Əsəri Türkiyə Cümhuriyyətinin sərvəti olan rəssam - Fotolar
![Əsəri Türkiyə Cümhuriyyətinin sərvəti olan rəssam - Fotolar](https://kaspi.az/storage/posts/large/623735d1014d4.jpg)
Rənglərin insan psixologiyasına təsiri danılmazdır.
Rənglər insanı fəallaşdıra, sakitləşdirə, həyəcanlandıra, üşüdə və ya isidə,
ona narahatlıq və ya rahatlıq gətirə bilər. Rənglərə ən yaxın olan və onlarla
danışan şəxslər isə sözsüz ki, rəssamlardır. Məhz bu səbəbdən rəssamları hər
zaman diqqət mərkəzində saxlamağı vacib bilirəm. Çünki bu sənət bəzən fitri
istedaddan, bəzən də özünü inkişafdan keçir.
Bu gün sizinlə daha yaxından tanış etmək istədiyim istedadlı və tanınmış
rəssamımız Günay Mehdizadədir. Günay xanım müxtəlif respublika sərgilərində,
beynəlxalq simpoziumlarda davamlı olaraq iştirak edib. Onun "Ailə”, "Nənə”,
"Qonşular”, "Məhsul bayramı”, "Mahnı”, "Nar nağılı”, "Küpələr”, "Novruz”,
"Rəqs”, "Mis qablar” və "Gənclik” lövhələrində, həm də "Qırmızı ağaclar”,
"Meyvələrlə natürmort”, "Güllər”, "Güldanla natürmort”, "Nar və ağ kuzələr”,
"Qədim qablar”, Milli qablarla avtoportret” və s. əsərləri diqqət çəkib.
![](https://kaspi.az/storage/posts/large/627ba5ddd14fc.jpg)
Ancaq müsahibim təkcə rəsm əsərləri ilə özünü
təqdim etmir, o eyni zamanda vətəninin mədəniyyətinin, milli-mənəvi
dəyərlərinin təbliği üçün bir neçə layihəyə gerçəkləşdirib. Hansı ki, o layihələrdən
bir çox gənclərimiz yararlanır və gənc rəssamlara sözlərini demək, öz potensiallarını inkişaf
etdirmək üçün daha geniş qapılar açılır.Ötən il İzmirdə "Azərbaycan Qardaşlıq və İş
Birliyi Dərnəyi”nin fəxri üzvü seçilən müsahibim, sənət uğurları ilə yanaşı,
son illərdə Türkiyə və Azərbaycan arasında "mənəvi körpü” rolunu oynayan
layihələr həyata keçirməkdə davam edir. Onun Türkiyə Respublikasının qurucusu
Atatürkə həsr etdiyi portret görkəmli dövlət xadiminin Ankaradakı ev-muzeyində
sərgilənir. Əsərlərindən biri Dünya Uşaq
Ensiklopediyasına daxil edilib.Əsərləri ilə tanınan və işinin peşəkarı olan
müsahibim, eyni zamanda, çox yaxşı təşkilatçıdır. Gerçəkləşdirdiyi layihələrlə
Azərbaycanın gənclərini önə çəkib, onlara geniş meydan açıb.
![](https://kaspi.az/storage/posts/large/627ba5ddd4e83.jpg)
Müsahibimiz Azərbaycan və Türkiyənin təhsil
nazirliklərinin dəstəyi ilə həyata keçirilən "Qardaş məktəb” layihəsinin
təşkilatçısı və koordinatorudur. Bu layihə çərçivəsində Təhsil Nazirliyi
və Bursa Zeki Müren Güzel Sanatlar Lisesi tərəfindən də mükafatlandırılıb.
- Özünüzü necə təqdim edərdiniz?
- Rəssamlar
İttifaqının üzvü Günay Mehdizadə.
![](https://kaspi.az/storage/posts/large/627ba5ddd7783.jpg)
- Nə üçün rəssamlıq?
- Dünyaya gələndən özümü bu sənətin bir parçası
hesab etmişəm. Uşaq yaşlarımdan valideynlərimiz bizi hərtərəfli böyüdüb. Belə
ki, çox kiçik yaşlarımdan incəsənətlə məşğul olmuşam. Mədəniyyət inkişaf edən
bir sahədir. Əgər siz uşaqlarınızı kiçik yaşlarından muzeyə, teatra aparsanız,
onun daxilindəki bu zövqü aşılaya biləcəksiniz. Uşaq yaşlarından övladlarınızda
incəsənət sevgisi yaratmasanız, onlarda bu sahəni inkişaf etdirməsəniz, müəyyən
yaşa gəlib çatdıqdan sonra yetişməkdə
olan gənclik incəsənətlə maraqlansa belə, baxışı həmin baxış olmayacaq. Mən uşaq vaxtından rəqsə, rəssamlığa,
üzgüçülüyə getmişəm. O ki, qaldı sizin sualınıza, rəssamlığı bizim ailədə hər
kəs bacarır. Ancaq onlar bu sənətlə peşəkarcasına məşğul olmayıblar.
![](https://kaspi.az/storage/posts/large/627ba5ddd9f0f.jpg)
- Bu, gendən gələn bir istedad ola bilərmi?
- Əslində istedad iki cür olur. Biri var genetik,
bir də var ki, özünüz onunla məşğul
olursunuz, öyrənirsiniz, təkmilləşdirirsiniz.
"Mən bunu bilirəm və bildiyimlə kifayətlənirəm” kimi anlayışla inkişaf
etmək mümkünsüzdür. Təbii ki, gendə varsa nə gözəl, ancaq bunu inkişaf
etdirdikdə daha gözəl nailiyyətlər əldə etmək mümkündür.
![](https://kaspi.az/storage/posts/large/627ba5dddc719.jpg)
- Bəzi gənc rəssamlar bu sənəti inkişaf etdirməyin yeganə çıxış
yolunu xarici təhsildə görür.
- Bizim incəsənətimiz, mədəniyyətimiz çox inkişaf
edib. Mənim gənc rəssamlara məsləhətim odur ki, dünyaca məşhur olan rəssamların
əsərlərinin orijinalına baxsınlar və nələrsə öyrənsinlər. Kitab oxusalar,
araşdırmalar aparsalar özlərini kifayət qədər inkişaf etdirmiş olarlar.
![](https://kaspi.az/storage/posts/large/627ba5dddf1ac.jpg)
- Əksər rəssamlar
qarışıq əsərlər çəkirlər və bu tablolar baha qiymətə çatılır. Bu, heç də
birmənalı qarşılanmır. Bu mövzu ilə bağlı nə düşünürsünüz?
- Mən rəssamlığa miniatür üslubundan başlamışam.
Onu öz tərzimdə işləmişəm. Miniatürü böyük fiqurlarla işləmişəm. Buraya öz
tərzimi əlavə etmişəm. 4 dəfə dəsti-xəttim dəyişib. Rəssamların zəhmətinin
qiymətləndirilməsinin tərəfdarıyam.
![](https://kaspi.az/storage/posts/large/627ba5dde156d.jpg)
- Rəssamlıq pul gətirən sahədirmi?
- Əlbəttə. Əsərlərim Madriddə, İspaniyada, üç
qalereyada satışda var. Hətta, İspaniya səfirliyinin nümayəndələri də mənim
əsərimi alıb.
- Siz rəssamlıqla bərabər, eyni zamanda bir çox layihələrin
müəllifisiniz. İmzanızı daşıyan
layihələr nəyə xidmət edir?
- Əslində, çox layihələr həyata keçirmişəm. Ola
bilər ki, indi onların hamısını bir-bir xatırlamayım. Gerçəkləşdirdiyim layihələr hamısı bizim
şagirdlərimizin inkişafına, ölkəmizin, mədəniyyətimizin təbliğatına xidmət edir.Ötən ilin oktyabrında Mədəniyyət və Turizm
Nazirliyinin Muzey Mərkəzində Türkiyə və Azərbaycan rəssamlarının əsərlərindən
ibarət "Rənglərin qardaşlığı” adlı sərgi keçirdik. Əvvəl biz İzmirə getdik,
sonra onlar Bakıya gəldilər. Onlar Bakıdan o qədər zövq almışdılar ki, hətta
buradan getmək istəmirdilər. Biz də İzmirdə gözəl qarşılandıq. Bizim
əsərlərimiz İzmirin Mədəniyyət Mərkəzində nümayiş olundu.
![](https://kaspi.az/storage/posts/large/627ba5dde3b70.jpg)
- Mustafa Kamal
Atatürkə həsr etdiyiniz portret hazırda dövlət xadiminin Ankaradakı
ev-muzeyində saxlanılır. Bu proses necə
baş verdi?
- Türkiyədə simpoziumda olanda əsərim, bəlkə də
rəsm çəkmək tərzim onların diqqətini çəkdi. Daha sonra məndən başqa əsərlərimin
olub-olmadığını soruşdular. Onlara bildirdim ki, məndə Atatürkün portreti də
var. Onlar həmin portreti Ankaraya
gətirməyimi istədilər. Sonra eşitdim ki, o portret Atatürkün ev-muzeyinə
yerləşdirilib. Təbii ki, bu, məni çox şad etdi. Portretimin Atatürkün
ev-muzeyində saxlanılması mənim üçün
şərəfdir. Artıq bu əsər Türkiyə Cümhuriyyətinin sərvəti sayılır.
![](https://kaspi.az/storage/posts/large/627ba5dde5f2f.jpg)
- Bildiyimiz
qədəri ilə sizin işlərinizdən "Konya Modern” muzeyində də var.
- İstanbul və Konya şəhərində keçirilən
simpoziumda iştirak etmişdik. Orada iki
canlı tablo yaratmalı idik. Simpoziumun keçirilməsində əsas məqsəd tələbələrin
65 ölkəni təmsil edən istedadlı rəssamlardan nə isə öyrənmələri idi. Biz orda
olduğumuz beş gün ərzində tələbələrlə sıx ünsiyyət qurduq. Onları maraqlandıran
sualları cavablandırdıq. Beş gündən sonra
sərgi açıldı. Bir əsər "Konya Modern Museum"a alındı. 65
ölkədən dəvət olunmuş rəssamlardan yalnız 6 rəssamın rəsm əsəri bu muzeyə qəbul
edildi. Onlardan da biri mən idim.
![](https://kaspi.az/storage/posts/large/627ba5dde7e8c.jpg)
- Bəs
"Qardaş ölkə” layihəsinin ideyası necə yarandı?
- Bu layihə əslində, mənim sferamdan bir qədər
uzaqdır. Ancaq mən bunu ürəkdən istədim. İdeya qızıma görə gəldi. Qızım Milli Konservatoriyanın
tərkibində olan İncəsənət Gimnaziyasında təhsil alır. Düşündüm ki, bəlkə belə
bir layihə edim. Bursa Zeki Müren Güzel Sanatlar Lisesi müdiriyyəti ilə əlaqə
saxladım. "Qardaş məktəb” layihəsi Azərbaycan və Türkiyənin təhsil
nazirliklərinin dəstəyi ilə həyata keçirildi. Layihə çərçivəsində İncəsənət
Gimnaziyasının dəvəti ilə Bursa İncəsənət Liseyindən 15 nəfərlik nümayəndə
heyəti Bakıya səfər etdi.
Tədbirdən öncə Şəhidlər Xiyabanı ziyarət etdik və şəhidlərimiz haqqında türk
şagirdlərə məlumat verdik. "Qardaşlıq qala gecəsi” tədbiri baş tutdu,
burada musiqi və rəqs nümayiş olundu. Şagirdlərin rəsm və əl işlərinin
sərgisi həyata keçirildi. Layihə çərçivəsində seçilmiş uşaqlar Bursaya
gedəcəklər. Onlar Bursada yataqxanada deyil, oradakı ailələrin himayəsində
olacaqlar. Bursadan gələn şagirdlər də həmçinin burada ailə mühitində
olacaqlar. Bu layihə onların inkişafından əlavə, həm də iki ölkə gənclərinin
dostluq əlaqələrinin qurulması deməkdir. Təsəvvür edin ki, ailələrdə qonaq olan
şagirdlərimiz ömür boyu dost olurlar. Onlar başqa bir ölkədə ailə, dost
qazanırlar.
- Gələcəkdə
sizdən başqa layihələr gözləyəkmi?
- TÜRKSOY-un təşkilatçılığı ilə 2018-ci il türk
dünyasının mədəniyyət paytaxtı olan Kastamonuda
bir sıra layihələrimiz olacaq.
Xəyalə Rəis
![banner](/images/kaspibanner.jpg)