Azərbaycan ordusu Xalqın Ordusudur!
Bu həmrəylik, bu güc işğalçı Ermənistana qarşıdır,
ölkəmizin ərazi bütövlüyünün təmin olunmasına yönəlib
Müasir Azərbaycan inkişaf səviyyəsinə görə Cənubi
Qafqazın lider dövlətidir. Böyük uzaqgörənliklə həyata keçirilən müstəqil
daxili və xarici siyasət, sosial ədalət prinsiplərinin gözlənilməsi, balanslı
yanaşma ölkədə xalq-iqtidar münasibətini yaxşılaşdırmaqla yanaşı, beynəlxalq
arenada da mövqeyimizi gücləndirib. Beynəlxalq birliyin layiqli üzvünə çevrilən
Azərbaycan etibarlı tərəfdaş, Avropanın enerji təhlükəsizliyində, regionun
inkişafında mühüm rol oynayan ölkəyə çevrilib.
Bu fonda Azərbaycan Silahlı Qüvvələri də böyük
inkişaf yolu keçib, dünyanın ən güclü 50 ordusu sırasında yer alıb. Bu, bir
tərəfdən Silahlı Qüvvələrə ayrılan vəsaitlə, ölkə rəhbərinin hərbiyə olan
diqqət və qayğısı ilə bağlıdırsa, digər yandan Azərbaycan cəmiyyətində
vətənpərvərliyin yüksək səviyyəsi, vətəndaşlarımızın işğal altındakı
ərazilərimizin hərbi yolla azad edilməsinə daim hazır olması ilə əlaqədardır.
Yəni, Azərbaycanda xalq-iqtidar-ordu həmrəyliyi var və bu həmrəylik, bu güc
işğalçı Ermənistana qarşıdır, ölkəmizin ərazi bütövlüyünün təmin olunmasına
yönəlib. İyulun 12-də dövlət sərhədinin Tovuz rayonundan keçən hissəsində
işğalçı Ermənistanın növbəti təxribata əl atmasından sonra bu həmrəylik bir
daha nümayiş olundu.
Prezident İlham Əliyev ötən həftə şimal-qərb
regionlarına səfəri zamanı Balakən regional ASAN Mərkəzinin açılışında iştirak
edib və geniş nitq söyləyərək bu amilə diqqət çəkib. Qeyd edib ki, iyul ayının ortasında
Nazirlər Kabinetinin toplantısında bu məsələ ilə bağlı fikirlərini ifadə
edəndən sonra cəmi bir həftə ərzində 50 mindən çox Azərbaycan gənci Səfərbərlik
və Hərbi Xidmətə Çağırış üzrə Dövlət Xidmətinə üz tutub, könüllü olaraq Vətəni
qorumaq üçün qeydiyyatdan keçiblər. O, Azərbaycan Ordusunun tam
komplektləşdirildiyini, bu gün əlavə canlı qüvvəyə ehtiyac olmadığını
xatırladaraq vurğulayıb ki, ehtiyac olduğu təqdirdə 50 mindən çox insan Vətən,
torpaq uğrunda vuruşmağa hazırdır. Dövlət başçısı Azərbaycanın xalqının və
dövlətinin Qarabağ məsələsində həmrəy olduğunu dilə gətirib. Deyib ki, Tovuzda
Ermənistanın əvvəlcədən planlaşdırılmış təxribatının qarşısının qəhrəmancasına
alınması, dövlət sərhədinin və mülki insanların təhlükəsizliyinin təmin
olunması, hərbi əməliyyatlarda yüksək texnologiyaların effektiv tətbiqi Azərbaycan
Silahlı Qüvvələrinin yüksək inkişaf səviyyəsini və döyüş qabiliyyətini nümayiş
etdirir.
Dövlət başçısı deyib ki, dünyanın bir çox
ölkələrində gənclərin ordudan yayınması və alternativ hərbi xidmətlərə üz tutması,
həmçinin Ermənistan daxil olmaqla, digər ölkələrdə muzdluların orduya cəlb edilməsi
fonunda Azərbaycan gənclərinin, ümumiyyətlə xalqın vətənpərvərliyi, könüllü
olaraq ordu sıralarına yazılması olduqca müsbət haldır. Prezidentin fikrincə, bu,
Silahlı Qüvvələrimizdə aparılan köklü islahatların, xalqın orduya inamının və xalq-ordu
vəhdətinin göstəricisidir: "Azərbaycan ordusu Xalqın Ordusudur! Tovuzda baş
vermiş döyüşlərdə Ermənistan tərəfindən ön sıraya muzdluların, əsasən Suriyadan
olan ermənilərin, orduda qeydiyyatda olmayan qismən yaşlı insanların
yerləşdirilməsi, həmçinin, Qarabağdan olan ermənilərin gətirilməsi faktları
məlumdur. Nəticə etibarilə, Ermənistan tərəfi itkilərini əsaslı şəkildə gizlədib.
Həmin insanlar mülki şəxs kimi uçotda olduğu üçün sonradan mülki şəraitdə
ölməsi barədə məlumat verilir... Ermənistan xalqı və mediası bu hərbi
avantüraya görə Ermənistan rəhbərliyindən hesabat tələb etməlidir”.
Milli Məclisin
Müdafiə, təhlükəsizlik və korrupsiya ilə mübarizə komitəsinin üzvü Arzu Nağıyev Azərbaycanın 20 faiz ərazisinin Ermənistan silahlı
qüvvələri tərəfindən işğal olunduğunu, 1 milyondan artıq azərbaycanlının qaçqın
və məcburi köçkünə çevrildiyini söyləyib. Deputatın fikrincə, Ermənistanın
qeyri-konstruktivliyi səbəbindən 30 ilə yaxındır aparılan sülh danışıqları
nəticə vermir, üstəlik, işğalçı dövlət hərbi təxribatlara əl atır ki, bu da
Dağlıq Qarabağ münaqişəsinin müharibə yolu ilə həllini gündəmə gətirir. O deyib
ki, işğal altındakı ərazilərin hərbi yolla azad edilməsi Azərbaycanın suveren
hüququdur: "Prezidentin çağırışından sonra bir həftə ərzində Səfərbərlik və
Hərbi Xidmətə Çağırış üzrə Dövlət Xidmətinə 50 mindən çox gənc müraciət edərək
vuruşmağa hazır olduğunu bildirib. Bu, xalq-ordu vəhdətinin mühüm
göstəricisidir. Cənab Prezidentimizin də vurğuladığı kimi, bu gün Azərbaycan Ordusu
tam kompleksləşdirilib, güclü kadr potensialımız var. Bununla belə, yetişən
gənc nəsil Vətən, torpaq uğrunda vuruşmağa daim hazırdır. Tovuz rayonunun
sərhəd ərazisində baş verən erməni təxribatı Azərbaycan xalqının Qarabağ
məsələsində həmrəy olduğunu bir daha bütün dünyaya nümayiş etdirdi. Azərbaycan
Silahlı Qüvvələri Ermənistanın əvvəlcədən planlaşdırılmış təxribatının
qarşısını qəhrəmancasına aldı. Bununla da dövlət sərhədinin və mülki insanların
təhlükəsizliyi təmin olundu. Bu hadisələr növbəti dəfə göstərdi ki, Azərbaycan
əsgəri kimin və nəyin naminə döyüşdüyünü yaxşı bilir. Bu, əsas məsələdir.
Xalqına güvənən, onun iradəsini ən yüksək səviyyədə ifadə edən cənab
Prezidentimiz dəfələrlə qeyd edib ki, Azərbaycan Dağlıq Qarabağ probleminin həllində
prinsipial mövqeyindən heç zaman geri çəkilməyəcək, tarixi torpaqlarımızda
ikinci erməni dövlətinin yaradılmasına imkan verilməyəcək. Bu gün Azərbaycan
Ordusu keçirdiyi hərbi təlimlər vasitəsilə gücünə güc qatır, döyüş
qabiliyyətini artırır, eyni zamanda Ermənistana və onun havadarlarına lazımi
mesaj verir”.
AMEA Naxçıvan
Bölməsinin sədri, akademik İsmayıl Hacıyev də Silahlı Qüvvələrimizin inkişafından,
xalq-iqtidar-ordu həmrəyliyindən söhbət açarkən bildirib ki, Prezident İlham
Əliyevin diqqət və qayğısı ilə müasir texnika ilə təchiz edilmiş qüdrətli
Azərbaycan Ordusu istənilən vaxt torpaqlarımızı işğaldan azad etməyə qadirdir. Onun
sözlərinə görə, Aprel döyüşləri, Günnüt zəfəri, son olaraq isə Tovuz
istiqamətində Ordumuzun Ermənistan silahlı qüvvələrinə qarşı həyata keçirdiyi
cəza tədbirləri bunu bir daha sübut edir: "Bu gün istər pandemiya ilə
mübarizədə, istərsə də cəbhədə düşmən tərəfindən törədilən çirkin hadisələrdə
xalqımız dövlətimizin, Prezidentimizin yanında olmaqla milli birlik və həmrəylik
nümayiş etdirir. Hadisələrlə bağlı ordumuzu dəstəkləyən insanlarımız
torpaqlarımızın azadlığı uğrunda döyüşə getmək üçün müraciətlər edirlər. Ali
Baş Komandan İlham Əliyevin Silahlı Qüvvələrimizin zəfər salnaməsi adlandırdığı
Aprel döyüşləri, Naxçıvan Əlahiddə Ümumqoşun Ordu tərəfindən 11 min hektar
ərazimizin azad edilməsi göstərdi ki, istənilən vaxt Azərbaycan Silahlı
Qüvvələri ərazi bütövlüyümüzü bərpa etmək qüdrətindədir. Bu gün adı güclü
ordular sırasında çəkilən Azərbaycan Ordusunda iradəli, əzmli, cəsarətli,
qəhrəman və gənc nəslə nümunə olan qeyrətli Vətən oğullarımız var. Vətənin,
millətin keşiyini çəkən oğullarımızın arxasında da Azərbaycan xalqı dayanır”.
Rufik İSMAYILOV