Mənfi rolların şəkər kimi ifaçısını şəkər apardı
Azərbaycanın kino və teatr aləmi daha bir aktyorunu
itirdi. Xalq artisti Muxtar Maniyev həyata vida dedi. 150-dən çox filmdə irili-xırdalı
rollar oynayan, teatr səhnəsində rəngarəng rollarla tamaşaçıların rəğbətini
qazanan aktyor uzun müddət idi ki, şəkərli diabetdən əziyyət çəkirdi. Ayaqlarının
hər ikisi amputasiya edilmişdi. Qaynar, hay-küylü həyata alışan aktyor
birdən-birə sakitliyə və qəmginliyə qapanmışdı. "Son vaxtlar çox zəifləmişdi.
Səhərə yaxın yuxudan qalxdı, narahat olduğunu dedi.İkicə dəqiqə keçmədi,
qəfildən gözlərini yumdu”- deyə həyat yoldaşı aktyorun son anlarını göz yaşları
içərisində danışıb.
Geoloq
olmalı idi
Muxtar Maniyev bir neçə il əvvəl
"Kaspi”nin də qonağı olmuşdu. Gəncliyindən, onu aktyorluğa gətirən həvəsdən,
sənət yollarında rastlaşdığı çətinliklərdən, qazandığı şöhrətdən danışmışdı. "Aktyor
olmaq üçün qarşınızda kimin obrazı olub?”- sualına "Heç kim deyə bilməz ki, kimisə təqlid
eləmişəm. Bir az böyük çıxsa da, deməliyəm ki, bu, məndə anadangəlmədir.
İndi istedadı olan da, olmayan da deyir ki, bu, məndə Allah vergisidir.
Sən bilmirsən ki, Allah vergisi insana necə gəlir. Başqasının beyninə
yox, ancaq sənin beyninə gəlir. Çünki çalışqanlıq olmalıdır. Daim
işləyəsən, düşünəsən və bunun ətrafında fırlanasan” cavabını
vermişdi.
M.Maniyev sənətə ilk gəldiyi vaxtlardan
söhbət açaraq, aktyorluğa başqalarına nisbətən bir qədər gec başladığını,
uşaq vaxtı özfəaliyyət dərnəklərinə getdiyini, sənətlə bağlı xəyallar
qurduğunu, hərbi xidmətdən qayıdandan sonra isə sənət aləminə gəldiyini söyləyirdi:
"Əsgərlikdən qabaq Neft və Kimya İnstitutunda oxumuşam. Geoloq olmalı
idim. Hərbi xidmətdən qayıdandan sonra sənədlərimi İncəsənət İnstitutuna
verdim. Valideynlərim bağda idilər, odur ki, xəbərləri olmadı. Bəxtimdən
imtahanları Ədil İsgəndərov qəbul edirdi. İnstituta daxil oldum. İlk gündən
ünsiyyətimiz yarandı. O, bu sənəti mənə öyrətdi. Məni hətta birinci kursda
oxuyanda "Azdrama”ya işə qəbul elədi. Sonra öz yanında aktyor sənəti
kurslarına gətirdi. Birinci kursu qurtaranda - 1959-cu ildə Moskvaya
dekadaya getdik. Gənc aktyor kimi bu, mənim həyatımda böyük hadisə idi”.
Muxtar Maniyev səhnədə Sidqi Ruhulla, Mirzəağa Əliyev, Hüseyn Razi,
Əjdər Sultanov, Mərziyyə Davudova, Mirvari Novruzova kimi sənətkarları
görür, bəziləri ilə tərəf müqabil olur. Sənətin sirlərini onlardan öyrənir:
"Biz o kollektivlə hər gün bir yerdə idik. Gecə-gündüz çalışır, qastrollara
gedirdik. Ədil müəllimin tələbəsi olduğumuz üçün dərslərimizin
çoxunu Dram Teatrında keçirdik. Dərsdən sonra səhnəyə çıxmaq üçün
teatrda qalırdıq. Bu, öyrənmək üçün çox yaxşı təcrübə idi”- deyə aktyor
xatırlayırdı.
Yeni ampluada aktyor
Muxtar Maniyev institutun birinci
kursunda oxuyanda "Koroğlu” filmində
dəmirçi oğlu Polad rolunda çəkilib. Kinorejissor Hüseyn Seyidzadə həmin filmə
aktyor axtarışı üçün instituta gələndə, Muxtarı elə ilk baxışdan seçib. Qəhrəmanlıq
dastanı əsasında çəkilən filmdəki rolundan sonra tənqidçilərin onun haqqında
söylədikləri fikirlər sırasında "kinoya yeni nəfəs, yeni ampluada aktyor gəlib”
sözləri də yer almışdı. M.Maniyev kinoda ilk rolunu belə xatırlayırdı: "Birinci
kursu qurtarandan sonra kinostudiyada "Koroğlu” filmini çəkməyə
hazırlaşırdılar. Məni at sürməyə çağırdılar. Məşqlərdə iştirak
elədim. Atçılar da, məşqçilər də Gürcüstandan gəlmişdilər. Mən orda
İran səfirini müşayiət edən iki çapardan birinin roluna çəkiləcəkdim.
Biz hər gün gedib "Domsovet”in qabağında üç saat məşq edirdik. Yaxşı
at sürməyi öyrəndim. Biz atları qatara mindirib Yevlaxa, ordan da
Xankəndinə getdik. Orda Həmzənin cırıq paltarda toya gəlməsi səhnəsi
çəkilirdi. Həmzə rolunu oynayan
aktyor gəlməmişdi. Tələsik onun sözlərini vərəqdə mənə verdilər.
Hafizəm yaxşı idi. Tez əzbərlədim. Bu epizoda da çəkildim. Beləcə,
kinoda çəkilişlərim başladı”.
Aktyor daha sonra "İnsan məskən salır”,
"O qızı tapın”, "Bizim Cəbiş müəllim” filmlərindəki rolları ilə özünü kino
aktyoru kimi təsdiqləyir. "Bəxt üzüyü”ndə Zırpı, "Ölsəm, bğışla” filmində
Seyidrza, "Bəyin oğurlanması” filmində Qonaq rolları, həmçinin "Bakıda küləklər
əsir”, "Bizim Cəbiş müəllim”, "Sizi dünyalar qədər sevirdim” və s. filmlərdə
aktyor müharibə dövrünün müxtəlif xarakterli insanlarının maraqlı obrazlarını
yaradır. Muxtar Maniyev həm teatr, həm də kino aktyoru kimi çalışdığından
incəsənətin bu iki sahəsi arasındakı fərqli və oxşar cəhətləri gözəl bilirdi:
"Hər ikisi çətin və bir-birindən çox fərqli sənətlərdir. Teatr aktyoru
bir rolun üstündə 5-6 ay işləyir. Sonra bir tamaşanı 1-2 il, elə tamaşalar
da var ki, 20 il oynayırlar. 5-6 ay ərzində oynadığı rolu təkmilləşdirmək
imkanı var. Kino aktyorunun işi isə istehkamçının işinə bənzəyir.
O, bir dəfə səhv edir. Çəkildi, qurtardı. Onu dəyişdirməyə, təkmilləşdirməyə
heç bir imkanın yoxdur. Kino aktyoru snayper olmalı, düz onluğu vurmalıdır.
Ona görə kinoda çəkilmək çox çətindir. Bunun fərqini bilməyən adamlar
bu saat kinoda dalbadal çəkilirlər. İndi rejissorlar gənclərdir.
Mən ssenarini oxuyuram. Xoşuma gəlirsə, çəkilirəm, gəlmirsə, razılıq
vermirəm”.
Əsas odur ki, rolun yadda qalsın
Bütün həyatının və yaradıcılığının məşəqqətlərdə
keçdiyini deyən Muxtar Maniyev sənətə münasibətdə bir qədər mühafizəkar idi:
"Aktyor təqaüdə getməz, səhnədə ölər”- deyirdi: "Mən aktyoru çayda
üzən təzə balığa bənzədirəm. Çaydan qırağa atdınmı, o, ölümə məhkumdur.
Onları teatrdan çıxarmaq, sənətdən ayırmaq olmaz. O sənətlə nəfəs alır,
onun qədrini bilmək lazımdır”.
Muxtar Maniyev teatrda və kinoda yüzdən çox
rol oynamasına baxmayaraq, tamaşaçılar onu daha çox mənfi rolların ifaçısı kimi
yadda saxlayblar. Bu barədə səslənən fikirləri özü də inkar etmirdi: "Mənfi
rolları oynamaq daha çətindir. Bu, tamaşaçının zövqündən asılıdır. Mənfini də
qiymətləndirir, müsbəti də. Əsas odur ki, oynadığın rol kino tarixində qalsın”.
"Sevmədiyiniz obrazı oynamısınızmı?” sualına isə aktyorun orijinal
cavabı vardı: "Sevmədiyim obrazı öz əsarətim altına salmışam. O
obrazda nə demək istədiyimi tapmaq istəmişəm. Aktyor sənətinin birinci şərti nə demək
istədiyini bildirməsidir. Aktyorlar var, saatlarla güzgünün qarşısında
dayanıb öz-özlərinə danışırlar. Elə aktyor var ki, qışqıra-qışqıra
iki saat şer oxuyur, bir misra da adamın yadında qalmır. Elə evdə övladınla
da, yoldaşınla da, qonşunla da danışanda nə danışdığına fikir verməlisən.
Aktyor da var ki, bir cümləsi ilə tamaşaçının qəlbinə yol tapır”. Muxtar
Maniyev aktyorluq sənətinə vərdiş kimi baxmırdı. Ona görə, obraz yaratmaq istedadlı
adamların işi idi: "Aktyorluq sənəti ilə məşğul olan adamın vərdişi olmamalıdır.
Çünki o, təzələşə bilməz. İnsanın vərdiş etdiyi müxtəlif hərəkətlər
bir rol üçün yarayar. Amma sonrakı rollar üçün düz gəlməz. Aktyor istər
teatrda, istərsə kinoda bir rol oynamağa başlayanda gərək bütün
şeyləri unudub xam torpaq, təmiz vərəq olsun. Ona görə də aktyor az yetişir.
Axı aktyorun nə fırça, nə qələmi, nə tuşu var. Hər şeyi ancaq öz hisslərinin
hesabına edir”.
Muxtar Maniyev şöhrətin zirvəsinə
asanlıqla yüksəlməmişdi. Sənətin daşlı-kəsəkli yollarından keçmiş, maneələrlə
qarşılaşmışdı. Haqsızlıqlar çox görmüşdü. Sənət aləmində rastlaşdığı səmimi
olmayan münasibətlər onu çox incidirdi: "Bizim incəsənətdə ümumiyyətlə,
istedadlı adama yer yoxdur. Hamı bir-birinin başından vurur. Onların
içində bir, ya da iki nəfər adam tapmaq olar, desin ki, bu istedadlıya
kömək etmək lazımdır. Axan suyun qabağını təmizləmək lazımdır ki,
axıb getsin. Amma mənim qabağıma həmişə cürbəcür maneələr qoyublar.
Özü də balaca adamlar tərəfindən qoyulmayıb bu maneələr. Balaca uşağa
nə var ki, saymazsan keçərsən. Bu maneələr yüksək səviyyəli adamlar
tərəfindən qarşıma qoyulub”. Qarşılaşdığı maneələr bəzən oynamaq istədiyi,
hətta təsdiq olunduğu rolları əlindən alıb. Bu anları yaşamaq nə qədər
əzablı olsa da, dözüb, tab gətirib: "Filmlərdə mənim əvəzimə başqa adam - özü
də məndən qat-qat zəif adam çəkirdilər. Hətta bir dəfə iş o yerə gəlib
çatmışdı ki, demişdilər filmin direktorunu çəkin, Muxtar Maniyevi
çəkməyin. Mənim təsdiq olunduğum rola Səməndər, Şahmar, Həsən Məmmədov
çəkilib. Rolum bədii şurada təsdiq olunub. Qonaqlığın da eləmişəm.
Səhər gəlib görürəm ki, başqa adam çəkilib. Bunlar ürəyə zərbədir.
Bu zərbələrin hamısını yaşamışam”.
Muxtar Maniyev xəstələndiyi, ayağının səhnədən,
kino meydanlarından çəkildiyi günə qədər sənətdən ayrılmayıb. Amansız xəstəlik
yaxasını tanıyanda daim işləməyə alışan aktyoru yatağa möhtac edib. Təsəllisi
isə Azərbaycanın kino və teatr tarixinə bəxş etdiyi, tamaşaçıların yaddaşında
əbədiləşən rolları olub. Aktyoru ölümsüz edən, ürəklərdə və xatirələrdə yaşadan da budur. O, özü də sənət aləmində
hər kəsin öz yerinin olduğunu bilirdi. "Bu
dünyada heç kim başqasının yerini tuta bilməz. Hər kəsin öz yeri var”. Bu da
onun sözləri idi...
Təranə
Məhərrəmova