“Con Boltonun səfəri Azərbaycan-ABŞ münasibətlərinin inkişafına təkan verəcək”
ABŞ prezidenti Donald
Trampın Milli təhlükəsizlik məsələləri üzrə köməkçisi Con Boltonun oktyabrın
20-də Cənubi Qafqaz ölkələrinə səfər edəcəyi gözlənilir. Bu barədə C.Bolton özü
"Twitter” səhifəsində yazıb. Müşavir qeyd edib ki, oktyabrın 20-də
təhlükəsizliklə bağlı bir sıra məsələlərdə ABŞ-ın maraqlarının təşviqi üçün
həmkarları və digər yüksək vəzifəli şəxslərlə görüşmək üçün Rusiya, Azərbaycan,
Ermənistan və Gürcüstana səfər edəcək. Rusiya mətbuatı da hesab edir ki, səfərdə
məqsəd ABŞ-ın yüksək səviyyəli dövlət rəsmisinin Cənubi Qafqaz bölgəsindəki
vəziyyətlə yaxından tanış olması və bu çərçivədə də Ağ evin gələcəkdə atacağı
addımları müəyyən etməsidir. Qeyd olunur ki, C.Bolton bölgəyə səfəri zamanı
Azərbaycan, Gürcüstan, Rusiya və Ermənistan prezidentləri, həmçinin digər rəsmi
şəxslər ilə görüşərək onlarla ikitərəfli əlaqələri müzakirə edəcək. ABŞ
rəsmisinin Bakıda və Yerevanda keçirəcəyi görüşlərdə Dağlıq Qarabağ
münaqişəsinin əsas müzakirə hədəfi olacağı da istisna edilmir. ABŞ
prezidentinin milli təhlükəsizlik məsələləri üzrə müşavirinin Cənubi Qafqaz
ölkələrinə səfərini şərh edən əcnəbi ekspertlər hesab edirlər ki, Amerika
tərəfi Rusiya ilə münasibətlərə müəyyən aydınlıq gətirəndən sonra Qafqaz
dövlətlərinə nə deməyin lazım olduğunu dəqiqləşdirmək arzusundadır. Qeyd edilir
ki, Moskvada C.Boltonu ağır danışıqlar gözləyir. Belə ki, onu həmkarı Nikolay
Patruşev və xarici işlər naziri Sergey Lavrov qəbul etməlidirlər. İstisna edilmir
ki, diplomat prezident Vladimir Putinlə də görüşsün. Ekspertlərin qənaətincə,
məhz bundan sonra amerikalı rəsmi Azərbaycana, Gürcüstana, Ermənistana səfər
edəcək və bu ölkələrlə C.Bolton əsasən İran məsələsini müzakirə edəcək.
Təxminlərə görə, məsələnin bu tərəfində ziddiyyətli məqamlar var.
Milli
Məclisin Azərbaycan-ABŞ parlamentlərarası əlaqələr üzrə işçi qrupunun üzvü, Demokratik
İslahatlar Partiyasının (ADİP) sədri Asim Mollazadə "Kaspi”yə
bildirib ki, C.Boltonun Cənubi Qafqaz səfəri olduqca əhəmiyyətlidir. Onun fikrincə, bu səfər Azərbaycan-ABŞ
münasibətlərinin inkişafına da müsbət təsir edəcək: "Bu səfər ölkələrimiz arasında
münasibətlərin daha da inkişafında mühüm rol oynayacaq. Çünki səfər ABŞ-ın
regiona olan ciddi marağını ifadə edir. Təbii ki, biz ATƏT-in Minsk qrupunun
həmsədr dövləti kimi ABŞ-dan Ermənistan-Azərbaycan, Dağlıq Qarabağ
münaqişəsinin ədalətli həllinə, beynəlxalq hüququn prinsiplərinə söykənərək
ölkəmizin ərazi bütövlüyünə dəstək nümayiş etdirməsini, eyni zamanda
Azərbaycanın iştirakı ilə regionda reallaşdırılan beynəlxalq miqyaslı
layihələrə dəstək verməsini gözləyirik. Bu baxımından, Boltonun Cənubi Qafqaza,
o cümlədən Azərbaycana səfərinin mühüm əhəmiyyəti var. Bu səfərin tanışlıq
xarakteri daşıdığını da unutmaq olmaz. ABŞ tərəfi bu səfərlə demək istəyir ki,
biz regiona marağımızı hər zaman artırmağa hazırıq. Təbii olaraq belə vəziyyətdə
Cənubi Qafqaz dövlətləri ilə əməkdaşlığın səviyyəsi də artırılacaq. Bu
çərçivədə Azərbaycan tərəfdaş ölkə kimi, antiterror koalisiyasına dəstək verən
dövlət olaraq mühüm mövqeyə sahibdir. Azərbaycan ABŞ-ın həyata keçirdiyi bir
sıra əməliyyatlara çox böyük dəstək verir. Hazırda Azərbaycan sülhməramlıları
Əfqanıstanda təmsil olunur, sülhyaratma prosesində yaxından iştirak edir,
xidmət keçirlər. Hesab edirəm ki, təhlükəsizlik, antiterror məsələləri və sair
istiqamətlər üzrə ABŞ-la əməkdaşlığımız səfər çərçivəsində diqqət mərkəzində
olacaq, əlaqələrimiz bundan sonra da davam etdiriləcəkdir. O ki, qaldı Boltonun
İrana münasibətinə və Azərbaycanı da ABŞ-ın bu ölkəyə tətbiq etdiyi
sanksiyalara qoşulmağa dəvət edəcəyi barədə mülahizələrə, rəsmi Bakının milli-dövlətçilik
mənafeyinə, qarşılıqlı və bərabər hüquqlu maraqlara xidmət edən müstəqil xarici
siyasət kursuna üstünlük verdiyi heç kimə sirr deyil. Azərbaycan işğalçı
Ermənistan istisna olmaqla, bütün region və həmsərhəd dövlətlərlə mehriban
qonşuluq siyasəti həyata keçirir. Biz ABŞ-İran münasibətlərinə müdaxilə
etmirik. Azərbaycan heç bir zaman qarşıdurmalarda iştirak etməyib, bundan sonra
da etməyəcək”.
Politoloq
Qabil Hüseynli C.Boltonun səfərini qəzetimizə şərh edərkən deyib
ki, ABŞ Cənubi Qafqaza müdaxiləsini artırır. Onun sözlərinə görə, Amerika bu
regionda Rusiyanın təkbaşına hökmranlığını qəbul etmir: "ABŞ Cənubi Qafqaz
dövlətləri ilə münasibətlərini xeyli yaxşılaşdırmağa cəhd edir. Gürcüstanla
Amerikanın münasibətlərinin qənaətbəxş olduğunu söyləmək mümkündür. Azərbaycan
və Ermənistanın ABŞ-la Gürcüstan səviyyəsində münasibətlər qura bilməməsi də
reallıqdır. Təbii ki, bizim üçün əsas olan ABŞ-Azərbaycan münasibətlərinin
yüksək səviyyədə olmasıdır. Əvvəla ona görə ki, Azərbaycan regionun lider
dövlətidir. Azərbaycanla münasibətlərin qurulması ABŞ-ın geosiyasi maraqlarının
reallaşması üçün daha geniş meydan aça bilər. Bu nöqteyi-nəzərdən ABŞ-da belə
bir fikir mövcuddur ki, indiyə qədər Azərbaycanla münasibətlərin inkişaf
etdirilməməsi, normal əlaqələrin yaradılmaması ABŞ xarici siyasətinin ciddi
çatışmazlıqlarındandır. Onlar bu boşluğu mütləq doldurmaq istəyirlər”.
Rufik
İSMAYILOV