Bakı 16°C
"China Travel" LLC turizm şirkəti Çinin Fuciyan əyalətinin turizm potensialını təqdim etdi - FOTO
Bu gün Bakıda "Hilton Baku" otelində "China Travel" LLC turizm şirkətinin təşkilatçılığı ilə Çin Xalq Respublikasının Fuciyan əyalətinin turizm potensialının təqdimatı keçirilib.
Kaspi.az xəbər verir ki, tədbirdə Fuco şəhərinin Mədəniyyət və Turizm Bürosunun vitse-prezidenti Luo Şujong, Fuciyan Bələdiyyəsinin Mədəniyyət və Turizm Bürosunun direktoru Venq Qupinq, Azərbaycan Turizm Bürosunun regional meneceri Rüfət Sadıxov, Azərbaycanda fəaliyyət göstərən turizm agentliklərinin nümayəndələri və media təmsilçiləri iştirak ediblər.
Tədbirin moderatoru öncə sözü Fuciyan əyalətinin Fuco şəhərinin Mədəniyyət və Turizm Bürosunun vitse-prezidenti Luo Şujonga verib. "Xoşbəxtlik şəhəri"nin turizm imkanlarından danışan L.Şujong bildirib ki, son illər Azərbaycan ilə Çin arasında iqtisadi, siyasi, mədəni və turizm sahəsində əməkdaşlıq əlaqələr genişlənir. Əlavə edib ki, Çin hökumətinin həyata keçirdiyi "Bir kəmər, bir yol" layihəsinə Azərbaycan hökuməti tərəfindən dəstək göstərilir. Qeyd olunub ki, əlaqələrin daha da inkişaf etdirilməsi gələcəkdə də müxtəlif layihələrin birgə icrası ilə davam edəcək.
Fuco səhərinin turizm imkanlarından danışan Luo Şujong deyib ki, turizm imkanları inkişaf edən Fuciyan əyaləti və Fuco şəhərinə hər zaman turistlərin gəlişi maraq doğurur: "Biz yerli və digər ölkələri təmsil edən turist şirkətləri ilə qarşılıqlı əməkdaşlıqda maraqlıyıq. Bizim məqsədimiz qarşılıqlı turizm potensialının yüksəldilməsinə xidmət edir. Azərbaycan ilə Çin arasında turizm sahəsində əməkdaşlıq üçün münbit şərait və böyük potensial var. Biz istəyirik ki, azərbaycanlılar Fucoya turist kimi səfər etsin, biz də Azərbaycana çoxsaylı çinli turistin gəlişi üçün çalışaq. Biz bu sahədə qarşılıqlı olaraq belə tədbirlər keçirmək, təqdimatlar reallaşdırmaqla əməkdaşlığımızı daha da inkişaf etdirə bilərik".
Bildirilib ki, Fuciyan əyalətini il ərzində 3 milyonu xarici, 6 milyon yerli turist olmaqla 9 milyon insan ziyarət edir. Bu rəqəmi yaxın gələcəkdə daha da artırmaq üçün bir çox layihələr icra olunur, işlər görülür.
Azərbaycan Turizm Bürosunun regional meneceri Rüfət Sadıxov deyib ki, Azərbaycan Çin ilə turizm sahəsində əməkdaşlıqda maraqlıdır. Bildirib ki, artıq Azərbaycanın bu ölkədə turizm nümayəndəliyinin açılması çinli turistlərin ölkəmizə gəlişini sürətləndirib. Bu ilin oktyabr ayınadək olan dövrdə ölkəmizə 25 min çinli turist gəlib ki, bu da ötən ilin eyni dövrü ilə müqayisədə 65 faiz artım deməkdir. Vurğulanıb ki, qarşılıqlı əməkdaşlıq üçün lazım olan addımlar bundan sonra da tərəflərin səyi nəticəsində davamlı olacaq.
Çinin turizm sektoru, o cümlədən Fuco şəhərinin turizm imkanları barədə çəkilən filmin prodüseri Əmir Hacılı çıxış edərək Azərbaycan səyahətsevərlərinə Çin ölkəsi və Fuco haqqında ətraflı məlumat verib, filmin çəkilişlərində qarşılaşdığı maraqlı məqamlardan söhbət açıb.
"China Travel" LLC turizm şirkətinin təşkil etdiyi tanıtım mərasiminin sonunda Fuciyan əyalətinin turizm potensialını əks etdirən videocarx təqdim edilib.
