Kor atın kor da nalbəndi olar
Aprelin 8-də Milli Şura keçirdiyi mitinq gözlənildiyi
kimi, biabırçılıqla nəticələndi. Demək olar ki, bu mitinq tam mənada fiaskoya
uğradı. Milli Şura rəhbərliyi nə mitinqə ictimai dəstəyi təmin edə, nə də
yetərli adam toplaya bildi. Hətta mitinqə gələnlərin bir qismi də bir neçə
dəqiqədən sonra "çeynənmiş” çıxışlardan bezərək, meydanı tərk etməyə
başladılar.
Milli Şuranın keçirdiyi biabırçı mitinqdən sonra
hətta müxalif düşərgənin özündən belə aşağılayıcı açıqlamaların şahidi
olduq.
Azərbaycan Xalq Cəbhəsi Partiyası
sədrliyinə keçmiş namizəd Sahib Kərimli mitinq biabırçılığına münasibət bildirərək qeyd
edib ki, mitinqə dəstək gəlmədi, aksiyada həmişəki adamlar
iştirak edirdi. O, AXCP-nin zəiflədiyini, partiyanın sədri Əli Kərimlinin isə
reytinqinin aşağı olduğunu və insanların artıq ona güvənmədiyini diqqətə
çatdırıb: "AXCP strukturları tamamən zəifləyib, təcrübəli adamlar yanlış
idarəetmə nəticəsində partiyadan ya uzaqlaşıb, ya da uzaqlaşdırılıblar. Əli
Kərimli illərdir uğursuz fəaliyyət göstərir, heç kim onun nə vaxt nəticə əldə
edəcəyinə inanmır. Cəmiyyəti inandırmaq üçün ən əvvəl yaxın çevrəni
inandırmalısan. Əli Kərimli orta məktəbdə oxuyub, onun sinif yoldaşlarının bir
xoş xatirəsinə rast gəlmisinizmi? Ya da ki, mebel fabrikində işlədiyi müddətdə
onun seçkin birisi olduğu haqqında bir iş yoldaşı sonralar nə isə deyibmi? Hərbi
xidmətdə olan Əli Kərimlinin əsgər yoldaşını tanıyan varmı? Hətta Əli
Kərimlinin hərəkat yoldaşlarının hamısı ondan üz döndərib, heç biri təşkilatda
qalmayıb”
S.Kərimli
vurğulayıb ki, AXCP kimi təşkilata rəhbərlik edən şəxsin keçmişdən bu günə qədər
dostu və ya ona hörmət edən bir həmkəndlisi, sinif yoldaşı, iş yoldaşı, tələbə
yoldaşı olmayıbsa, hərəkat yoldaşının qalmamasında təəccüblü heç nə yoxdur.
Keçmiş partiya funksioneri Əli Kərimlinin istefasını da tələb edib.
Milli Şuranın keçmiş üzvü,
hüquqşünas Aslan İsmayılovun mitinqlə bağlı yanaşması da demək olar ki,
eynidir. O, vurğulayır ki, mitinqdən sonra Müsavat, AXCP üzvlərinin biri-birilərinə
yönəlik yazıları insanlarda ikrah hissi
doğurur: "Məqsədləri eyni olan hər iki tərəfin biri-birilərinin
uğursuzluqlarını toy-bayram kimi qeyd edirdilər. Özünə hörmət edən şəxs
mitinqdə iştirak etməyənləri təhqir etməz”.
A.İsmayılov mitinqə
yüz minlərin yox, minlərin, özü də eyni adamların çıxmasının səbəbinin çox
maraqlı olduğunu bildirib: "Başqalarını demirəm, 2013-cü il mitinqlərinin
hamısına gedirdim və insanların da getməsi üçün əlimdən gələni edirdim. Hələ o
dövrdə həmin mitinqə gələnlər günümü qara etdilər, haqqımda yazmadıqları
böhtanlar qalmadı. Onlardan aralanan kimi təhqirlər də yox oldu. Dünənki
mitinqdə REAL-çıların iştirakını mən də gözləyirdim. Mitinqdən dərhal sonra
onların iştirak etməməsinin səbəbi ilə maraqlandıqda isə Milli Şuranın üzvü,
kinorejissor Eldəniz Quliyevin "İlqar Məmmədov tezliklə azad edilməsə...
REAL-ın əksər funksionerləri oriental rəqs ustasına çevriləcəklər!"
məzmunda yazısına rast gəldim. Bundan sonra REAL-çılardan iştirak etməmələrinin
səbəbini soruşmağa belə ehtiyac qalmadı”.
Ənənəvi
müxalifət liderlərinin uğursuzluqlarına üzüldüyünü vurğulayan A.İsmayılov qeyd
edib ki, kim başqasına nə arzu edirsə, onu da qazanır: "Bu yolda xəyanət,
haqsızlıq, təhqir görənlər birinci səbəbi öz etdiklərində axtarsınlar. Hamı
bilməlidir ki, intriqalarla, başqalarının uğursuzluqlarında nəsə axtarmaqla,
böhtan atmaqla, oyunbazlıqla bu günə qədər heç kim uğur qazanmayıb. Əminəm ki,
bundan sonra da qazanmayacaq.
İnsanlar müxalifət
inhisarını, müxalifət sülaləsini də görür. 30 il eyni simaları müxalifətdə
görürük. Azərbaycan balaca yerdir, nə baş verir hamı bilir və görür”.
A.İsmayılov
ötən illər ərzində müxalifət partiyalarında rəhbər dəyişikliyi olmadığını diqqətə
çatdırıb: "Şəxsi qənaətim odur ki, son 25 il ərzində müxalifətin öz arasında
olan mübarizə hakimiyyətə qarşı olan mübarizədən daha kəskin olub. AXCP, Müsavat,
AMİP, ADP-nin öz aralarında olanları bir kənara qoyaq, yeni yaranan siyasi
təşkilatlara hücumları kimlər görmədi. REAL, NİDA təşkilatlarına "ya
bizimlə olacaqsınız, ya da atdığımız çirkablarda boğulacaqsınız"
prinsipini hər kəs gördü. "Birdən onlar irəli düşər” qənaəti ilə hamısını
ictimai həyatdan uzaqlaşdırdılar”.
Hüquqşünas
vurğulayıb ki, bu xalq 25 il meydanda olanların hamısından, yumşaq desək,
yorulub, onlara inanmır, bundan sonra da inanmayacaq və buna da tam haqqı var.
Ona görə ki, hamısı bu xalqı aldadıb, onun səmimiliyini öz şəxsi maraqları,
ambisiyalarına qurban verib.
Göründüyü
kimi, artıq nə Milli Şuraya, nə də ona faktiki olaraq rəhbərlik edən Əli
Kərimliyə inam qalmayıb. Çünki AXCP bir siyasi təşkilat olaraq öz gücünü,
elektoratını itirib və ancaq Milli Şuranın kölgəsinə çəkilib. Sosial
şəbəkələrdə hər şeydən narazı olan Əli Kərimlinin "ordusunu” isə mitinqdə
görmək mümkün olmadı. Bu bir daha onu göstərir ki, mitinq üçün internet
məkanında "hay-həşir salan”lar saxta profil sahibləridir. Başqa sözlə desək, AXCP-nin
heç də virtual aləmdə təqdim olunan kimi sosial bazası, elektoratı yoxdur.
F.QƏHRƏMANLI