“Çanaqqala zəfəri türk xalqının qəhrəmanlıq tarixinin şanlı səhifələrindən biridir”

Əli Həsənov: "Çanaqqala zəfəri türk xalqının qəhrəmanlıq tarixinin şanlı səhifələrindən biridir. İşğalçı qoşunların birləşmiş gücünə, Türkiyə dövlətini birdəfəlik yox etmək siyasətinə qarşı türk xalqının və qəhrəman türk əsgərinin ölüm-qalım savaşı, dirənişi və mübarizəsidir".
APA-nın məlumatına görə, bunu bu gün jurnalistlərə açıqlamasında Azərbaycan Prezidentinin ictimai-siyasi məsələlər üzrə köməkçisi Əli Həsənov söyləyib.
Ə.Həsənov deyib ki, Çanaqqalada türk əsgərləri və onlara qoşulan, sıralarında azərbaycanlıların da olduğu digər könüllülər, faktiki olaraq, türk xalqının iradəsinin məğlubedilməzliyini ortaya qoyublar, xalqı və dövləti məhv olmaqdan xilas ediblər: “Bu zəfərin qeyd edilməsi ilə bağlı Türkiyə və Azərbaycan prezidentlərinin iştirakı ilə tədbirlər planı hazırlanıb. Tədbirlər həm Türkiyədə, həm Azərbaycanda, həm də dünyanın ayrı-ayrı ölkələrində həyata keçirilir. Yekun olaraq, aprelin 24-də Çanaqqalada dünyanın müxtəlif ölkələrinin dövlət və hökumət rəhbərlərinin iştirakı ilə qələbənin 100 illiyinə həsr olunmuş təntənəli mərasim keçiriləcək”.
Ə.Həsənov əminliklə bildirib ki, Azərbaycan Ordusunun günbəgün artan qüdrəti və hərbçilərimizin rəşadəti sayəsində ərazi bütövlüyümüz yaxın gələcəkdə bərpa olunacaq və bayrağımız Şuşada dalğalanacaq.