Özünü ölümə, sürücünü həbsə yollayanlar - ARAŞDIRMA
Və
ya faciələrə yol açan piyada məsuliyyətsizliyi
Yol hərəkəti təhlükəsizliyi sahəsində həllini
tapmayan əsas problemlərdən biri də piyada məsuliyyətsizliyidir. Qaydalara
riayət etməyən, o cümlədən piyada keçidi olmayan ərazilərdən yolu keçməyə
çalışan, işıqfora, qadağanedici işarələrə əhəmiyyət vermədən avtomobilin altına
atılan vətəndaşlar
həm özlərinə, həm də sürücülərə təhlükə yaradırlar. Belə laqeydliyin nəticəsidir
ki, yol-nəqliyyat hadisələrində həlak olanların ümumi sayının 50 faizini məhz
piyada məsuliyyətsizliyi təşkil edir. Müasir dövrdə istər paytaxtda, istərsə də
regionlarda təhlükəsizlik kameraları quraşdırıldığından, yol hərəkəti
qaydalarını pozan sürücülər avtomobilin qeydiyyat nömrəsi ilə dərhal müəyyən
edilir, qanunla nəzərdə tutulmuş qaydada cərimələnirlər. Lakin piyadalarla
bağlı bu metod işləmir. Ona görə də, bir çox hallarda piyadalar ətrafda
polisinin olub-olmadığını müəyyən edib, yolu istədikləri kimi keçirlər. Bu da
bir qədər əvvəl vurğuladığımız kimi, faciələrə səbəb ola bilir.
Statistik
göstəricilər: 6 ayda290 nəfər həlak olub
Baş Dövlət Yol Polisi İdarəsinin rəsmi saytında
yerləşdirilən statistikaya görə, təkcə cari ilin 6 ayı ərzində ölüm və
xəsarətlə nəticələnən 756 yol-nəqliyyat hadisəsi qeydə alınıb ki, bu qəzalarda
290 nəfər həlak olub, 698 nəfər isə müxtəlif dərəcəli bədən xəsarəti alıb. Ötən
ilin müvafiq dövrü ilə müqayisədə hadisələrin sayı 4 (0,5%) fakt, ölənlərin
sayı 35 (10,8%) nəfər, yaralananların sayı isə 3 (0,4%) nəfər azalıb.Müəyyən edilib ki, sürücülər tərəfindən yol
hərəkəti qaydalarının pozulması nəticəsində 734 (97%) yol-nəqliyyat hadisəsi (piyadalar
tərəfindən 18 - 2,4%) baş verib. Bu qayda pozuntularının 302-si (39,9%)
nəqliyyat vasitələrinin yüksək sürətlə idarə edilməsi (142 ölü, 230 yaralı), 241-i
(31,8%) qarşıdan gələn nəqliyyatın hərəkət zolağına çıxma və ötmə qaydalarının
pozulması (73 ölü, 236 yaralı), 72-i (9,5%) yolayrıcılarını keçmə qaydalarının
pozulması (15 ölü, 93 yaralı), 10-u (1,3%) nəqliyyatın sərxoş vəziyyətdə idarə
edilməsi olub (5 ölü, 9 yaralı). Qəzaların növləri içərisində piyadanı vurmaq
(304 - 40,2%) və toqquşma (270 - 35,7%) əvvəllər də olduğu kimi üstünlük təşkil
edir (maneəni vurmaq 75 – 9,9%, aşma 66-8,7%). Həlak olan 290 nəfərdən
(qadınlar - 53 nəfər, 7-16 yaş - 26 nəfər,) 123-ü piyada, 87-si sürücü, 68-i
sərnişin, 10-u velosipedçi, 2-si isə digər hərəkət iştirakçısı olub.
Piyadanın
vəzifəsi və məsuliyyəti
Qanunvericiliyə nəzər salsaq, görərik ki, "Yol
hərəkəti haqqında” Qanunun 40-cı Maddəsində "Piyadaların vəzifələri” əks
olunub. Orada qeyd edilib ki, piyada, dəmiryolunu, avtomobil yolunun hərəkət
hissəsini, küçələri piyada keçidləri ilə, o cümlədən
yeraltıvəyerüstükeçidlərlə, bunlar olmadıqda
isəyolayrıclarında səki xətti vəya yolçiyni xətləri boyunca
keçməlidir. Piyada, hərəkətin nizamlandığıyerlərdənizamlayıcının
vəya piyada işıqforunun,
o olmadıqda isə nəqliyyat işıqforunun
işarəsiniəsas tutmalıdır, yolun hərəkət hissəsindəzərurət olmadan
ləngiməməli vədayanmamalıdır. Bildirilib ki, piyada, nizamlanmayan piyada
keçidlərindəyolun hərəkət hissəsinəyalnız yaxınlaşmaqda olan
nəqliyyat vasitələrinədək məsafəni, onların sürətini qiymətləndirdikdən
vəyolu keçməyin onlarüçün təhlükəsiz olacağınıyəqin etdikdən
sonraçıxa bilər. Təbii ki, bu vəzifələrin yerinə yetirilməməsinə görə
piyadalar məsuliyyət daşıyır və İnzibati Xətalar Məcəlləsinə əsasən müvafiq
miqdarda cərimə olunurlar. Məcəllənin "Yol hərəkəti qaydaları əleyhinə olan
inzibati xətalar” adlı 29-cu Fəslinin "Piyadanın məsuliyyəti” başlıqlı 338-ci
Maddəsində göstərilib ki, piyadalar tərəfindən yol hərəkəti qaydalarının
pozulmasına, yəni piyada işıqforunun
və ya nizamlayıcının işarələrinə riayət edilməməsinə, yaxınlaşmaqda olan
nəqliyyat vasitələrinin qarşısına qəflətən çıxılmasına görə iyirmi manat
məbləğində cərimə nəzərdə tutulub. Piyadalar tərəfindən yolun hərəkət
hissəsinin, dəmiryol keçidinin müəyyən olunmayan yerdən keçilməsinə görə də
iyirmi manat məbləğində cərimə edilir.
Cəriməyə
görə deyil, həyatına görə qərar ver
Göründüyü kimi, həm "Yol hərəkəti haqqında”
Qanunda, həm də İnzibati Xətalar Məcəlləsində piyadaların davranış qaydaları, məsuliyyəti,
tələblərə riayət etmədikləri halda, onlara tətbiq olunacaq cərimələr aydın
şəkildə verilib. Lakin hər piyadaya bir yol polisi təhkim etmək, ümumilikdə yol
hərəkəti qaydalarını pozan piyadaların hamısını cərimələmək, onların
hərəkətlərini nəzarət altında saxlamaq qeyri-mümkündür. Belə olan halda, hər
bir vətəndaş məsuliyyətli olmalı, təhlükəsizlik qaydalarına riayət etməli,
cərimələnməmək üçün deyil, özünün və başqalarının həyatını təhlükəyə atmamaq
üçün qaydalara riayət etməlidir. Baş
Dövlət Yol Polisi İdarəsinin şöbə rəisi, polis polkovnik-leytenantı Namidan
Piriyev mövzu ilə bağlı "Kaspi” qəzetinə açıqlamasında deyib ki, yol
hərəkəti qaydalarını pozan piyadaların təhlükəsizlik kameraları vasitəsilə
müəyyən edilməsi qeyri-mümkündür. Onun sözlərinə görə, hər bir vətəndaş, piyada
"Yol hərəkəti haqqında” Qanunun tələblərinə riayət etməlidir: "Tövsiyə edərdim
ki, piyadalar yol keçərkən son dərəcə diqqətli olsunlar, öz həyatlarını
təhlükəyə atmasınlar. Hətta piyada zolağı olan yolları keçərkən belə, "yol
mənimdir, üstünlük mənə məxsusdur” deyib, tələskənlik etməsinlər. Avtomobilin
sürətini, onun əyləc məsafəsini, hər hansı texniki çatışmazlıq səbəbilə, yaxud
qəfil avtomobilin qarşısına çıxan zaman sürücünün nəqliyyat vasitəsini saxlaya
bilib-bilməyəcəyini düşünsünlər.
Xüsusilə də gecə saatlarında son dərəcə diqqətli olsunlar, yolun müəyyən
edilməyən hissələrindən, yaxud işıqlandırılma olmayan yerlərdən yolu
keçməsinlər. Axşam saatlarında görüntünün məhdudlaşdığını nəzərə alıb, qara və
tünd deyil, əlvan rəngli geyimlərə üstünlük versinlər ki, hərəkətdə olan sürücü
onları daha tez görə bilsin, bununla da baş verə biləcək qəzanın qarşısı
alınsın. Bəzən piyadalar hərəkətdə olarkən qulaqlıqdan istifadə edirlər. Belə
piyada nəqliyyat vasitəsinin qarşısına qəfil çıxanda sürücü nə qədər siqnal
versə də eşitmir. Nəticədə qəzadan qurtulmaq mümkünsüz olur”.
Sosial
dəyərləri dəyişmək, dünyagörüşü artırmaq
Nəqliyyat
məsələləri üzrə ekspert, hüquqşünas Ərşad Hüseynov bizimlə söhbətində bildirib ki, dünyanın bir çox
ölkələrində "face kontrol” – üz tanıma sistemləri var. Onun sözlərinə görə,
beynəlxalq təcrübədə bu üz tanıma sistemləri vasitəsilə ictimai təhlükəsizliyə
ümumi nəzarət olunur: "Üz tanıma sistemini kütləvi istifadə edib yol hərəkəti
qaydalarını pozan piyadaları cərimələməyi, hələlik hər hansı ölkə tətbiq
etməyib. Belə bir təcrübənin indiyə qədər hansı ölkədə tətbiq edildiyindən
məlumatsızam. Yol hərəkəti qaydalarının müəyyənləşdirilməsində, bu qaydaları
pozanların inzibati məsuliyyətə cəlb edilməsində başlıca hədəf, çoxlu cərimə
yazmaq deyil. İnsanlar kütləvi cərimələnməklə intizamlı olmurlar. Düzdür,
cərimə də lazımdır. Amma yalnız cərimənin tətbiqi çıxış yolu deyil. Ümumilikdə,
hüquqi məsələlərə laqeyd münasibət, intizamsızlıq ortadan qalxmalıdır. Yol
hərəkəti mədəniyyəti, hüquq mədəniyyəti deyilən anlayışlar var. Hüquq
mədəniyyəti odur ki, insan qaydaları, qanunları, davranış normalarını bilir və
onlara şüurlu surətdə, könüllü şəkildə riayət edir. İnsan bunlara nə dərəcədə
riayət edirsə, demək, onun hüquq mədəniyyəti bir o qədər yüksəkdir. Təəssüf ki,
bizim cəmiyyətdə ictimai qaydalara, davranış normalarına laqeydlik var. Misal
üçün, çəkdiyi siqaretin kötüyünü, xırda məişət tullantısını, o cümlədən içdiyi
suyun, şirənin və
sairin qabını, çeynədiyi saqqızı hara gəldi atmaq pis bir ənənəyə çevrilib.
Yaxud hər hansı bir ünvanda növbəli sistem tətbiq olunduğu halda, kiminsə
növbədənkənar oraya soxulmaq cəhdi və sair bu kimi hallar, ümumilikdə hüquq
mədəniyyətinin aşağı olmasından qaynaqlanır. Belə bir mühitdə, sadəcə cərimələr
hesabına vətəndaşları, o cümlədən piyadaları yüksək intizamlı edə bilmərik.
Ümumilikdə, cəmiyyətimizdə sosial dəyərlərə yanaşmaların müsbət istiqamətə
dəyişməsi üçün müvafiq işlər görməli, təbliğat, maarifləndirmə işləri
aparmalıyıq. Bu işə yaxşı nümunələrlə ailədən, bağçadan, məktəbdən,
universitetdən başlamaq lazımdır. Çünki valideynlərinin, müəlliminin ictimai
qaydalara biganəliyini görən uşaq, yeniyetmə böyüyəndə eyni əməli təkrarlayacaq
və onu yalnız cərimələrlə islah etmək mümkün olmayacaq. Ona görə də, sosial
dəyərləri dəyişmək, dünyagörüşü artırmaq vacibdir. Bu istiqamətdə işlər görmək
lazımdır”.
Bəşəriyyət
üçün ağır itki
Sonda qeyd edək ki, yollarda baş verən hadisələr
nəticəsində dünyada hər il 1,3 milyon insan həyatını itirir, 50 milyona qədər
insan xəsarət alır. "Davamlı İnkişafa Doğru” İctimai Birliyinin 2017-ci ildə
nəşr etdirdiyi "Yol mədəniyyəti həyatımızın qarantıdır” adlı nəşrdə göstərilib
ki, yol-nəqliyyat qəzaları dünyada 15-29 yaşlı insanların əsas ölüm
səbəblərindən biridir. Hər il 25 yaşadək 400 000 gənc yol-nəqliyyat qəzaları
zamanı dünyasını dəyişir ki, bu da gündə təxminən 1000 nəfər deməkdir.
Proqnozlara görə, 2030-cu ilədək yol-nəqliyyat qəzaları nəticəsində baş verən
ölüm halları 5-ci yerdə olacaq və hər il 2,4 milyon insanın həyatına son
qoyacaq. Planetimizdə 15-44 yaşda dünyasını dəyişənlərin 25%-i yol qəzalarında
həlak olanlardır. Yol-nəqliyyat hadisələri nəticəsində sağlam insanların
faciəvi şəkildə həlak olması bəşəriyyət üçün ağır itkidir.
Rufik
İSMAYILOV
Foto: Tapdıq
Abdullayev/ Global Media Groupvə Firudin Səlimov / Global Media
Group