Anarın kitablarını yandırmaq İçərişəhəri yandırmaqdır
Gündəmi bir o qədər də izləmədiyim üçün son olanlardan, ya da
olacaqlardan xəbərsiz idim. Yeni "451”lər etirazını biləndə təəccüblənmədim.
Deyəsən, artıq bütün eşidilənlərin sadəcə informasiya kimi qavranıldığı dövrə
gəlib çatmışıq. Bu yazıda nə kitabı müqəddəsləşdirmək, nə də kitabları
yandırılan müəlliflərin ünvanına atəşin təriflər yağdırmaq fikrim var. Hətta
bütün sentimentallığı qatlayıb bir küncə qoymuşam. Sırf bu yazı üçün. Sırf
demək istədiklərimi daha real, daha ağlabatan etmək, düşüncələrimin "ayağını”
yerdə saxlamaq üçün...
Yəqin ki, dünyada ən asan icra olunan hərəkətlərdən biridir kağız
yandırmaq. Kibriti alovlandırıb kağızla
"qovuşdurursan” və budur – geriyə sadəcə bir hissəsi uçuşan, bir hissəsi də
yerdə can verən kül yığını qalır. Ehtimal ki, uşaqlara kibritə yaxınlaşmağı
qadağan etmələri bu səbəbdəndir. Deməli, kitabları yandırmaq istəyən o
"uşaqlar”a kitabla kağızın fərqini bəsit bir şəkildə izah etməklə işə
başlamalıyam. Kağızın yuxarıdakı ardıcıllıqla yanmasına sadəcə bir mane ola
bilər: mürəkkəb. Bəyaz kağıza bircə sözlük mürəkkəb düşübsə, təəssüflə
bildirməliyəm ki, o kağız yanmaz, yoldaşlar, yanmaz! Yəni həqiqətən
düşünürsünüz ki, fikirlərə alov təsir edə bilər? Zənn edirsiniz ki, bu, sizin
üsyankar ruhunuzun, intellektual düşüncənizin sübutudur? Bu uşaqca hərəkətə
"etiraz”mı deyirsiniz? O zaman, gəlin, sizə bircə nümunə ilə əsl etirazın, əsl
mübarizənin nə olduğunu izah etməyə çalışım. Məşhur yazar Knut Hamsun vətəni
Norveçi işğal edənləri dəstəkləyənlər cərgəsində idi. Norveç işğaldan azad
olunduqda xalq onlara xəyanət etmiş bu yazara heç nə söyləmədi. Nə bir
protesto, nə bir yazı, nə də hücum. Fəqət bir gün K.Hamsunun evinin qarşısına
gənc bir qız müəllifin kitablarını qoydu. Bir az sonra yaşlı bir adam da
eynisini etdi. Müəllifin evinin önü kitablarını gətirənlərə "qucaq açdı”. Kitab
yığını böyüdükcə xalqına xəyanət edən yazar da kiçildi, kiçildi və kiçildi.
Baxın, etiraz budur. Əksi isə nə etirazdır, nə gözdağı. Əksi sadəcə
barbarlıqdır. Bu başıbəlalı tariximiz yanğınlardan, talanlardan, qarətlərdən
bəs qədər zərər çəkib axı...
Yandırdığımız "bir” kitabın yaranması üçün neçə kitab mütaliəsi
lazımdır bilirikmi, görəsən? Niyə axı düşünmürük ki, yanan o kitabın içində
Aristoteldən tutmuş Murakamiyə qədər onlarla, yüzlərlə müəllif var, əmək var,
mürəkkəb var... Biz yalnız müəllifi yandırmırıq, bütöv ədəbiyyat tarixini atəşə
atırıq. Özü də atəşin tüstüsündə boğulacağımızı bilərək. Bizim əleyhqazımız
yoxdur! Yox-dur!
Məsələni daha da konkretləşdirmək üçün atəşə atılacaq kitabların
müəlliflərindən söz açmaq yerinə düşər. Ortada mənim üçün bir Anar həqiqəti
var. Sentimental ruhumu Türkiyə ədəbiyyatında Səbahəddin Əli qidalandırırsa,
milli ədəbiyyatımızda bu "iş” Anara düşür. Mən Anarla birgə bütün digər
məsələləri kənara qoyub mətnmərkəzli olmağı öyrənmişəm. Və əminəm ki, nə qədər
dodaq büzülsə də, haqqında yazanların həqiqi heyranlığı manipulyasiya edilsə
də, Azərbaycan ədəbiyyatı tarixində, "60-cılar” ədəbi nəslində bir Anar gerçəyi
var. Lakin ədəbi baxışımdan atdığım önyarğıları Anarla birgə silahlanmaq fikrim
yoxdur. Ona görə də bu gün xəbəri eşidəndə "Anarın kitablarını yandırırlar”
cümləsindəki ilk söz solğun fonda idi mənim üçün. "Kitabları yandırırlar, kitabları!
Bu məsələyə fikir bildirməyimdə Anar nəsrinin poetikliyin, altıncı
mərtəbələrin, taksilərin, bənövşələrin, yağışlı günlərin aidiyyatı həm yox idi,
həm də var. Yoldaşlar, biz Anarı "yandırmaqla” illərdir Azərbaycan
ədəbiyyatının ən çox müzakirə olunan qadın surətini cadugər kimi alova atırıq. Çünki
o dövrdə, elə indi də küçələrə su səpən, qəssabdan rejissora qədər tanışı olan,
o şaquli qızı yaratmaq birmənalı qarşılanmaz. Anar bütün etirazları bilməsinə
rəğmən, bizə Təhminəni bəxş etdi və razılaşaq ki, illərdir onun qədər
danışılan, müzakirə edilən bir qadın qəhrəmanına heç birimiz can verə
bilməmişik.
Anarı "yandırmaq” Kəbirlinskini məhv etməkdir. Və Kəbirlinski ilə
birgə mənim kimi onlarla oxuyucunun ümidlərini də. Axı biz ümid edirik ki,
qonşuları narahat etməmək üçün pilləkənləri asta addımlayan o insan bir gün
bütün həqiqətləri açıb deyəcək. Kim bilir, bəlkə də Kəbirlinski də inanır ki,
bir gün həqiqət parlayacaq və artıq insanların gözündə aciz yox, qəhrəman
olaraq yüksələcək...
Anarın kitablarını yandırmaq İçərişəhəri yandırmaqdır. Başa düşə
bilmirəm, necə qıyacaqsınız "Gün keçdi”dəki o qocanın əllərinə? Axı biz bir gün
İçərişəhəri itirsək onu içərişəhərli qocanın əl izlərindən tapacaqdıq.
Kamikadzelərimizə, dondurmamıza toxunmayın.
Biz Anarın kitablarını yandırmaqla nələr-nələri oda atırıq,
bilirsinizmi? Gülarənin bayram həsrətini, Nərgizi sevənin eyni taksiyə minmə
şübhəsini, Zeynalın sabahkı ayıqlığını, əntiqə sarı paltoyla, nimdaş qaranı, o
beş rəqəmli nömrə və ardınca gələn bənövşə iyini, təyyarə səsini... Düzün
deyin, bu qədər yanğından sonra ağrımayacaqsızmı?
Aytac Quliyeva