“Yesterday”in premyerasında canlı konsert
Dünən "Park Cinema Metropark”da keçirilən
"Yesterday” filminin press-nümayişində "Park Cinema” qonaqlara əsl konsert təşkil etmişdi. Filmi izləməyə gələnlər üçün Orxan
Musayev və "Meredian”
qrupunun ifasında əfsanəvi
"Bitlz” qrupunun nəğmələri səsləndi.
Premyeradan
qabaq canlı konsertin keçirilməsi təsadüfi deyil. Çünki filmin özü Londondan olan sadə
küçə müğənnisindən
bəhs edir. O, yoldan ötüb keçənlər üçün oxumaqla pul qazanırdı. Amma günlərin bir günü bir saatın
içində Liverpul "dördlüyü”nün – "Bitlz”in məşhur hitlərini
oxumaqla məşhurlaşdı. Məlum olur ki, ondan başqa dünyada heç kim "Bitlz”i
xatırlamır. Bundan istifadə edən baş qəhrəman "Yesterday”, "Let İt Be”, "All My
Loving”, "Long Tall Sally” və "Hey Jude” mahnılarını oxumaqla dünya şöhrəti qazanır. Tamaşaçılar filmi çox bəyəndilər. "Yesterday” 19
sentyabrdan etibarən "Park Cinema” Kinoteatrlar Şəbəkəsində nümayişdə olacaq.
Amma bununla belə "Park Cinema” təkcə "bitl”lərlə məhdudlaşmağa
hazırlaşmır. Oktyabr həm Şəbəkə, həm də onun tamaşaçıları üçün çox məzmunlu
olacaq. Oktyabrın 1-də rejissor Kamran Ağabalayevin "Ağacdələn” filminin təqdimatı
keçiriləcək. Oktyabrın 2-dən 10-a qədər isə Avropa Filmləri Festivalı,
oktyabrın 3-də isə yeni "Coker” filminin xüsusi nümayişi baş tutacaq.