İlham Əliyev: “Siyasətimizin mərkəzində Azərbaycan vətəndaşıdır”
"Azərbaycan dünya
miqyasında seçilən ölkələrdəndir ki, burada həm iqtisadi, həm sosial və bütün
başqa məsələlər uğurla öz həllini tapır. Sosial
məsələlərin arasında, əlbəttə ki, səhiyyə sisteminin inkişafı xüsusi yer tutur.
Çünki bizim siyasətimizin mərkəzində Azərbaycan vətəndaşıdır və hər bir insan
üçün onun sağlamlığı, onun yaxınlarının sağlamlığı xüsusi əhəmiyyət daşıyır. Biz
çalışırıq və çalışacağıq ki, bu sahədə bütün lazımi tədbirləri görək”.
"Kaspi.az” xəbər verir ki,
bu barədə Prezident İlham Əliyev Bakının Qaradağ rayonunun Qobustan qəsəbəsində
Səhiyyə Nazirliyinin yeni inşa olunan 17 saylı birləşmiş şəhər xəstəxanasının
açılışı zamanı bildirib. Dövlət başçısı qeyd edib ki, təkcə son 15 il ərzində
ölkəmizdə 600-dən çox xəstəxana, tibb müəssisəsi ya yenidən tikilib, ya da
əsaslı şəkildə təmir edilib. Onun sözlərinə görə, ölkəmizin hər bir şəhərində
və ya onların mütləq əksəriyyətində müasir xəstəxanalar artıq tikilib və bir
neçə şəhərdə tikinti işləri davam edir.
Prezident İlham Əliyev
deyib ki, yaxın gələcəkdə Azərbaycanda ən müasir tibbi mərkəz olmayan şəhər
qalmayacaq. Ölkə başçısı 5 milyondan çox insanın hər il dövlət xətti ilə tibbi
müayinədən keçdiyinə də diqqət çəkib: "Bu, bizim təşəbbüsümüzdür və dünyanın
nadir ölkələrində belə təşəbbüs həyata keçirilir. Bunun da bir məqsədi var ki, vətəndaşlar, əgər onların
sağlamlığında hər hansı bir problem varsa, onu vaxtında aşkar etsinlər və
yüksək səviyyəli müalicə alsınlar. Bu proqram nəticəsində minlərlə insan artıq
lazımi səviyyədə müalicə alır”.
Dövlət başçısı bildirib ki,
Azərbaycan vətəndaşlarının daha da yaxşı yaşaması və onları narahat edən
məsələlərin öz həllini tapması üçün görülən və görüləcək işlərdən də söhbət
açıb. Deyib ki, bütün bunlara nail olmaq üçün güclü iqtisadiyyat olmalıdır və Azərbaycanda
bu iqtisadiyyat qurulur: "Keçən ilin nəticələri, - bir neçə gün bundan əvvəl bu
barədə mən xalqa hesabat verdim, - çox müsbətdir. Bu, onu göstərir ki, biz düzgün yoldayıq, biz uğurla
inkişaf edirik və ölkəmiz öz hesabına, öz daxili imkanları hesabına bütün lazım
olan məsələləri həll edir, həm sosial, həm iqtisadi, infrastrukturla bağlı və
digər məsələləri. Əminəm ki, gələcək illərdə, o cümlədən əlbəttə ki, 2019-cu
ildə biz bu müsbət dinamikanı saxlayacağıq, ölkəmiz uğurla inkişaf edəcək və
bütün məsələlər öz həllini tapacaq”.