqayırma və avadanlıq istehsalı istiqamətində də ciddi
nailiyyətlər əldə edilib. Deputat buna daha bir nümunə kimi, Gəncə Avtomobil Zavodu İstehsalat Birliyində
ilk dəfə olaraq "E - 321”
markalı elektrobus və "PALESSE KZS - 575” markalı taxılyığan kombaynın istehsal
edilməsini qeyd edib. Bildirib ki, bu, iqtisadiyyatın ağır sahəsi
sayılan maşınqayırma sənayesinə daha bir töhfə olub: "Zavodda iki yeni yığım xəttinin açılması həm də daimi iş yerlərinin
yaradılması, yeni məhsulların bazara çıxarılması, ölkə iqtisadiyyatının güclənməsi
deməkdir. Bu həm də Gəncə sakinlərinin sosial rifahının daha da yaxşılaşmasında
böyük əhəmiyyət kəsb edir. Xatırladım ki, bir vaxtlar regionlarda yaşayış yeri
üzrə iş tapa bilməyən insanlar, xüsusən da gənclər paytaxta, xarici ölkələrin
iri şəhərlərinə üz tutmaq məcburiyyətində qalırdılar. Ölkə başçısı İlham Əliyevin
apardığı uğurlu siyasət nəticəsində bu mənfi tendensiya, demək olar ki, tam
dayanıb. Gəncə
Avtomobil Zavodu İstehsalat Birliyi də bu mənfi tendensiyanın dayanmasında özünəməxsus
rol oynayıb. İndiyə qədər bu zavodda çoxsaylı minik və yük avtomobilləri,
traktorlar istehsal edilib, istehlakçılara çatdırılıb. Zavodda elektrobus və
taxılyığan kombaynın istehsal edilməsi isə ölkəmizdə yenilik olmaqla yanaşı,
maşınqayırma sənayesinin inkişafına, yeni iş yerlərinin yaradılmasına, vətəndaşlarımızın
sosial vəziyyətinin bir qədər də yaxşılaşmasına xidmət edəcək”.
Sonda vurğulayaq ki, bütün bu faktlar, xaraktercə xəbis radikalların, Azərbaycanın uğurlarına
sevinə bilməyən xarici düşmənlərimizin, həmçinin onların əlində maşaya çevrilən
"özümüzünkülərin” yalanını, qərəzini növbəti dəfə gün işığına çıxarır.
Rufik İSMAYILOV