Azərbaycan və Ermənistan prezidentləri görüşəcəkmi?
Ermənistan-Azərbaycan, Dağlıq Qarabağ münaqişəsinin tənzimlənməsi
prosesində tərəflər arasında növbəti dəfə görüş keçirilib. Belə ki, ötən həftə BMT
Baş məclisinin 72-ci sessiyası çərçivəsində ATƏT-in Minsk Qrupunun həmsədrləri
İqor Popov, Stefan Viskonti, Əndrü Sxofer və ATƏT-in fəaliyyətdə olan sədrinin
şəxsi nümayəndəsi Anjey Kaspişikin iştirakı ilə Azərbaycan və Ermənistan xarici
işlər nazirləri Elmar Məmmədyarov və Edvard Nalbandyan görüşüblər.
Görüşdə Ermənistan-Azərbaycan Dağlıq Qarabağ münaqişəsinin həlli üzrə
ətraflı fikir mübadiləsi aparılıb. Bu xüsusda, Ermənistan, Azərbaycan və
həmsədrlər tərəfindən atılmalı olan addımlar nəzərdən keçirilib. Həmçinin görüş
əsnasında ATƏT-in Minsk Qrupunun həmsədrlərinin təklifinə uyğun olaraq
Ermənistan və Azərbaycan prezidentlərinin görüşünün keçirilməsi ilə əlaqədar
məsələlər müzakirə olunub.
E.Məmmədyarov münaqişənin həlli üzrə substantiv danışıqların davam
etdirilməsi üçün həmsədrlər tərəfindən səsləndirilən bir sıra maraqlı
təkliflərin Azərbaycan tərəfindən dəstəkləndiyini bildirib.
Ermənistanın substantiv danışıqlardan qaçdığı bir məqamda
prezidentlərin görüşü baş tutacaqmı?
Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Aydın Mizəzadə bildirdi ki, Azərbaycan
və Ermənistan xarici işlər nazirlərinin görüşü zərurətdən yaranıb: "Ermənistanın
Azərbaycan torpaqlarının bir hissəsini işğalda saxlaması artıq Azərbaycandan
çox onların inkişafına ciddi zərbə vurur. Əhalisi köçür, iqtisadiyyatda
geriləmə baş verir, Ermənistan dövlətçiliyinin özü artıq ciddi təhlükə
altındadır. Bu baxımdan Ermənistan özü üçün sərfəli olan vəziyyətdə Dağlıq
Qarabağ problemini həll etməyə çalışır. Ancaq aydın olur ki, torpaqlar işğaldan
azad olunmayana qədər hər hansı bir irəliləyişdən söhbət gedə bilməz. Həmçinin
Azərbaycanın iqtisadiyyatda inkişafı, beynəlxalq arenada siyasi nüfuzunun
artması da onun Dağlıq Qarabağ probleminin həllində mövqeyini kifayət qədər
möhkəmləndirir.Rəsmi məlumatda bildirilir ki, danışıqlarda müəyyən yeni təkliflər olub
və tərəflər bu təkliflərə razılıq bildiriblər. Əgər Azərbaycan yeni təkliflərə
razılıq bildiribsə, deməli, söhbət Azərbaycanın ərazi bütövlüyünün təmin
edilməsi məsələsi çərçivəsində gedir. Heç bir halda Azərbaycan torpaqlarının
bir santimetri də Ermənistana güzəştə gedilə bilməz. Bu baxımdan yeniliyin hər
halda müsbət istiqamətdə olmasını arzulayardım”.
A.Mizəzadə qeyd etdi ki, bir neçə gündən sonra ATƏT-in Minsk qrupunun həmsədrləri bəyan etdikləri
kimi regiona səfər edəcəklər: "Prezidentlərin görüşünün təşkil edilməsi ilə
bağlı danışıqların aparılması gözlənilir. Əgər ortada müəyyən məsələlər üzrə
razılaşma varsa, bu gün problemin həlli istiqamətində azacıq da olsa,
irəliləyiş gözlənilirsə, əlbəttə ki, Azərbaycan bu danışıqlara razılıq verə
bilər. İstənilən halda problemin həlli zamanı artıq yetişib və bunu Ermənistan
ciddi şəkildə dərk etməlidir.Prezidentlərin görüşəcəyini indidən demək çətindir və həmsədrlər bunu
etməyə çalışırlar. Azərbaycan görüş naminə görüşməyin əleyhinədir. O zaman
prezidentlərin görüşünə razılıq verilə bilər ki, nə isə bir nəticə əldə edilsin.
Çox təəssüf ki, Ermənistan qeyri-ciddi danışıq tərəfidir və Azərbaycan bu
vəziyyətlə dəfələrlə qarşılaşıb. Hər halda, həmsədrlərin səfəri zamanı bütün bu
məsələlər ciddi şəkildə araşdırılacaq”.
Politoloq Fikrət Sadıxovun sözlərinə görə,
Azərbaycan və Ermənistan xarici işlər nazirlərinin görüşü özü-özlüyündə müsbət
nəticə verdi: "Burada problemin həllini deyil, məsələnin gedişatını nəzərdə
tuturam. Azərbaycanın xarici işlər naziri də bəyan etdi ki, müəyyən təkliflər
var. Yəni, o, bununla demək istədi ki, müzakirə predmeti mövcuddur. Bu,
konstruktiv və substantiv şəraitdə keçsə, əlbəttə ki, müəyyən ilkin nəticələr
əldə etmək olar. Burada dövlət başçılarının görüşü nəzərdə tutulur. Mənə elə
gəlir ki, vaxtilə keçmiş amerikalı həmsədr Hoqlandın irəli sürdüyü təkliflər
əsasında olan təşəbbüslərdən söhbət gedir. O, prosesin işğal olunmuş rayonların
azad edilməsindən başlanılmasını təklif edirdi və bununla bağlı 6 prinsip
səsləndirib. Əgər bunun əsasında danışıqlar baş tutsa, bu bizim maraqlarımıza
cavab verən addım olar və biz nə isə əldə edə bilərik. Fikrimcə, məhz bu,
Nyu-Yorkda baş tutan görüşün əsas müsbət nəticəsidir”.
F.Sadıxov əlavə etdi ki, Azərbaycan və Ermənistan prezidentlərinin
görüşünün baş tutacağını əminliklə demək mümkün deyil: "Lakin həmsədrlər bu
görüşün keçirilməsinin daha çox istəyirlər və bunun üçün əllərindən gələni
edəcəklər. Hesab edirəm ki, görüş naminə hansısa görüş təşkil etməyin heç də
mənası yoxdur. Çünki masanın üzərində Azərbaycanın marağına cavab verən konkret
təkliflər olmalıdır. Azərbaycanın maraqları dedikdə, biz beynəlxalq hüquq
normalarını nəzərdə tuturuq. Əgər belə təkliflərin müzakirəsi planlaşdırılsa,
əlbəttə ki, dövlət başçıları görüşə bilər. Amma bir şərtlə ki, Ermənistana
müəyyən təzyiqlər olunsun. Ermənistan özü-özlüyündə normal konstruktiv plana
riayət etmir. Ona görə də iki istiqamət eyni vaxtda vacibdir: Birincisi,
həmsədrlər tərəfindən təkliflər irəli sürülməlidir, digər tərəfdən isə
Ermənistana müəyyən təzyiq göstərilməlidir. Bundan sonra mərhələli plan
əsasında münaqişənin həllinin ilk addımları atılmalıdır”.
Bəxtiyar MƏMMƏDLİ