Ermənilərin ərazi iddiası və məsələyə beynəlxalq hüquqi baxış - Fotolar
Bu gün "Qarabağ
Araşdırmalar Mərkəzi” İctimai Birliyi Prezident yanında Qeyri-Hökumət Təşkilatlarına
Dövlət Dəstəyi Şurası layihəsi çərçivəsində Azərbaycanın KİV-nin nümayəndələri
üçün "Ermənistanın Azərbaycana qarşı ərazi iddiaları və təcavüzkarlıq siyasətinin
mərhələləri” haqqında qısamüddətlı elmi maarifləndirmə və təbligat kurslarını davam
etdirdi.
Milli Məslisinin deputatı, AMEA-nın müxbir üzvü Musa Qasımlı "Sovet
dövründə Ermənistanın Azərbaycana ərazi iddiaları və azərbaycanlılara qarşı
etnik təmizləmə siyasətinin nəticələri (1945-1985)” mövzusunda mühazirə ilə
çıxış edərək bildirdi ki, ermənilər tarixən Türkiyəyə qarşı ərazi iddiaları ilə
çıxış ediblər. Onun sözlərinə görə, bu, mümkün olmayanda Azərbaycana qarşı
iddia irəli sürüblər: "Azərbaycandan torpaq ala bilməyəndə isə xaricdən erməniləri
Ermənistana köçürüblər və azərbaycanlıları Ermənistandan deportasiya ediblər. Burada
əsas hədəf Ermənistanın torpaqlarını cənuba və şərqə doğru genişləndirmək, yəni
Qarabağ və Naxçıvanı almaq olub. 1945-ci ildə Ermənistan Kommunist Partiyasının
birinci katibi Qriqori Arutyunov SSRİ-nin rəhbəri Stalinə məktubunda iddia edir
ki, 1923-cü ildə Dağlıq Qarabağ Muxtar Vilayəti Azərbaycana birləşdirilib və
153 minlik əhalinin 123 mini ermənidir. Onun iddiasına görə, Dağlıq Qarabağ Ermənistana
birləşdirilsə, burada kənd təsərrüfatı inkişaf edər. Məsələ həll olunduqda
Qarabağın keçmiş paytaxtı Şuşa şəhərinin bərpasını və mərkəz kimi istifadəsini
qaldıracaqlarını da bildirib. Stalin həmin məktuba dərkənarla Mərkəzi Komitənin
katibi Georqiy Malenkova yazır. Mircəfər Bağırov 10 dekabr 1945-c ildə 5 səhifəlik
məktubla bu məsələyə öz münasibətini bildirib. Orada yazıb ki, sizin teleqrama
cavab olaraq bildirirəm: DQMV ərazisi Qarabağ xanlığının ərazisində olub,
1747-ci ildə mərkəzi Pənahabad olub, 1826-cı ildə isə Çar Rusiyanın tərkibinə
birləşdirilib. Musavat dövründə Şuşa şəhəri general-qubernatorluğun paytaxtı
olub, sonra qırğınlar törədilib. Daha sonra yazıb ki, 1923-cü ildə ermənilərin
çox yaşadığı bu ərazinin Ermənistana birləşdirilməsi məsələsi qaldırılıb, amma
bu bölgənin Ermənistanla birbaşa əlaqəsi olmayıb, 1923-cü ildə Muxtar Vilayət
yaradılıb və Stepanakert şəhəri mərkəz olub. Azərbaycan ali məktəblərində 20,5
faizi ermənilər, əksəriyyəti DQMV-dən olanlardır. Şuşa həmişə Azərbaycan mədəniyyət
mərkəzinin beşiyi olub, orada azərbaycanlılar yaşayıb. Mircəfər Bağırov Ağa Məhəmməd
Şah Qacarın Şuşada öldürüldüyünü xatırladıb. Bildirib ki, Şuşa böyük mədəniyyət
yaradıb, İbrahim xan, Vaqif və Natəvan və digərlərini yetirib”.
Tarixçi-alim
M.Qasımlı bildirib ki, Mircəfər Bağırov ermənilərin iddiaların ilə bağlı xüsusi
bir komissiyanın yaradılmasını, müzakirələr zaman aşağıdakı məsələlərə
baxılmasını zəruri sayıb: "1.Ermənistanın Əzizbəyov, Vedi və Qarabağlılar
rayonlarının Azərbaycana birləşdirilməsi məsələsinə baxılsın. Bu
rayonların əhalisi əsasən azərbaycanlılardan ibarətdir və ərazi Azərbaycanla sərhəddə
yerləşir. Ona görə də daha yaxşı olar ki, bu ərazi Azərbaycana birləşdirilsin.
2.Gürcüstandan olan yoldaşlar vaxtaşırı Balakən, Zaqatala, Qax rayonlarının
Gürcüstana birləşdirilməsi məsələsini qaldırırlar. O bölgədəki 79 min nəfərin
yalnız 9 min nəfəri gürcü-ingiloydur. Xahiş edirik, bu məsələyə baxarkən Gürcüstanın
Borçalı rayonunun
azərbaycana birləşdirilməsi məsələsini müsbət həll edəsiniz. Daha sonra xahiş
edirik vaxtilə Bakı quberniyasının tərkibində olmuş Dərbənd və Qasımkənd
rayonları Azərbaycana birləşdirilsin. Stalin bütün bu müraciətlərə baxılmamasının mümkünlüyünü
qeyd edir”.
M.Qasımlı arxiv materiallarına istinadən bildirdi
ki, Azərbaycandan torpaq qopara bilməyən ermənilər ikinci varianta əl atıblar: "Beləki, 1945-ci ilin noyabrında
SSRİ Xalq Komissarları Soveti bir sənəd imzaladı. Bu sənəd Ermənistanda sovet
hökumətinin qurulmasının 25 illiyi ilə əlaqədar xaricdəki ermənilərinin
köçürülməsi barədə idi. Bundan sonra ermənilərin Ermənistana köçürülməsi
prosesi başladı. 1947-ci il 23 dekabrda qərar çıxdı. Bu qərardan əvvəl
Arutunovun Stalinə məktubu var. Yazır ki, xaricdən ermənilər gəlib, amma onlar
kənd mühitinə uyğunlaşa bilmirlər, narazılıq edirlər. Onlara normal yaşayış
üçün şərait yaratmaq lazımdır. Bundan sonra qərar verilir ki, Ermənistandakı
100 min nəfər azərbaycanlı pambıqçılıq rayonlarına köçürülsün. Mingəçevir, Əli
Bayramlı su elektrik
stansiyası tikilir, işçi qüvvəsinə ehtiyac var, pambıqçılıq sahəsinin
inkişafı məsələsi var. Xaricdən gətirilən ermənilər isə azərbaycanlıların evlərinə
köçürülsün”.
Ermənilərin heç vaxt torpaq iddalarından əl çəkmədiyini
deyən M.Qasımlı qeyd etdi ki, ermənilər heç vaxt yaşlı nəsil arasında təbliğat işi aparmayıblar, gələcək
nəsillə işləyiblər: "Ümummilli
lider
Heydər Əliyevin hələ DKT-nın şöbə rəisi olarkən imzaladığı sənəddə "erməni
burjua millətçilərindən 60 nəfəri üzə çıxartmışıq. Onlar Stepanakert, Bakı,
Kirovabad və Naxçıvanda yaşayıblar.
Bu şəxslərdən 15 nəfər öyrənilib”, qeyd edilir. 1962-ci il 20 iyun tarixli həmin sənəddə ermənilərin
adları qeyd olunur və sonrakı dönəmdə barələrində zəruri tədbirlər görülür. Sonrakı dönəmdə H.Əliyev azərbaycanlı
qardaşların ermənilər tərəfindən öldürülməsi ilə bağlı Şuşaya gedir, hətta təkidlərə
baxmayaraq, dəvət olunan evdə qalmır, "deyir daş düşdüyü yerdə ağır olar”, -
deyib məsciddə qalır. Bu zaman da erməni millətçilərin cəzalandırılması
istiqamətində mühüm addımlar atılır”.
Professor 1984-cü ildə Qazaxda baş verən Kəmərli
hadisəsi barədə də danışdı. M.Qasımlı
xatırlatdı
ki, ermənilər bu əraziləri də ələ keçirmək istəyiblər: "Ermənistandan Movsesyanın rəhbərliyi
ilə bir qrup Qazax rayonuna gəlib. Məsələdən duyuq düşən yerli əhali onların
maşınını aşırır, özlərini döyürlər. Ancaq sonra Azərbaycan ərazilərinin Ermənistana
verilməsinə qarşı çıxanlara insident yaratdıqlarına görə müxtəlif cəzalar
verilib. Ermənilər bir an belə ərazi iddialarından əl çəkmirlər, hətta bununla
bağlı SSRİ rəhbərliyindən çeşidli dəstək alırlar. 25 iyun 1986-cı ildə Dəmirçyan
xaricdəki erməni qəzetlərinə maliyyə yardımının edilməsi barədə müraciət
edilir. Qorbaçov bu müraciətin müsbət həll olunması barədə göstəriş verir. Mərkəzi
Komitənin avqust ayında qərarı olur. Maliyyə dəstəyi Argentina, Faransa və s.
ölkələrdəki "Daşnaksütyun”un siyasətini təbliğ edən erməni qəzetlərinə yönəldilir. Onu da qeyd edim ki, Azərbaycan
ərazilərinə köçdüklərini ermənilər özləri də etiraf ediblər. 1986-cı
ilin noyabrında Dəmirçiyan Mərkəzi Komitəyə yazırdı ki, Ermənistan SSRİ ərazisinə
230 mindən çox erməni köçürülüb. 1923-cü ildə təkcə Mosuldan 8 min ermənini gətirilib Dağlıq Qarabağa yerləşdiriblər.
Çar dövründə isə 1,3 milyonluq
erməninin 1 milyonu
bu
bölgəyə köçürüldüyü bildirilir”.
Azərbaycan Respublikasının Prezidenti yanında Dövlət
İdarəçilik Akademiyasının müəllimi, "Qarabağ Araşdırmalar Mərkəzi” İB-nin sədr
müavini Səfiyə Mehbalıyeva isə jurnalistlərə "Millətlərin
öz müqəddəratını təyin etmə və ərazi bütövlüyü prinsipləri: Ermənistanın Azərbaycana
qarşı ərazi iddiaları və beynəlxalq hüquq kontekstində” mövzusunda mühazirə
oxudu. O, bu
hüququn Dağlıq Qarabağ məsələsi kontesktinə yönəldərək, ərazi bütövlüyü və
xalqların öz müqəddəratını təyinetmə prinsipinə beynəlxalq baxışdan bəhs etdi:
"Ərazi bütövlüyü prinsipi beynəlxalq hüquqda daha çox işlənib. Burada sərhəd
toxunulmazlığı, sərhədlərin dəyişilməz olduğunu özündə ehtiva edir. Bu gün biz
həmçinin ATƏT sənədləri və Helsinki Yekun Aktına istinad edirik”.
S.Mehbalıyeva
qeyd etdi ki, hər bir millət öz müqəddəratını təyinetmə uğrunda mübarizəyə
qalxsa, dünya xəritəsi mütəmadi dəyişər: "Təəssüf ki, sülh prosesi şəraitində
olmayacaq deyə, bu, dünyada faciələrə səbəb ola bilər Keçmiş SSRİ Konstitusiyası və Azərbaycan SSRİ,
həmçinin Azərbaycan Respublikasının Konstitusiyası və BMT sənədləri sərhədlərin
dəyişidirilməsini qadağan edir. O cümlədən Cenevrə Konvensiyasına görə işğal
zonasında qanunsuz məskunlaşma qadağan edilir”.
S.Mehbalıyeva
qeyd etdi ki, erməni iddiaların ilə bağlı Beynəxalq Ədalət Məhkəməsinə müraciət
etmək üçün Azərbaycanın əlində kifayət qədər sübutlar var. BMT Təhlükəsizlik Şurasını
qətnamələri isə tövsiyyə xarakterlidir və məcburetmə qüvvəsi yoxdur.
BƏXTİYAR