“Ermənistandakı böhran daha da dərinləşəcək”
İşğalçı Ermənistanda Serj
Sarkisyanın baş nazir təyin olunmasına etiraz olaraq paytaxt Yerevan və digər
şəhərləri kütləvi aksiyalar cənginə alıb. Aprelin 16-dan davam edən etirazlar
zamanı polislə aksiya iştirakçıları arasında qarşıdurma yaşanıb, saxlanılanlar
var. Müxalif deputat Nikol Paşinyan rəhbərlik etdiyi aksiyalarda polis
zorakılığı müşahidə olunub. Bütün bunların fonunda Ermənistanda yeni təyin
olunmuş baş nazir, sabiq prezident Serj Sarkisyan hökuməti formalaşdırmaq üçün
müvafiq qərarlar qəbul edib. Keçmiş baş nazir Karen Karapetyan baş nazirin
birinci müavini təyin olunub. Bundan başqa, beynəlxalq iqtisadi inteqrasiya və
islahatlar naziri Vaçe Qabrielyan və Prezident Administrasiyasının keçmiş
rəhbəri Armen Gevorkyan baş nazirin müavinləri təyin olunub. Müdafiə naziri
Vigen Sarkisyan və xarici işlər naziri Edvard Nalbandyan öz vəzifələrində
qalıblar. Mediada yayılan məlumatlardan belə aydın olur ki, paytaxt Yerevanda
və digər şəhərlərdə S.Sarkisyana qarşı aksiyalar səngiməyəcək.
Milli
Məclisin deputatı, politoloq Elman Nəsirov mövzu ilə bağlı bildirib
ki, Ermənistanda sistemli böhran yeni mərhələyə daxil olub və bu gün həmin
böhranın mühüm tərkib hissəsi olan siyasi böhran özünün pik nöqtəsinə gəlib
çatıb. O qeyd edib ki, Ermənistanda gərginlik yaranacağı ilə bağlı gözləntilər,
proqnozlar var idi və bu proqnozlar da özünü doğruldub: "Burada üç amili xüsusi
qeyd etmək istərdim. Birincisi, xalq ona görə ayağa qalxıb ki, Serj Sarkisyanın
10 illik hakimiyyətindən bezib. Çünki bu 10 illik hakimiyyət Ermənistan
əhalisinə yalnız əzab-əziyyət, iztirab və işgəncə gətirib. Ermənistan
əhalisinin yoxsulluq səviyyəsi dözülməz hala gəlib çatıb, ölkədə iqtisadiyyat
ümumiyyətlə tənəzzül edib, ölkədən mühacirət heç zaman olmadığı səviyyəyə
çatıb. Bunu görən xalq Serj Sarkisyanın bundan sonra da hakimiyyətdə qalmasını
istəmir və ona qarşı ayağa qalıb. İkinci tərəfdən, Sarkisyan ölkədə siyasi
islahatlara gedib prezidentli respublikanı parlamentli respublikaya çevirəcəyi
ilə bağlı addımlar atmağa başlayarkən bəyan etmişdi ki, onun baş nazir
kürsüsünə iddiası yoxdur və heç bir halda Ermənistanın baş naziri olmayacaq. Bu
gün xalq həm də ona görə ayağa qalxır ki, Serj Sarkisyan növbəti dəfə xalqını
aldatdı. Və nəhayət, hesab edirəm ki, Azərbaycan dövlətinin Ermənistana
münasibətdə tətbiq etdiyi taqətdən salma taktikası öz işini görüb və Ermənistanın
üzləşdiyi bugünkü böhranda Azərbaycanın bu taktikasının mühüm rolu var. Artıq
Ermənistan xalqında belə bir düşüncə hasil olmaqdadır ki, nə qədər ki
Azərbaycan torpaqları işğal altındadır, onların heç bir xoşbəxtliyi, heç bir
gələcəyi yoxdur və vəziyyətləri daha da pisləşəcək. Bu düşüncə tərzi
Ermənistanda getdikcə daha geniş yayılmaqdadır. Bunun səbəbkarı kimi Serj
Sarkisyanın adı qeyd edilir. Ona görə də hesab edirəm ki, bu gün sözün həqiqi
mənasında Sarkisyanın başı üzərində qorxulu kabus fırlanmaqdadır”.
Millət
vəkili, Vəhdət Partiyasının sədri Tahir Kərimli də hesab edir ki,
Ermənistanda S.Sarkisyana qarşı etiraz aksiyalarının keçiriləcəyi gözlənilən
idi. Onun fikrincə, S.Sarkisyanın rəhbərlik etdiyi "Qarabağ klanı”ndan canını
qurtarmaq istəyən Ermənistan cəmiyyətinin hərəkətə keçəcəyi gözlənilirdi:
"Parlamentdə 17 deputat Sarkisyanın əleyhinə səs verdi. Bunun özü də kifayət
qədər önəmli məsələdir. Düşünürəm ki, bu proses ciddi şəkildə davam edəcək,
cəmiyyət bu klanla barışmayacaq. Aksiyalar artıq ciddi xəsarət almalar və
həbslərlə müşahidə olunur. Yerevan 1 milyonluq şəhərdir. Burada 100 min nəfərin
aksiyaya qoşulması kifayət edir ki, hakimiyyətin taleyi həll olunsun. Narazı
vətəndaşlarla yanaşı, artıq aksiyaya gənclər, tələbələr də qoşulub. Hesab
edirəm ki, bu aksiyalar hələ çox davam edəcək. Bu, çox ciddi prosesdir, yaxın
vaxtlarda bu hadisələrin bir nəticəsi olacaq”.
Azərbaycan
Milli Elmlər Akademiyasının Qafqazşünaslıq İnstitutunun direktoru, Milli
Məclisin deputatı Musa Qasımlı bildirib ki, Ermənistanda S.Sarkisyanın baş
nazir təyin edilməsi əleyhinə keçirilən güclü etiraz aksiyalarının səbəbi
ölkəni bürümüş dərin siyasi, sosial-iqtisadi böhrandır. Tarixçi alim deyib ki,
uzun müddətdir S.Sarkisyan güc və silah vasitəsilə ölkəni idarə edir,
vətəndaşlar da bundan əziyyət çəkirlər. Millət vəkili bildirib ki, idarəçiliyin
qeyri-normal olması Ermənistanda psixoloji böhran yaradıb: "Əgər Serj Sarkisyan
əvvəlki illərdə yaxşı prezident olsaydı ermənilər onun baş nazir postuna
gəlməsinə də etiraz etməzdilər. Bu narazılıq Ermənistanda hökm sürən ümumi
böhranın tərkib hissəsidir. Hadisələrin gedişi göstərir ki, yaxın vaxtlarda
Ermənistanda daha böyük qarşıdurmalar baş verəcək. Bütün bu hadisələr
Ermənistan əhalisinin kütləvi şəkildə ölkədən köçməsinə gətirib çıxarıb. Artıq
Ermənistanda silaha arxalanaraq dövləti idarə edənlərin sosial dayağı yoxdur.
Mitinq iştirakçılarına qarşı zor işlədilməsi, qan tökülməsi Ermənistanın
demokratiyadan uzaq bir ölkə olduğunu göstərir. Ermənistandakı böhran getdikcə
daha da dərinləşəcək. Bunun nəticəsi isə erməni xalqı üçün fəlakət olacaq”.
Rufik
İSMAYILOV