Koronavirusun siyasətə gətirdiyi ünsiyyət forması dəyişəcəkmi?
Politoloqların fikrincə,
onlayn konfransların üstünlüyü olsa da, diplomatiyada ənənəvi ünsiyyət metoduna
qayıdış müşahidə ediləcək
Koronavirus pandemiyası ilə əlaqədar olaraq dünya ölkələri arasında sərhədlər bağlandı, beynəlxalq münasibətlər sistemində bir süstlük yarandı. Çünki beynəlxalq konfranslar, tədbirlər, zirvə görüşləri dayandırıldı, hökumət və dövlət başçılarının səfərləri təxirə salındı. Bütün bunların fonunda beynəlxalq münasibətlər sistemində ənənəvi ünsiyyət forması demək olar ki, mümkünsüz oldu. Xüsusilə, nəzərdə tutulan beynəlxalq konfransların keçirilməsi ilə bağlı suallar yarandı. Nəhayət, Azərbaycan Prezidenti İlham Əliyevin təşəbbüsü ilə ilk dəfə olaraq Türk Şurasının fövqəladə Zirvə görüşü və ardınca Qoşulmama Hərəkatının Təmas Qrupu formatında videokonfranslar keçirildi. Azərbaycanın təşəbbüsü ilə keçirilən bu videokonfrnaslar daha sonra digər dövlətlər və beynəlxalq qurumlar tərəfindən təkrarlandı. Düşünmək olarmı ki, postpandemiya dövründə də beynəlxalq əməkdaşlıq bu formatdan istifadə ediləcək? Yaxud da, belə bir formatın ənənəvi formatdan hansısa üstünlüyü varmı?
Mövzu ilə bağlı "Kaspi” qəzetinə açıqlamasında politoloq Nəzakət Məmmədova bildirdi ki, post pandemiya dövründə
yəqin ki, beynəlxalq görüşlər,
konfranslar ənənəvi qaydada davam etdiriləcək: "Çünki bu, beynəlxalq protokolda
qəbul olunmuş, norma halına gəlmiş bir üsuldur. Dövlət rəsmilərinin üzbəüz,
əyani görüşlərinin öz əhəmiyyəti var. Digər tərəfdən, bəzən diplomatiyada elə
məxfi məsələlərin müzakirəsi olur ki, bunu yalnız üzbəüz müzakirə etmək
zərurəti yaranır”.
N.Məmmədova qeyd etdi ki, videokonfrans, virtual ünsiyyət bu zaman o
qədər də etibarlı vasitə hesab olunmur: "Ona görə ki, marağı olan ölkələrin
radio əks-kəşfiyyatı efir məkanına müdaxilə edib dövlət rəsmilərinin söhbətini
dinləyə bilərlər. Tutaq ki, Azərbaycan və Türkiyə prezidentləri, yaxud müdafiə
nazirləri iki ölkə arasında hərbi əməkdaşlıq məsələsini müzakirə edirlər. Kim
təminat verə bilər ki, Rusiya, İran, Ermənistan radio əks-kəşfiyyatı bunu
dinləməyəcək?! Yaxud, Ərdoğanla Putinin Suriyada birgə kəşfiyyat aparmaq və
digər məsələlərə dair danışığını virtual yolla həyata keçirmək mümkün deyil.
ABŞ, İsrail kəşfiyyatları dərhal hərəkətə keçə bilərlər. Doğrudur, dövlət
rəsmilərinin söhbətləri ən müasir texnika ilə aparılır və onların
təhlükəsizliyi təmin edilir. Lakin müdaxilə etmək həmişə mümkündür. Ona görə
də, bundan sonra vacib beynəlxalq tədbirlərin ənənəvi qaydada davam
etdiriləcəyini demək olar. Biz bilirik ki, Azərbaycan beynəlxalq münasibətlərdə
yeni bir metodun - virtual diplomatiya ənənəsinin əsasını qoydu. Yəqin ki,
əyani beynəlxalq tədbirlər təşkil etmək imkanı olmayanda, bu vasitəyə müraciət
olunacaq”.
Politoloq Əhməd Əlili bildirdi ki,
koronavirus pandemiyası ilə əlaqədar olaraq dövlət başçılarının əksəriyyəti öz
aralarında onlayn şəkildə ünsiyyətlərini davam etdirməyə məcbur idilər:
"Xüsusilə, koronavirus dövründə bir çox sahələrdə əməkdaşlığa ehtiyac yarandı.
Belə ki, sərhədlərin bağlı olduğu halda, yükdaşımaların təmin olunmasına və
yaxud da ölkələrin biri-birinə tibbi ləvazimatla kömək etməsinə, eləcə də
müəyyən bir fikir mübadiləsinə ehtiyac yaranmışdı. Bu baxımdan
videokonfransların keçirilməsi özü-özlüyündə çox vacib element idi. Düşünürəm
ki, Azərbaycanın, Türkdilli ölkələrin dövlət başçıları, həm də Qoşulmama
Hərəkatının zirvə toplantısı ilə bağlı keçirdiyi videokonfransla liderliyini
ortaya qoyması ölkəmiz adına böyük bir bonusdur. Yəni əgər dünya üzrə pandemiya
dövründə beynəlxalq əhəmiyyətli 5 böyük konfrans baş tutubsa, onun ikisi məhz Azərbaycan
Prezidentinin rəhbərliyi ilə keçirilən konfranslar oldu. Nəzərə almaq lazımdır
ki, hələ pandemiya bitməyib və davam etməkdədir. Sadəcə olaraq, ölkələr o qədər
təcrübə toplayıblar ki, bu istiqamətdə daha çox işlər görə biləcəklərini
düşünürlər. Onlar daha yüngülləşdirilmiş karantin şərtləri ilə fəaliyyətlərini
davam etdirə bilərlər. Həmin ölkələr tibbi resurslara arxayındırlar ki,
xəstələrin sayı hədsiz artsa belə, bunun qarşısını alacaqlar”.
Ə.Əlili vurğuladı ki, belə olan halda iqtisadiyyata vurulan zərərin
qarşısını almaq üçün bütün ölkələr koronavirus pandemiyası ilə bağlı karantin
şəraitində müəyyən güzəştlər etmək qərarına gəliblər: "Onlardan biri də
Azərbaycandır. Düşünürəm ki, hətta növbəti il yarım ərzində beynəlxalq
münasibətlər sistemində bu cür onlayn konfransların keçirilməsi aktiv olacaq.
Əlbəttə ki, Azərbaycanın bu istiqamətdə, artıq təcrübəsi var. Postpandemiya
dövründə bu formada beynəlxalq əməkdaşlığın davam etdirilməsinə gəlincə, onu
deyim ki, bu, mümkündür. Bu cür ünsiyyət göstərdi ki, müəyyən məsələləri bu
formatda təşkil etmək olar. Amma düşünürəm ki, diplomatiya heç də hər zaman
onlayn olacaq bir məsələ deyil. Diplomatik görüşlər zamanı eyni ortamda olmaqla
müəyyən informasiyalar əldə edilir. Hətta deyərdim ki, Avropanın bir çox siyasi
institutlarının qərarları çox zaman kuluarlardakı müzakirələr zamanı qəbul
olunur. Kuluarlardakı iştirak diplomatlar üçün çox vacibdir. Düşünürəm ki,
onlayn konfransların üstünlükləri çox olsa da, bir müddətdən sonra
diplomatiyanın ənənəvi ünsiyyət metodlarına qayıtmasını müşahidə edəcəyik”.
BƏXTİYAR