“Biz öz çərçivəmizə sığmayacağıq”
Ümüd Abbas yeni teatr yaradıb: Siz "Cosmo”da
gəlin-qaynana kimi məişət mövzularını görməyəcəksiniz
Axır ki, biz də ağızdolusu "özəl teatr” kəlməsini
işlədə bilirik. Daha çox gənclərin cəsarət edib, yaratdıqları özəl teatrlarımızın
sayının biri də artdı. Deyəcəksiniz ki, karantin günlərində nə teatr? Amma
istək olduğu yerdə canlı sənət növü olan teatr da yaranar, hələ üstəlik, bu
teatr dünyəvi əhəmiyyət də daşıyar.
Gənc rejissor və aktyor Ümüd Abbas "Şah Mat”
Teatrından sonra ikinci teatrını yaratmaq qərarına gəlib. Həmkarı Mir Qabillə
birlikdə yaratdığı "Şah Mat” Teatrı ilə yollarını ayıran rejissor "Cosmo Teatr”
adlı yeni layihəsini təqdim edib. "Cosmo”-nun "dünya” mənasını verdiyini deyən
rejissor, teatrın da məhz belə bir anlam kəsb etdiyini bildirir: "Çalışacam ki,
burada ancaq dünyəvi problemləri özündə əks etdirən əsərlərə müraciət edim.
Yeni teatrımız vasitəsi ilə sərhədsiz olduğunu, müəyyən bir sərhəddə ilişib
qalan teatr olmadığını göstərməyə çalışacağıq. Dünya yarananda sərhədləri
olmayıb. İndi də quş uçaraq, dovşan qaçaraq sərhədləri keçə bilirsə, mən niyə
sərhədi çətinliklə keçməliyəm? Sərhədsiz dünya arzusu ilə belə bir teatr
yaratdıq. Dünyanın o biri başında bir insan əzizini itirəndə necə əzab çəkirsə,
biz də dünyanın bu biri başında həmin hadisəni yaşayanda, elə əzab çəkirik. Bu
dünya hamımızındır, acıları, duyğuları, hissləri eynidir. "Cosmo” Teatrında da
sərhədlər, maneələr aradan qalxacaq. Teatrda hisslərin, duyğuların sərhədi
olmadığını, sərhədsiz dünyanın sakinlərini göstərməyə çalışacağıq. "Biz hamımız
bu dünyanın sakiniyik”, "hamımızın vətəni bu dünyadır” mesajını vermək ümidi
ilə belə bir işə başladıq”.
3 il bundan əvvəl həmkarı ilə "Şah Mat” Teatrını
yaradan və rejissoru olan Ümüd Abbas müəyyən səbəblərdən ordan ayrıldığını
bildirir: "Burda şəriksiz çalışacam. İki nəfər - bir teatr anlayışı olmayacaq.
Hər şeyi təkbaşına özüm idarə edəcəm. İki nəfərin fikrinin üst-üstə
düşməməyinin, fikir ayrılığı yaşamanın nə qədər böyük problemlərə gətirib
çıxardığının şahidi oldum. "Cosmo” heç kəsə dəymədən, toxunmadan dünyəvi
planlarımı, düşüncələrimi ortaya qoyan bir teatr olacaq”.
Müsahibimizdən yeni teatrın yaradılmasına nə qədər
ehtiyacın olduğunu soruşduqda isə, bildirdi ki, hazırkı dövrdə yetərincə güclü potensiala
malik özəl teatrlar var: "Zamanında böyük ehtiyac duyulan zirzəmi teatrını
yaratmışdıq. "Cosmo” Teatrı da fəaliyyətinə zirzəmidən başlayacaq və böyük
səhnələrə qədər gedəcəyini ümid edirik. Başlamaq üçün mükəmməl olmaq lazım deyil.
Amma mükəmməl olmaq üçün başlamaq lazımdır. Hədəfimiz daha böyük arena və beynəlxalq
müstəvidə adımızı tarixə yazdırmaqdır. Bu dəfə tamam başqa istiqamət üzrə özümü
sınayacam və yeni teatrda fərqli üslub, seçim tərzi ilə tamaşaçıların qarşısına
çıxacam. Teatrda ilk dəfə fərqli bir üslubda fərqli yanaşma tərzi nümayiş
etdirəcəyik. Buna həqiqətən ehtiyac vardı”.
Hazırda online şəkildə 2 tamaşanın məşq prosesinin
getdiyini deyən rejissor, kollektivin 2 hissəyə ayrıldığını bildirir: "Yeni
teatrın peşəkar truppasında hələ ki Kamran Muradlı, İlahə Səfərli, Şəmistan
Süleymanlı iştirak edəcək. Həvəskar truppada isə Tansu Abbaszadə, Əkbərov
Ülkər, Əliyev Kainat, Sahibzadə Aytac, Babayeva Lamiyə, Bayramova Güney,
Şahmarlı Mahir, Daşdəmirova Lalə, Rzazadə Nadir rol alacaqlar. Adalarını qeyd
etdiyim komanda heyətimizin üzvlərini tanıyıram və onlarla işləmişəm. Onlar güvəndiyim
insanlardır. Ümid edirəm ki, yeni işimiz hər birimizə uğur gətirəcək”.
Tamaşalara gəlincə isə, rejissor "Şah Mat”
Teatrında hazırladığı tamaşaları bərpa edərək yenidən hazırlayacağını deyir: "O
biri teatrda müəyyən tamaşalarım var ki, burda bərpa olunacaq. Müəyyən əsərlər
var ki, onları "Şah Mat”da hazırlamağı düşünsəm də, qisməti "Cosmo”-da
açılacaq. Bundan başqa, çalışacam ki, aktyorların potensialına uyğun tamaşalar hazırlayım.
İki truppa arasında seçim edəcəm. Həvəskar truppadan aktyorlar özünü
təsdiqlədikdən sonra peşəkar komandaya keçid edəcəklər. Elə hesab edirəm ki,
tamaşaçılara da maraqlı olacaq”.
Ümüd Abbas yeni teatrı yaratmaq üçün böyüklərlə
danışdığını, onlardan məsləhətlər aldığını bildirir. Qeyd edir ki, yeni işə
başlamaq üçün ən əlverişli zamandır. Çünki məşq etmək üçün gözəl vaxtdır, belə
bir zamanda aktyorların başqa işləri olmadığı üçün karantin günlərində online
şəkildə məşqlər edirlər.
Müsahibimiz "bu teatrla cəmiyyətə hansı mesajları
ötürəcəksiniz” – sualına cavab olaraq, dünyəvi fikirlərin, bəşəri ideologiyanın
təbliği rolunu oynayacağını vurğulayır: "Bəşəri problemləri ortaya çıxarmaq yönündə
çalışacam. Xırda məsələlərə qaçmamaq, daha böyük məsələlər ortaya qoymağa cəhd
edəcəm. Çalışacam ki, bütün insanların ortaq problemləri müzakirə mövzusu
olsun. Loqomuzdan da göründüyü kimi, sözlər qlobusun kənarına çıxır. Loqoda
gizli simvollar yer alıb. Biz öz çərçivəmizə sığmayacağıq. Bacardığım qədər o
sərhədləri aşmağa çalışaraq, yeniliklərə imza atacağıq. Ən çox sevdiyim iş
novatorluqdur və güman edirəm ki bunu da bacaracam. Sizə deyə bilmərəm ki, insanları
sülhə səsləyəcəm. Əsər ümumiləşmiş məqsədimə uyğun olacaqsa, istəklərimi özündə
əks etdirə biləcəksə, o ideyanı tamaşaçıya çatdıracam. Siz "Cosmo” Teatrında gəlin-qaynana
kimi məişət mövzularını görməyəcəksiniz. Heç kimlə işimiz olmadan, bacarığımızı ortaya qoymaq üçün "Cosmo” bizə
bu imkanı yaradacaq”.
Xəyalə Rəis