Ermənilər canlarını “Qarabağ klanı”dan qurtara biləcəklərmi?
Ermənistanda Levon Ter-Petrosyandan sonra hakimiyyətə Robert Koçaryan
gəldi. Bu həmin dövr idi ki, Azərbaycan ərazilərini işğal edən təcavüzkarlara
ermənilərə ölkədə "qəhrəman” kimi yanaşılırdı. Koçaryanın hakimiyyətə gəlməsi
isə qondarma Qarabağ rejiminin tör-töküntülərinin Ermənistan hakimiyyətinə
axını ilə nəticələndi. Elə həmin dövrdən də "Qarabağ klanı” qeyri-rəsmi şəkildə
ölkə hakimiyyətini ələ keçirdi. Serj Sarkisyanın hakimiyyəti illərində isə "Qarabağ
klanı”na qarşı nifrəti pik həddə çatdı.Son günlər Ermənistanda baş verən hadisələr, Nikol Paşinyanın
başçılığı ilə keçirilən mitinqlər ilk olaraq Serj Sarkisyanın baş nazir
postundan getməsi ilə nəticələndi. Ötən gün isə parlamenti qəbul etməyən
tərəfin ikinci etiraz dalğası başlayıb. Bu isə ondan xəbər verir ki, yerli
ermənilər hakimiyyəti "Qarabağ klanı”nın əlində geri almaq istəyir. Görəsən,
Ermənistan "Qarabağ klan”ından canını qurtara biləcəkmi?
Mövzu ilə bağlı "Kaspi” qəzetinə açıqlamasında politoloq Fikrət Sadıxov bildirdi ki, "Qarabağ klanı”nı
hakimiyyətdən uzaqlaşdırmaq üçün ilkin addımlar atılıb: "Əhali bu qruplaşmanın
əlindən cana doymuşdu. Faktiki olaraq Koçaryan və Sarkisyan cütlüyü hakimiyyəti
əldən vermək istəmirdi. Bir çox tələblər məhz bununla bağlı idi ki, onları
hakimiyyətdən uzaqlaşdıra bilsinlər və yerlərinə normal şəxslər gəlsin. Küçələrdə
nümayişçilərə rəhbərlik edən Paşinyan və tərəfdarları Yerevan və ətraf
ərazilərin nümayəndələridir. Onların iştirakı ilə "Qarabağ klanı”nın səhnədən
getməsinin artıq birinci addımı atıldı. Yəni Serj Sarkisyan baş nazir postundan
istefa verdi. Amma Sarkisyanın rəhbərlik etdiyi Respublika Partiyası başa
düşmür ki, vaxtı artıq sona çatıb. Ümumiyyətlə, etirazçılar tək Sarkisyanın
getməsinin deyil, bütövlükdə klanın siyasi səhnədən getməsinə çalışırlar. Lakin
onlar vaxtı uzadır, şərtlər irəli sürür və ya müxtəlif ssenarilər təklif edir.
Buna isə Paşinyan və digər nümayişçilər heç vaxt razı olmayacaqlar, onların
tələbləri qəti və prinsipialdır. Əminəm ki, gec-tez Respublika Partiyası geri
oturdulacaq və Ermənistanda yeni parlament seçkiləri keçiriləcək. Yeni
parlamentdə isə respublikaçılar çoxluq təşkil etməyəcək”.
F.Sadıxov qeyd etdi ki, "Qarabağ klanı”nın siyasi səhnədən getməsi
fonunda qondarma rejim rəhbərliyi çıxılmaz vəziyyətdə qalıb: "Bu saxta hərbi
rejimin rəhbəri Koçaryan və Ter-Petrosyanla görüşlər keçirib var-gəl edir. Hələ
də bilmir ki, kimin tərəfində yer alsın. Düşünmürəm ki, Ermənistanda yeni
hakimiyyətin seçilməsi ilə Qarabağ problemi həll olunsun. Çünki Qarabağ
məsələsi onların strateji məqsədidir. Amma hər halda, strateji istiqamətdə
müəyyən taktiki addımlar da atıla bilər. Yəni, bu məsələdə müəyyən yumşaqlıq
nümayiş etdirilməsi mümkündür. Çünki onlar Ermənistanı pis vəziyyətdən çıxarmaq
istəyirlərsə, gərək Azərbaycana güzəştə getsinlər. Bunun başqa çıxış yolu
yoxdur”.
Politoloq Zaur Məmmədov bildirdi ki,
Ermənistanda ilk günlər başlanılan etiraz aksiyalarında Paşinyan tələb kimi
Sarkisyanın istefasını irəli sürürdü: "Amma indi görünür ki, bu, yeganə tələb deyil.
Paşinyan baş nazir kimi hakimiyyətə gəlmək istəyir və bilir ki, xalq onun
tərəfindədir. Elə buna görə də aprelin 25-də Ermənistanda mitinqlər yenidən
bərpa olunub. Son məlumatlara görə, artıq 40 millət vəkili aksiyalara qoşulur
və Paşinyanın tərəfinə keçir. Burada əsas məsələ Daşnaksütyun Partiyasının
mövqeyi olacaq. Bu partiyadan da bir neçə deputat Paşinyanın tərəfinə keçərsə
və bu zaman baş nazirlik məsələsi həll oluna bilər. Lakin Sarkisyanın
Respublika Partiyası razı olmazsa, Karen Karapetyanın başçılığı altında
növbədənkənar parlament seçkilərinə gedərlərsə, onda vəziyyət bir qədər dəyişəcək.
Yəni, hakimiyyətə kimin gəlməsi sual altında olacaq. Məsələ burasındadır ki,
Karen Karapetyan Rusiyaya yaxın adamdır. Onun qardaşı da Rusiyada fəaliyyət
göstərir. Onu qeyd edim ki, Rusiya hüquq-mühafizə orqanlarına yaxınlığı ilə
seçilən telekanalda Paşinyanı tənqid edib. Görünən budur ki, Paşinyan çox
qabağa gedərək hakimiyyətə gəlmək istəyir”.
Z.Məmmədov əlavə etdi ki, Ermənistanda indi baş verənlər "Qarabağ
klanı”nın hakimiyyətdən uzaqlaşdırılması ilə nəticələnə bilər: "Çünki
parlamentdə təmsil olunan Respublika Partiyasının yüksək çinli üzvləri "Qarabağ
klanı”na aiddirlər. Onların çoxu Xankəndində doğulmuş şəxslərdir. Eləcə də
Karen Karapetyan Qarabağ əsillidir. Digər tərəf isə yerli ermənilərdir. Onu
qeyd edim ki, Paşinyan çox ağıllı və hiyləgər siyasət yürüdür. O, mitinqlər
zamanı "Qarabağ klanı” haqqında mənfi fikir səsləndirməyib və açıq şəkildə
onların qarşısını almayıb. Eləcə də Rusiyaya qarşı hansısa fikirlər səsləndirmir.
Əvvəlki mitinqlərin məğlubiyyətə düçar olmasının səbəblərindən biri o idi ki,
etirazçılar, misal üçün, Ermənistanın yalnız Avropaya inteqrasiya etməsini
bildirirdilər, Rusiyadan ayrılmaq tələbini ortaya qoyurdular. Lakin bu dəfəki
mitinqlərdə biz bunun əksinin şahidi olduq və belə şüarlar səsləndirilmədi”.
Bəxtiyar MƏMMƏDLİ