Makiyajın qadınların həyatında rolu əvəzsizdir
Ötən gün məşhur stilist Anar Ağakişiyevin sosial
şəbəkə hesabındakı paylaşımı gündəmə çevrildi. Belə ki, bədbəxt hadisə nəticəsində
11 yaşından bütün vücudu, üzü yanaraq tanınmaz olan qadın, illərdi güzgüyə
baxmaqdan çəkinib. Cizgilərini belə xatırlamayan gənc xanım bir neçə saatlıq
olsa belə, gözəl görünməyi üçün Anar Ağakişiyevə üz tutub. Anar üzü tamamilə
yanan qadının sifətində make-up edərək 11 il güzgüyə baxmayan qadına bəlkə bir
də heç vaxt yaşaya bilməyəcəyi xoş anları yaşadıb.
Qadın güzgüdə özünü görəndə göz yaşlarına hakim ola
bilməyib. Stilistin sosial şəbəkədə paylaşdığı video səs-küyə səbəb olub. O, 18
illik karyerasında ən çətin makiyajı məhz bu qadının üzərində etdiyini
bildirib.
"Nəticənin necə olacağını özüm də bilmirdim”
"Şərq” qəzetinə açıqlama verən Anar Ağakişiyev bir
qadına bu sevinci yaşada bildiyi üçün özünü xoşbəxt hiss etdiyini deyib: "Mən
bir qadını dəyişmişdim. Bu xanım da o paylaşımı görüb mənə müraciət etdi.
Bildirdi ki, 11 yaşında yanıb. Bədbəxt hadisədən sonra onun bədəni, üzü
tamamilə yanıb. Dedi, utanıram makiyaj edim. Amma cizgilərimi belə unutmuşam.
Paylaşım etməkdən çəkinirəm. Bildirdim ki, həyatda sizin kimi bir çox xanımlar
var, sizin bu paylaşımınız onlara da stimul verə bilər. Həyatda bədbəxt
hadisələr ola bilər. Amma həyat davam edir. Əsas odur yaşayırsınız. Xanımı
makiyaj etmək mənim üçün böyük məsuliyyət idi. Çünki cizgiləri, dərisi o qədər
ağır dərəcədə yanıq izləri ilə diqqət çəkirdi ki, mən çox narahat qaldım. Amma
xanıma o qədər həssaslıqla yanaşdım ki, heç bir halda həyəcanımı hiss etməyini
istəmədim. Dərisi tonal kremi götürmürdü.Nəticənin necə olacağını özüm də
bilmirdim. Xüsusi həssaslıqla onu makiyaj etməyə başladım. Amma o müddətdə
güzgüyə baxmağına imkan vermədim. İş tam bitdikdən sonra gözünü açmağını
istədim. Çox qorxaraq, ehtiyatla gözünü açdı. Gördükləri onu heyrətləndirdi,
həyəcandan gözləri doldu, göz yaşını saxlaya bilmədi. Bu, sevinc yaşları idi.
İllər sonra o, özünü görə bilirdi. Dediyinə görə, cizgilərini
xatırlamırdı. Ona görə də onun üzünü makiyaj etməyə başlayanda qaşının, gözünün
çizgilərini təxmin etməyə çalışırdım. Nəticə göz önündədir. Çox şadam ki, ona bu
sevinci bəxş edə bildim. Bu paylaşımım kifayət qədər marağa səbəb oldu.
Dünyanın ən məşhur müğənniləri, make-up ustaları səhifəmdə müsbət rəylərini
bildirdilər. Dünyaca məşhur Peris Hilton və digər məşhurlar bu paylaşıma
reaksiyasız qalmadılar, kövrəldiklərini, ağlayaraq bu görüntüləri izlədiklərini
qeyd etdilər. 3 milyon baxış, 14 mindən çox öz səhifəmdə rəy yazılıb. Bu, mənim
üçün sevindirici hissdir. Mən elə bilirdim, insanlar biri-birinə qarşı soyuyub,
buzlaşıb. Amma bu paylaşımdan sonra bir də anladım ki, insanlıq ölməyib.
İnsanları sevmək, onlara sevinc bəxş etmək qədər gözəl duyğu tanımıram. Bu
təkcə mənim deyil, Azərbaycan adına əldə olunan uğurdu. Çünki bu paylaşımı
bədxah qonşularımız da izləyib, hətta onlar belə, təəccüblərini gizlədə
bilməyərək rəy bildirirlər”.
Anarın bu addımı bir çox stilistlər tərəfindən də
müsbət qarşılanıb. Bir qadına qadın olduğunu hiss etdirmək, onun istənilən
halda gözəl olduğunu vurğulamaq, özügüvənini artırmaq nəyə desən dəyər.
Makiyajın öhdəsindən gələ bilmədiyi sifət yoxdur, deyə düşünürəm. Ancaq stilistlərimiz
mənimlə bir qədər razı deyil.
Onlar deyirlər ki, makiyajla bir möcüzəyə sahib
olmaq da, özünüzü gülünc vəziyyətə salmaq da mümkündür. Yetər ki, ondan düzgün
və lazımi səviyyədə istifadə edilsin. Bəzən görürük ki, xanımlar o qədər aşırı
dərəcədə makiyaj edirlər ki, gözəl xanım çox eybəcər və baxımsız görünür, bəzən
də real həyatdan uzaq bir insanla rastlaşırıq. Makiyajın qadın həyatındakı rolu
danılmazdır. Ekspertlərimiz də deyir ki, makiyaj hər bir xanımın silahıdır.
Yetər ki, onun sirlərinə bələd olasan və düzgün, qaydasında istifadə etməyi
bacarasan.
"Hər xanım öz eyibini hamıdan yaxşı bilir”
ElAy gözəllik
salonunun rəhbəri Elyanə Məmmədova deyir ki, makiyaj
qadınların həyatının ən vazkeçilməz elementidir. Bir qadın makiyaj vasitəsi ilə
istədiyi hər şeyə nail ola bilər: "İndi müasir zamandır, texnologiya o qədər
inkişaf edib ki, insanlar qrim və estetik əməliyyatla istədiyi effekti və
görüntünü ala bilir. Bura nəinki qadınlar, hətta kişilər də daxildir. İnsanın
geyimi, duruşu, qaməti qədər onun siması da önəmlidir. Hətta mən deyərdim ki, bu
gün sima olaraq gözəl görünmək modadan, dəbdən və sadaladığımız digər
məsələlərdən daha çox önəmlidir və müzakirə obyektidir. Bu sənət çox həssas və
bir o qədər də dərin peşədir. Bu baxımdan, həmkarımın etdiyi işi dəstəkləyir və
xanımlara sevinc bəxş etməyi təqdirəlayiq hal kimi dəyərləndirirəm. Bəzən isə
biz iş prosesində bunun əksi ilə də qarşılaşırıq. Belə ki, xanımlarımızın çox
zaman düzgün makiyaj etmədiyinin və bunun üçün də gözəlliyini itirmələrinin
şahidinə çevrilirik”.
Əslində bu sənətlə ölkəmizi beynəlxalq arenada tanıtmağın
da mümkün olduğunu deyən Elyanə Məmmədova bir neçə il bundan öncə Türkiyədə
keçirilən beynəlxalq yarışmada ölkəmizi təmsil edərək vizaj üzrə qalibiyyət
əldə edib. Deyir ki, bu gün bu sahəni inkişaf etdirmək və tanınmaq heç də çətin
deyil. Yetər ki, iş təcrübən və peşəkarlığın kifayət qədər olsun: "Mən gündəlik
olaraq abartılı makiyaj etməyin əleyhinəyəm. Əgər xanımın üzündə problemi varsa,
onu tonlaşdırmalıdır, ancaq əndazəni aşmamaq şərti ilə. Qara qaş, qara gözlü
xanımlar çox makiyajdan istifadə etməməlidirlər. O zaman makiyajdan aşırı
dərəcədə istifadə edilir ki, o xanımların xarici görünüşündə problemlər olsun.
Misal üçün, xanımın üzündə çil, yanıq ləkəsi, qızartılı hissə, ya da bir çapıq
varsa, tonlaşdırmadan istifadə edə bilər. Xanımlarımızın bəzilərində istifadə
etdikləri makiyaj çox pis və abartılı görünür. Bu da onların dərilərinə bələd
olmamalarından irəli gəlir. Məsələn, hamar dərili xanımlar pudradan çox
istifadə etməməlidirlər. Kiçik həcmli tonlardan istifadə etsələr, kifayət edir.
İnsan birinci növbədə öz dərisini tanımalıdır və ondan sonra ona nəyin yaraşıb-yaraşmadığını
bilməlidir. Hər xanım öz eyibini stilistlərdən yaxşı bilir. Əgər onlar makiyaj
məsələsində düzgün seçim edərlərsə, əlbəttə ki, gözəl görünərlər. Makiyaj
həyatın bir parçasıdır. Əynimizdəki geyim gözəl olanda ürəyimiz açılır, depressiyadan
çıxırıq. Makiyaj da onun kimidir, qadınları depressiyadan çıxarır. Yox əgər üzümüzə
çox tonlaşdırıcı krem vurub, özümüzü qocaldırıqsa, istər-istəməz dəri də nəfəs
almır və biz yorğun, əsəbi görünürük. Və ya qaşımızı süni yolla çox yuxarı aldırmışıqsa,
sözsüz ki, əsəbi görünəcəyik”.
Stilistlərin daha çox psixoloq olmalarını,
insanlarla işləmək qabiliyyətləri formalaşdıqdan sonra fantaziyalarını işə
salmalarını məsləhət görən Elyanə Məmmədova Anar Ağakişiyevin bu layihəsini
dəstəklədiyini və xarici görünüşündə problem olan xanımlara stimul verməyin
mütləq olduğunu vurğuladı: "Uzun müddətdir ki, xərçəng xəstəliyindən əziyyət
çəkən xanımlara xarici görünüşləri səbəbindən çəkdikləri sıxıntılara görə
ödənişsiz olaraq permament və mikrobleyndinq (qaş tatuajı) proseduru tətbiq
edirik. Nəinki qaşlar, eyni zamanda bu xəstəlikdən əziyyət çəkən xanımların
saçları tökülürsə, onları da bərpa edirik. Belə xanımların qaşları və saçlarını
bərpa etdikdən sonra onların həyata necə ikiəlli sarılmalarının şahidi olmuşam.
Bunun üçün bu tip layihələrin keçirilməsini zəruri hesab edirəm”.
"Elə xanımlarımız var ki, gündəlik makiyajsız gəzmək istəmirlər”
Vizajist Samira
Abbasova isə deyir ki, makiyajın qadın həyatındakı rolu
danılmazdır. Gözəllik ondursa, doqquzu elə makiyajın özüdür: "Biz insan
simasını tam dəyişə biliriksə, deməli, bu özü də bir uğurdur, böyük bir işdir.
Sadəcə, bunu bacarmaq lazımdır. İşinin peşəkarı olmaq, qalmaqaldan uzaq durmaq
lazımdır. Hətta elə xanımlar var ki, müştərilərimdi, artıq makiyajsız gəzmək
istəmirlər. Düşünürlər ki, makiyajla belə gözəl olmaq olursa, elə hər zaman
belə olaq. Amma belə də olmaz. Hər xanım özünə makiyaj etməyi bacarmalıdır,
bunu öyrənməlidir. Makiyajdan asılı olmaq olmaz, amma makiyajsız da olmaz. Hər
məkanın öz makiyaj növü var, məsələn, elə ifaçılar var, səhər efirinə axşamkı
toy makiyajı ilə çıxır. Bu, tamaşaçıya hörmətsizlikdir, olmaz belə. Hər
məkanın, hər geyimin xüsusi makiyajı olmalıdır”.
Samira Abbasova deyir ki, çox tez-tez ona müraciət
edən müştəriləri güzgüdə özlərini görəndə tanımayıblar: "Elə xanım müştərilərim
olub ki, müraciət ediblər, onları makiyaj etmişəm, güzgüdə üzünün dəyişdiyini
görüb çox təəccübləniblər. Xanımlar bəzən bunu bəyənirlər, bəzən də bu hal onlara
çox qəribə gəlir. Amma hələ yadıma gəlmir, etdiyim makiyajdn kimsə narazı
qalsın. Maksimum müştərinin dediklərini edirəm ki, narazılıq olmasın”.
Biz xanımlar hər zaman formada qalmaq, gözəl
görünmək və diqqət cəlb etmək üçün çalışırıq. Ancaq bunun da öz əndazəsi,
çərçivəsi var. Stilistlərin də dediyi kimi, aşırı makiyajdan yalnız ehtiyacı,
xarici görünüşündə qüsuru olan insanların istifadə etməsi məqsədəuyğundur. Əks
təqdirdə, yeniyetmə və gənclərin, dərisi təravətli xanımların bu dərəcədə
lazımsız həvəsi qaş düzəltmək əvəzinə, gözü də vurub çıxartmaq olur.
Xəyalə Rəis