Baş nazir Ermənistanı uçuruma aparır
Küçə eyforiyasından çıxa bilməyən Ermənistanın baş naziri Nikol
Paşinyan günbəgün müxtəlif mövzularda ziddiyyətli bəyanatlarını davam etdirir.
Onun bu sərsəm fikirləri isə artıq Ermənistan cəmiyyəti tərəfindən birmənalı
qarşılanmır. Artıq erməni mətbuatı Paşinyanı tənqid hədəfinə gətirib ki, bu da
baş nazirin "xoşuna” gəlməyib. Mətbuata azadlıq verəcəyini bəyan edən Paşinyan
indi onu tənqid edən mətbu qurumlara qarşı "tədbirlər” görməyə başlayıb.
Siyasi savadsızlığı ucbatından verdiyi vədləri yerinə yetirə bilməyən yeni baş nazir cəmiyyətin diqqətini daxili problemlərdən uzaqlaşdırmaq üçün sələfləri kimi Qarabağ problemi ilə bağlı sərsəm bəyanatlar səsləndirir. Bəs görəsən Paşinyan bu addımı ilə nə qədər siyasi manipulyasiya edə biləcək?
Bəxtiyar MƏMMƏDLİ
Siyasi savadsızlığı ucbatından verdiyi vədləri yerinə yetirə bilməyən yeni baş nazir cəmiyyətin diqqətini daxili problemlərdən uzaqlaşdırmaq üçün sələfləri kimi Qarabağ problemi ilə bağlı sərsəm bəyanatlar səsləndirir. Bəs görəsən Paşinyan bu addımı ilə nə qədər siyasi manipulyasiya edə biləcək?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, Nikol
Paşinyanın hakimiyyətə gəlişindən artıq 4 ay keçir: "Bu dövr ərzində onun həm
daxili, həm də xarici siyasətinə qiymət versək, Prezidentin İctimai-siyasi
məsələlər üzrə köməkçisi Əli Həsənovun dediyi kimi, Paşinyanın öz vəzifəsinə
qeyri-adekvat bir adam olduğu məlum olacaq. Onun bəyanatları və atdığı addımlar
bu fikri bir daha təsdiqləyir. Bu günlərdə isə erməni mətbuatı daha çox
Paşinyanın əqli problemlərini müzakirəyə çıxarıb. Hətta belə fikirlər
səslənməkdədir ki, dünyanın ən nüfuzlu psixiatrlarını, psixoloqlarını Ermənistana
dəvət etmək lazımdır. Eyni zamanda parlamentdə Paşinyanın əqli baxımdan xəstə
olması məsələsi müzakirə edilməlidir, əks təqdirdə, Ermənistanı çox böyük
fəlakətlər gözləyə bilər. Bununla bağlı misallar da gətirirlər. Paşinyan son
çıxışlarından birində qeyd edir ki, Ermənistanda heç bir məhkəmənin hakimi onun
bir sözünü iki edə bilməz və belə bir hakim varsa, mən onunla görüşmək
istəyərdim. İş o yerə çatıb ki, populizm üzərində hakimiyyətə gələn Paşinyanın
küçədən gələn dəstəyi artıq tükənmək üzrədir. Buna baxmayaraq, o bu populizmini
daha da gücləndirməkdədir, hətta ailəsini də bu işə cəlb edir. Oğlunu Dağlıq
Qarabağa hərbi xidmətə göndərmək hesabına da istəyir ki, erməni ictimai fikrində
özünə rəğbət oyatsın. Lakin onun bu addımı da beynəlxalq hüquqa tamamilə ziddir.
Ümumiyyətlə, bu gün Paşinyanın ailə üzvlərinin davranışı Ermənistana ciddi
problemlər yaradır. Elə götürək onun həyat yoldaşı Anna Akopyanı. O, Paşinyanla
birgə Paris səfərindən danışarkən deyib ki, mənim 300 avro pulum var idi və
dükanları gəzərkən 3 uşağım üçün cəmi 100 avro pul xərclədim, qalan xərcləri
isə Ermənistanın Fransadakı səfiri qarşılayıb. Bu, birbaşa korrupsiya əməlidir.
Faktiki olaraq, Anna Akopyan etiraf edir ki, səfir onun xərclərini qarşılamaqla
korrupsiyaya yol verib. Ona görə də bu diplomat geri çağırılmalı və eləcə də
Ermənistanın Baş Prokurorluğu Anna Akopyana qarşı cinayət işi açmalı idi. Bu
faktlar onu göstərir ki, Ermənistanın baş nazirinin ailəsi də öz davranışı ilə
yerli ictimai fikirdə qıcıq oyatmaqda davam edir”.
E.Nəsirov qeyd etdi ki, Paşinyanın sentyabrın 18-də Qarabağa təcili
səfər etməsi də populizmdən qaynaqlanır: "Məqsədi isə odur ki, sələfləri kimi
Qarabağ kartından istifadə edib müəyyən zaman üçün hakimiyyətdə qala bilsin.
Amma nə vaxta qədər? Məgər Sarkisyanın hakimiyyətdən getməsi ona dərs olmadımı?
Sarkisyanın Qarabağla bağlı tutduğu mövqe və Azərbaycan tərəfindən güclənməkdə
olan blokada, təcrid siyasəti Ermənistanda rejimin çökməsini şərtləndirdi. Bu
günlərdə Prezident İlham Əliyev Biləsuvara səfəri zamanı ictimaiyyət
nümayəndələri ilə görüşündə də qeyd etdi ki, Ermənistanda əvvəlki diktatura
rejimi 20 il ərzində mövcud oldu, amma çökdü. Bu hakimiyyətin diktatura,
korrupsioner bir rejim olduğunu biz söyləyirdik və bunu sonra erməni xalqı
dedi. Təəssüf ki, Ermənistandakı indiki rejim də çox məsuliyyətsiz bəyanatlar
verir və münaqişənin tənzimlənməsi imkanlarını buxovlayır. Bizim gücümüz
ondadır ki, xalq hakimiyyəti dəstəkləyir. Ermənistanda isə xalq-hakimiyyət
birliyi yoxdur. Hadisələr belə davam edərsə, Paşinyan öz sələfi Sarksiyanın
taleyini yaşayacaq”.
Qərbi Kaspi Universitetinin
professoru, politoloq Fikrət Sadıxov bildirdi ki, Paşinyanın
stabil psixi durumu sual altındadır və həkimlər tərəfindən ciddi şəkildə
müayinədən keçməlidir: "Ziddiyyətli bəyanatlar vermək, özünü qeyri-stabil
aparmaq əlbəttə ki, normal baş nazir işi deyil. O, küçələrdə verdiyi vədlərin
indi ziddinə gedir, əleyhinə addımlar atır. Ona görə də hesab edirəm ki, sağlam
düşüncəli insanlar bunun hərəkətlərini normal qəbul etmir.
Bundan başqa, Rusiya prezidentinin Yerevana gəlməsi artıq bəyan
olunub. Putin bildirdi ki, Koçaryan və Sarkisyanla görüşəcək və onlar Paşinyanın
ən qatı rəqibləridir. Bunun özü Paşinyana bir zərbədir, çünki Paşinyan onlara
qarşı cinayət işi açır, həbs etmək istəyir. Putin isə onlarla görüşmək
niyyətində olduğunu deyir. Bu, o deməkdir ki, hətta Ermənistanın müttəfiqləri
belə, başa düşür ki, Paşinyanla normal əlaqə qurmaq, onu inkişaf etdirmək
mümkün deyil. O həqiqətən daşıdığı vəzifəsinə qeyri-adekvat bir insandır və
psixi durumu mütləq yoxlanılmalıdır. Əgər bunu etməsələr, Paşinyanın ciddi
qeyri-adekvat addımları olacaq və bu da Ermənistanı uçuruma aparacaq”.
F.Sadıxov qeyd etdi ki, Paşinyanın həyat tərzi onun demokrat olmasını
inkar edir: "O heç universitet diplomu ala bilməyib. Jurnalistika sahəsində də
uğur qazana bilməyib. Onu keçmiş həmkarları da tənqid edir və düşünürlər ki,
Paşinyan normal düşüncəli jurnalist olmayıb. Belə bir insanı normal şəxs
adlandırmaq da mümkün deyil”.
Bəxtiyar MƏMMƏDLİ